| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
11. සඞ්‌කවාසුත්‌තවණ්‌ණනා
11. Saṅkavāsuttavaṇṇanā
92. එකාදසමෙ සඞ්‌කවා නාම කොසලානං නිගමොති සඞ්‌කවාති එවංනාමකො කොසලරට්‌ඨෙ නිගමො. ආවාසිකොති භාරහාරො නවෙ ආවාසෙ සමුට්‌ඨාපෙති, පුරාණෙ පටිජග්‌ගති. සික්‌ඛාපදපටිසංයුත්‌තායාති සික්‌ඛාසඞ්‌ඛාතෙහි පදෙහි පටිසංයුත්‌තාය, තීහි සික්‌ඛාහි සමන්‌නාගතායාති අත්‌ථො. සන්‌දස්‌සෙතීති සම්‌මුඛෙ විය කත්‌වා දස්‌සෙති. සමාදපෙතීති ගණ්‌හාපෙති. සමුත්‌තෙජෙතීති සමුස්‌සාහෙති. සම්‌පහංසෙතීති පටිලද්‌ධගුණෙහි වණ්‌ණං කථෙන්‌තො වොදාපෙති. අධිසල්‌ලිඛතෙති අතිවිය සල්‌ලිඛති, අතිවිය සල්‌ලිඛිතං කත්‌වා සණ්‌හං සණ්‌හං කථෙතීති අත්‌ථො.
92. Ekādasame saṅkavā nāma kosalānaṃ nigamoti saṅkavāti evaṃnāmako kosalaraṭṭhe nigamo. Āvāsikoti bhārahāro nave āvāse samuṭṭhāpeti, purāṇe paṭijaggati. Sikkhāpadapaṭisaṃyuttāyāti sikkhāsaṅkhātehi padehi paṭisaṃyuttāya, tīhi sikkhāhi samannāgatāyāti attho. Sandassetīti sammukhe viya katvā dasseti. Samādapetīti gaṇhāpeti. Samuttejetīti samussāheti. Sampahaṃsetīti paṭiladdhaguṇehi vaṇṇaṃ kathento vodāpeti. Adhisallikhateti ativiya sallikhati, ativiya sallikhitaṃ katvā saṇhaṃ saṇhaṃ kathetīti attho.
අච්‌චයොති අපරාධො. මං අච්‌චගමාති මං අතික්‌කම්‌ම අධිභවිත්‌වා පවත්‌තො. අහුදෙව අක්‌ඛන්‌තීති අහොසියෙව අනධිවාසනා. අහු අප්‌පච්‌චයොති අහොසි අතුට්‌ඨාකාරො. පටිග්‌ගණ්‌හාතූති ඛමතු. ආයතිං සංවරායාති අනාගතෙ සංවරත්‌ථාය, පුන එවරූපස්‌ස අපරාධස්‌ස දොසස්‌ස ඛලිතස්‌ස වා අකරණත්‌ථායාති අත්‌ථො. තග්‌ඝාති එකංසෙන. යථාධම්‌මං පටිකරොසීති යථා ධම්‌මො ඨිතො, තථා කරොසි, ඛමාපෙසීති වුත්‌තං හොති. තං තෙ මයං පටිග්‌ගණ්‌හාමාති තං තව අපරාධං මයං ඛමාම. වුද්‌ධිහෙසා, කස්‌සප, අරියස්‌ස විනයෙති එසා කස්‌සප බුද්‌ධස්‌ස භගවතො සාසනෙ වුද්‌ධි නාම. කතමා? යායං අච්‌චයං අච්‌චයතො දිස්‌වා යථාධම්‌මං පටිකරිත්‌වා ආයතිං සංවරාපජ්‌ජනා. දෙසනං පන පුග්‌ගලාධිට්‌ඨානං කරොන්‌තො ‘‘යො අච්‌චයං අච්‌චයතො දිස්‌වා යථාධම්‌මං පටිකරොති, ආයතිං සංවරං ආපජ්‌ජතී’’ති ආහ. න සික්‌ඛාකාමොති තිස්‌සො සික්‌ඛා න කාමෙති න පත්‌ථෙති න පිහෙති. සික්‌ඛාසමාදානස්‌සාති සික්‌ඛාපරිපූරණස්‌ස. න වණ්‌ණවාදීති ගුණං න කථෙති. කාලෙනාති යුත්‌තප්‌පයුත්‌තකාලෙන. සෙසමෙත්‌ථ උත්‌තානත්‌ථමෙවාති.
Accayoti aparādho. Maṃ accagamāti maṃ atikkamma adhibhavitvā pavatto. Ahudeva akkhantīti ahosiyeva anadhivāsanā. Ahu appaccayoti ahosi atuṭṭhākāro. Paṭiggaṇhātūti khamatu. Āyatiṃ saṃvarāyāti anāgate saṃvaratthāya, puna evarūpassa aparādhassa dosassa khalitassa vā akaraṇatthāyāti attho. Tagghāti ekaṃsena. Yathādhammaṃ paṭikarosīti yathā dhammo ṭhito, tathā karosi, khamāpesīti vuttaṃ hoti. Taṃ te mayaṃ paṭiggaṇhāmāti taṃ tava aparādhaṃ mayaṃ khamāma. Vuddhihesā, kassapa, ariyassa vinayeti esā kassapa buddhassa bhagavato sāsane vuddhi nāma. Katamā? Yāyaṃ accayaṃ accayato disvā yathādhammaṃ paṭikaritvā āyatiṃ saṃvarāpajjanā. Desanaṃ pana puggalādhiṭṭhānaṃ karonto ‘‘yo accayaṃ accayato disvā yathādhammaṃ paṭikaroti, āyatiṃ saṃvaraṃ āpajjatī’’ti āha. Na sikkhākāmoti tisso sikkhā na kāmeti na pattheti na piheti. Sikkhāsamādānassāti sikkhāparipūraṇassa. Na vaṇṇavādīti guṇaṃ na katheti. Kālenāti yuttappayuttakālena. Sesamettha uttānatthamevāti.
සමණවග්‌ගො චතුත්‌ථො.
Samaṇavaggo catuttho.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 11. සඞ්‌කවාසුත්‌තං • 11. Saṅkavāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 11. සඞ්‌කවාසුත්‌තවණ්‌ණනා • 11. Saṅkavāsuttavaṇṇanā
