| Library / Tipiṭaka / तिपिटक • Tipiṭaka / जातक-अट्ठकथा • Jātaka-aṭṭhakathā |
[६०] १०. सङ्खधमजातकवण्णना
[60] 10. Saṅkhadhamajātakavaṇṇanā
धमे धमेति इदं सत्था जेतवने विहरन्तो दुब्बचमेवारब्भ कथेसि।
Dhamedhameti idaṃ satthā jetavane viharanto dubbacamevārabbha kathesi.
अतीते बाराणसियं ब्रह्मदत्ते रज्जं कारेन्ते बोधिसत्तो सङ्खधमककुले निब्बत्तित्वा बाराणसियं नक्खत्ते घुट्ठे पितरं आदाय सङ्खधमनकम्मेन धनं लभित्वा आगमनकाले चोराटवियं पितरं निरन्तरं सङ्खं धमन्तं वारेसि। सो ‘‘सङ्खसद्देन चोरे पलापेस्सामी’’ति निरन्तरमेव धमि, चोरा पुरिमनयेनेव आगन्त्वा विलुम्पिंसु। बोधिसत्तो पुरिमनयेनेव गाथं अभासि –
Atīte bārāṇasiyaṃ brahmadatte rajjaṃ kārente bodhisatto saṅkhadhamakakule nibbattitvā bārāṇasiyaṃ nakkhatte ghuṭṭhe pitaraṃ ādāya saṅkhadhamanakammena dhanaṃ labhitvā āgamanakāle corāṭaviyaṃ pitaraṃ nirantaraṃ saṅkhaṃ dhamantaṃ vāresi. So ‘‘saṅkhasaddena core palāpessāmī’’ti nirantarameva dhami, corā purimanayeneva āgantvā vilumpiṃsu. Bodhisatto purimanayeneva gāthaṃ abhāsi –
६०.
60.
‘‘धमे धमे नातिधमे, अतिधन्तञ्हि पापकं।
‘‘Dhame dhame nātidhame, atidhantañhi pāpakaṃ;
धन्तेनाधिगता भोगा, ते तातो विधमी धम’’न्ति॥
Dhantenādhigatā bhogā, te tāto vidhamī dhama’’nti.
तत्थ ते तातो विधमी धमन्ति ते सङ्खं धमित्वा लद्धभोगे मम पिता पुनप्पुनं धमन्तो विधमि विद्धंसेसि विनासेसीति।
Tattha te tāto vidhamī dhamanti te saṅkhaṃ dhamitvā laddhabhoge mama pitā punappunaṃ dhamanto vidhami viddhaṃsesi vināsesīti.
सत्था इमं धम्मदेसनं आहरित्वा अनुसन्धिं घटेत्वा जातकं समोधानेसि – ‘‘तदा पिता दुब्बचभिक्खु अहोसि, पुत्तो पनस्स अहमेव अहोसि’’न्ति।
Satthā imaṃ dhammadesanaṃ āharitvā anusandhiṃ ghaṭetvā jātakaṃ samodhānesi – ‘‘tadā pitā dubbacabhikkhu ahosi, putto panassa ahameva ahosi’’nti.
सङ्खधमजातकवण्णना दसमा।
Saṅkhadhamajātakavaṇṇanā dasamā.
आसीसवग्गो छट्ठो।
Āsīsavaggo chaṭṭho.
तस्सुद्दानं –
Tassuddānaṃ –
महासीलवजनकं, पुण्णपाति च किंफलं।
Mahāsīlavajanakaṃ, puṇṇapāti ca kiṃphalaṃ;
पञ्चावुधकञ्चनक्खन्धं, वानरिन्दं तयोधम्मं।
Pañcāvudhakañcanakkhandhaṃ, vānarindaṃ tayodhammaṃ;
भेरिवादसङ्खधमन्ति॥
Bherivādasaṅkhadhamanti.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / जातकपाळि • Jātakapāḷi / ६०. सङ्खधमजातकं • 60. Saṅkhadhamajātakaṃ
