| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. ஸங்க²த⁴மஸுத்தவண்ணனா
8. Saṅkhadhamasuttavaṇṇanā
360. அட்ட²மே யங்ப³ஹுலங் யங்ப³ஹுலந்தி இமினா நிக³ண்டோ² அத்தனாவ அத்தனோ வாத³ங் பி⁴ந்த³தி. தஸ்மா ப⁴க³வா ஏவங் ஸந்தே ந கோசி ஆபாயிகோதிஆதி³மாஹ. புரிமானி பன சத்தாரி பதா³னி தி³ட்டி²யா பச்சயா ஹொந்தி. தஸ்மா தேஸுபி ஆதீ³னவங் த³ஸ்ஸெந்தோ இத⁴, கா³மணி, ஏகச்சோ ஸத்தா² ஏவங்வாதீ³ ஹோதீதிஆதி³மாஹ. தத்த² அஹம்பம்ஹீதி அஹம்பி அம்ஹி.
360. Aṭṭhame yaṃbahulaṃ yaṃbahulanti iminā nigaṇṭho attanāva attano vādaṃ bhindati. Tasmā bhagavā evaṃ sante na koci āpāyikotiādimāha. Purimāni pana cattāri padāni diṭṭhiyā paccayā honti. Tasmā tesupi ādīnavaṃ dassento idha, gāmaṇi, ekacco satthā evaṃvādī hotītiādimāha. Tattha ahampamhīti ahampi amhi.
மெத்தாஸஹக³தேனாதிஆதீ³ஸு யங் வத்தப்³ப³ங், தங் ஸப்³ப³ங் ஸத்³தி⁴ங் பா⁴வனானயேன விஸுத்³தி⁴மக்³கே³ வுத்தமேவ. ஸெய்யதா²பி, கா³மணி, ப³லவா ஸங்க²த⁴மோதிஆதி³ பன இத⁴ அபுப்³ப³ங். தத்த² ப³லவாதி ப³லஸம்பன்னோ. ஸங்க²த⁴மோதி ஸங்க²த⁴மகோ. அப்பகஸிரேனாதி அகிச்சே²ன அது³க்கே²ன. து³ப்³ப³லோ ஹி ஸங்க²த⁴மோ ஸங்க²ங் த⁴மந்தோபி ந ஸக்கோதி சதஸ்ஸோ தி³ஸா ஸரேன விஞ்ஞாபேதுங், நாஸ்ஸ ஸங்க²ஸத்³தோ³ ஸப்³ப³தோ ப²ரதி, ப³லவதோ பன விப்பா²ரிகோ ஹோதி, தஸ்மா ‘‘ப³லவா’’தி ஆஹ.
Mettāsahagatenātiādīsu yaṃ vattabbaṃ, taṃ sabbaṃ saddhiṃ bhāvanānayena visuddhimagge vuttameva. Seyyathāpi, gāmaṇi, balavā saṅkhadhamotiādi pana idha apubbaṃ. Tattha balavāti balasampanno. Saṅkhadhamoti saṅkhadhamako. Appakasirenāti akicchena adukkhena. Dubbalo hi saṅkhadhamo saṅkhaṃ dhamantopi na sakkoti catasso disā sarena viññāpetuṃ, nāssa saṅkhasaddo sabbato pharati, balavato pana vipphāriko hoti, tasmā ‘‘balavā’’ti āha.
மெத்தாய சேதோவிமுத்தியாதி எத்த² ‘‘மெத்தா’’தி வுத்தே உபசாரோபி அப்பனாபி வட்டதி, ‘‘சேதோவிமுத்தீ’’தி வுத்தே பன அப்பனாவ வட்டதி. யங் பமாணகதங் கம்மந்தி பமாணகதங் கம்மங் நாம காமாவசரங் வுச்சதி, அப்பமாணகதங் கம்மங் நாம ரூபாவசரங். தஞ்ஹி பமாணங் அதிக்கமித்வா ஓதி⁴ஸகஅனோதி⁴ஸகதி³ஸாப²ரணவஸேன வட்³டெ⁴த்வா கதத்தா அப்பமாணகதந்தி வுச்சதி.
Mettāya cetovimuttiyāti ettha ‘‘mettā’’ti vutte upacāropi appanāpi vaṭṭati, ‘‘cetovimuttī’’ti vutte pana appanāva vaṭṭati. Yaṃ pamāṇakataṃ kammanti pamāṇakataṃ kammaṃ nāma kāmāvacaraṃ vuccati, appamāṇakataṃ kammaṃ nāma rūpāvacaraṃ. Tañhi pamāṇaṃ atikkamitvā odhisakaanodhisakadisāpharaṇavasena vaḍḍhetvā katattā appamāṇakatanti vuccati.
ந தங் தத்ராவஸிஸ்ஸதி, ந தங் தத்ராவதிட்ட²தீதி தங் காமாவசரகம்மங் தஸ்மிங் ரூபாரூபாவசரகம்மே ந ஓஹீயதி ந திட்ட²தி. கிங் வுத்தங் ஹோதி? தங் காமாவசரகம்மங் தஸ்ஸ ரூபாரூபாவசரகம்மஸ்ஸ அந்தரா லக்³கி³துங் வா டா²துங் வா ரூபாரூபாவசரகம்மங் ப²ரித்வா பரியாதி³யித்வா அத்தனோ ஓகாஸங் க³ஹெத்வா பதிட்டா²துங் வா ந ஸக்கோதி. அத² கோ² ரூபாரூபாவசரகம்மமேவ காமாவசரங் மஹோகோ⁴ விய பரித்தங் உத³கங் ப²ரித்வா பரியாதி³யித்வா அத்தனோ ஓகாஸங் கத்வா திட்ட²தி, தஸ்ஸ விபாகங் படிபா³ஹித்வா ஸயமேவ ப்³ரஹ்மஸஹப்³யதங் உபனேதீதி. இதி இத³ங் ஸுத்தங் ஆதி³ம்ஹி கிலேஸவஸேன வுட்டா²ய அவஸானே ப்³ரஹ்மவிஹாரவஸேன க³ஹிதத்தா யதா²னுஸந்தி⁴னாவ க³தங்.
Na taṃ tatrāvasissati, na taṃ tatrāvatiṭṭhatīti taṃ kāmāvacarakammaṃ tasmiṃ rūpārūpāvacarakamme na ohīyati na tiṭṭhati. Kiṃ vuttaṃ hoti? Taṃ kāmāvacarakammaṃ tassa rūpārūpāvacarakammassa antarā laggituṃ vā ṭhātuṃ vā rūpārūpāvacarakammaṃ pharitvā pariyādiyitvā attano okāsaṃ gahetvā patiṭṭhātuṃ vā na sakkoti. Atha kho rūpārūpāvacarakammameva kāmāvacaraṃ mahogho viya parittaṃ udakaṃ pharitvā pariyādiyitvā attano okāsaṃ katvā tiṭṭhati, tassa vipākaṃ paṭibāhitvā sayameva brahmasahabyataṃ upanetīti. Iti idaṃ suttaṃ ādimhi kilesavasena vuṭṭhāya avasāne brahmavihāravasena gahitattā yathānusandhināva gataṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. ஸங்க²த⁴மஸுத்தங் • 8. Saṅkhadhamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. ஸங்க²த⁴மஸுத்தவண்ணனா • 8. Saṅkhadhamasuttavaṇṇanā
