| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৮. সঙ্খধমসুত্তৰণ্ণনা
8. Saṅkhadhamasuttavaṇṇanā
৩৬০. অট্ঠমে যংবহুলং যংবহুলন্তি ইমিনা নিগণ্ঠো অত্তনাৰ অত্তনো ৰাদং ভিন্দতি। তস্মা ভগৰা এৰং সন্তে ন কোচি আপাযিকোতিআদিমাহ। পুরিমানি পন চত্তারি পদানি দিট্ঠিযা পচ্চযা হোন্তি। তস্মা তেসুপি আদীনৰং দস্সেন্তো ইধ, গামণি, একচ্চো সত্থা এৰংৰাদী হোতীতিআদিমাহ। তত্থ অহম্পম্হীতি অহম্পি অম্হি।
360. Aṭṭhame yaṃbahulaṃ yaṃbahulanti iminā nigaṇṭho attanāva attano vādaṃ bhindati. Tasmā bhagavā evaṃ sante na koci āpāyikotiādimāha. Purimāni pana cattāri padāni diṭṭhiyā paccayā honti. Tasmā tesupi ādīnavaṃ dassento idha, gāmaṇi, ekacco satthā evaṃvādī hotītiādimāha. Tattha ahampamhīti ahampi amhi.
মেত্তাসহগতেনাতিআদীসু যং ৰত্তব্বং, তং সব্বং সদ্ধিং ভাৰনানযেন ৰিসুদ্ধিমগ্গে ৰুত্তমেৰ। সেয্যথাপি, গামণি, বলৰা সঙ্খধমোতিআদি পন ইধ অপুব্বং। তত্থ বলৰাতি বলসম্পন্নো। সঙ্খধমোতি সঙ্খধমকো। অপ্পকসিরেনাতি অকিচ্ছেন অদুক্খেন। দুব্বলো হি সঙ্খধমো সঙ্খং ধমন্তোপি ন সক্কোতি চতস্সো দিসা সরেন ৰিঞ্ঞাপেতুং, নাস্স সঙ্খসদ্দো সব্বতো ফরতি, বলৰতো পন ৰিপ্ফারিকো হোতি, তস্মা ‘‘বলৰা’’তি আহ।
Mettāsahagatenātiādīsu yaṃ vattabbaṃ, taṃ sabbaṃ saddhiṃ bhāvanānayena visuddhimagge vuttameva. Seyyathāpi, gāmaṇi, balavā saṅkhadhamotiādi pana idha apubbaṃ. Tattha balavāti balasampanno. Saṅkhadhamoti saṅkhadhamako. Appakasirenāti akicchena adukkhena. Dubbalo hi saṅkhadhamo saṅkhaṃ dhamantopi na sakkoti catasso disā sarena viññāpetuṃ, nāssa saṅkhasaddo sabbato pharati, balavato pana vipphāriko hoti, tasmā ‘‘balavā’’ti āha.
মেত্তায চেতোৰিমুত্তিযাতি এত্থ ‘‘মেত্তা’’তি ৰুত্তে উপচারোপি অপ্পনাপি ৰট্টতি, ‘‘চেতোৰিমুত্তী’’তি ৰুত্তে পন অপ্পনাৰ ৰট্টতি। যং পমাণকতং কম্মন্তি পমাণকতং কম্মং নাম কামাৰচরং ৰুচ্চতি, অপ্পমাণকতং কম্মং নাম রূপাৰচরং। তঞ্হি পমাণং অতিক্কমিত্ৰা ওধিসকঅনোধিসকদিসাফরণৰসেন ৰড্ঢেত্ৰা কতত্তা অপ্পমাণকতন্তি ৰুচ্চতি।
Mettāya cetovimuttiyāti ettha ‘‘mettā’’ti vutte upacāropi appanāpi vaṭṭati, ‘‘cetovimuttī’’ti vutte pana appanāva vaṭṭati. Yaṃ pamāṇakataṃ kammanti pamāṇakataṃ kammaṃ nāma kāmāvacaraṃ vuccati, appamāṇakataṃ kammaṃ nāma rūpāvacaraṃ. Tañhi pamāṇaṃ atikkamitvā odhisakaanodhisakadisāpharaṇavasena vaḍḍhetvā katattā appamāṇakatanti vuccati.
ন তং তত্রাৰসিস্সতি, ন তং তত্রাৰতিট্ঠতীতি তং কামাৰচরকম্মং তস্মিং রূপারূপাৰচরকম্মে ন ওহীযতি ন তিট্ঠতি। কিং ৰুত্তং হোতি? তং কামাৰচরকম্মং তস্স রূপারূপাৰচরকম্মস্স অন্তরা লগ্গিতুং ৰা ঠাতুং ৰা রূপারূপাৰচরকম্মং ফরিত্ৰা পরিযাদিযিত্ৰা অত্তনো ওকাসং গহেত্ৰা পতিট্ঠাতুং ৰা ন সক্কোতি। অথ খো রূপারূপাৰচরকম্মমেৰ কামাৰচরং মহোঘো ৰিয পরিত্তং উদকং ফরিত্ৰা পরিযাদিযিত্ৰা অত্তনো ওকাসং কত্ৰা তিট্ঠতি, তস্স ৰিপাকং পটিবাহিত্ৰা সযমেৰ ব্রহ্মসহব্যতং উপনেতীতি। ইতি ইদং সুত্তং আদিম্হি কিলেসৰসেন ৰুট্ঠায অৰসানে ব্রহ্মৰিহারৰসেন গহিতত্তা যথানুসন্ধিনাৰ গতং।
Na taṃ tatrāvasissati, na taṃ tatrāvatiṭṭhatīti taṃ kāmāvacarakammaṃ tasmiṃ rūpārūpāvacarakamme na ohīyati na tiṭṭhati. Kiṃ vuttaṃ hoti? Taṃ kāmāvacarakammaṃ tassa rūpārūpāvacarakammassa antarā laggituṃ vā ṭhātuṃ vā rūpārūpāvacarakammaṃ pharitvā pariyādiyitvā attano okāsaṃ gahetvā patiṭṭhātuṃ vā na sakkoti. Atha kho rūpārūpāvacarakammameva kāmāvacaraṃ mahogho viya parittaṃ udakaṃ pharitvā pariyādiyitvā attano okāsaṃ katvā tiṭṭhati, tassa vipākaṃ paṭibāhitvā sayameva brahmasahabyataṃ upanetīti. Iti idaṃ suttaṃ ādimhi kilesavasena vuṭṭhāya avasāne brahmavihāravasena gahitattā yathānusandhināva gataṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৮. সঙ্খধমসুত্তং • 8. Saṅkhadhamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৮. সঙ্খধমসুত্তৰণ্ণনা • 8. Saṅkhadhamasuttavaṇṇanā
