| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੪. ਸਙ੍ਖਾਰਜਾਯਮਾਨਪਞ੍ਹੋ
4. Saṅkhārajāyamānapañho
੪. ਰਾਜਾ ਆਹ ‘‘ਭਨ੍ਤੇ ਨਾਗਸੇਨ, ਅਤ੍ਥਿ ਕੇਚਿ ਸਙ੍ਖਾਰਾ, ਯੇ ਜਾਯਨ੍ਤੀ’’ਤਿ? ‘‘ਆਮ, ਮਹਾਰਾਜ, ਅਤ੍ਥਿ ਸਙ੍ਖਾਰਾ, ਯੇ ਜਾਯਨ੍ਤੀ’’ਤਿ। ‘‘ਕਤਮੇ ਤੇ, ਭਨ੍ਤੇ’’ਤਿ? ‘‘ਚਕ੍ਖੁਸ੍ਮਿਞ੍ਚ ਖੋ, ਮਹਾਰਾਜ, ਸਤਿ ਰੂਪੇਸੁ ਚ ਚਕ੍ਖੁવਿਞ੍ਞਾਣਂ ਹੋਤਿ, ਚਕ੍ਖੁવਿਞ੍ਞਾਣੇ ਸਤਿ ਚਕ੍ਖੁਸਮ੍ਫਸ੍ਸੋ ਹੋਤਿ, ਚਕ੍ਖੁਸਮ੍ਫਸ੍ਸੇ ਸਤਿ વੇਦਨਾ ਹੋਤਿ, વੇਦਨਾਯ ਸਤਿ ਤਣ੍ਹਾ ਹੋਤਿ, ਤਣ੍ਹਾਯ ਸਤਿ ਉਪਾਦਾਨਂ ਹੋਤਿ, ਉਪਾਦਾਨੇ ਸਤਿ ਭવੋ ਹੋਤਿ, ਭવੇ ਸਤਿ ਜਾਤਿ ਹੋਤਿ, ਜਾਤਿਯਾ ਸਤਿ ਜਰਾਮਰਣਂ ਸੋਕਪਰਿਦੇવਦੁਕ੍ਖਦੋਮਨਸ੍ਸੁਪਾਯਾਸਾ ਸਮ੍ਭવਨ੍ਤਿ, ਏવਮੇਤਸ੍ਸ ਕੇવਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤਿ। ਚਕ੍ਖੁਸ੍ਮਿਞ੍ਚ ਖੋ, ਮਹਾਰਾਜ, ਅਸਤਿ ਰੂਪੇਸੁ ਚ ਅਸਤਿ ਚਕ੍ਖੁવਿਞ੍ਞਾਣਂ ਨ ਹੋਤਿ, ਚਕ੍ਖੁવਿਞ੍ਞਾਣੇ ਅਸਤਿ ਚਕ੍ਖੁਸਮ੍ਫਸ੍ਸੋ ਨ ਹੋਤਿ, ਚਕ੍ਖੁਸਮ੍ਫਸ੍ਸੇ ਅਸਤਿ વੇਦਨਾ ਨ ਹੋਤਿ, વੇਦਨਾਯ ਅਸਤਿ ਤਣ੍ਹਾ ਨ ਹੋਤਿ, ਤਣ੍ਹਾਯ ਅਸਤਿ ਉਪਾਦਾਨਂ ਨ ਹੋਤਿ, ਉਪਾਦਾਨੇ ਅਸਤਿ ਭવੋ ਨ ਹੋਤਿ, ਭવੇ ਅਸਤਿ ਜਾਤਿ ਨ ਹੋਤਿ, ਜਾਤਿਯਾ ਅਸਤਿ ਜਰਾਮਰਣਂ ਸੋਕਪਰਿਦੇવਦੁਕ੍ਖਦੋਮਨਸ੍ਸੁਪਾਯਾਸਾ ਨ ਹੋਨ੍ਤਿ, ਏવਮੇਤਸ੍ਸ ਕੇવਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀ’’ਤਿ।
4. Rājā āha ‘‘bhante nāgasena, atthi keci saṅkhārā, ye jāyantī’’ti? ‘‘Āma, mahārāja, atthi saṅkhārā, ye jāyantī’’ti. ‘‘Katame te, bhante’’ti? ‘‘Cakkhusmiñca kho, mahārāja, sati rūpesu ca cakkhuviññāṇaṃ hoti, cakkhuviññāṇe sati cakkhusamphasso hoti, cakkhusamphasse sati vedanā hoti, vedanāya sati taṇhā hoti, taṇhāya sati upādānaṃ hoti, upādāne sati bhavo hoti, bhave sati jāti hoti, jātiyā sati jarāmaraṇaṃ sokaparidevadukkhadomanassupāyāsā sambhavanti, evametassa kevalassa dukkhakkhandhassa samudayo hoti. Cakkhusmiñca kho, mahārāja, asati rūpesu ca asati cakkhuviññāṇaṃ na hoti, cakkhuviññāṇe asati cakkhusamphasso na hoti, cakkhusamphasse asati vedanā na hoti, vedanāya asati taṇhā na hoti, taṇhāya asati upādānaṃ na hoti, upādāne asati bhavo na hoti, bhave asati jāti na hoti, jātiyā asati jarāmaraṇaṃ sokaparidevadukkhadomanassupāyāsā na honti, evametassa kevalassa dukkhakkhandhassa nirodho hotī’’ti.
‘‘ਕਲ੍ਲੋਸਿ, ਭਨ੍ਤੇ ਨਾਗਸੇਨਾ’’ਤਿ।
‘‘Kallosi, bhante nāgasenā’’ti.
ਸਙ੍ਖਾਰਜਾਯਮਾਨਪਞ੍ਹੋ ਚਤੁਤ੍ਥੋ।
Saṅkhārajāyamānapañho catuttho.
