| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၃. သင္ခာရသုတ္တံ
3. Saṅkhārasuttaṃ
၂၃. ‘‘တယောမေ, ဘိက္ခဝေ, ပုဂ္ဂလာ သန္တော သံဝိဇ္ဇမာနာ လောကသ္မိံ။ ကတမေ တယော? ဣဓ, ဘိက္ခဝေ, ဧကစ္စော ပုဂ္ဂလော သဗ္ယာဗဇ္ဈံ 1 ကာယသင္ခာရံ အဘိသင္ခရောတိ, သဗ္ယာဗဇ္ဈံ ဝစီသင္ခာရံ အဘိသင္ခရောတိ, သဗ္ယာဗဇ္ဈံ မနောသင္ခာရံ အဘိသင္ခရောတိ။ သော သဗ္ယာဗဇ္ဈံ ကာယသင္ခာရံ အဘိသင္ခရိတ္ဝာ, သဗ္ယာဗဇ္ဈံ ဝစီသင္ခာရံ အဘိသင္ခရိတ္ဝာ, သဗ္ယာဗဇ္ဈံ မနောသင္ခာရံ အဘိသင္ခရိတ္ဝာ သဗ္ယာဗဇ္ဈံ လောကံ ဥပပဇ္ဇတိ။ တမေနံ သဗ္ယာဗဇ္ဈံ လောကံ ဥပပန္နံ သမာနံ သဗ္ယာဗဇ္ဈာ ဖသ္သာ ဖုသန္တိ။ သော သဗ္ယာဗဇ္ဈေဟိ ဖသ္သေဟိ ဖုဋ္ဌော သမာနော သဗ္ယာဗဇ္ဈံ ဝေဒနံ ဝေဒယတိ ဧကန္တဒုက္ခံ, သေယ္ယထာပိ သတ္တာ နေရယိကာ။
23. ‘‘Tayome, bhikkhave, puggalā santo saṃvijjamānā lokasmiṃ. Katame tayo? Idha, bhikkhave, ekacco puggalo sabyābajjhaṃ 2 kāyasaṅkhāraṃ abhisaṅkharoti, sabyābajjhaṃ vacīsaṅkhāraṃ abhisaṅkharoti, sabyābajjhaṃ manosaṅkhāraṃ abhisaṅkharoti. So sabyābajjhaṃ kāyasaṅkhāraṃ abhisaṅkharitvā, sabyābajjhaṃ vacīsaṅkhāraṃ abhisaṅkharitvā, sabyābajjhaṃ manosaṅkhāraṃ abhisaṅkharitvā sabyābajjhaṃ lokaṃ upapajjati. Tamenaṃ sabyābajjhaṃ lokaṃ upapannaṃ samānaṃ sabyābajjhā phassā phusanti. So sabyābajjhehi phassehi phuṭṭho samāno sabyābajjhaṃ vedanaṃ vedayati ekantadukkhaṃ, seyyathāpi sattā nerayikā.
‘‘ဣဓ ပန, ဘိက္ခဝေ, ဧကစ္စော ပုဂ္ဂလော အဗ္ယာဗဇ္ဈံ ကာယသင္ခာရံ အဘိသင္ခရောတိ, အဗ္ယာဗဇ္ဈံ ဝစီသင္ခာရံ အဘိသင္ခရောတိ, အဗ္ယာဗဇ္ဈံ မနောသင္ခာရံ အဘိသင္ခရောတိ။ သော အဗ္ယာဗဇ္ဈံ ကာယသင္ခာရံ အဘိသင္ခရိတ္ဝာ, အဗ္ယာဗဇ္ဈံ ဝစီသင္ခာရံ အဘိသင္ခရိတ္ဝာ, အဗ္ယာဗဇ္ဈံ မနောသင္ခာရံ အဘိသင္ခရိတ္ဝာ အဗ္ယာဗဇ္ဈံ လောကံ ဥပပဇ္ဇတိ။ တမေနံ အဗ္ယာဗဇ္ဈံ လောကံ ဥပပန္နံ သမာနံ အဗ္ယာဗဇ္ဈာ ဖသ္သာ ဖုသန္တိ။ သော အဗ္ယာဗဇ္ဈေဟိ ဖသ္သေဟိ ဖုဋ္ဌော သမာနော အဗ္ယာဗဇ္ဈံ ဝေဒနံ ဝေဒယတိ ဧကန္တသုခံ, သေယ္ယထာပိ ဒေဝာ သုဘကိဏ္ဟာ။
‘‘Idha pana, bhikkhave, ekacco puggalo abyābajjhaṃ kāyasaṅkhāraṃ abhisaṅkharoti, abyābajjhaṃ vacīsaṅkhāraṃ abhisaṅkharoti, abyābajjhaṃ manosaṅkhāraṃ abhisaṅkharoti. So abyābajjhaṃ kāyasaṅkhāraṃ abhisaṅkharitvā, abyābajjhaṃ vacīsaṅkhāraṃ abhisaṅkharitvā, abyābajjhaṃ manosaṅkhāraṃ abhisaṅkharitvā abyābajjhaṃ lokaṃ upapajjati. Tamenaṃ abyābajjhaṃ lokaṃ upapannaṃ samānaṃ abyābajjhā phassā phusanti. So abyābajjhehi phassehi phuṭṭho samāno abyābajjhaṃ vedanaṃ vedayati ekantasukhaṃ, seyyathāpi devā subhakiṇhā.
‘‘ဣဓ ပန, ဘိက္ခဝေ, ဧကစ္စော ပုဂ္ဂလော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ကာယသင္ခာရံ အဘိသင္ခရောတိ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝစီသင္ခာရံ အဘိသင္ခရောတိ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ မနောသင္ခာရံ အဘိသင္ခရောတိ။ သော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ကာယသင္ခာရံ အဘိသင္ခရိတ္ဝာ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝစီသင္ခာရံ အဘိသင္ခရိတ္ဝာ, သဗ္ယာဗဇ္ဈမ္ပိ အဗ္ယာဗဇ္ဈမ္ပိ မနောသင္ခာရံ အဘိသင္ခရိတ္ဝာ သဗ္ယာဗဇ္ဈမ္ပိ အဗ္ယာဗဇ္ဈမ္ပိ လောကံ ဥပပဇ္ဇတိ။ တမေနံ သဗ္ယာဗဇ္ဈမ္ပိ အဗ္ယာဗဇ္ဈမ္ပိ လောကံ ဥပပန္နံ သမာနံ သဗ္ယာဗဇ္ဈာပိ အဗ္ယာဗဇ္ဈာပိ ဖသ္သာ ဖုသန္တိ။ သော သဗ္ယာဗဇ္ဈေဟိပိ အဗ္ယာဗဇ္ဈေဟိပိ ဖသ္သေဟိ ဖုဋ္ဌော သမာနော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ဝေဒနံ ဝေဒယတိ ဝောကိဏ္ဏသုခဒုက္ခံ, သေယ္ယထာပိ မနုသ္သာ ဧကစ္စေ စ ဒေဝာ ဧကစ္စေ စ ဝိနိပာတိကာ။ ဣမေ ခော, ဘိက္ခဝေ, တယော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ။ တတိယံ။
‘‘Idha pana, bhikkhave, ekacco puggalo sabyābajjhampi abyābajjhampi kāyasaṅkhāraṃ abhisaṅkharoti, sabyābajjhampi abyābajjhampi vacīsaṅkhāraṃ abhisaṅkharoti, sabyābajjhampi abyābajjhampi manosaṅkhāraṃ abhisaṅkharoti. So sabyābajjhampi abyābajjhampi kāyasaṅkhāraṃ abhisaṅkharitvā, sabyābajjhampi abyābajjhampi vacīsaṅkhāraṃ abhisaṅkharitvā, sabyābajjhampi abyābajjhampi manosaṅkhāraṃ abhisaṅkharitvā sabyābajjhampi abyābajjhampi lokaṃ upapajjati. Tamenaṃ sabyābajjhampi abyābajjhampi lokaṃ upapannaṃ samānaṃ sabyābajjhāpi abyābajjhāpi phassā phusanti. So sabyābajjhehipi abyābajjhehipi phassehi phuṭṭho samāno sabyābajjhampi abyābajjhampi vedanaṃ vedayati vokiṇṇasukhadukkhaṃ, seyyathāpi manussā ekacce ca devā ekacce ca vinipātikā. Ime kho, bhikkhave, tayo puggalā santo saṃvijjamānā lokasmi’’nti. Tatiyaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၃. သင္ခာရသုတ္တဝဏ္ဏနာ • 3. Saṅkhārasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃. သင္ခာရသုတ္တဝဏ္ဏနာ • 3. Saṅkhārasuttavaṇṇanā
