| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. ஸங்கா²ரஸுத்தவண்ணனா
3. Saṅkhārasuttavaṇṇanā
23. ததியே விவிதே⁴ஹி ஆகாரேஹி ஆபா³த⁴னதோ ப்³யாபா³தோ⁴வ ப்³யாப³ஜ்ஜ²ங், காயிகங் சேதஸிகஞ்ச து³க்க²ங். ஸஹ ப்³யாப³ஜ்ஜே²ன வத்ததீதி ஸப்³யாப³ஜ்ஜ²ங். தேனாஹ ‘‘ஸது³க்க²’’ந்தி. சேதனாராஸிந்தி புப்³ப³சேதனாதி³ராஸிங். சேதனங் புனப்புனங் பவத்தெந்தோ ‘‘ராஸிங் கரோதி பிண்ட³ங் கரோதீ’’தி ச வுத்தோ. ஸது³க்க²ந்தி நிரந்தரது³க்க²ங். தேனாஹ ‘‘ஸாபா³த⁴ங் நிரஸ்ஸாத³’’ந்தி. அத்தீ²தி உஜுகங் து³க்க²வேத³னா நத்தீ²தி அவத்தப்³ப³த்தா வுத்தங். அனிட்ட²ஸபா⁴வத்தா அனிட்டா²ரம்மணத்தா ச து³க்க²பக்கி²காவ ஸா த³ட்ட²ப்³பா³. ந ஹி அகுஸலவிபாகா இட்டா² நாம அத்தீ², குஸலவிபாகா பன உபெக்கா²வேத³னா தத்த² அப்பாவஸரா. அட்ட²கதா²யங் பன நிரயஸ்ஸ து³க்க²ப³ஹுலத்தா து³க்க²ஸ்ஸ ச தத்த² ப³லவதாய ஸா அப்³போ³ஹாரிகட்டா²னே டி²தாதி வுத்தங். உபமங் கத்வா ஆஹடோ விஸேஸோ விய ஸாமஞ்ஞஸ்ஸ யதா² அயோபிண்டி³ரோஹினோ விய ரூபானந்தி. படிபா⁴க³உபமாதி படிபி³ம்ப³உபமா.
23. Tatiye vividhehi ākārehi ābādhanato byābādhova byābajjhaṃ, kāyikaṃ cetasikañca dukkhaṃ. Saha byābajjhena vattatīti sabyābajjhaṃ. Tenāha ‘‘sadukkha’’nti. Cetanārāsinti pubbacetanādirāsiṃ. Cetanaṃ punappunaṃ pavattento ‘‘rāsiṃ karoti piṇḍaṃ karotī’’ti ca vutto. Sadukkhanti nirantaradukkhaṃ. Tenāha ‘‘sābādhaṃ nirassāda’’nti. Atthīti ujukaṃ dukkhavedanā natthīti avattabbattā vuttaṃ. Aniṭṭhasabhāvattā aniṭṭhārammaṇattā ca dukkhapakkhikāva sā daṭṭhabbā. Na hi akusalavipākā iṭṭhā nāma atthī, kusalavipākā pana upekkhāvedanā tattha appāvasarā. Aṭṭhakathāyaṃ pana nirayassa dukkhabahulattā dukkhassa ca tattha balavatāya sā abbohārikaṭṭhāne ṭhitāti vuttaṃ. Upamaṃ katvā āhaṭo viseso viya sāmaññassa yathā ayopiṇḍirohino viya rūpānanti. Paṭibhāgaupamāti paṭibimbaupamā.
தே அக்³க³ஹெத்வாதி ஹெட்டி²மப்³ரஹ்மலோகே அக்³க³ஹெத்வா. வோமிஸ்ஸகஸுக²து³க்க²ந்தி விமிஸ்ஸகஸுக²து³க்க²ங் பீதிமிஸ்ஸகபா⁴வதோ. கம்மந்தி பாபகம்மங். கம்மஸீஸேன ப²லங் வத³தி. காமஞ்செத்த² ‘‘அப்³யாப³ஜ்ஜ²ங் லோகங் உபபஜ்ஜதீ’’தி ஆக³தங், ‘‘அப்³யாப³ஜ்ஜா² ப²ஸ்ஸா பு²ஸந்தீ’’தி பன வசனேன லோகுத்தரப²ஸ்ஸாபி ஸங்க³ய்ஹந்தீதி ‘‘தீணி ஸுசரிதானி லோகியலோகுத்தரமிஸ்ஸகானி கதி²தானீ’’தி வுத்தங்.
Te aggahetvāti heṭṭhimabrahmaloke aggahetvā. Vomissakasukhadukkhanti vimissakasukhadukkhaṃ pītimissakabhāvato. Kammanti pāpakammaṃ. Kammasīsena phalaṃ vadati. Kāmañcettha ‘‘abyābajjhaṃ lokaṃ upapajjatī’’ti āgataṃ, ‘‘abyābajjhā phassā phusantī’’ti pana vacanena lokuttaraphassāpi saṅgayhantīti ‘‘tīṇi sucaritāni lokiyalokuttaramissakāni kathitānī’’ti vuttaṃ.
ஸங்கா²ரஸுத்தவண்ணனா நிட்டி²தா.
Saṅkhārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. ஸங்கா²ரஸுத்தங் • 3. Saṅkhārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 3. ஸங்கா²ரஸுத்தவண்ணனா • 3. Saṅkhārasuttavaṇṇanā
