| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৩. সঙ্খারসুত্তৰণ্ণনা
3. Saṅkhārasuttavaṇṇanā
২৩. ততিযে ৰিৰিধেহি আকারেহি আবাধনতো ব্যাবাধোৰ ব্যাবজ্ঝং, কাযিকং চেতসিকঞ্চ দুক্খং। সহ ব্যাবজ্ঝেন ৰত্ততীতি সব্যাবজ্ঝং। তেনাহ ‘‘সদুক্খ’’ন্তি। চেতনারাসিন্তি পুব্বচেতনাদিরাসিং। চেতনং পুনপ্পুনং পৰত্তেন্তো ‘‘রাসিং করোতি পিণ্ডং করোতী’’তি চ ৰুত্তো। সদুক্খন্তি নিরন্তরদুক্খং। তেনাহ ‘‘সাবাধং নিরস্সাদ’’ন্তি। অত্থীতি উজুকং দুক্খৰেদনা নত্থীতি অৰত্তব্বত্তা ৰুত্তং। অনিট্ঠসভাৰত্তা অনিট্ঠারম্মণত্তা চ দুক্খপক্খিকাৰ সা দট্ঠব্বা। ন হি অকুসলৰিপাকা ইট্ঠা নাম অত্থী, কুসলৰিপাকা পন উপেক্খাৰেদনা তত্থ অপ্পাৰসরা। অট্ঠকথাযং পন নিরযস্স দুক্খবহুলত্তা দুক্খস্স চ তত্থ বলৰতায সা অব্বোহারিকট্ঠানে ঠিতাতি ৰুত্তং। উপমং কত্ৰা আহটো ৰিসেসো ৰিয সামঞ্ঞস্স যথা অযোপিণ্ডিরোহিনো ৰিয রূপানন্তি। পটিভাগউপমাতি পটিবিম্বউপমা।
23. Tatiye vividhehi ākārehi ābādhanato byābādhova byābajjhaṃ, kāyikaṃ cetasikañca dukkhaṃ. Saha byābajjhena vattatīti sabyābajjhaṃ. Tenāha ‘‘sadukkha’’nti. Cetanārāsinti pubbacetanādirāsiṃ. Cetanaṃ punappunaṃ pavattento ‘‘rāsiṃ karoti piṇḍaṃ karotī’’ti ca vutto. Sadukkhanti nirantaradukkhaṃ. Tenāha ‘‘sābādhaṃ nirassāda’’nti. Atthīti ujukaṃ dukkhavedanā natthīti avattabbattā vuttaṃ. Aniṭṭhasabhāvattā aniṭṭhārammaṇattā ca dukkhapakkhikāva sā daṭṭhabbā. Na hi akusalavipākā iṭṭhā nāma atthī, kusalavipākā pana upekkhāvedanā tattha appāvasarā. Aṭṭhakathāyaṃ pana nirayassa dukkhabahulattā dukkhassa ca tattha balavatāya sā abbohārikaṭṭhāne ṭhitāti vuttaṃ. Upamaṃ katvā āhaṭo viseso viya sāmaññassa yathā ayopiṇḍirohino viya rūpānanti. Paṭibhāgaupamāti paṭibimbaupamā.
তে অগ্গহেত্ৰাতি হেট্ঠিমব্রহ্মলোকে অগ্গহেত্ৰা। ৰোমিস্সকসুখদুক্খন্তি ৰিমিস্সকসুখদুক্খং পীতিমিস্সকভাৰতো। কম্মন্তি পাপকম্মং। কম্মসীসেন ফলং ৰদতি। কামঞ্চেত্থ ‘‘অব্যাবজ্ঝং লোকং উপপজ্জতী’’তি আগতং, ‘‘অব্যাবজ্ঝা ফস্সা ফুসন্তী’’তি পন ৰচনেন লোকুত্তরফস্সাপি সঙ্গয্হন্তীতি ‘‘তীণি সুচরিতানি লোকিযলোকুত্তরমিস্সকানি কথিতানী’’তি ৰুত্তং।
Te aggahetvāti heṭṭhimabrahmaloke aggahetvā. Vomissakasukhadukkhanti vimissakasukhadukkhaṃ pītimissakabhāvato. Kammanti pāpakammaṃ. Kammasīsena phalaṃ vadati. Kāmañcettha ‘‘abyābajjhaṃ lokaṃ upapajjatī’’ti āgataṃ, ‘‘abyābajjhā phassā phusantī’’ti pana vacanena lokuttaraphassāpi saṅgayhantīti ‘‘tīṇi sucaritāni lokiyalokuttaramissakāni kathitānī’’ti vuttaṃ.
সঙ্খারসুত্তৰণ্ণনা নিট্ঠিতা।
Saṅkhārasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. সঙ্খারসুত্তং • 3. Saṅkhārasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৩. সঙ্খারসুত্তৰণ্ণনা • 3. Saṅkhārasuttavaṇṇanā
