১. পণ্ণত্তিৰারৰণ্ণনা

1. Paṇṇattivāravaṇṇanā

১. ইদানি তেসঞ্ঞেৰ মূলযমকে দেসিতানং কুসলাদিধম্মানং লব্ভমানৰসেন একদেসং সঙ্গণ্হিত্ৰা সচ্চযমকানন্তরং দেসিতস্স সঙ্খারযমকস্স ৰণ্ণনা হোতি। তত্থাপি হেট্ঠা ৰুত্তনযেনেৰ পণ্ণত্তিৰারাদযো তযো মহাৰারা, অন্তরৰারাদযো চ অৰসেসপভেদা ৰেদিতব্বা। অযং পনেত্থ ৰিসেসো – পণ্ণত্তিৰারে তাৰ যথা হেট্ঠা খন্ধাদযো ধম্মে উদ্দিসিত্ৰা ‘‘রূপং রূপক্খন্ধো; চক্খু চক্খাযতনং; চক্খু চক্খুধাতু; দুক্খং দুক্খসচ্চ’’ন্তি পদসোধনৰারো আরদ্ধো। তথা অনারভিত্ৰা ‘‘অস্সাসপস্সাসা কাযসঙ্খারো’’তি পঠমং তযোপি সঙ্খারা ৰিভজিত্ৰা দস্সিতা।

1. Idāni tesaññeva mūlayamake desitānaṃ kusalādidhammānaṃ labbhamānavasena ekadesaṃ saṅgaṇhitvā saccayamakānantaraṃ desitassa saṅkhārayamakassa vaṇṇanā hoti. Tatthāpi heṭṭhā vuttanayeneva paṇṇattivārādayo tayo mahāvārā, antaravārādayo ca avasesapabhedā veditabbā. Ayaṃ panettha viseso – paṇṇattivāre tāva yathā heṭṭhā khandhādayo dhamme uddisitvā ‘‘rūpaṃ rūpakkhandho; cakkhu cakkhāyatanaṃ; cakkhu cakkhudhātu; dukkhaṃ dukkhasacca’’nti padasodhanavāro āraddho. Tathā anārabhitvā ‘‘assāsapassāsā kāyasaṅkhāro’’ti paṭhamaṃ tayopi saṅkhārā vibhajitvā dassitā.

তত্থ কাযস্স সঙ্খারো কাযসঙ্খারো। ‘‘অস্সাসপস্সাসা কাযিকা, এতে ধম্মা কাযপ্পটিবদ্ধা’’তি (ম॰ নি॰ ১.৪৬৩; সং॰ নি॰ ৪.৩৪৮ অত্থতো সমানং) হি ৰচনতো কারণভূতস্স করজকাযস্স ফলভূতো এৰ সঙ্খারোতি কাযসঙ্খারো। অপরো নযো – সঙ্খরিযতীতি সঙ্খারো। কেন সঙ্খরিযতীতি? কাযেন। অযঞ্হি ৰাতো ৰিয ভস্তায করজকাযেন সঙ্খরিযতীতি। এৰম্পি কাযস্স সঙ্খারোতি কাযসঙ্খারো। কাযেন কতো অস্সাসপস্সাসৰাতোতি অত্থো। ‘‘পুব্বেৰ খো, আৰুসো ৰিসাখ, ৰিতক্কেত্ৰা ৰিচারেত্ৰা পচ্ছা ৰাচং ভিন্দতি, তস্মা ৰিতক্কৰিচারা ৰচীসঙ্খারো’’তি (ম॰ নি॰ ১.৪৬৩; সং॰ নি॰ ৪.৩৪৮) ৰচনতো পন সঙ্খরোতীতি সঙ্খারো। কিং সঙ্খরোতি? ৰচিং। ৰচিযা সঙ্খারোতি ৰচীসঙ্খারো। ৰচীভেদসমুট্ঠাপকস্স ৰিতক্কৰিচারদ্ৰযস্সেতং নামং। ‘‘সঞ্ঞা চ ৰেদনা চ চেতসিকা এতে ধম্মা চিত্তপটিবদ্ধা’’তি (ম॰ নি॰ ১.৪৬৩; সং॰ নি॰ ৪.৩৪৮) ৰচনতোযেৰ পন ততিযপদেপি সঙ্খরিযতীতি সঙ্খারো। কেন সঙ্খরিযতি? চিত্তেন। করণত্থে সামিৰচনং কত্ৰা চিত্তস্স সঙ্খারোতি চিত্তসঙ্খারো। সব্বেসম্পি চিত্তসমুট্ঠানানং চেতসিকধম্মানমেতং অধিৰচনং। ৰিতক্কৰিচারানং পন ৰচীসঙ্খারভাৰেন ৰিসুং গহিতত্তা ‘‘ঠপেত্ৰা ৰিতক্কৰিচারে’’তি ৰুত্তং।

Tattha kāyassa saṅkhāro kāyasaṅkhāro. ‘‘Assāsapassāsā kāyikā, ete dhammā kāyappaṭibaddhā’’ti (ma. ni. 1.463; saṃ. ni. 4.348 atthato samānaṃ) hi vacanato kāraṇabhūtassa karajakāyassa phalabhūto eva saṅkhāroti kāyasaṅkhāro. Aparo nayo – saṅkhariyatīti saṅkhāro. Kena saṅkhariyatīti? Kāyena. Ayañhi vāto viya bhastāya karajakāyena saṅkhariyatīti. Evampi kāyassa saṅkhāroti kāyasaṅkhāro. Kāyena kato assāsapassāsavātoti attho. ‘‘Pubbeva kho, āvuso visākha, vitakketvā vicāretvā pacchā vācaṃ bhindati, tasmā vitakkavicārā vacīsaṅkhāro’’ti (ma. ni. 1.463; saṃ. ni. 4.348) vacanato pana saṅkharotīti saṅkhāro. Kiṃ saṅkharoti? Vaciṃ. Vaciyā saṅkhāroti vacīsaṅkhāro. Vacībhedasamuṭṭhāpakassa vitakkavicāradvayassetaṃ nāmaṃ. ‘‘Saññā ca vedanā ca cetasikā ete dhammā cittapaṭibaddhā’’ti (ma. ni. 1.463; saṃ. ni. 4.348) vacanatoyeva pana tatiyapadepi saṅkhariyatīti saṅkhāro. Kena saṅkhariyati? Cittena. Karaṇatthe sāmivacanaṃ katvā cittassa saṅkhāroti cittasaṅkhāro. Sabbesampi cittasamuṭṭhānānaṃ cetasikadhammānametaṃ adhivacanaṃ. Vitakkavicārānaṃ pana vacīsaṅkhārabhāvena visuṃ gahitattā ‘‘ṭhapetvā vitakkavicāre’’ti vuttaṃ.

২-৭. ইদানি কাযো কাযসঙ্খারোতি পদসোধনৰারো আরদ্ধো। তস্স অনুলোমনযে তীণি, পটিলোমনযে তীণীতি ছ যমকানি। পদসোধনমূলচক্কৰারে একেকসঙ্খারমূলকানি দ্ৰে দ্ৰে কত্ৰা অনুলোমনযে ছ, পটিলোমনযে ছাতি দ্ৰাদস যমকানি। সুদ্ধসঙ্খারৰারে পন যথা সুদ্ধখন্ধৰারাদীসু ‘‘রূপং খন্ধো, খন্ধা রূপং; চক্খু আযতনং, আযতনা চক্খূ’’তিআদিনা নযেন যমকানি ৰুত্তানি। এৰং ‘‘কাযো সঙ্খারো, সঙ্খারা কাযো’’তি অৰত্ৰা ‘‘কাযসঙ্খারো ৰচীসঙ্খারো, ৰচীসঙ্খারো কাযসঙ্খারো’’তিআদিনা নযেন কাযসঙ্খারমূলকানি দ্ৰে, ৰচীসঙ্খারমূলকং একন্তি অনুলোমে তীণি, পটিলোমে তীণীতি সব্বানিপি সুদ্ধিকৰারে ছ যমকানি ৰুত্তানি। কিং কারণা? সুদ্ধিকএকেকপদৰসেন অত্থাভাৰতো। যথা হি খন্ধযমকাদীসু রূপাদিৰিসিট্ঠানং খন্ধানং চক্খাদিৰিসিট্ঠানঞ্চ আযতনাদীনং অধিপ্পেতত্তা ‘‘রূপং খন্ধো , খন্ধা রূপং, চক্খু আযতনং, আযতনা চক্খূ’’তি সুদ্ধিকএকেকপদৰসেন অত্থো অত্থি। এৰমিধ ‘‘কাযো সঙ্খারো, সঙ্খারা কাযো’’তি নত্থি। কাযসঙ্খারোতি পন দ্ৰীহিপি পদেহি একোৰ অত্থো লব্ভতি। অস্সাসো ৰা পস্সাসো ৰাতি সুদ্ধিকএকেকপদৰসেন অত্থাভাৰতো ‘‘কাযো সঙ্খারো, সঙ্খারা কাযো’’তি ন ৰুত্তং। ‘‘কাযো কাযসঙ্খারো’’তিআদি পন ৰত্তব্বং সিযা। তম্পি কাযৰচীচিত্তপদেহি ইধ অধিপ্পেতানং সঙ্খারানং অগ্গহিতত্তা ন যুজ্জতি। সুদ্ধসঙ্খারৰারো হেস। পদসোধনে পন ৰিনাপি অত্থেন ৰচনং যুজ্জতীতি তত্থ সো নযো গহিতোৰ। ইধ পন কাযসঙ্খারস্স ৰচীসঙ্খারাদীহি, ৰচীসঙ্খারস্স চ চিত্তসঙ্খারাদীহি, চিত্তসঙ্খারস্স চ কাযসঙ্খারাদীহি, অঞ্ঞত্তা ‘‘কাযসঙ্খারো ৰচীসঙ্খারো, ৰচীসঙ্খারো, কাযসঙ্খারো’’তি একেকসঙ্খারমূলকানি দ্ৰে দ্ৰে কত্ৰা ছ যমকানি যুজ্জন্তি। তেসু অগ্গহিতগ্গহণেন তীণেৰ লব্ভন্তি। তস্মা তানেৰ দস্সেতুং অনুলোমনযে তীণি, পটিলোমনযে তীণীতি ছ যমকানি ৰুত্তানি। সুদ্ধসঙ্খারমূলচক্কৰারো পনেত্থ ন গহিতোতি। এৰং পণ্ণত্তিৰারস্স উদ্দেসৰারো ৰেদিতব্বো।

2-7. Idāni kāyo kāyasaṅkhāroti padasodhanavāro āraddho. Tassa anulomanaye tīṇi, paṭilomanaye tīṇīti cha yamakāni. Padasodhanamūlacakkavāre ekekasaṅkhāramūlakāni dve dve katvā anulomanaye cha, paṭilomanaye chāti dvādasa yamakāni. Suddhasaṅkhāravāre pana yathā suddhakhandhavārādīsu ‘‘rūpaṃ khandho, khandhā rūpaṃ; cakkhu āyatanaṃ, āyatanā cakkhū’’tiādinā nayena yamakāni vuttāni. Evaṃ ‘‘kāyo saṅkhāro, saṅkhārā kāyo’’ti avatvā ‘‘kāyasaṅkhāro vacīsaṅkhāro, vacīsaṅkhāro kāyasaṅkhāro’’tiādinā nayena kāyasaṅkhāramūlakāni dve, vacīsaṅkhāramūlakaṃ ekanti anulome tīṇi, paṭilome tīṇīti sabbānipi suddhikavāre cha yamakāni vuttāni. Kiṃ kāraṇā? Suddhikaekekapadavasena atthābhāvato. Yathā hi khandhayamakādīsu rūpādivisiṭṭhānaṃ khandhānaṃ cakkhādivisiṭṭhānañca āyatanādīnaṃ adhippetattā ‘‘rūpaṃ khandho , khandhā rūpaṃ, cakkhu āyatanaṃ, āyatanā cakkhū’’ti suddhikaekekapadavasena attho atthi. Evamidha ‘‘kāyo saṅkhāro, saṅkhārā kāyo’’ti natthi. Kāyasaṅkhāroti pana dvīhipi padehi ekova attho labbhati. Assāso vā passāso vāti suddhikaekekapadavasena atthābhāvato ‘‘kāyo saṅkhāro, saṅkhārā kāyo’’ti na vuttaṃ. ‘‘Kāyo kāyasaṅkhāro’’tiādi pana vattabbaṃ siyā. Tampi kāyavacīcittapadehi idha adhippetānaṃ saṅkhārānaṃ aggahitattā na yujjati. Suddhasaṅkhāravāro hesa. Padasodhane pana vināpi atthena vacanaṃ yujjatīti tattha so nayo gahitova. Idha pana kāyasaṅkhārassa vacīsaṅkhārādīhi, vacīsaṅkhārassa ca cittasaṅkhārādīhi, cittasaṅkhārassa ca kāyasaṅkhārādīhi, aññattā ‘‘kāyasaṅkhāro vacīsaṅkhāro, vacīsaṅkhāro, kāyasaṅkhāro’’ti ekekasaṅkhāramūlakāni dve dve katvā cha yamakāni yujjanti. Tesu aggahitaggahaṇena tīṇeva labbhanti. Tasmā tāneva dassetuṃ anulomanaye tīṇi, paṭilomanaye tīṇīti cha yamakāni vuttāni. Suddhasaṅkhāramūlacakkavāro panettha na gahitoti. Evaṃ paṇṇattivārassa uddesavāro veditabbo.

৮-১৮. নিদ্দেসৰারে পনস্স অনুলোমে তাৰ যস্মা ন কাযাদযোৰ কাযসঙ্খারাদীনং নামং, তস্মা নোতি পটিসেধো কতো। পটিলোমে ন কাযো ন কাযসঙ্খারোতি যো ন কাযো সো কাযসঙ্খারোপি ন হোতীতি পুচ্ছতি। কাযসঙ্খারো ন কাযো কাযসঙ্খারোতি কাযসঙ্খারো কাযো ন হোতি, কাযসঙ্খারোযেৰ পনেসোতি অত্থো। অৰসেসন্তি ন কেৰলং সেসসঙ্খারদ্ৰযমেৰ। কাযসঙ্খারৰিনিমুত্তং পন সেসং সব্বম্পি সঙ্খতাসঙ্খতপণ্ণত্তিভেদং ধম্মজাতং নেৰ কাযো, ন কাযসঙ্খারোতি ইমিনা উপাযেন সব্বৰিস্সজ্জনেসু অত্থো ৰেদিতব্বোতি।

8-18. Niddesavāre panassa anulome tāva yasmā na kāyādayova kāyasaṅkhārādīnaṃ nāmaṃ, tasmā noti paṭisedho kato. Paṭilome na kāyo na kāyasaṅkhāroti yo na kāyo so kāyasaṅkhāropi na hotīti pucchati. Kāyasaṅkhāro na kāyo kāyasaṅkhāroti kāyasaṅkhāro kāyo na hoti, kāyasaṅkhāroyeva panesoti attho. Avasesanti na kevalaṃ sesasaṅkhāradvayameva. Kāyasaṅkhāravinimuttaṃ pana sesaṃ sabbampi saṅkhatāsaṅkhatapaṇṇattibhedaṃ dhammajātaṃ neva kāyo, na kāyasaṅkhāroti iminā upāyena sabbavissajjanesu attho veditabboti.

পণ্ণত্তিৰারৰণ্ণনা।

Paṇṇattivāravaṇṇanā.

২. পৰত্তিৰারৰণ্ণনা

2. Pavattivāravaṇṇanā

১৯. পৰত্তিৰারে পনেত্থ পচ্চুপ্পন্নকালে পুগ্গলৰারস্স অনুলোমনযে ‘‘যস্স কাযসঙ্খারো উপ্পজ্জতি, তস্স ৰচীসঙ্খারো উপ্পজ্জতী’’তি কাযসঙ্খারমূলকানি দ্ৰে, ৰচীসঙ্খারমূলকং একন্তি তীণেৰ যমকানি লব্ভন্তি; তানি গহিতানেৰ। তস্স পটিলোমনযেপি ওকাসৰারাদীসুপি এসেৰ নযো। এৰমেত্থ সব্বৰারেসু তিণ্ণং তিণ্ণং যমকানং ৰসেন যমকগণনা ৰেদিতব্বা।

19. Pavattivāre panettha paccuppannakāle puggalavārassa anulomanaye ‘‘yassa kāyasaṅkhāro uppajjati, tassa vacīsaṅkhāro uppajjatī’’ti kāyasaṅkhāramūlakāni dve, vacīsaṅkhāramūlakaṃ ekanti tīṇeva yamakāni labbhanti; tāni gahitāneva. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā.

অত্থৰিনিচ্ছযে পনেত্থ ইদং লক্খণং – ইমস্মিঞ্হি সঙ্খারযমকে ‘‘অস্সাসপস্সাসানং উপ্পাদক্খণে ৰিতক্কৰিচারানং উপ্পাদক্খণে’’তিআদিৰচনতো পচ্চুপ্পন্নাদিকালভেদো পৰত্তিৰসেনাপি গহেতব্বো, ন চুতিপটিসন্ধিৰসেনেৰ। ‘‘দুতিযজ্ঝানে ততিযজ্ঝানে তত্থ কাযসঙ্খারো উপ্পজ্জতী’’তিআদিৰচনতো চ ঝানম্পি ওকাসৰসেন গহিতন্তি ৰেদিতব্বং। এৰমেত্থ যং যং লব্ভতি, তস্স তস্স ৰসেন অত্থৰিনিচ্ছযো ৰেদিতব্বো।

Atthavinicchaye panettha idaṃ lakkhaṇaṃ – imasmiñhi saṅkhārayamake ‘‘assāsapassāsānaṃ uppādakkhaṇe vitakkavicārānaṃ uppādakkhaṇe’’tiādivacanato paccuppannādikālabhedo pavattivasenāpi gahetabbo, na cutipaṭisandhivaseneva. ‘‘Dutiyajjhāne tatiyajjhāne tattha kāyasaṅkhāro uppajjatī’’tiādivacanato ca jhānampi okāsavasena gahitanti veditabbaṃ. Evamettha yaṃ yaṃ labbhati, tassa tassa vasena atthavinicchayo veditabbo.

তত্রিদং নযমুখং – ৰিনা ৰিতক্কৰিচারেহীতি দুতিযততিযজ্ঝানৰসেন ৰুত্তং। তেসন্তি তেসং দুতিযততিযজ্ঝানসমঙ্গীনং। কামাৰচরানন্তি কামাৰচরে উপ্পন্নসত্তানং। রূপাৰচরদেৰানং পন অস্সাসপস্সাসা নত্থি। অরূপাৰচরানং রূপমেৰ নত্থি। ৰিনা অস্সাসপস্সাসেহীতি রূপারূপভৰেসু নিব্বত্তসত্তানং ৰিতক্কৰিচারুপ্পত্তিং সন্ধায ৰুত্তং।

Tatridaṃ nayamukhaṃ – vinā vitakkavicārehīti dutiyatatiyajjhānavasena vuttaṃ. Tesanti tesaṃ dutiyatatiyajjhānasamaṅgīnaṃ. Kāmāvacarānanti kāmāvacare uppannasattānaṃ. Rūpāvacaradevānaṃ pana assāsapassāsā natthi. Arūpāvacarānaṃ rūpameva natthi. Vinā assāsapassāsehīti rūpārūpabhavesu nibbattasattānaṃ vitakkavicāruppattiṃ sandhāya vuttaṃ.

২১. পঠমজ্ঝানে কামাৰচরেতি কামাৰচরভূমিযং উপ্পন্নে পঠমজ্ঝানে। অঙ্গমত্তৰসেন চেত্থ পঠমজ্ঝানং গহেতব্বং, ন অপ্পনাৰসেনেৰ। অনপ্পনাপত্তেপি হি সৰিতক্কসৰিচারচিত্তে ইদং সঙ্খারদ্ৰযং উপ্পজ্জতেৰ।

21. Paṭhamajjhāne kāmāvacareti kāmāvacarabhūmiyaṃ uppanne paṭhamajjhāne. Aṅgamattavasena cettha paṭhamajjhānaṃ gahetabbaṃ, na appanāvaseneva. Anappanāpattepi hi savitakkasavicāracitte idaṃ saṅkhāradvayaṃ uppajjateva.

২৪. চিত্তস্স ভঙ্গক্খণেতি ইদং কাযসঙ্খারস্স একন্তচিত্তসমুট্ঠানত্তা ৰুত্তং। উপ্পজ্জমানমেৰ হি চিত্তং রূপং ৰা অরূপং ৰা সমুট্ঠাপেতি, ন ভিজ্জমানং।

24. Cittassabhaṅgakkhaṇeti idaṃ kāyasaṅkhārassa ekantacittasamuṭṭhānattā vuttaṃ. Uppajjamānameva hi cittaṃ rūpaṃ vā arūpaṃ vā samuṭṭhāpeti, na bhijjamānaṃ.

৩৭. সুদ্ধাৰাসানং দুতিযে চিত্তে ৰত্তমানেতি পটিসন্ধিতো দুতিযে ভৰঙ্গচিত্তে। কামঞ্চেতং পটিসন্ধিচিত্তেপি ৰত্তমানে তেসং তত্থ নুপ্পজ্জিত্থেৰ। যাৰ পন অব্বোকিণ্ণং ৰিপাকচিত্তং ৰত্ততি, তাৰ নুপ্পজ্জিত্থেৰ নামাতি দস্সনত্থমেতং ৰুত্তং। যস্স ৰা ঝানস্স ৰিপাকচিত্তেন তে নিব্বত্তা, তং সতসোপি সহস্সসোপি উপ্পজ্জমানং পঠমচিত্তমেৰ। ৰিপাকচিত্তেন পন ৰিসদিসং ভৰনিকন্তিযা আৰজ্জনচিত্তং দুতিযচিত্তং নাম। তং সন্ধাযেতং ৰুত্তন্তি ৰেদিতব্বং।

37. Suddhāvāsānaṃ dutiye citte vattamāneti paṭisandhito dutiye bhavaṅgacitte. Kāmañcetaṃ paṭisandhicittepi vattamāne tesaṃ tattha nuppajjittheva. Yāva pana abbokiṇṇaṃ vipākacittaṃ vattati, tāva nuppajjittheva nāmāti dassanatthametaṃ vuttaṃ. Yassa vā jhānassa vipākacittena te nibbattā, taṃ satasopi sahassasopi uppajjamānaṃ paṭhamacittameva. Vipākacittena pana visadisaṃ bhavanikantiyā āvajjanacittaṃ dutiyacittaṃ nāma. Taṃ sandhāyetaṃ vuttanti veditabbaṃ.

৪৪. পচ্ছিমচিত্তসমঙ্গীনন্তি সব্বপচ্ছিমেন অপ্পটিসন্ধিকচিত্তেন সমঙ্গীভূতানং খীণাসৰানং। অৰিতক্কঅৰিচারং পচ্ছিমচিত্তন্তি রূপাৰচরানং দুতিযজ্ঝানিকাদিচুতিচিত্তৰসেন, অরূপাৰচরানঞ্চ চতুত্থজ্ঝানিকচুতিচিত্তৰসেনেতং ৰুত্তং। তেসন্তি তেসং পচ্ছিমচিত্তসমঙ্গীআদীনং।

44. Pacchimacittasamaṅgīnanti sabbapacchimena appaṭisandhikacittena samaṅgībhūtānaṃ khīṇāsavānaṃ. Avitakkaavicāraṃ pacchimacittanti rūpāvacarānaṃ dutiyajjhānikādicuticittavasena, arūpāvacarānañca catutthajjhānikacuticittavasenetaṃ vuttaṃ. Tesanti tesaṃ pacchimacittasamaṅgīādīnaṃ.

৭৯. যস্স কাযসঙ্খারো নিরুজ্ঝতি, তস্স চিত্তসঙ্খারো নিরুজ্ঝতীতি এত্থ নিযমতো কাযসঙ্খারস্স চিত্তসঙ্খারেন সদ্ধিং একক্খণে নিরুজ্ঝনতো আমন্তাতি পটিৰচনং দিন্নং। ন চিত্তসঙ্খারস্স কাযসঙ্খারেন সদ্ধিং। কিং কারণা? চিত্তসঙ্খারো হি কাযসঙ্খারেন ৰিনাপি উপ্পজ্জতি চ নিরুজ্ঝতি চ। কাযসঙ্খারো পন চিত্তসমুট্ঠানো অস্সাসপস্সাসৰাতো। চিত্তসমুট্ঠানরূপঞ্চ চিত্তস্স উপ্পাদক্খণে উপ্পজ্জিত্ৰা যাৰ অঞ্ঞানি সোল়সচিত্তানি উপ্পজ্জন্তি, তাৰ তিট্ঠতি। তেসং সোল়সন্নং সব্বপচ্ছিমেন সদ্ধিং নিরুজ্ঝতীতি যেন চিত্তেন সদ্ধিং উপ্পজ্জতি, ততো পট্ঠায সত্তরসমেন সদ্ধিং নিরুজ্ঝতি। ন কস্সচি চিত্তস্স উপ্পাদক্খণে ৰা ঠিতিক্খণে ৰা নিরুজ্ঝতি, নাপি ঠিতিক্খণে ৰা ভঙ্গক্খণে ৰা উপ্পজ্জতি। এসা চিত্তসমুট্ঠানরূপস্স ধম্মতাতি নিযমতো চিত্তসঙ্খারেন সদ্ধিং একক্খণে নিরুজ্ঝনতো আমন্তাতি ৰুত্তং। যং পন ৰিভঙ্গপ্পকরণস্স সীহল়ট্ঠকথাযং ‘‘চিত্তসমুট্ঠানং রূপং সত্তরসমস্স চিত্তস্স উপ্পাদক্খণে নিরুজ্ঝতী’’তি ৰুত্তং, তং ইমায পাল়িযা ৰিরূজ্ঝতি। অট্ঠকথাতো চ পাল়িযেৰ বলৰতরাতি পাল়িযং ৰুত্তমেৰ পমাণং।

79. Yassa kāyasaṅkhāro nirujjhati, tassa cittasaṅkhāro nirujjhatīti ettha niyamato kāyasaṅkhārassa cittasaṅkhārena saddhiṃ ekakkhaṇe nirujjhanato āmantāti paṭivacanaṃ dinnaṃ. Na cittasaṅkhārassa kāyasaṅkhārena saddhiṃ. Kiṃ kāraṇā? Cittasaṅkhāro hi kāyasaṅkhārena vināpi uppajjati ca nirujjhati ca. Kāyasaṅkhāro pana cittasamuṭṭhāno assāsapassāsavāto. Cittasamuṭṭhānarūpañca cittassa uppādakkhaṇe uppajjitvā yāva aññāni soḷasacittāni uppajjanti, tāva tiṭṭhati. Tesaṃ soḷasannaṃ sabbapacchimena saddhiṃ nirujjhatīti yena cittena saddhiṃ uppajjati, tato paṭṭhāya sattarasamena saddhiṃ nirujjhati. Na kassaci cittassa uppādakkhaṇe vā ṭhitikkhaṇe vā nirujjhati, nāpi ṭhitikkhaṇe vā bhaṅgakkhaṇe vā uppajjati. Esā cittasamuṭṭhānarūpassa dhammatāti niyamato cittasaṅkhārena saddhiṃ ekakkhaṇe nirujjhanato āmantāti vuttaṃ. Yaṃ pana vibhaṅgappakaraṇassa sīhaḷaṭṭhakathāyaṃ ‘‘cittasamuṭṭhānaṃ rūpaṃ sattarasamassa cittassa uppādakkhaṇe nirujjhatī’’ti vuttaṃ, taṃ imāya pāḷiyā virūjjhati. Aṭṭhakathāto ca pāḷiyeva balavatarāti pāḷiyaṃ vuttameva pamāṇaṃ.

১২৮. যস্স কাযসঙ্খারো উপ্পজ্জতি, তস্স ৰচীসঙ্খারো নিরুজ্ঝতীতি এত্থ যস্মা কাযসঙ্খারো চিত্তস্স উপ্পাদক্খণে উপ্পজ্জতি, ন চ তস্মিং খণে ৰিতক্কৰিচারা নিরুজ্ঝন্তি, তস্মা নোতি পটিসেধো কতোতি। ইমিনা নযমুখেন সব্বত্থ অত্থৰিনিচ্ছযো ৰেদিতব্বো। পরিঞ্ঞাৰারো পাকতিকোযেৰাতি।

128. Yassa kāyasaṅkhāro uppajjati, tassa vacīsaṅkhāro nirujjhatīti ettha yasmā kāyasaṅkhāro cittassa uppādakkhaṇe uppajjati, na ca tasmiṃ khaṇe vitakkavicārā nirujjhanti, tasmā noti paṭisedho katoti. Iminā nayamukhena sabbattha atthavinicchayo veditabbo. Pariññāvāro pākatikoyevāti.

পৰত্তিৰারৰণ্ণনা।

Pavattivāravaṇṇanā.

সঙ্খারযমকৰণ্ণনা নিট্ঠিতা।

Saṅkhārayamakavaṇṇanā niṭṭhitā.

Next: ৭. অনুসযযমকং • 7. Anusayayamakaṃ

Related texts:

তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ৬. সঙ্খারযমকং • 6. Saṅkhārayamakaṃ

টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৬. সঙ্খারযমকং • 6. Saṅkhārayamakaṃ

টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. সঙ্খারযমকং • 6. Saṅkhārayamakaṃ

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact