Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ • Majjhimanikāya

    ੧੦. ਸਙ੍ਖਾਰੁਪਪਤ੍ਤਿਸੁਤ੍ਤਂ

    10. Saṅkhārupapattisuttaṃ

    ੧੬੦. ਏવਂ ਮੇ ਸੁਤਂ – ਏਕਂ ਸਮਯਂ ਭਗવਾ ਸਾવਤ੍ਥਿਯਂ વਿਹਰਤਿ ਜੇਤવਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ। ਤਤ੍ਰ ਖੋ ਭਗવਾ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖવੋ’’ਤਿ। ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗવਤੋ ਪਚ੍ਚਸ੍ਸੋਸੁਂ। ਭਗવਾ ਏਤਦવੋਚ – ‘‘ਸਙ੍ਖਾਰੁਪਪਤ੍ਤਿਂ 1 વੋ, ਭਿਕ੍ਖવੇ, ਦੇਸੇਸ੍ਸਾਮਿ, ਤਂ ਸੁਣਾਥ, ਸਾਧੁਕਂ ਮਨਸਿ ਕਰੋਥ; ਭਾਸਿਸ੍ਸਾਮੀ’’ਤਿ। ‘‘ਏવਂ, ਭਨ੍ਤੇ’’ਤਿ ਖੋ ਤੇ ਭਿਕ੍ਖੂ ਭਗવਤੋ ਪਚ੍ਚਸ੍ਸੋਸੁਂ। ਭਗવਾ ਏਤਦવੋਚ –

    160. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘saṅkhārupapattiṃ 2 vo, bhikkhave, desessāmi, taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

    ੧੬੧. ‘‘ਇਧ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ ਸਮਨ੍ਨਾਗਤੋ ਹੋਤਿ, ਚਾਗੇਨ ਸਮਨ੍ਨਾਗਤੋ ਹੋਤਿ, ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਖਤ੍ਤਿਯਮਹਾਸਾਲਾਨਂ 3 ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ । ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ 4 ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ 5 ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    161. ‘‘Idha, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa evaṃ hoti – ‘aho vatāhaṃ kāyassa bhedā paraṃ maraṇā khattiyamahāsālānaṃ 6 sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti . Tassa te saṅkhārā ca vihārā 7 ca evaṃ bhāvitā evaṃ bahulīkatā tatrupapattiyā 8 saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੨. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ ਸਮਨ੍ਨਾਗਤੋ ਹੋਤਿ, ਚਾਗੇਨ ਸਮਨ੍ਨਾਗਤੋ ਹੋਤਿ, ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਬ੍ਰਾਹ੍ਮਣਮਹਾਸਾਲਾਨਂ…ਪੇ॰… ਗਹਪਤਿਮਹਾਸਾਲਾਨਂ 9 ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    162. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa evaṃ hoti – ‘aho vatāhaṃ kāyassa bhedā paraṃ maraṇā brāhmaṇamahāsālānaṃ…pe… gahapatimahāsālānaṃ 10 sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੩. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ ਸਮਨ੍ਨਾਗਤੋ ਹੋਤਿ, ਚਾਗੇਨ ਸਮਨ੍ਨਾਗਤੋ ਹੋਤਿ, ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘ਚਾਤੁਮਹਾਰਾਜਿਕਾ 11 ਦੇવਾ ਦੀਘਾਯੁਕਾ વਣ੍ਣવਨ੍ਤੋ ਸੁਖਬਹੁਲਾ’ਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਚਾਤੁਮਹਾਰਾਜਿਕਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ । ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    163. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – ‘cātumahārājikā 12 devā dīghāyukā vaṇṇavanto sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā cātumahārājikānaṃ devānaṃ sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੪. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ ਸਮਨ੍ਨਾਗਤੋ ਹੋਤਿ, ਚਾਗੇਨ ਸਮਨ੍ਨਾਗਤੋ ਹੋਤਿ, ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ਤਾવਤਿਂਸਾ ਦੇવਾ…ਪੇ॰… ਯਾਮਾ ਦੇવਾ… ਤੁਸਿਤਾ ਦੇવਾ… ਨਿਮ੍ਮਾਨਰਤੀ ਦੇવਾ… ਪਰਨਿਮ੍ਮਿਤવਸવਤ੍ਤੀ ਦੇવਾ ਦੀਘਾਯੁਕਾ વਣ੍ਣવਨ੍ਤੋ ਸੁਖਬਹੁਲਾਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਪਰਨਿਮ੍ਮਿਤવਸવਤ੍ਤੀਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ । ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    164. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – tāvatiṃsā devā…pe… yāmā devā… tusitā devā… nimmānaratī devā… paranimmitavasavattī devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā paranimmitavasavattīnaṃ devānaṃ sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੫. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ ਸਮਨ੍ਨਾਗਤੋ ਹੋਤਿ, ਚਾਗੇਨ ਸਮਨ੍ਨਾਗਤੋ ਹੋਤਿ, ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘ਸਹਸ੍ਸੋ ਬ੍ਰਹ੍ਮਾ ਦੀਘਾਯੁਕੋ વਣ੍ਣવਾ ਸੁਖਬਹੁਲੋ’ਤਿ। ਸਹਸ੍ਸੋ, ਭਿਕ੍ਖવੇ, ਬ੍ਰਹ੍ਮਾ ਸਹਸ੍ਸਿਲੋਕਧਾਤੁਂ 13 ਫਰਿਤ੍વਾ ਅਧਿਮੁਚ੍ਚਿਤ੍વਾ 14 વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਸੇਯ੍ਯਥਾਪਿ, ਭਿਕ੍ਖવੇ, ਚਕ੍ਖੁਮਾ ਪੁਰਿਸੋ ਏਕਂ ਆਮਣ੍ਡਂ ਹਤ੍ਥੇ ਕਰਿਤ੍વਾ ਪਚ੍ਚવੇਕ੍ਖੇਯ੍ਯ; ਏવਮੇવ ਖੋ, ਭਿਕ੍ਖવੇ, ਸਹਸ੍ਸੋ ਬ੍ਰਹ੍ਮਾ ਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸਹਸ੍ਸਸ੍ਸ ਬ੍ਰਹ੍ਮੁਨੋ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    165. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena samannāgato hoti, cāgena samannāgato hoti, paññāya samannāgato hoti. Tassa sutaṃ hoti – ‘sahasso brahmā dīghāyuko vaṇṇavā sukhabahulo’ti. Sahasso, bhikkhave, brahmā sahassilokadhātuṃ 15 pharitvā adhimuccitvā 16 viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, cakkhumā puriso ekaṃ āmaṇḍaṃ hatthe karitvā paccavekkheyya; evameva kho, bhikkhave, sahasso brahmā sahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā sahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੬. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ਦ੍વਿਸਹਸ੍ਸੋ ਬ੍ਰਹ੍ਮਾ…ਪੇ॰… ਤਿਸਹਸ੍ਸੋ ਬ੍ਰਹ੍ਮਾ… ਚਤੁਸਹਸ੍ਸੋ ਬ੍ਰਹ੍ਮਾ… ਪਞ੍ਚਸਹਸ੍ਸੋ ਬ੍ਰਹ੍ਮਾ ਦੀਘਾਯੁਕੋ વਣ੍ਣવਾ ਸੁਖਬਹੁਲੋਤਿ। ਪਞ੍ਚਸਹਸ੍ਸੋ, ਭਿਕ੍ਖવੇ, ਬ੍ਰਹ੍ਮਾ ਪਞ੍ਚਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਸੇਯ੍ਯਥਾਪਿ, ਭਿਕ੍ਖવੇ, ਚਕ੍ਖੁਮਾ ਪੁਰਿਸੋ ਪਞ੍ਚ ਆਮਣ੍ਡਾਨਿ ਹਤ੍ਥੇ ਕਰਿਤ੍વਾ ਪਚ੍ਚવੇਕ੍ਖੇਯ੍ਯ; ਏવਮੇવ ਖੋ, ਭਿਕ੍ਖવੇ, ਪਞ੍ਚਸਹਸ੍ਸੋ ਬ੍ਰਹ੍ਮਾ ਪਞ੍ਚਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਪਞ੍ਚਸਹਸ੍ਸਸ੍ਸ ਬ੍ਰਹ੍ਮੁਨੋ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    166. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena… cāgena… paññāya samannāgato hoti. Tassa sutaṃ hoti – dvisahasso brahmā…pe… tisahasso brahmā… catusahasso brahmā… pañcasahasso brahmā dīghāyuko vaṇṇavā sukhabahuloti. Pañcasahasso, bhikkhave, brahmā pañcasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, cakkhumā puriso pañca āmaṇḍāni hatthe karitvā paccavekkheyya; evameva kho, bhikkhave, pañcasahasso brahmā pañcasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā pañcasahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੭. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ ਸਮਨ੍ਨਾਗਤੋ ਹੋਤਿ, ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘ਦਸਸਹਸ੍ਸੋ ਬ੍ਰਹ੍ਮਾ ਦੀਘਾਯੁਕੋ વਣ੍ਣવਾ ਸੁਖਬਹੁਲੋ’ਤਿ। ਦਸਸਹਸ੍ਸੋ, ਭਿਕ੍ਖવੇ, ਬ੍ਰਹ੍ਮਾ ਦਸਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਸੇਯ੍ਯਥਾਪਿ, ਭਿਕ੍ਖવੇ, ਮਣਿ વੇਲ਼ੁਰਿਯੋ ਸੁਭੋ ਜਾਤਿਮਾ ਅਟ੍ਠਂਸੋ ਸੁਪਰਿਕਮ੍ਮਕਤੋ ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤੋ ਭਾਸਤੇ ਚ ਤਪਤੇ ਚ 17 વਿਰੋਚਤਿ ਚ; ਏવਮੇવ ਖੋ, ਭਿਕ੍ਖવੇ, ਦਸਸਹਸ੍ਸੋ ਬ੍ਰਹ੍ਮਾ ਦਸਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਦਸਸਹਸ੍ਸਸ੍ਸ ਬ੍ਰਹ੍ਮੁਨੋ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    167. ‘‘Puna caparaṃ, bhikkhave, bhikkhu saddhāya samannāgato hoti, sīlena samannāgato hoti, sutena… cāgena… paññāya samannāgato hoti. Tassa sutaṃ hoti – ‘dasasahasso brahmā dīghāyuko vaṇṇavā sukhabahulo’ti. Dasasahasso, bhikkhave, brahmā dasasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, maṇi veḷuriyo subho jātimā aṭṭhaṃso suparikammakato paṇḍukambale nikkhitto bhāsate ca tapate ca 18 virocati ca; evameva kho, bhikkhave, dasasahasso brahmā dasasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā dasasahassassa brahmuno sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੮. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘ਸਤਸਹਸ੍ਸੋ ਬ੍ਰਹ੍ਮਾ ਦੀਘਾਯੁਕੋ વਣ੍ਣવਾ ਸੁਖਬਹੁਲੋ’ਤਿ। ਸਤਸਹਸ੍ਸੋ, ਭਿਕ੍ਖવੇ, ਬ੍ਰਹ੍ਮਾ ਸਤਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਸੇਯ੍ਯਥਾਪਿ, ਭਿਕ੍ਖવੇ, ਨਿਕ੍ਖਂ ਜਮ੍ਬੋਨਦਂ 19 ਦਕ੍ਖਕਮ੍ਮਾਰਪੁਤ੍ਤਉਕ੍ਕਾਮੁਖਸੁਕੁਸਲਸਮ੍ਪਹਟ੍ਠਂ ਪਣ੍ਡੁਕਮ੍ਬਲੇ ਨਿਕ੍ਖਿਤ੍ਤਂ ਭਾਸਤੇ ਚ ਤਪਤੇ ਚ વਿਰੋਚਤਿ ਚ; ਏવਮੇવ ਖੋ, ਭਿਕ੍ਖવੇ, ਸਤਸਹਸ੍ਸੋ ਬ੍ਰਹ੍ਮਾ ਸਤਸਹਸ੍ਸਿਲੋਕਧਾਤੁਂ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਯੇਪਿ ਤਤ੍ਥ ਸਤ੍ਤਾ ਉਪਪਨ੍ਨਾ ਤੇਪਿ ਫਰਿਤ੍વਾ ਅਧਿਮੁਚ੍ਚਿਤ੍વਾ વਿਹਰਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸਤਸਹਸ੍ਸਸ੍ਸ ਬ੍ਰਹ੍ਮੁਨੋ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ । ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    168. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘satasahasso brahmā dīghāyuko vaṇṇavā sukhabahulo’ti. Satasahasso, bhikkhave, brahmā satasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Seyyathāpi, bhikkhave, nikkhaṃ jambonadaṃ 20 dakkhakammāraputtaukkāmukhasukusalasampahaṭṭhaṃ paṇḍukambale nikkhittaṃ bhāsate ca tapate ca virocati ca; evameva kho, bhikkhave, satasahasso brahmā satasahassilokadhātuṃ pharitvā adhimuccitvā viharati. Yepi tattha sattā upapannā tepi pharitvā adhimuccitvā viharati. Tassa evaṃ hoti – ‘aho vatāhaṃ kāyassa bhedā paraṃ maraṇā satasahassassa brahmuno sahabyataṃ upapajjeyya’nti . So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੬੯. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ਆਭਾ ਦੇવਾ…ਪੇ॰… ਪਰਿਤ੍ਤਾਭਾ ਦੇવਾ… ਅਪ੍ਪਮਾਣਾਭਾ ਦੇવਾ… ਆਭਸ੍ਸਰਾ ਦੇવਾ ਦੀਘਾਯੁਕਾ વਣ੍ਣવਨ੍ਤੋ ਸੁਖਬਹੁਲਾਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਆਭਸ੍ਸਰਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    169. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ābhā devā…pe… parittābhā devā… appamāṇābhā devā… ābhassarā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā ābhassarānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੦. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ … ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ਪਰਿਤ੍ਤਸੁਭਾ ਦੇવਾ…ਪੇ॰… ਅਪ੍ਪਮਾਣਸੁਭਾ ਦੇવਾ… ਸੁਭਕਿਣ੍ਹਾ ਦੇવਾ ਦੀਘਾਯੁਕਾ વਣ੍ਣવਨ੍ਤੋ ਸੁਖਬਹੁਲਾਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਭਕਿਣ੍ਹਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    170. ‘‘Puna caparaṃ, bhikkhave, bhikkhu saddhāya samannāgato hoti, sīlena … sutena… cāgena… paññāya samannāgato hoti. Tassa sutaṃ hoti – parittasubhā devā…pe… appamāṇasubhā devā… subhakiṇhā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā subhakiṇhānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੧. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – વੇਹਪ੍ਫਲਾ ਦੇવਾ…ਪੇ॰… ਅવਿਹਾ ਦੇવਾ… ਅਤਪ੍ਪਾ ਦੇવਾ… ਸੁਦਸ੍ਸਾ ਦੇવਾ… ਸੁਦਸ੍ਸੀ ਦੇવਾ… ਅਕਨਿਟ੍ਠਾ ਦੇવਾ ਦੀਘਾਯੁਕਾ વਣ੍ਣવਨ੍ਤੋ ਸੁਖਬਹੁਲਾਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਅਕਨਿਟ੍ਠਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    171. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – vehapphalā devā…pe… avihā devā… atappā devā… sudassā devā… sudassī devā… akaniṭṭhā devā dīghāyukā vaṇṇavanto sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā akaniṭṭhānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੨. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘ਆਕਾਸਾਨਞ੍ਚਾਯਤਨੂਪਗਾ ਦੇવਾ ਦੀਘਾਯੁਕਾ ਚਿਰਟ੍ਠਿਤਿਕਾ ਸੁਖਬਹੁਲਾ’ਤਿ । ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਆਕਾਸਾਨਞ੍ਚਾਯਤਨੂਪਗਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    172. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘ākāsānañcāyatanūpagā devā dīghāyukā ciraṭṭhitikā sukhabahulā’ti . Tassa evaṃ hoti – ‘aho vatāhaṃ kāyassa bhedā paraṃ maraṇā ākāsānañcāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੩. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ‘વਿਞ੍ਞਾਣਞ੍ਚਾਯਤਨੂਪਗਾ ਦੇવਾ ਦੀਘਾਯੁਕਾ ਚਿਰਟ੍ਠਿਤਿਕਾ ਸੁਖਬਹੁਲਾ’ਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ વਿਞ੍ਞਾਣਞ੍ਚਾਯਤਨੂਪਗਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    173. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ‘viññāṇañcāyatanūpagā devā dīghāyukā ciraṭṭhitikā sukhabahulā’ti. Tassa evaṃ hoti – ‘aho vatāhaṃ kāyassa bhedā paraṃ maraṇā viññāṇañcāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੪. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਸੁਤਂ ਹੋਤਿ – ਆਕਿਞ੍ਚਞ੍ਞਾਯਤਨੂਪਗਾ ਦੇવਾ…ਪੇ॰… ਨੇવਸਞ੍ਞਾਨਾਸਞ੍ਞਾਯਤਨੂਪਗਾ ਦੇવਾ ਦੀਘਾਯੁਕਾ ਚਿਰਟ੍ਠਿਤਿਕਾ ਸੁਖਬਹੁਲਾਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਕਾਯਸ੍ਸ ਭੇਦਾ ਪਰਂ ਮਰਣਾ ਨੇવਸਞ੍ਞਾਨਾਸਞ੍ਞਾਯਤਨੂਪਗਾਨਂ ਦੇવਾਨਂ ਸਹਬ੍ਯਤਂ ਉਪਪਜ੍ਜੇਯ੍ਯ’ਨ੍ਤਿ। ਸੋ ਤਂ ਚਿਤ੍ਤਂ ਦਹਤਿ, ਤਂ ਚਿਤ੍ਤਂ ਅਧਿਟ੍ਠਾਤਿ, ਤਂ ਚਿਤ੍ਤਂ ਭਾવੇਤਿ। ਤਸ੍ਸ ਤੇ ਸਙ੍ਖਾਰਾ ਚ વਿਹਾਰਾ ਚ ਏવਂ ਭਾવਿਤਾ ਏવਂ ਬਹੁਲੀਕਤਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਨ੍ਤਿ। ਅਯਂ, ਭਿਕ੍ਖવੇ, ਮਗ੍ਗੋ ਅਯਂ ਪਟਿਪਦਾ ਤਤ੍ਰੁਪਪਤ੍ਤਿਯਾ ਸਂવਤ੍ਤਤਿ।

    174. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa sutaṃ hoti – ākiñcaññāyatanūpagā devā…pe… nevasaññānāsaññāyatanūpagā devā dīghāyukā ciraṭṭhitikā sukhabahulāti. Tassa evaṃ hoti – ‘aho vatāhaṃ kāyassa bhedā paraṃ maraṇā nevasaññānāsaññāyatanūpagānaṃ devānaṃ sahabyataṃ upapajjeyya’nti. So taṃ cittaṃ dahati, taṃ cittaṃ adhiṭṭhāti, taṃ cittaṃ bhāveti. Tassa te saṅkhārā ca vihārā ca evaṃ bhāvitā evaṃ bahulīkatā tatrupapattiyā saṃvattanti. Ayaṃ, bhikkhave, maggo ayaṃ paṭipadā tatrupapattiyā saṃvattati.

    ੧੭੫. ‘‘ਪੁਨ ਚਪਰਂ, ਭਿਕ੍ਖવੇ, ਭਿਕ੍ਖੁ ਸਦ੍ਧਾਯ ਸਮਨ੍ਨਾਗਤੋ ਹੋਤਿ, ਸੀਲੇਨ… ਸੁਤੇਨ… ਚਾਗੇਨ… ਪਞ੍ਞਾਯ ਸਮਨ੍ਨਾਗਤੋ ਹੋਤਿ। ਤਸ੍ਸ ਏવਂ ਹੋਤਿ – ‘ਅਹੋ વਤਾਹਂ ਆਸવਾਨਂ ਖਯਾ ਅਨਾਸવਂ ਚੇਤੋવਿਮੁਤ੍ਤਿਂ ਪਞ੍ਞਾવਿਮੁਤ੍ਤਿਂ ਦਿਟ੍ਠੇવ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਉਪਸਮ੍ਪਜ੍ਜ વਿਹਰੇਯ੍ਯ’ਨ੍ਤਿ। ਸੋ ਆਸવਾਨਂ ਖਯਾ ਅਨਾਸવਂ ਚੇਤੋવਿਮੁਤ੍ਤਿਂ ਪਞ੍ਞਾવਿਮੁਤ੍ਤਿਂ ਦਿਟ੍ਠੇવ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍વਾ ਉਪਸਮ੍ਪਜ੍ਜ વਿਹਰਤਿ। ਅਯਂ, ਭਿਕ੍ਖવੇ, ਭਿਕ੍ਖੁ ਨ ਕਤ੍ਥਚਿ ਉਪਪਜ੍ਜਤੀ’’ਤਿ 21।

    175. ‘‘Puna caparaṃ, bhikkhave, bhikkhu saddhāya samannāgato hoti, sīlena… sutena… cāgena… paññāya samannāgato hoti. Tassa evaṃ hoti – ‘aho vatāhaṃ āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’nti. So āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ, bhikkhave, bhikkhu na katthaci upapajjatī’’ti 22.

    ਇਦਮવੋਚ ਭਗવਾ। ਅਤ੍ਤਮਨਾ ਤੇ ਭਿਕ੍ਖੂ ਭਗવਤੋ ਭਾਸਿਤਂ ਅਭਿਨਨ੍ਦੁਨ੍ਤਿ।

    Idamavoca bhagavā. Attamanā te bhikkhū bhagavato bhāsitaṃ abhinandunti.

    ਸਙ੍ਖਾਰੁਪਪਤ੍ਤਿਸੁਤ੍ਤਂ ਨਿਟ੍ਠਿਤਂ ਦਸਮਂ।

    Saṅkhārupapattisuttaṃ niṭṭhitaṃ dasamaṃ.

    ਅਨੁਪਦવਗ੍ਗੋ ਨਿਟ੍ਠਿਤੋ ਦੁਤਿਯੋ।

    Anupadavaggo niṭṭhito dutiyo.

    ਤਸ੍ਸੁਦ੍ਦਾਨਂ –

    Tassuddānaṃ –

    ਅਨੁਪਾਦ-ਸੋਧਨ-ਪੋਰਿਸਧਮ੍ਮੋ, ਸੇવਿਤਬ੍ਬ-ਬਹੁਧਾਤੁ-વਿਭਤ੍ਤਿ।

    Anupāda-sodhana-porisadhammo, sevitabba-bahudhātu-vibhatti;

    ਬੁਦ੍ਧਸ੍ਸ ਕਿਤ੍ਤਿਨਾਮ-ਚਤ੍ਤਾਰੀਸੇਨ, ਆਨਾਪਾਨੋ ਕਾਯਗਤੋ ਉਪਪਤ੍ਤਿ 23॥

    Buddhassa kittināma-cattārīsena, ānāpāno kāyagato upapatti 24.




    Next: ੧. ਚੂਲ਼ਸੁਞ੍ਞਤਸੁਤ੍ਤਂ • 1. Cūḷasuññatasuttaṃ




    Footnotes:
    1. ਸਙ੍ਖਾਰੂਪਪਤ੍ਤਿਂ (ਸ੍ਯਾ॰ ਕਂ॰), ਸਙ੍ਖਾਰੁਪ੍ਪਤ੍ਤਿਂ (ਸੀ॰ ਪੀ॰)
    2. saṅkhārūpapattiṃ (syā. kaṃ.), saṅkhāruppattiṃ (sī. pī.)
    3. ਖਤ੍ਤਿਯਮਹਾਸਾਲਾਨਂ વਾ (ਸ੍ਯਾ॰ ਕਂ॰ ਪੀ॰)
    4. વਿਹਾਰੋ (ਸੀ॰ ਪੀ॰)
    5. ਤਤ੍ਰੂਪਪਤ੍ਤਿਯਾ (ਸ੍ਯਾ॰ ਕਂ॰), ਤਤ੍ਰੁਪ੍ਪਤ੍ਤਿਯਾ (ਸੀ॰ ਪੀ॰)
    6. khattiyamahāsālānaṃ vā (syā. kaṃ. pī.)
    7. vihāro (sī. pī.)
    8. tatrūpapattiyā (syā. kaṃ.), tatruppattiyā (sī. pī.)
    9. ਬ੍ਰਾਹ੍ਮਣਮਹਾਸਾਲਾਨਂ વਾ ਗਹਪਤਿਮਹਾਸਾਲਾਨਂ વਾ (ਸ੍ਯਾ॰ ਕਂ॰ ਪੀ॰)
    10. brāhmaṇamahāsālānaṃ vā gahapatimahāsālānaṃ vā (syā. kaṃ. pī.)
    11. ਚਾਤੁਮ੍ਮਹਾਰਾਜਿਕਾ (ਸੀ॰ ਸ੍ਯਾ॰ ਕਂ॰ ਪੀ॰)
    12. cātummahārājikā (sī. syā. kaṃ. pī.)
    13. ਸਹਸ੍ਸਿਂ ਲੋਕਧਾਤੁਂ (ਸੀ॰)
    14. ਅਧਿਮੁਞ੍ਚਿਤ੍વਾ (ਕ॰)
    15. sahassiṃ lokadhātuṃ (sī.)
    16. adhimuñcitvā (ka.)
    17. ਭਾਸਤਿ ਚ ਤਪਤਿ ਚ (ਸੀ॰ ਸ੍ਯਾ॰ ਕਂ॰ ਪੀ॰)
    18. bhāsati ca tapati ca (sī. syā. kaṃ. pī.)
    19. ਨੇਕ੍ਖਂ (ਸੀ॰ ਸ੍ਯਾ॰ ਕਂ॰ ਪੀ॰)
    20. nekkhaṃ (sī. syā. kaṃ. pī.)
    21. ਨ ਕਤ੍ਥਚਿ ਉਪਪਜ੍ਜਤਿ, ਨ ਕੁਹਿਞ੍ਚਿ ਉਪਪਜ੍ਜਤੀਤਿ (ਸੀ॰ ਪੀ॰), ਨ ਕਤ੍ਥਚਿ ਉਪਪਜ੍ਜਤਿ, ਨ ਕੁਹਿਞ੍ਚਿ ਉਪਸਮ੍ਪਜ੍ਜ વਿਹਰਤੀਤਿ। (ਕ॰)
    22. na katthaci upapajjati, na kuhiñci upapajjatīti (sī. pī.), na katthaci upapajjati, na kuhiñci upasampajja viharatīti. (ka.)
    23. ਇਤੋ ਪਰਂ ਸ੍ਯਾ॰ ਕਂ॰ ਕ॰ ਪੋਤ੍ਥਕੇਸੁ ਏવਮ੍ਪਿ ਦਿਸ੍ਸਤਿ –-§ਚਨ੍ਦਕੇ વਿਮਲੇ ਪਰਿਸੁਦ੍ਧੇ, ਪੁਣ੍ਣਸਮ੍ਮੋਦਿਨਿਰੋਧਅਤ੍ਤਨੋ।§ਦਨ੍ਧਾ ਬਹੁਜਨਸੇવਿਤਂ ਧਮ੍ਮવਰਂ, ਯਂ ਅਨੁਪਦਂ વਗ੍ਗવਰਂ ਦੁਤਿਯਾਤਿ
    24. ito paraṃ syā. kaṃ. ka. potthakesu evampi dissati –-§candake vimale parisuddhe, puṇṇasammodinirodhaattano;§dandhā bahujanasevitaṃ dhammavaraṃ, yaṃ anupadaṃ vaggavaraṃ dutiyāti



    Related texts:



    ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) / ੧੦. ਸਙ੍ਖਾਰੁਪਪਤ੍ਤਿਸੁਤ੍ਤવਣ੍ਣਨਾ • 10. Saṅkhārupapattisuttavaṇṇanā

    ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੧੦. ਸਙ੍ਖਾਰੁਪਪਤ੍ਤਿਸੁਤ੍ਤવਣ੍ਣਨਾ • 10. Saṅkhārupapattisuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact