| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. ஸங்கா²ருபபத்திஸுத்தவண்ணனா
10. Saṅkhārupapattisuttavaṇṇanā
160. ஸங்கா²ருபபத்திந்தி விபாகக்க²ந்த⁴ஸஞ்ஞிதானங் ஸங்கா²ரானங் உப்பத்திங், நிப்³ப³த்திந்தி அத்தோ². யஸ்மா அவதா⁴ரணங் ஏதஸ்மிங் பதே³ இச்சி²தப்³ப³ந்தி, ‘‘ஸங்கா²ரானங்யேவ உபபத்தி’’ந்தி வத்வா தேன நிவத்திதங் த³ஸ்ஸெந்தோ, ‘‘ந ஸத்தஸ்ஸா’’தி ஆஹ. தேன ஸத்தோ ஜீவோ உப்பஜ்ஜதீதி மிச்சா²வாத³ங் படிக்கி²பதி. ஏவங் உப்பஜ்ஜனகத⁴ம்மவஸேன உப்பத்திங் த³ஸ்ஸெத்வா இதா³னி உப்பத்திஜனகத⁴ம்மவஸேனபி தங் த³ஸ்ஸேதுங், ‘‘புஞ்ஞாபி⁴ஸங்கா²ரேன வா’’திஆதி³ வுத்தங். தத்த² காமேஸு புஞ்ஞாபி⁴ஸங்கா²ரேனபி உபபத்தி ஹோதி, ஸா பன இமஸ்மிங் ஸுத்தே க³ஹிதாதி. புஞ்ஞாபி⁴ஸங்கா²ரேன வாதி வா-ஸத்³தோ³ அவுத்தத்தா²பெக்க²ணவிகப்பத்தோ², அவுத்தத்தா²பெக்கா²ய பன ந ஆக³தோ ‘‘ஆனேஞ்ஜாபி⁴ஸங்கா²ரேனா’’தி. அத² வா உபபத்தி ஆக³தா, ஏவங் கிச்சங் ஆக³தங், ஆனேஞ்ஜாபி⁴ஸங்கா²ரோ பனெத்த² ஸரூபேன அனாக³தோபி புஞ்ஞாபி⁴ஸங்கா²ரக்³க³ஹணேனேவ க³ஹிதோதி த³ட்ட²ப்³ப³ங். கேசி பன ‘‘புஞ்ஞானேஞ்ஜாபி⁴ஸங்கா²ரேனா’’தி பட²ந்தி. ப⁴வூபக³க்க²ந்தா⁴னந்தி ஸுக³திப⁴வூபகா³னங் உபாதா³னக்க²ந்தா⁴னங்.
160.Saṅkhārupapattinti vipākakkhandhasaññitānaṃ saṅkhārānaṃ uppattiṃ, nibbattinti attho. Yasmā avadhāraṇaṃ etasmiṃ pade icchitabbanti, ‘‘saṅkhārānaṃyeva upapatti’’nti vatvā tena nivattitaṃ dassento, ‘‘na sattassā’’ti āha. Tena satto jīvo uppajjatīti micchāvādaṃ paṭikkhipati. Evaṃ uppajjanakadhammavasena uppattiṃ dassetvā idāni uppattijanakadhammavasenapi taṃ dassetuṃ, ‘‘puññābhisaṅkhārena vā’’tiādi vuttaṃ. Tattha kāmesu puññābhisaṅkhārenapi upapatti hoti, sā pana imasmiṃ sutte gahitāti. Puññābhisaṅkhārena vāti vā-saddo avuttatthāpekkhaṇavikappattho, avuttatthāpekkhāya pana na āgato ‘‘āneñjābhisaṅkhārenā’’ti. Atha vā upapatti āgatā, evaṃ kiccaṃ āgataṃ, āneñjābhisaṅkhāro panettha sarūpena anāgatopi puññābhisaṅkhāraggahaṇeneva gahitoti daṭṭhabbaṃ. Keci pana ‘‘puññāneñjābhisaṅkhārenā’’ti paṭhanti. Bhavūpagakkhandhānanti sugatibhavūpagānaṃ upādānakkhandhānaṃ.
161. லோகிகா வட்டந்தி கம்மவட்டஸ்ஸ க³ஹணதோ. ப⁴வூபபத்திஹேதுபூ⁴தா ஓகப்பனீயஸத்³தா⁴ சதுபாரிஸுத்³தி⁴ஸீலங் தாதி³ஸங் பு³த்³த⁴வசனபா³ஹுஸச்சங் ஆமிஸபரிச்சாகோ³ கம்மஸ்ஸகதாஞாணங் கம்மப²லதி³ட்டி² ச இமே ஸத்³தா⁴த³யோ வேதி³தப்³பா³. ட²பேதீதி பணித³ஹனவஸேன ட²பேதி. பணித³ஹதீதி ஹி அயமெத்த² அத்தோ². பதிட்டா²பேதீதி தத்த² ஸுப்பதிட்டி²தங் கத்வா ட²பேதி. ஸஹபத்த²னாயாதி, ‘‘அஹோ வதாஹங்…பே॰… உபபஜ்ஜெய்ய’’ந்தி ஏவங் பவத்தபத்த²னாய ஸஹ. ஸத்³தா⁴த³யோவாதி யதா²வுத்தா ஸத்³தா⁴த³யோ ஏவ பஞ்ச த⁴ம்மா உபபத்தியா ஸங்க²ரணட்டே²ன ஸங்கா²ரா, தஸ்மா ஏவ அஞ்ஞேஹி விஸிட்ட²ப⁴வூபஹரணட்டே²ன விஹாரா நாமாதி. தஸ்மிங் டா²னேதி தஸ்மிங் உபபத்திட்டா²னே.
161.Lokikā vaṭṭanti kammavaṭṭassa gahaṇato. Bhavūpapattihetubhūtā okappanīyasaddhā catupārisuddhisīlaṃ tādisaṃ buddhavacanabāhusaccaṃ āmisapariccāgo kammassakatāñāṇaṃ kammaphaladiṭṭhi ca ime saddhādayo veditabbā. Ṭhapetīti paṇidahanavasena ṭhapeti. Paṇidahatīti hi ayamettha attho. Patiṭṭhāpetīti tattha suppatiṭṭhitaṃ katvā ṭhapeti. Sahapatthanāyāti, ‘‘aho vatāhaṃ…pe… upapajjeyya’’nti evaṃ pavattapatthanāya saha. Saddhādayovāti yathāvuttā saddhādayo eva pañca dhammā upapattiyā saṅkharaṇaṭṭhena saṅkhārā, tasmā eva aññehi visiṭṭhabhavūpaharaṇaṭṭhena vihārā nāmāti. Tasmiṃ ṭhāneti tasmiṃ upapattiṭṭhāne.
பஞ்சத⁴ம்மாவ தங்ஸமங்கீ³புக்³க³லோ உபபத்திங் மக்³க³தி க³வேஸதி ஏதேனாதி மக்³கோ³. படிபஜ்ஜதி ஏதாயாதி படிபதா³. சேதனா பனெத்த² ஸுத்³த⁴ஸங்கா²ரதாய ஸத்³தா⁴தி³க்³க³ஹணேனேவ க³ஹிதா, தஸ்மா அவதா⁴ரணங் கதங். உபபத்திபகப்பனவஸேனேவ பவத்தியா பத்த²னாக³ஹணேனேவ தஸ்ஸா க³ஹணந்தி கேசி. சித்தகரயுத்தக³தினிப்³ப³த்தனத⁴ம்மவஸேன அவதா⁴ரணஸ்ஸ கதத்தா. சேதனா ஹி நாம கம்மங், தஸ்ஸா உபபத்தினிப்³ப³த்தனே வத்தப்³ப³மேவ நத்தி², தஸ்ஸா பன கிச்சகரணா ஸத்³தா⁴த³யோ பத்த²னா சாதி இமே த⁴ம்மா ஸஹகாரினோ ப⁴வூபபத்தியா நியாமகா ஹொந்தீதி தத்ரூபபத்தியா பவத்தந்தீதி தேஸங் மக்³கா³தி³பா⁴வோ வுத்தோ. தேனாஹ ‘‘யஸ்ஸ ஹீ’’திஆதி³. தேன ஸத்³தா⁴ பத்த²னா சாதி உப⁴யே த⁴ம்மா ஸஹிதா ஹுத்வா கம்மங் விஸேஸெந்தா க³திங் நியமெந்தீதி த³ஸ்ஸேதி, படிஸந்தி⁴க்³க³ஹணங் அனியதங் கேவலஸ்ஸ கம்மஸ்ஸ வஸேனாதி அதி⁴ப்பாயோ. காமஞ்செத்த² ‘‘கம்மங் கத்வா’’தி வுத்தங், கம்மாயூஹனதோ பன பகே³வ பத்த²னங் ட²பேதும்பி வட்டதியேவ. கம்மங் கத்வாதி செத்த² ‘‘தாபெத்வா பு⁴ஞ்ஜதி, பு⁴த்வா ஸயதீ’’திஆதீ³ஸு விய ந காலனியமோ, கம்மங் கத்வா யதா³ கதா³சி பத்த²னங் காதுங் வட்டதீதி ச இத³ங் சாரித்தத³ஸ்ஸனங் விய வுத்தங். யதா² ஹி ப⁴வபத்த²னா யாவ மக்³கே³ன ந ஸமுச்சி²ஜ்ஜதி, தாவ அனுப்பன்னாபி⁴னவகதூபசிதஸ்ஸ கம்மஸ்ஸ பச்சயோ ஹோதியேவ. புன ததா² விஸேஸபச்சயோ, யதா² நியமெத்வா உப்பாதி³தா. தேன வுத்தங் – ‘‘யஸ்ஸ பஞ்ச த⁴ம்மா அத்தி², ந பத்த²னா தஸ்ஸ க³தி அனிப³த்³தா⁴’’தி.
Pañcadhammāva taṃsamaṅgīpuggalo upapattiṃ maggati gavesati etenāti maggo. Paṭipajjati etāyāti paṭipadā. Cetanā panettha suddhasaṅkhāratāya saddhādiggahaṇeneva gahitā, tasmā avadhāraṇaṃ kataṃ. Upapattipakappanavaseneva pavattiyā patthanāgahaṇeneva tassā gahaṇanti keci. Cittakarayuttagatinibbattanadhammavasena avadhāraṇassa katattā. Cetanā hi nāma kammaṃ, tassā upapattinibbattane vattabbameva natthi, tassā pana kiccakaraṇā saddhādayo patthanā cāti ime dhammā sahakārino bhavūpapattiyā niyāmakā hontīti tatrūpapattiyā pavattantīti tesaṃ maggādibhāvo vutto. Tenāha ‘‘yassa hī’’tiādi. Tena saddhā patthanā cāti ubhaye dhammā sahitā hutvā kammaṃ visesentā gatiṃ niyamentīti dasseti, paṭisandhiggahaṇaṃ aniyataṃ kevalassa kammassa vasenāti adhippāyo. Kāmañcettha ‘‘kammaṃ katvā’’ti vuttaṃ, kammāyūhanato pana pageva patthanaṃ ṭhapetumpi vaṭṭatiyeva. Kammaṃ katvāti cettha ‘‘tāpetvā bhuñjati, bhutvā sayatī’’tiādīsu viya na kālaniyamo, kammaṃ katvā yadā kadāci patthanaṃ kātuṃ vaṭṭatīti ca idaṃ cārittadassanaṃ viya vuttaṃ. Yathā hi bhavapatthanā yāva maggena na samucchijjati, tāva anuppannābhinavakatūpacitassa kammassa paccayo hotiyeva. Puna tathā visesapaccayo, yathā niyametvā uppāditā. Tena vuttaṃ – ‘‘yassa pañca dhammā atthi, na patthanā tassa gati anibaddhā’’ti.
165. ஸப்³ப³ஸோவாதி ‘‘இத³ங் காளகங் ஸாமங் ஸேதங் ஹரிதங் மண்ட³லங் அபரிமண்ட³லங் சதுரங்ஸங் பரிபுண்ணங் கு²த்³த³கங் மஹந்த’’ந்திஆதி³னா ஸப்³ப³ஸோவ பாகடங் ஹோதி.
165.Sabbasovāti ‘‘idaṃ kāḷakaṃ sāmaṃ setaṃ haritaṃ maṇḍalaṃ aparimaṇḍalaṃ caturaṃsaṃ paripuṇṇaṃ khuddakaṃ mahanta’’ntiādinā sabbasova pākaṭaṃ hoti.
167. ஸுந்த³ரோதி காளகாதி³தோ³ஸரஹிததாய ஸோப⁴னோ. ஆகரஸம்பன்னோ ஸம்பன்னஆகருப்பத்தியா. தோ⁴வனாதீ³ஹீதி தோ⁴வனதாபனமஜ்ஜனாதீ³ஹி.
167.Sundaroti kāḷakādidosarahitatāya sobhano. Ākarasampanno sampannaākaruppattiyā. Dhovanādīhīti dhovanatāpanamajjanādīhi.
168. லோகதா⁴தூனங் ஸதஸஹஸ்ஸங் அத்தனோ வஸே வத்தனதோ ஸதஸஹஸ்ஸோ. தஸ்ஸ பன தத்த² ஓபா⁴ஸகரணங் பாகடந்தி ஆஹ ‘‘ஆலோகப²ரணப்³ரஹ்மா’’தி. அயமேவ நயோ ஹெட்டா² ‘‘ஸஹஸ்ஸோ ப்³ரஹ்மா’’திஆதீ³ஸுபி. நிக்கே²ன கதந்தி நிக்க²பரிமாணேன ஜம்போ³னதே³ன கதங். நிக்க²ங் பன வீஸதிஸுவண்ணந்தி கேசி. பஞ்சவீஸதிஸுவண்ணந்தி அபரே. ஸுவண்ணங் நாம சதுத⁴ரணந்தி வத³ந்தி. க⁴ட்டனமஜ்ஜனக்க²மங் ந ஹோதி பரித்தபா⁴வதோ. அதிரேகேனாதி பஞ்சஸுவண்ணஅதிரேகேன நிக்க²ப்பமாணங் அஸம்பத்தேன. வண்ணவந்தங் பன ந ஹோதி அவிபுலதாய உளாரங் ஹுத்வா அனுபட்டா²னதோ. அவண்ணவந்ததாய ஏவ ப²ருஸதா⁴துகங் கா²யதி. தாஸூதி தாஸு பூ⁴மீஸு, யத்த² ஸாகா² வட்³டி⁴த்வா டி²தா. தேதி ஸுவண்ணங்குரா. பசித்வாதி தாபெத்வா. ஸம்பஹட்ட²ந்தி ஸமுஜ்ஜலீகதந்தி ஆஹ – ‘‘தோ⁴தக⁴ட்டிதபமஜ்ஜித’’ந்தி, தம்ப³மத்திகலேபங் கத்வா தோ⁴தஞ்சேவ பாஸாணாதி³னா க⁴ட்டிதஞ்ச ஏளகலோமாதி³னா பமஜ்ஜிதஞ்சாதி அத்தோ².
168. Lokadhātūnaṃ satasahassaṃ attano vase vattanato satasahasso. Tassa pana tattha obhāsakaraṇaṃ pākaṭanti āha ‘‘ālokapharaṇabrahmā’’ti. Ayameva nayo heṭṭhā ‘‘sahasso brahmā’’tiādīsupi. Nikkhena katanti nikkhaparimāṇena jambonadena kataṃ. Nikkhaṃ pana vīsatisuvaṇṇanti keci. Pañcavīsatisuvaṇṇanti apare. Suvaṇṇaṃ nāma catudharaṇanti vadanti. Ghaṭṭanamajjanakkhamaṃ na hoti parittabhāvato. Atirekenāti pañcasuvaṇṇaatirekena nikkhappamāṇaṃ asampattena. Vaṇṇavantaṃ pana na hoti avipulatāya uḷāraṃ hutvā anupaṭṭhānato. Avaṇṇavantatāya eva pharusadhātukaṃ khāyati. Tāsūti tāsu bhūmīsu, yattha sākhā vaḍḍhitvā ṭhitā. Teti suvaṇṇaṅkurā. Pacitvāti tāpetvā. Sampahaṭṭhanti samujjalīkatanti āha – ‘‘dhotaghaṭṭitapamajjita’’nti, tambamattikalepaṃ katvā dhotañceva pāsāṇādinā ghaṭṭitañca eḷakalomādinā pamajjitañcāti attho.
ஏததே³வாதி ஆலோகங் வட்³டெ⁴த்வா எத்த² ஆலோகப²ரணமேவ. அத² வா யங் தி³ப்³ப³சக்கு²ப²ரணங், ஆலோகப²ரணம்பி ஏததே³வ. யத்தகஞ்ஹி டா²னங் யோகீ³ கஸிணாலோகேன ப²ரதி; தத்தகங் டா²னங் தி³ப்³ப³சக்கு²ஞாணங் பு²ஸதீதி தி³ப்³ப³சக்கு²ப²ரணே த³ஸ்ஸிதே ஆலோகப²ரணங் த³ஸ்ஸிதமேவாதி அத்தோ². ஸப்³ப³த்தா²தி ஸப்³ப³ஸ்மிங் ‘‘ப²ரித்வா’’தி ஆக³தட்டா²னே. அவினாஸெந்தேனாதி அஸம்பி⁴ன்னேன.
Etadevāti ālokaṃ vaḍḍhetvā ettha ālokapharaṇameva. Atha vā yaṃ dibbacakkhupharaṇaṃ, ālokapharaṇampi etadeva. Yattakañhi ṭhānaṃ yogī kasiṇālokena pharati; tattakaṃ ṭhānaṃ dibbacakkhuñāṇaṃ phusatīti dibbacakkhupharaṇe dassite ālokapharaṇaṃ dassitamevāti attho. Sabbatthāti sabbasmiṃ ‘‘pharitvā’’ti āgataṭṭhāne. Avināsentenāti asambhinnena.
கஸிணப²ரணங் வியாதி கஸிணோபா⁴ஸேன ப²ரணங் விய தி³ஸ்ஸதி உபட்டா²தி, மணிபபா⁴ப²ரணஸ்ஸ விய ப்³ரஹ்மலோகே தா⁴துப²ரணஸ்ஸ த³ஸ்ஸிதத்தாதி அதி⁴ப்பாயோ. ஸரீரபபா⁴ பன நிக்க²பபா⁴ஸதி³ஸாதி, ‘‘நிக்கோ²பம்மே ஸரீரப²ரணங் விய தி³ஸ்ஸதீ’’தி வுத்தங். அட்ட²கதா² நாம நத்தீ²தி பாளிபத³ஸ்ஸ அத்த²வண்ணனாய நாம நிச்சி²தாய ப⁴விதப்³ப³ங், அவினிச்சி²தாய பன நத்தி² வியாதி அகத²னங் நாம அட்ட²கதா²ய அனாசிண்ணந்தி தஸ்ஸ வாத³ங் படிக்கி²பித்வா. யதா² ஹி வத்தப்³ப³ங், ததா² அவத்வா ‘‘வியா’’தி வசனங் கிமத்தி²யந்தி அதி⁴ப்பாயோ. பு³த்³தா⁴னங் ப்³யாமப்பபா⁴ ப்³யாமப்பதே³ஸே ஸப்³ப³காலங் அதி⁴ட்டா²தி விய தஸ்ஸ ப்³ரஹ்முனோ ஸரீரப²ரணங் ஸரீராபா⁴ய பத்த²ரணங் ஸப்³ப³காலிகங். சத்தாரிமானி இதரானி ப²ரணானி அவினாஸெத்வா அஞ்ஞமஞ்ஞமபி⁴ந்தி³த்வா கதே²தப்³ப³ங். ப²ரணபத³ஸ்ஸேவ வேவசனங் ‘‘அதி⁴முச்சனேனேவ ப²ரண’’ந்தி. பத்த²ரதீதி யதா²வுத்தங் ப²ரணவஸேன பத்த²ரதி. ஜானாதீதி அதி⁴முச்சனவஸேன ஜானாதி.
Kasiṇapharaṇaṃviyāti kasiṇobhāsena pharaṇaṃ viya dissati upaṭṭhāti, maṇipabhāpharaṇassa viya brahmaloke dhātupharaṇassa dassitattāti adhippāyo. Sarīrapabhā pana nikkhapabhāsadisāti, ‘‘nikkhopamme sarīrapharaṇaṃ viya dissatī’’ti vuttaṃ. Aṭṭhakathā nāma natthīti pāḷipadassa atthavaṇṇanāya nāma nicchitāya bhavitabbaṃ, avinicchitāya pana natthi viyāti akathanaṃ nāma aṭṭhakathāya anāciṇṇanti tassa vādaṃ paṭikkhipitvā. Yathā hi vattabbaṃ, tathā avatvā ‘‘viyā’’ti vacanaṃ kimatthiyanti adhippāyo. Buddhānaṃ byāmappabhā byāmappadese sabbakālaṃ adhiṭṭhāti viya tassa brahmuno sarīrapharaṇaṃ sarīrābhāya pattharaṇaṃ sabbakālikaṃ. Cattārimāni itarāni pharaṇāni avināsetvā aññamaññamabhinditvā kathetabbaṃ. Pharaṇapadasseva vevacanaṃ ‘‘adhimuccaneneva pharaṇa’’nti. Pattharatīti yathāvuttaṃ pharaṇavasena pattharati. Jānātīti adhimuccanavasena jānāti.
169. ஆத³யோதி ஆதி³-ஸத்³தே³ன ஸுபே⁴ ஸங்க³ண்ஹாதி. ஆபா⁴தி து³தியஜ்ஜா²னபூ⁴மிகே தே³வே ஏகஜ்ஜ²ங் க³ஹெத்வா ஸாதா⁴ரணதோ வுத்தங். ததோ ஸுபா⁴தி ததியஜ்ஜா²னபூ⁴மிகே. தேனாஹ – ‘‘பாடியேக்கா தே³வா நத்தீ²’’திஆதி³. ஸாதா⁴ரணதோ கதாயபி பத்த²னாய ஜா²னங்க³ங் பரித்தங் பா⁴விதஞ்சே, பரித்தாபே⁴ஸு உபபத்தி ஹோதி, மஜ்ஜி²மஞ்சே, அப்பமாணாபே⁴ஸு, பணீதஞ்சே, ஆப⁴ஸ்ஸரேஸு உபபத்தி ஹோதீதி த³ட்ட²ப்³ப³ங். ஸுபா⁴தி எத்தா²பி ஏஸேவ நயோ. ஹெட்டா² வுத்தனயேனேவ ஸுவிஞ்ஞெய்யோதி ஆஹ – ‘‘வேஹப்ப²லாதி³வாரா பாகடாயேவா’’தி.
169.Ādayoti ādi-saddena subhe saṅgaṇhāti. Ābhāti dutiyajjhānabhūmike deve ekajjhaṃ gahetvā sādhāraṇato vuttaṃ. Tato subhāti tatiyajjhānabhūmike. Tenāha – ‘‘pāṭiyekkā devā natthī’’tiādi. Sādhāraṇato katāyapi patthanāya jhānaṅgaṃ parittaṃ bhāvitañce, parittābhesu upapatti hoti, majjhimañce, appamāṇābhesu, paṇītañce, ābhassaresu upapatti hotīti daṭṭhabbaṃ. Subhāti etthāpi eseva nayo. Heṭṭhā vuttanayeneva suviññeyyoti āha – ‘‘vehapphalādivārā pākaṭāyevā’’ti.
காமாவசரேஸு நிப்³ப³த்ததூதிஆதி³னா ஸத்³தா⁴தீ³னங் அஜ்ஜா²னவிபஸ்ஸனானங் கத²ங் தத³தி⁴ட்டா²னங் ஹோதீதி ஆஸங்கதி. இதரோ ஸத்³தா⁴தீ³னங் அஜ்ஜா²னஸபா⁴வத்தேபி ஜா²னவிபஸ்ஸனானங் அதி⁴ட்டா²னங் நிஸ்ஸயபச்சயாதி³வஸேன ஸப்பச்சயத்தா ப்³ரஹ்மலோகூபபத்திங் நிப்³பா³னஞ்ச ஆவஹந்தீதி த³ஸ்ஸெந்தோ, ‘‘இமே பஞ்ச த⁴ம்மா’’திஆதி³மாஹ . தத்த² ஸீலந்தி ஸம்பா⁴ரஸீலங். அனாகா³மீ ஸமுச்சி²ன்னஓரம்பா⁴கி³யஸங்யோஜனோ ஸமானோ ஸசே ஸப்³ப³ஸோ உபபத்தியோ அதிக்கமிதுங் ந ஸக்கோதி, அரியபூ⁴மீஸு ஏவ நிப்³ப³த்ததி யதூ²பசிதஜா²னகம்முனாதி ஆஹ – ‘‘அனாகா³மி…பே॰… நிப்³ப³த்ததீ’’தி. உபரிமக்³க³ந்தி அக்³க³மக்³க³ங் பா⁴வெத்வா. ஆஸவக்க²யந்தி ஸப்³ப³ஸோ ஆஸவானங் க²யங் பஹானங் பாபுணாதி. ஸேஸங் ஸுவிஞ்ஞெய்யமேவ.
Kāmāvacaresu nibbattatūtiādinā saddhādīnaṃ ajjhānavipassanānaṃ kathaṃ tadadhiṭṭhānaṃ hotīti āsaṅkati. Itaro saddhādīnaṃ ajjhānasabhāvattepi jhānavipassanānaṃ adhiṭṭhānaṃ nissayapaccayādivasena sappaccayattā brahmalokūpapattiṃ nibbānañca āvahantīti dassento, ‘‘ime pañca dhammā’’tiādimāha . Tattha sīlanti sambhārasīlaṃ. Anāgāmī samucchinnaorambhāgiyasaṃyojano samāno sace sabbaso upapattiyo atikkamituṃ na sakkoti, ariyabhūmīsu eva nibbattati yathūpacitajhānakammunāti āha – ‘‘anāgāmi…pe… nibbattatī’’ti. Uparimagganti aggamaggaṃ bhāvetvā. Āsavakkhayanti sabbaso āsavānaṃ khayaṃ pahānaṃ pāpuṇāti. Sesaṃ suviññeyyameva.
ஸங்கா²ருபபத்திஸுத்தவண்ணனாய லீனத்த²ப்பகாஸனா ஸமத்தா.
Saṅkhārupapattisuttavaṇṇanāya līnatthappakāsanā samattā.
நிட்டி²தா ச அனுபத³வக்³க³வண்ணனா.
Niṭṭhitā ca anupadavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. ஸங்கா²ருபபத்திஸுத்தங் • 10. Saṅkhārupapattisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. ஸங்கா²ருபபத்திஸுத்தவண்ணனா • 10. Saṅkhārupapattisuttavaṇṇanā
