| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
১০. সঙ্খারুপপত্তিসুত্তৰণ্ণনা
10. Saṅkhārupapattisuttavaṇṇanā
১৬০. এৰং মে সুতন্তি সঙ্খারুপপত্তিসুত্তং। তত্থ সঙ্খারুপপত্তিন্তি সঙ্খারানংযেৰ উপপত্তিং, ন সত্তস্স, ন পোসস্স, পুঞ্ঞাভিসঙ্খারেন ৰা ভৰূপগক্খন্ধানং উপপত্তিং।
160.Evaṃme sutanti saṅkhārupapattisuttaṃ. Tattha saṅkhārupapattinti saṅkhārānaṃyeva upapattiṃ, na sattassa, na posassa, puññābhisaṅkhārena vā bhavūpagakkhandhānaṃ upapattiṃ.
১৬১. সদ্ধায সমন্নাগতোতি সদ্ধাদযো পঞ্চ ধম্মা লোকিকা ৰট্টন্তি। দহতীতি ঠপেতি। অধিট্ঠাতীতি পতিট্ঠাপেতি। সঙ্খারা চ ৰিহারা চাতি সহ পত্থনায সদ্ধাদযোৰ পঞ্চ ধম্মা। তত্রুপপত্তিযাতি তস্মিং ঠানে নিব্বত্তনত্থায। অযং মগ্গো অযং পটিপদাতি সহ পত্থনায পঞ্চ ধম্মাৰ। যস্স হি পঞ্চ ধম্মা অত্থি, ন পত্থনা, তস্স গতি অনিবদ্ধা। যস্স পত্থনা অত্থি, ন পঞ্চ ধম্মা, তস্সপি অনিবদ্ধা। যেসং উভযং অত্থি, তেসং গতি নিবদ্ধা। যথা হি আকাসে খিত্তদণ্ডো অগ্গেন ৰা মজ্ঝেন ৰা মূলেন ৰা নিপতিস্সতীতি নিযমো নত্থি, এৰং সত্তানং পটিসন্ধিগ্গহণং অনিযতং। তস্মা কুসলং কম্মং কত্ৰা একস্মিং ঠানে পত্থনং কাতুং ৰট্টতি।
161.Saddhāya samannāgatoti saddhādayo pañca dhammā lokikā vaṭṭanti. Dahatīti ṭhapeti. Adhiṭṭhātīti patiṭṭhāpeti. Saṅkhārā ca vihārā cāti saha patthanāya saddhādayova pañca dhammā. Tatrupapattiyāti tasmiṃ ṭhāne nibbattanatthāya. Ayaṃ maggo ayaṃ paṭipadāti saha patthanāya pañca dhammāva. Yassa hi pañca dhammā atthi, na patthanā, tassa gati anibaddhā. Yassa patthanā atthi, na pañca dhammā, tassapi anibaddhā. Yesaṃ ubhayaṃ atthi, tesaṃ gati nibaddhā. Yathā hi ākāse khittadaṇḍo aggena vā majjhena vā mūlena vā nipatissatīti niyamo natthi, evaṃ sattānaṃ paṭisandhiggahaṇaṃ aniyataṃ. Tasmā kusalaṃ kammaṃ katvā ekasmiṃ ṭhāne patthanaṃ kātuṃ vaṭṭati.
১৬৫. আমণ্ডন্তি আমলকং। যথা তং পরিসুদ্ধচক্খুস্স পুরিসস্স সব্বসোৰ পাকটং হোতি, এৰং তস্স ব্রহ্মুনো সদ্ধিং তত্থ নিব্বত্তসত্তেহি সহস্সী লোকধাতু। এস নযো সব্বত্থ।
165.Āmaṇḍanti āmalakaṃ. Yathā taṃ parisuddhacakkhussa purisassa sabbasova pākaṭaṃ hoti, evaṃ tassa brahmuno saddhiṃ tattha nibbattasattehi sahassī lokadhātu. Esa nayo sabbattha.
১৬৭. সুভোতি সুন্দরো। জাতিমাতি আকরসম্পন্নো। সুপরিকম্মকতোতি ধোৰনাদীহি সুট্ঠুকতপরিকম্মো। পণ্ডুকম্বলে নিক্খিত্তোতি রত্তকম্বলে ঠপিতো।
167.Subhoti sundaro. Jātimāti ākarasampanno. Suparikammakatoti dhovanādīhi suṭṭhukataparikammo. Paṇḍukambale nikkhittoti rattakambale ṭhapito.
১৬৮. সতসহস্সোতি লোকধাতুসতসহস্সম্হি আলোকফরণব্রহ্মা। নিক্খন্তি নিক্খেন কতং পিল়ন্ধনং, নিক্খং নাম পঞ্চসুৰণ্ণং, ঊনকনিক্খেন কতং পসাধনঞ্হি ঘট্টনমজ্জনক্খমং ন হোতি, অতিরেকেন কতং ঘট্টনমজ্জনং খমতি, ৰণ্ণৰন্তং পন ন হোতি, ফরুসধাতুকং খাযতি। নিক্খেন কতং ঘট্টনমজ্জনঞ্চেৰ খমতি, ৰণ্ণৰন্তঞ্চ হোতি। জম্বোনদন্তি জম্বুনদিযং নিব্বত্তং। মহাজম্বুরুক্খস্স হি একেকা সাখা পণ্ণাস পণ্ণাস যোজনানি ৰড্ঢিতা, তাসু মহন্তা নদিযো সন্দন্তি, তাসং নদীনং উভযতীরেসু জম্বুপক্কানং পতিতট্ঠানে সুৰণ্ণঙ্কুরা উট্ঠহন্তি, তে নদীজলেন ৰুয্হমানা অনুপুব্বেন মহাসমুদ্দং পৰিসন্তি। তং সন্ধায জম্বোনদন্তি ৰুত্তং। দক্খকম্মারপুত্তউক্কামুখসুকুসলসম্পহট্ঠন্তি দক্খেন সুকুসলেন কম্মারপুত্তেন উক্কামুখে পচিত্ৰা সম্পহট্ঠং। উক্কামুখেতি উদ্ধনে। সম্পহট্ঠন্তি ধোতঘট্টিতমজ্জিতং। ৰত্থোপমে (ম॰ নি॰ ১.৭৫-৭৬) চ ধাতুৰিভঙ্গে (ম॰ নি॰ ৩.৩৫৭-৩৬০) চ পিণ্ডসোধনং ৰুত্তং। ইমস্মিং সুত্তে কতভণ্ডসোধনং ৰুত্তং।
168.Satasahassoti lokadhātusatasahassamhi ālokapharaṇabrahmā. Nikkhanti nikkhena kataṃ piḷandhanaṃ, nikkhaṃ nāma pañcasuvaṇṇaṃ, ūnakanikkhena kataṃ pasādhanañhi ghaṭṭanamajjanakkhamaṃ na hoti, atirekena kataṃ ghaṭṭanamajjanaṃ khamati, vaṇṇavantaṃ pana na hoti, pharusadhātukaṃ khāyati. Nikkhena kataṃ ghaṭṭanamajjanañceva khamati, vaṇṇavantañca hoti. Jambonadanti jambunadiyaṃ nibbattaṃ. Mahājamburukkhassa hi ekekā sākhā paṇṇāsa paṇṇāsa yojanāni vaḍḍhitā, tāsu mahantā nadiyo sandanti, tāsaṃ nadīnaṃ ubhayatīresu jambupakkānaṃ patitaṭṭhāne suvaṇṇaṅkurā uṭṭhahanti, te nadījalena vuyhamānā anupubbena mahāsamuddaṃ pavisanti. Taṃ sandhāya jambonadanti vuttaṃ. Dakkhakammāraputtaukkāmukhasukusalasampahaṭṭhanti dakkhena sukusalena kammāraputtena ukkāmukhe pacitvā sampahaṭṭhaṃ. Ukkāmukheti uddhane. Sampahaṭṭhanti dhotaghaṭṭitamajjitaṃ. Vatthopame (ma. ni. 1.75-76) ca dhātuvibhaṅge (ma. ni. 3.357-360) ca piṇḍasodhanaṃ vuttaṃ. Imasmiṃ sutte katabhaṇḍasodhanaṃ vuttaṃ.
যং পন সব্বৰারেসু ফরিত্ৰা অধিমুচ্চিত্ৰাতি ৰুত্তং, তত্থ পঞ্চৰিধং ফরণং চেতোফরণং কসিণফরণং দিব্বচক্খুফরণং আলোকফরণং সরীরফরণন্তি। তত্থ চেতোফরণং নাম লোকধাতুসহস্সে সত্তানং চিত্তজাননং। কসিণফরণং নাম লোকধাতুসহস্সে কসিণপত্থরণং। দিব্বচক্খুফরণং নাম আলোকং ৰড্ঢেত্ৰা দিব্বেন চক্খুনা সহস্সলোকধাতুদস্সনং। আলোকফরণম্পি এতদেৰ। সরীরফরণং নাম লোকধাতুসহস্সে সরীরপভায পত্থরণং। সব্বত্থ ইমানি পঞ্চ ফরণানি অৰিনাসেন্তেন কথেতব্বন্তি।
Yaṃ pana sabbavāresu pharitvā adhimuccitvāti vuttaṃ, tattha pañcavidhaṃ pharaṇaṃ cetopharaṇaṃ kasiṇapharaṇaṃ dibbacakkhupharaṇaṃ ālokapharaṇaṃ sarīrapharaṇanti. Tattha cetopharaṇaṃ nāma lokadhātusahasse sattānaṃ cittajānanaṃ. Kasiṇapharaṇaṃ nāma lokadhātusahasse kasiṇapattharaṇaṃ. Dibbacakkhupharaṇaṃ nāma ālokaṃ vaḍḍhetvā dibbena cakkhunā sahassalokadhātudassanaṃ. Ālokapharaṇampi etadeva. Sarīrapharaṇaṃ nāma lokadhātusahasse sarīrapabhāya pattharaṇaṃ. Sabbattha imāni pañca pharaṇāni avināsentena kathetabbanti.
তিপিটকচূল়াভযত্থেরো পনাহ – ‘‘মণিওপম্মে কসিণফরণং ৰিয নিক্খোপম্মে সরীরফরণং ৰিয দিস্সতী’’তি। তস্স ৰাদং ৰিয অট্ঠকথা নাম নত্থীতি পটিক্খিত্ৰা সরীরফরণং ন সব্বকালিকং, চত্তারিমানি ফরণানি অৰিনাসেত্ৰাৰ কথেতব্বন্তি ৰুত্তং। অধিমুচ্চতীতি পদং ফরণপদস্সেৰ ৰেৰচনং, অথ ৰা ফরতীতি পত্থরতি। অধিমুচ্চতীতি জানাতি।
Tipiṭakacūḷābhayatthero panāha – ‘‘maṇiopamme kasiṇapharaṇaṃ viya nikkhopamme sarīrapharaṇaṃ viya dissatī’’ti. Tassa vādaṃ viya aṭṭhakathā nāma natthīti paṭikkhitvā sarīrapharaṇaṃ na sabbakālikaṃ, cattārimāni pharaṇāni avināsetvāva kathetabbanti vuttaṃ. Adhimuccatīti padaṃ pharaṇapadasseva vevacanaṃ, atha vā pharatīti pattharati. Adhimuccatīti jānāti.
১৬৯. আভাতিআদীসু আভাদযো নাম পাটিযেক্কা দেৰা নত্থি, তযো পরিত্তাভাদযো দেৰা আভা নাম, পরিত্তাসুভাদযো চ। সুভকিণ্হাদযো চ সুভা নাম। ৰেহপ্ফলাদিৰারা পাকটাযেৰ।
169.Ābhātiādīsu ābhādayo nāma pāṭiyekkā devā natthi, tayo parittābhādayo devā ābhā nāma, parittāsubhādayo ca. Subhakiṇhādayo ca subhā nāma. Vehapphalādivārā pākaṭāyeva.
ইমে তাৰ পঞ্চ ধম্মে ভাৰেত্ৰা কামাৰচরেসু নিব্বত্ততু। ব্রহ্মলোকে নিব্বত্তং পন আসৰক্খযঞ্চ কথং পাপুণাতীতি? ইমে পঞ্চ ধম্মা সীলং, সো ইমস্মিং সীলে পতিট্ঠায কসিণপরিকম্মং কত্ৰা তা তা সমাপত্তিযো ভাৰেত্ৰা রূপীব্রহ্মলোকে নিব্বত্ততি, অরূপজ্ঝানানি নিব্বত্তেত্ৰা অরূপীব্রহ্মলোকে, সমাপত্তিপদট্ঠানং ৰিপস্সনং ৰড্ঢেত্ৰা অনাগামিফলং সচ্ছিকত্ৰা পঞ্চসু সুদ্ধাৰাসেসু নিব্বত্ততি। উপরিমগ্গং ভাৰেত্ৰা আসৰক্খযং পাপুণাতীতি।
Ime tāva pañca dhamme bhāvetvā kāmāvacaresu nibbattatu. Brahmaloke nibbattaṃ pana āsavakkhayañca kathaṃ pāpuṇātīti? Ime pañca dhammā sīlaṃ, so imasmiṃ sīle patiṭṭhāya kasiṇaparikammaṃ katvā tā tā samāpattiyo bhāvetvā rūpībrahmaloke nibbattati, arūpajjhānāni nibbattetvā arūpībrahmaloke, samāpattipadaṭṭhānaṃ vipassanaṃ vaḍḍhetvā anāgāmiphalaṃ sacchikatvā pañcasu suddhāvāsesu nibbattati. Uparimaggaṃ bhāvetvā āsavakkhayaṃ pāpuṇātīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
সঙ্খারুপপত্তিসুত্তৰণ্ণনা নিট্ঠিতা।
Saṅkhārupapattisuttavaṇṇanā niṭṭhitā.
দুতিযৰগ্গৰণ্ণনা নিট্ঠিতা।
Dutiyavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১০. সঙ্খারুপপত্তিসুত্তং • 10. Saṅkhārupapattisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১০. সঙ্খারুপপত্তিসুত্তৰণ্ণনা • 10. Saṅkhārupapattisuttavaṇṇanā
