| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೯. ಸಙ್ಖಾರುಪೇಕ್ಖಾಞಾಣನಿದ್ದೇಸೋ
9. Saṅkhārupekkhāñāṇaniddeso
೫೪. ಕಥಂ ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ 1 ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ? ಉಪ್ಪಾದಂ ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ 2 ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ, ಪವತ್ತಂ ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ, ನಿಮಿತ್ತಂ ಮುಞ್ಚಿತುಕಮ್ಯತಾ…ಪೇ॰… ಆಯೂಹನಂ ಮುಞ್ಚಿತುಕಮ್ಯತಾ… ಪಟಿಸನ್ಧಿಂ ಮುಞ್ಚಿತುಕಮ್ಯತಾ… ಗತಿಂ ಮುಞ್ಚಿತುಕಮ್ಯತಾ… ನಿಬ್ಬತ್ತಿಂ ಮುಞ್ಚಿತುಕಮ್ಯತಾ… ಉಪಪತ್ತಿಂ ಮುಞ್ಚಿತುಕಮ್ಯತಾ… ಜಾತಿಂ ಮುಞ್ಚಿತುಕಮ್ಯತಾ… ಜರಂ ಮುಞ್ಚಿತುಕಮ್ಯತಾ… ಬ್ಯಾಧಿಂ ಮುಞ್ಚಿತುಕಮ್ಯತಾ… ಮರಣಂ ಮುಞ್ಚಿತುಕಮ್ಯತಾ… ಸೋಕಂ ಮುಞ್ಚಿತುಕಮ್ಯತಾ… ಪರಿದೇವಂ ಮುಞ್ಚಿತುಕಮ್ಯತಾ…ಪೇ॰… ಉಪಾಯಾಸಂ ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ।
54. Kathaṃ muñcitukamyatāpaṭisaṅkhāsantiṭṭhanā 3 paññā saṅkhārupekkhāsu ñāṇaṃ? Uppādaṃ muñcitukamyatāpaṭisaṅkhāsantiṭṭhanā 4 paññā saṅkhārupekkhāsu ñāṇaṃ, pavattaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ, nimittaṃ muñcitukamyatā…pe… āyūhanaṃ muñcitukamyatā… paṭisandhiṃ muñcitukamyatā… gatiṃ muñcitukamyatā… nibbattiṃ muñcitukamyatā… upapattiṃ muñcitukamyatā… jātiṃ muñcitukamyatā… jaraṃ muñcitukamyatā… byādhiṃ muñcitukamyatā… maraṇaṃ muñcitukamyatā… sokaṃ muñcitukamyatā… paridevaṃ muñcitukamyatā…pe… upāyāsaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ಉಪ್ಪಾದೋ ದುಕ್ಖನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಪವತ್ತಂ ದುಕ್ಖನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ…ಪೇ॰… ಉಪಾಯಾಸೋ ದುಕ್ಖನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ।
Uppādo dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ಉಪ್ಪಾದೋ ಭಯನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಪವತ್ತಂ ಭಯನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ…ಪೇ॰… ಉಪಾಯಾಸೋ ಭಯನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ।
Uppādo bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ಉಪ್ಪಾದೋ ಸಾಮಿಸನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಪವತ್ತಂ ಸಾಮಿಸನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ…ಪೇ॰… ಉಪಾಯಾಸೋ ಸಾಮಿಸನ್ತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ।
Uppādo sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ಉಪ್ಪಾದೋ ಸಙ್ಖಾರಾತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಪವತ್ತಂ ಸಙ್ಖಾರಾತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ…ಪೇ॰… ಉಪಾಯಾಸೋ ಸಙ್ಖಾರಾತಿ – ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ।
Uppādo saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ಉಪ್ಪಾದೋ ಸಙ್ಖಾರಾ, ತೇ ಸಙ್ಖಾರೇ ಅಜ್ಝುಪೇಕ್ಖತೀತಿ – ಸಙ್ಖಾರುಪೇಕ್ಖಾ। ಯೇ ಚ ಸಙ್ಖಾರಾ ಯಾ ಚ ಉಪೇಕ್ಖಾ ಉಭೋಪೇತೇ ಸಙ್ಖಾರಾ, ತೇ ಸಙ್ಖಾರೇ ಅಜ್ಝುಪೇಕ್ಖತೀತಿ – ಸಙ್ಖಾರುಪೇಕ್ಖಾ। ಪವತ್ತಂ ಸಙ್ಖಾರಾ…ಪೇ॰… ನಿಮಿತ್ತಂ ಸಙ್ಖಾರಾ… ಆಯೂಹನಾ ಸಙ್ಖಾರಾ… ಪಟಿಸನ್ಧಿ ಸಙ್ಖಾರಾ… ಗತಿ ಸಙ್ಖಾರಾ… ನಿಬ್ಬತ್ತಿ ಸಙ್ಖಾರಾ… ಉಪಪತ್ತಿ ಸಙ್ಖಾರಾ… ಜಾತಿ ಸಙ್ಖಾರಾ… ಜರಾ ಸಙ್ಖಾರಾ… ಬ್ಯಾಧಿ ಸಙ್ಖಾರಾ… ಮರಣಂ ಸಙ್ಖಾರಾ… ಸೋಕೋ ಸಙ್ಖಾರಾ… ಪರಿದೇವೋ ಸಙ್ಖಾರಾ…ಪೇ॰… ಉಪಾಯಾಸೋ ಸಙ್ಖಾರಾ, ತೇ ಸಙ್ಖಾರೇ ಅಜ್ಝುಪೇಕ್ಖತೀತಿ – ಸಙ್ಖಾರುಪೇಕ್ಖಾ। ಯೇ ಚ ಸಙ್ಖಾರಾ ಯಾ ಚ ಉಪೇಕ್ಖಾ ಉಭೋಪೇತೇ ಸಙ್ಖಾರಾ, ತೇ ಸಙ್ಖಾರೇ ಅಜ್ಝುಪೇಕ್ಖತೀತಿ – ಸಙ್ಖಾರುಪೇಕ್ಖಾ।
Uppādo saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā. Pavattaṃ saṅkhārā…pe… nimittaṃ saṅkhārā… āyūhanā saṅkhārā… paṭisandhi saṅkhārā… gati saṅkhārā… nibbatti saṅkhārā… upapatti saṅkhārā… jāti saṅkhārā… jarā saṅkhārā… byādhi saṅkhārā… maraṇaṃ saṅkhārā… soko saṅkhārā… paridevo saṅkhārā…pe… upāyāso saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā.
೫೫. ಕತಿಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ಅಟ್ಠಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ। ಪುಥುಜ್ಜನಸ್ಸ ಕತಿಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ಸೇಕ್ಖಸ್ಸ ಕತಿಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ವೀತರಾಗಸ್ಸ ಕತಿಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ಪುಥುಜ್ಜನಸ್ಸ ದ್ವೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ। ಸೇಕ್ಖಸ್ಸ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ। ವೀತರಾಗಸ್ಸ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ।
55. Katihākārehi saṅkhārupekkhāya cittassa abhinīhāro hoti? Aṭṭhahākārehi saṅkhārupekkhāya cittassa abhinīhāro hoti. Puthujjanassa katihākārehi saṅkhārupekkhāya cittassa abhinīhāro hoti? Sekkhassa katihākārehi saṅkhārupekkhāya cittassa abhinīhāro hoti? Vītarāgassa katihākārehi saṅkhārupekkhāya cittassa abhinīhāro hoti? Puthujjanassa dvīhākārehi saṅkhārupekkhāya cittassa abhinīhāro hoti. Sekkhassa tīhākārehi saṅkhārupekkhāya cittassa abhinīhāro hoti. Vītarāgassa tīhākārehi saṅkhārupekkhāya cittassa abhinīhāro hoti.
ಪುಥುಜ್ಜನಸ್ಸ ಕತಮೇಹಿ ದ್ವೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ಪುಥುಜ್ಜನೋ ಸಙ್ಖಾರುಪೇಕ್ಖಂ ಅಭಿನನ್ದತಿ ವಾ ವಿಪಸ್ಸತಿ ವಾ। ಪುಥುಜ್ಜನಸ್ಸ ಇಮೇಹಿ ದ್ವೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ। ಸೇಕ್ಖಸ್ಸ ಕತಮೇಹಿ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ಸೇಕ್ಖೋ ಸಙ್ಖಾರುಪೇಕ್ಖಂ ಅಭಿನನ್ದತಿ ವಾ ವಿಪಸ್ಸತಿ ವಾ ಪಟಿಸಙ್ಖಾಯ ವಾ ಫಲಸಮಾಪತ್ತಿಂ ಸಮಾಪಜ್ಜತಿ। ಸೇಕ್ಖಸ್ಸ ಇಮೇಹಿ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ। ವೀತರಾಗಸ್ಸ ಕತಮೇಹಿ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ? ವೀತರಾಗೋ ಸಙ್ಖಾರುಪೇಕ್ಖಂ ವಿಪಸ್ಸತಿ ವಾ ಪಟಿಸಙ್ಖಾಯ ವಾ ಫಲಸಮಾಪತ್ತಿಂ ಸಮಾಪಜ್ಜತಿ, ತದಜ್ಝುಪೇಕ್ಖಿತ್ವಾ ಸುಞ್ಞತವಿಹಾರೇನ ವಾ ಅನಿಮಿತ್ತವಿಹಾರೇನ ವಾ ಅಪ್ಪಣಿಹಿತವಿಹಾರೇನ ವಾ ವಿಹರತಿ। ವೀತರಾಗಸ್ಸ ಇಮೇಹಿ ತೀಹಾಕಾರೇಹಿ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಹೋತಿ।
Puthujjanassa katamehi dvīhākārehi saṅkhārupekkhāya cittassa abhinīhāro hoti? Puthujjano saṅkhārupekkhaṃ abhinandati vā vipassati vā. Puthujjanassa imehi dvīhākārehi saṅkhārupekkhāya cittassa abhinīhāro hoti. Sekkhassa katamehi tīhākārehi saṅkhārupekkhāya cittassa abhinīhāro hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Sekkhassa imehi tīhākārehi saṅkhārupekkhāya cittassa abhinīhāro hoti. Vītarāgassa katamehi tīhākārehi saṅkhārupekkhāya cittassa abhinīhāro hoti? Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Vītarāgassa imehi tīhākārehi saṅkhārupekkhāya cittassa abhinīhāro hoti.
೫೬. ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಏಕತ್ತಂ ಹೋತಿ? ಪುಥುಜ್ಜನಸ್ಸ ಸಙ್ಖಾರುಪೇಕ್ಖಂ ಅಭಿನನ್ದತೋ ಚಿತ್ತಂ ಕಿಲಿಸ್ಸತಿ, ಭಾವನಾಯ ಪರಿಪನ್ಥೋ ಹೋತಿ, ಪಟಿವೇಧಸ್ಸ ಅನ್ತರಾಯೋ ಹೋತಿ, ಆಯತಿಂ ಪಟಿಸನ್ಧಿಯಾ ಪಚ್ಚಯೋ ಹೋತಿ। ಸೇಕ್ಖಸ್ಸಪಿ ಸಙ್ಖಾರುಪೇಕ್ಖಂ ಅಭಿನನ್ದತೋ ಚಿತ್ತಂ ಕಿಲಿಸ್ಸತಿ, ಭಾವನಾಯ ಪರಿಪನ್ಥೋ ಹೋತಿ, ಉತ್ತರಿಪಟಿವೇಧಸ್ಸ ಅನ್ತರಾಯೋ ಹೋತಿ, ಆಯತಿಂ ಪಟಿಸನ್ಧಿಯಾ ಪಚ್ಚಯೋ ಹೋತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಏಕತ್ತಂ ಹೋತಿ ಅಭಿನನ್ದಟ್ಠೇನ।
56. Kathaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti? Puthujjanassa saṅkhārupekkhaṃ abhinandato cittaṃ kilissati, bhāvanāya paripantho hoti, paṭivedhassa antarāyo hoti, āyatiṃ paṭisandhiyā paccayo hoti. Sekkhassapi saṅkhārupekkhaṃ abhinandato cittaṃ kilissati, bhāvanāya paripantho hoti, uttaripaṭivedhassa antarāyo hoti, āyatiṃ paṭisandhiyā paccayo hoti. Evaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti abhinandaṭṭhena.
ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಏಕತ್ತಂ ಹೋತಿ? ಪುಥುಜ್ಜನೋ ಸಙ್ಖಾರುಪೇಕ್ಖಂ ಅನಿಚ್ಚತೋಪಿ ದುಕ್ಖತೋಪಿ ಅನತ್ತತೋಪಿ ವಿಪಸ್ಸತಿ। ಸೇಕ್ಖೋಪಿ ಸಙ್ಖಾರುಪೇಕ್ಖಂ ಅನಿಚ್ಚತೋಪಿ ದುಕ್ಖತೋಪಿ ಅನತ್ತತೋಪಿ ವಿಪಸ್ಸತಿ। ವೀತರಾಗೋಪಿ ಸಙ್ಖಾರುಪೇಕ್ಖಂ ಅನಿಚ್ಚತೋಪಿ ದುಕ್ಖತೋಪಿ ಅನತ್ತತೋಪಿ ವಿಪಸ್ಸತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ಏಕತ್ತಂ ಹೋತಿ ಅನುಪಸ್ಸನಟ್ಠೇನ।
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti? Puthujjano saṅkhārupekkhaṃ aniccatopi dukkhatopi anattatopi vipassati. Sekkhopi saṅkhārupekkhaṃ aniccatopi dukkhatopi anattatopi vipassati. Vītarāgopi saṅkhārupekkhaṃ aniccatopi dukkhatopi anattatopi vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti anupassanaṭṭhena.
ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ? ಪುಥುಜ್ಜನಸ್ಸ ಸಙ್ಖಾರುಪೇಕ್ಖಾ ಕುಸಲಾ ಹೋತಿ। ಸೇಕ್ಖಸ್ಸಪಿ ಸಙ್ಖಾರುಪೇಕ್ಖಾ ಕುಸಲಾ ಹೋತಿ। ವೀತರಾಗಸ್ಸ ಸಙ್ಖಾರುಪೇಕ್ಖಾ ಅಬ್ಯಾಕತಾ ಹೋತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ ಕುಸಲಾಬ್ಯಾಕತಟ್ಠೇನ।
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kusalā hoti. Sekkhassapi saṅkhārupekkhā kusalā hoti. Vītarāgassa saṅkhārupekkhā abyākatā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti kusalābyākataṭṭhena.
ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ? ಪುಥುಜ್ಜನಸ್ಸ ಸಙ್ಖಾರುಪೇಕ್ಖಾ ಕಿಞ್ಚಿಕಾಲೇ ಸುವಿದಿತಾ ಹೋತಿ, ಕಿಞ್ಚಿಕಾಲೇ ನ ಸುವಿದಿತಾ ಹೋತಿ। ಸೇಕ್ಖಸ್ಸಪಿ ಸಙ್ಖಾರುಪೇಕ್ಖಾ ಕಿಞ್ಚಿಕಾಲೇ ಸುವಿದಿತಾ ಹೋತಿ, ಕಿಞ್ಚಿಕಾಲೇ ನ ಸುವಿದಿತಾ ಹೋತಿ। ವೀತರಾಗಸ್ಸ ಸಙ್ಖಾರುಪೇಕ್ಖಾ ಅಚ್ಚನ್ತಂ ಸುವಿದಿತಾ ಹೋತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ ವಿದಿತಟ್ಠೇನ ಚ ಅವಿದಿತಟ್ಠೇನ ಚ।
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kiñcikāle suviditā hoti, kiñcikāle na suviditā hoti. Sekkhassapi saṅkhārupekkhā kiñcikāle suviditā hoti, kiñcikāle na suviditā hoti. Vītarāgassa saṅkhārupekkhā accantaṃ suviditā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti viditaṭṭhena ca aviditaṭṭhena ca.
ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ? ಪುಥುಜ್ಜನೋ ಸಙ್ಖಾರುಪೇಕ್ಖಂ ಅತಿತ್ತತ್ತಾ ವಿಪಸ್ಸತಿ। ಸೇಕ್ಖೋಪಿ ಸಙ್ಖಾರುಪೇಕ್ಖಂ ಅತಿತ್ತತ್ತಾ ವಿಪಸ್ಸತಿ। ವೀತರಾಗೋ ಸಙ್ಖಾರುಪೇಕ್ಖಂ ತಿತ್ತತ್ತಾ ವಿಪಸ್ಸತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ ತಿತ್ತಟ್ಠೇನ ಚ ಅತಿತ್ತಟ್ಠೇನ ಚ।
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ atittattā vipassati. Sekkhopi saṅkhārupekkhaṃ atittattā vipassati. Vītarāgo saṅkhārupekkhaṃ tittattā vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti tittaṭṭhena ca atittaṭṭhena ca.
ಕಥಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ? ಪುಥುಜ್ಜನೋ ಸಙ್ಖಾರುಪೇಕ್ಖಂ ತಿಣ್ಣಂ ಸಂಯೋಜನಾನಂ ಪಹಾನಾಯ ಸೋತಾಪತ್ತಿಮಗ್ಗಂ ಪಟಿಲಾಭತ್ಥಾಯ ವಿಪಸ್ಸತಿ। ಸೇಕ್ಖೋ ಸಙ್ಖಾರುಪೇಕ್ಖಂ ತಿಣ್ಣಂ ಸಞ್ಞೋಜನಾನಂ ಪಹೀನತ್ತಾ ಉತ್ತರಿಪಟಿಲಾಭತ್ಥಾಯ ವಿಪಸ್ಸತಿ। ವೀತರಾಗೋ ಸಙ್ಖಾರುಪೇಕ್ಖಂ ಸಬ್ಬಕಿಲೇಸಾನಂ ಪಹೀನತ್ತಾ ದಿಟ್ಠಧಮ್ಮಸುಖವಿಹಾರತ್ಥಾಯ ವಿಪಸ್ಸತಿ। ಏವಂ ಪುಥುಜ್ಜನಸ್ಸ ಚ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ ಪಹೀನಟ್ಠೇನ ಚ ಅಪ್ಪಹೀನಟ್ಠೇನ ಚ।
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ tiṇṇaṃ saṃyojanānaṃ pahānāya sotāpattimaggaṃ paṭilābhatthāya vipassati. Sekkho saṅkhārupekkhaṃ tiṇṇaṃ saññojanānaṃ pahīnattā uttaripaṭilābhatthāya vipassati. Vītarāgo saṅkhārupekkhaṃ sabbakilesānaṃ pahīnattā diṭṭhadhammasukhavihāratthāya vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti pahīnaṭṭhena ca appahīnaṭṭhena ca.
ಕಥಂ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ? ಸೇಕ್ಖೋ ಸಙ್ಖಾರುಪೇಕ್ಖಂ ಅಭಿನನ್ದತಿ ವಾ ವಿಪಸ್ಸತಿ ವಾ ಪಟಿಸಙ್ಖಾಯ ವಾ ಫಲಸಮಾಪತ್ತಿಂ ಸಮಾಪಜ್ಜತಿ। ವೀತರಾಗೋ ಸಙ್ಖಾರುಪೇಕ್ಖಂ ವಿಪಸ್ಸತಿ ವಾ ಪಟಿಸಙ್ಖಾಯ ವಾ ಫಲಸಮಾಪತ್ತಿಂ ಸಮಾಪಜ್ಜತಿ, ತದಜ್ಝುಪೇಕ್ಖಿತ್ವಾ ಸುಞ್ಞತವಿಹಾರೇನ ವಾ ಅನಿಮಿತ್ತವಿಹಾರೇನ ವಾ ಅಪ್ಪಣಿಹಿತವಿಹಾರೇನ ವಾ ವಿಹರತಿ। ಏವಂ ಸೇಕ್ಖಸ್ಸ ಚ ವೀತರಾಗಸ್ಸ ಚ ಸಙ್ಖಾರುಪೇಕ್ಖಾಯ ಚಿತ್ತಸ್ಸ ಅಭಿನೀಹಾರೋ ನಾನತ್ತಂ ಹೋತಿ ವಿಹಾರಸಮಾಪತ್ತಟ್ಠೇನ।
Kathaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Evaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti vihārasamāpattaṭṭhena.
೫೭. ಕತಿ ಸಙ್ಖಾರುಪೇಕ್ಖಾ ಸಮಥವಸೇನ ಉಪ್ಪಜ್ಜನ್ತಿ? ಕತಿ ಸಙ್ಖಾರುಪೇಕ್ಖಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ? ಅಟ್ಠ ಸಙ್ಖಾರುಪೇಕ್ಖಾ ಸಮಥವಸೇನ ಉಪ್ಪಜ್ಜನ್ತಿ। ದಸ ಸಙ್ಖಾರುಪೇಕ್ಖಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ।
57. Kati saṅkhārupekkhā samathavasena uppajjanti? Kati saṅkhārupekkhā vipassanāvasena uppajjanti? Aṭṭha saṅkhārupekkhā samathavasena uppajjanti. Dasa saṅkhārupekkhā vipassanāvasena uppajjanti.
ಕತಮಾ ಅಟ್ಠ ಸಙ್ಖಾರುಪೇಕ್ಖಾ ಸಮಥವಸೇನ ಉಪ್ಪಜ್ಜನ್ತಿ? ಪಠಮಂ ಝಾನಂ ಪಟಿಲಾಭತ್ಥಾಯ ನೀವರಣೇ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ದುತಿಯಂ ಝಾನಂ ಪಟಿಲಾಭತ್ಥಾಯ ವಿತಕ್ಕವಿಚಾರೇ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ತತಿಯಂ ಝಾನಂ ಪಟಿಲಾಭತ್ಥಾಯ ಪೀತಿಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ । ಚತುತ್ಥಂ ಝಾನಂ ಪಟಿಲಾಭತ್ಥಾಯ ಸುಖದುಕ್ಖೇ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಆಕಾಸಾನಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ರೂಪಸಞ್ಞಂ ಪಟಿಘಸಞ್ಞಂ ನಾನತ್ತಸಞ್ಞಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ವಿಞ್ಞಾಣಞ್ಚಾಯತನಸಮಾಪತ್ತಿಂ ಪಟಿಲಾಭತ್ಥಾಯ ಆಕಾಸಾನಞ್ಚಾಯತನಸಞ್ಞಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಆಕಿಞ್ಚಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ವಿಞ್ಞಾಣಞ್ಚಾಯತನಸಞ್ಞಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ನೇವಸಞ್ಞಾನಾಸಞ್ಞಾಯತನಸಮಾಪತ್ತಿಂ ಪಟಿಲಾಭತ್ಥಾಯ ಆಕಿಞ್ಚಞ್ಞಾಯತನಸಞ್ಞಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಇಮಾ ಅಟ್ಠ ಸಙ್ಖಾರುಪೇಕ್ಖಾ ಸಮಥವಸೇನ ಉಪ್ಪಜ್ಜನ್ತಿ।
Katamā aṭṭha saṅkhārupekkhā samathavasena uppajjanti? Paṭhamaṃ jhānaṃ paṭilābhatthāya nīvaraṇe paṭisaṅkhāsantiṭṭhanā paññā saṅkhārupekkhāsu ñāṇaṃ. Dutiyaṃ jhānaṃ paṭilābhatthāya vitakkavicāre paṭisaṅkhāsantiṭṭhanā paññā saṅkhārupekkhāsu ñāṇaṃ. Tatiyaṃ jhānaṃ paṭilābhatthāya pītiṃ paṭisaṅkhāsantiṭṭhanā paññā saṅkhārupekkhāsu ñāṇaṃ . Catutthaṃ jhānaṃ paṭilābhatthāya sukhadukkhe paṭisaṅkhāsantiṭṭhanā paññā saṅkhārupekkhāsu ñāṇaṃ. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Imā aṭṭha saṅkhārupekkhā samathavasena uppajjanti.
ಕತಮಾ ದಸ ಸಙ್ಖಾರುಪೇಕ್ಖಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ? ಸೋತಾಪತ್ತಿಮಗ್ಗಂ ಪಟಿಲಾಭತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ ಗತಿಂ ನಿಬ್ಬತ್ತಿಂ ಉಪಪತ್ತಿಂ ಜಾತಿಂ ಜರಂ ಬ್ಯಾಧಿಂ ಮರಣಂ ಸೋಕಂ ಪರಿದೇವಂ ಉಪಾಯಾಸಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಸೋತಾಪತ್ತಿಫಲಸಮಾಪತ್ತತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ…ಪೇ॰… ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಸಕದಾಗಾಮಿಮಗ್ಗಂ ಪಟಿಲಾಭತ್ಥಾಯ…ಪೇ॰… ಸಕದಾಗಾಮಿಫಲಸಮಾಪತ್ತತ್ಥಾಯ…ಪೇ॰… ಅನಾಗಾಮಿಮಗ್ಗಂ ಪಟಿಲಾಭತ್ಥಾಯ…ಪೇ॰… ಅನಾಗಾಮಿಫಲಸಮಾಪತ್ತತ್ಥಾಯ …ಪೇ॰… ಅರಹತ್ತಮಗ್ಗಂ ಪಟಿಲಾಭತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ ಗತಿಂ ನಿಬ್ಬತ್ತಿಂ ಉಪಪತ್ತಿಂ ಜಾತಿಂ ಜರಂ ಬ್ಯಾಧಿಂ ಮರಣಂ ಸೋಕಂ ಪರಿದೇವಂ ಉಪಾಯಾಸಂ ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಅರಹತ್ತಫಲಸಮಾಪತ್ತತ್ಥಾಯ…ಪೇ॰… ಸುಞ್ಞತವಿಹಾರಸಮಾಪತ್ತತ್ಥಾಯ…ಪೇ॰… ಅನಿಮಿತ್ತವಿಹಾರಸಮಾಪತ್ತತ್ಥಾಯ ಉಪ್ಪಾದಂ ಪವತ್ತಂ ನಿಮಿತ್ತಂ ಆಯೂಹನಂ ಪಟಿಸನ್ಧಿಂ…ಪೇ॰… ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ। ಇಮಾ ದಸ ಸಙ್ಖಾರುಪೇಕ್ಖಾ ವಿಪಸ್ಸನಾವಸೇನ ಉಪ್ಪಜ್ಜನ್ತಿ।
Katamā dasa saṅkhārupekkhā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Sakadāgāmimaggaṃ paṭilābhatthāya…pe… sakadāgāmiphalasamāpattatthāya…pe… anāgāmimaggaṃ paṭilābhatthāya…pe… anāgāmiphalasamāpattatthāya …pe… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Arahattaphalasamāpattatthāya…pe… suññatavihārasamāpattatthāya…pe… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Imā dasa saṅkhārupekkhā vipassanāvasena uppajjanti.
೫೮. ಕತಿ ಸಙ್ಖಾರುಪೇಕ್ಖಾ ಕುಸಲಾ, ಕತಿ ಅಕುಸಲಾ, ಕತಿ ಅಬ್ಯಾಕತಾ? ಪನ್ನರಸ ಸಙ್ಖಾರುಪೇಕ್ಖಾ ಕುಸಲಾ, ತಿಸ್ಸೋ ಸಙ್ಖಾರುಪೇಕ್ಖಾ ಅಬ್ಯಾಕತಾ। ನತ್ಥಿ ಸಙ್ಖಾರುಪೇಕ್ಖಾ ಅಕುಸಲಾ।
58. Kati saṅkhārupekkhā kusalā, kati akusalā, kati abyākatā? Pannarasa saṅkhārupekkhā kusalā, tisso saṅkhārupekkhā abyākatā. Natthi saṅkhārupekkhā akusalā.
ಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ, ಅಟ್ಠ ಚಿತ್ತಸ್ಸ ಗೋಚರಾ।
Paṭisaṅkhāsantiṭṭhanā paññā, aṭṭha cittassa gocarā;
ಪುಥುಜ್ಜನಸ್ಸ ದ್ವೇ ಹೋನ್ತಿ, ತಯೋ ಸೇಕ್ಖಸ್ಸ ಗೋಚರಾ।
Puthujjanassa dve honti, tayo sekkhassa gocarā;
ತಯೋ ಚ ವೀತರಾಗಸ್ಸ, ಯೇಹಿ ಚಿತ್ತಂ ವಿವಟ್ಟತಿ॥
Tayo ca vītarāgassa, yehi cittaṃ vivaṭṭati.
ಅಟ್ಠ ಸಮಾಧಿಸ್ಸ ಪಚ್ಚಯಾ, ದಸ ಞಾಣಸ್ಸ ಗೋಚರಾ।
Aṭṭha samādhissa paccayā, dasa ñāṇassa gocarā;
ಅಟ್ಠಾರಸ ಸಙ್ಖಾರುಪೇಕ್ಖಾ, ತಿಣ್ಣಂ ವಿಮೋಕ್ಖಾನ ಪಚ್ಚಯಾ॥
Aṭṭhārasa saṅkhārupekkhā, tiṇṇaṃ vimokkhāna paccayā.
ಇಮೇ ಅಟ್ಠಾರಸಾಕಾರಾ, ಪಞ್ಞಾ ಯಸ್ಸ ಪರಿಚ್ಚಿತಾ।
Ime aṭṭhārasākārā, paññā yassa pariccitā;
ಕುಸಲೋ ಸಙ್ಖಾರುಪೇಕ್ಖಾಸು, ನಾನಾದಿಟ್ಠೀಸು ನ ಕಮ್ಪತೀತಿ॥
Kusalo saṅkhārupekkhāsu, nānādiṭṭhīsu na kampatīti.
ತಂ ಞಾತಟ್ಠೇನ ಞಾಣಂ, ಪಜಾನನಟ್ಠೇನ ಪಞ್ಞಾ। ತೇನ ವುಚ್ಚತಿ – ‘‘ಮುಞ್ಚಿತುಕಮ್ಯತಾಪಟಿಸಙ್ಖಾಸನ್ತಿಟ್ಠನಾ ಪಞ್ಞಾ ಸಙ್ಖಾರುಪೇಕ್ಖಾಸು ಞಾಣಂ’’।
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ’’.
ಸಙ್ಖಾರುಪೇಕ್ಖಾಞಾಣನಿದ್ದೇಸೋ ನವಮೋ।
Saṅkhārupekkhāñāṇaniddeso navamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ೯. ಸಙ್ಖಾರುಪೇಕ್ಖಾಞಾಣನಿದ್ದೇಸವಣ್ಣನಾ • 9. Saṅkhārupekkhāñāṇaniddesavaṇṇanā
