| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༩. སངྑཱརུཔེཀྑཱཉཱཎནིདྡེསོ
9. Saṅkhārupekkhāñāṇaniddeso
༥༤. ཀཐཾ མུཉྩིཏུཀམྱཏཱཔཊིསངྑཱསནྟིཊྛནཱ 1 པཉྙཱ སངྑཱརུཔེཀྑཱསུ ཉཱཎཾ? ཨུཔྤཱདཾ མུཉྩིཏུཀམྱཏཱཔཊིསངྑཱསནྟིཊྛནཱ 2 པཉྙཱ སངྑཱརུཔེཀྑཱསུ ཉཱཎཾ, པཝཏྟཾ མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ, ནིམིཏྟཾ མུཉྩིཏུཀམྱཏཱ…པེ॰… ཨཱཡཱུཧནཾ མུཉྩིཏུཀམྱཏཱ… པཊིསནྡྷིཾ མུཉྩིཏུཀམྱཏཱ… གཏིཾ མུཉྩིཏུཀམྱཏཱ… ནིབྦཏྟིཾ མུཉྩིཏུཀམྱཏཱ… ཨུཔཔཏྟིཾ མུཉྩིཏུཀམྱཏཱ… ཛཱཏིཾ མུཉྩིཏུཀམྱཏཱ… ཛརཾ མུཉྩིཏུཀམྱཏཱ… བྱཱདྷིཾ མུཉྩིཏུཀམྱཏཱ… མརཎཾ མུཉྩིཏུཀམྱཏཱ… སོཀཾ མུཉྩིཏུཀམྱཏཱ… པརིདེཝཾ མུཉྩིཏུཀམྱཏཱ…པེ॰… ཨུཔཱཡཱསཾ མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ།
54. Kathaṃ muñcitukamyatāpaṭisaṅkhāsantiṭṭhanā 3 paññā saṅkhārupekkhāsu ñāṇaṃ? Uppādaṃ muñcitukamyatāpaṭisaṅkhāsantiṭṭhanā 4 paññā saṅkhārupekkhāsu ñāṇaṃ, pavattaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ, nimittaṃ muñcitukamyatā…pe… āyūhanaṃ muñcitukamyatā… paṭisandhiṃ muñcitukamyatā… gatiṃ muñcitukamyatā… nibbattiṃ muñcitukamyatā… upapattiṃ muñcitukamyatā… jātiṃ muñcitukamyatā… jaraṃ muñcitukamyatā… byādhiṃ muñcitukamyatā… maraṇaṃ muñcitukamyatā… sokaṃ muñcitukamyatā… paridevaṃ muñcitukamyatā…pe… upāyāsaṃ muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ཨུཔྤཱདོ དུཀྑནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། པཝཏྟཾ དུཀྑནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ…པེ॰… ཨུཔཱཡཱསོ དུཀྑནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ།
Uppādo dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso dukkhanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ཨུཔྤཱདོ བྷཡནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། པཝཏྟཾ བྷཡནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ…པེ॰… ཨུཔཱཡཱསོ བྷཡནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ།
Uppādo bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso bhayanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ཨུཔྤཱདོ སཱམིསནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། པཝཏྟཾ སཱམིསནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ…པེ॰… ཨུཔཱཡཱསོ སཱམིསནྟི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ།
Uppādo sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso sāmisanti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ཨུཔྤཱདོ སངྑཱརཱཏི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། པཝཏྟཾ སངྑཱརཱཏི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ…པེ॰… ཨུཔཱཡཱསོ སངྑཱརཱཏི – མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ།
Uppādo saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ. Pavattaṃ saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ…pe… upāyāso saṅkhārāti – muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ.
ཨུཔྤཱདོ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི – སངྑཱརུཔེཀྑཱ། ཡེ ཙ སངྑཱརཱ ཡཱ ཙ ཨུཔེཀྑཱ ཨུབྷོཔེཏེ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི – སངྑཱརུཔེཀྑཱ། པཝཏྟཾ སངྑཱརཱ…པེ॰… ནིམིཏྟཾ སངྑཱརཱ… ཨཱཡཱུཧནཱ སངྑཱརཱ… པཊིསནྡྷི སངྑཱརཱ… གཏི སངྑཱརཱ… ནིབྦཏྟི སངྑཱརཱ… ཨུཔཔཏྟི སངྑཱརཱ… ཛཱཏི སངྑཱརཱ… ཛརཱ སངྑཱརཱ… བྱཱདྷི སངྑཱརཱ… མརཎཾ སངྑཱརཱ… སོཀོ སངྑཱརཱ… པརིདེཝོ སངྑཱརཱ…པེ॰… ཨུཔཱཡཱསོ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི – སངྑཱརུཔེཀྑཱ། ཡེ ཙ སངྑཱརཱ ཡཱ ཙ ཨུཔེཀྑཱ ཨུབྷོཔེཏེ སངྑཱརཱ, ཏེ སངྑཱརེ ཨཛ྄ཛྷུཔེཀྑཏཱིཏི – སངྑཱརུཔེཀྑཱ།
Uppādo saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā. Pavattaṃ saṅkhārā…pe… nimittaṃ saṅkhārā… āyūhanā saṅkhārā… paṭisandhi saṅkhārā… gati saṅkhārā… nibbatti saṅkhārā… upapatti saṅkhārā… jāti saṅkhārā… jarā saṅkhārā… byādhi saṅkhārā… maraṇaṃ saṅkhārā… soko saṅkhārā… paridevo saṅkhārā…pe… upāyāso saṅkhārā, te saṅkhāre ajjhupekkhatīti – saṅkhārupekkhā. Ye ca saṅkhārā yā ca upekkhā ubhopete saṅkhārā, te saṅkhāre ajjhupekkhatīti – saṅkhārupekkhā.
༥༥. ཀཏིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? ཨཊྛཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི། པུཐུཛྫནསྶ ཀཏིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? སེཀྑསྶ ཀཏིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? ཝཱིཏརཱགསྶ ཀཏིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? པུཐུཛྫནསྶ དྭཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི། སེཀྑསྶ ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི། ཝཱིཏརཱགསྶ ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི།
55. Katihākārehi saṅkhārupekkhāya cittassa abhinīhāro hoti? Aṭṭhahākārehi saṅkhārupekkhāya cittassa abhinīhāro hoti. Puthujjanassa katihākārehi saṅkhārupekkhāya cittassa abhinīhāro hoti? Sekkhassa katihākārehi saṅkhārupekkhāya cittassa abhinīhāro hoti? Vītarāgassa katihākārehi saṅkhārupekkhāya cittassa abhinīhāro hoti? Puthujjanassa dvīhākārehi saṅkhārupekkhāya cittassa abhinīhāro hoti. Sekkhassa tīhākārehi saṅkhārupekkhāya cittassa abhinīhāro hoti. Vītarāgassa tīhākārehi saṅkhārupekkhāya cittassa abhinīhāro hoti.
པུཐུཛྫནསྶ ཀཏམེཧི དྭཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? པུཐུཛྫནོ སངྑཱརུཔེཀྑཾ ཨབྷིནནྡཏི ཝཱ ཝིཔསྶཏི ཝཱ། པུཐུཛྫནསྶ ཨིམེཧི དྭཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི། སེཀྑསྶ ཀཏམེཧི ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? སེཀྑོ སངྑཱརུཔེཀྑཾ ཨབྷིནནྡཏི ཝཱ ཝིཔསྶཏི ཝཱ པཊིསངྑཱཡ ཝཱ ཕལསམཱཔཏྟིཾ སམཱཔཛྫཏི། སེཀྑསྶ ཨིམེཧི ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི། ཝཱིཏརཱགསྶ ཀཏམེཧི ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི? ཝཱིཏརཱགོ སངྑཱརུཔེཀྑཾ ཝིཔསྶཏི ཝཱ པཊིསངྑཱཡ ཝཱ ཕལསམཱཔཏྟིཾ སམཱཔཛྫཏི, ཏདཛ྄ཛྷུཔེཀྑིཏྭཱ སུཉྙཏཝིཧཱརེན ཝཱ ཨནིམིཏྟཝིཧཱརེན ཝཱ ཨཔྤཎིཧིཏཝིཧཱརེན ཝཱ ཝིཧརཏི། ཝཱིཏརཱགསྶ ཨིམེཧི ཏཱིཧཱཀཱརེཧི སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཧོཏི།
Puthujjanassa katamehi dvīhākārehi saṅkhārupekkhāya cittassa abhinīhāro hoti? Puthujjano saṅkhārupekkhaṃ abhinandati vā vipassati vā. Puthujjanassa imehi dvīhākārehi saṅkhārupekkhāya cittassa abhinīhāro hoti. Sekkhassa katamehi tīhākārehi saṅkhārupekkhāya cittassa abhinīhāro hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Sekkhassa imehi tīhākārehi saṅkhārupekkhāya cittassa abhinīhāro hoti. Vītarāgassa katamehi tīhākārehi saṅkhārupekkhāya cittassa abhinīhāro hoti? Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Vītarāgassa imehi tīhākārehi saṅkhārupekkhāya cittassa abhinīhāro hoti.
༥༦. ཀཐཾ པུཐུཛྫནསྶ ཙ སེཀྑསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཨེཀཏྟཾ ཧོཏི? པུཐུཛྫནསྶ སངྑཱརུཔེཀྑཾ ཨབྷིནནྡཏོ ཙིཏྟཾ ཀིལིསྶཏི, བྷཱཝནཱཡ པརིཔནྠོ ཧོཏི, པཊིཝེདྷསྶ ཨནྟརཱཡོ ཧོཏི, ཨཱཡཏིཾ པཊིསནྡྷིཡཱ པཙྩཡོ ཧོཏི། སེཀྑསྶཔི སངྑཱརུཔེཀྑཾ ཨབྷིནནྡཏོ ཙིཏྟཾ ཀིལིསྶཏི, བྷཱཝནཱཡ པརིཔནྠོ ཧོཏི, ཨུཏྟརིཔཊིཝེདྷསྶ ཨནྟརཱཡོ ཧོཏི, ཨཱཡཏིཾ པཊིསནྡྷིཡཱ པཙྩཡོ ཧོཏི། ཨེཝཾ པུཐུཛྫནསྶ ཙ སེཀྑསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཨེཀཏྟཾ ཧོཏི ཨབྷིནནྡཊྛེན།
56. Kathaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti? Puthujjanassa saṅkhārupekkhaṃ abhinandato cittaṃ kilissati, bhāvanāya paripantho hoti, paṭivedhassa antarāyo hoti, āyatiṃ paṭisandhiyā paccayo hoti. Sekkhassapi saṅkhārupekkhaṃ abhinandato cittaṃ kilissati, bhāvanāya paripantho hoti, uttaripaṭivedhassa antarāyo hoti, āyatiṃ paṭisandhiyā paccayo hoti. Evaṃ puthujjanassa ca sekkhassa ca saṅkhārupekkhāya cittassa abhinīhāro ekattaṃ hoti abhinandaṭṭhena.
ཀཐཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཨེཀཏྟཾ ཧོཏི? པུཐུཛྫནོ སངྑཱརུཔེཀྑཾ ཨནིཙྩཏོཔི དུཀྑཏོཔི ཨནཏྟཏོཔི ཝིཔསྶཏི། སེཀྑོཔི སངྑཱརུཔེཀྑཾ ཨནིཙྩཏོཔི དུཀྑཏོཔི ཨནཏྟཏོཔི ཝིཔསྶཏི། ཝཱིཏརཱགོཔི སངྑཱརུཔེཀྑཾ ཨནིཙྩཏོཔི དུཀྑཏོཔི ཨནཏྟཏོཔི ཝིཔསྶཏི། ཨེཝཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ཨེཀཏྟཾ ཧོཏི ཨནུཔསྶནཊྛེན།
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti? Puthujjano saṅkhārupekkhaṃ aniccatopi dukkhatopi anattatopi vipassati. Sekkhopi saṅkhārupekkhaṃ aniccatopi dukkhatopi anattatopi vipassati. Vītarāgopi saṅkhārupekkhaṃ aniccatopi dukkhatopi anattatopi vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro ekattaṃ hoti anupassanaṭṭhena.
ཀཐཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི? པུཐུཛྫནསྶ སངྑཱརུཔེཀྑཱ ཀུསལཱ ཧོཏི། སེཀྑསྶཔི སངྑཱརུཔེཀྑཱ ཀུསལཱ ཧོཏི། ཝཱིཏརཱགསྶ སངྑཱརུཔེཀྑཱ ཨབྱཱཀཏཱ ཧོཏི། ཨེཝཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི ཀུསལཱབྱཱཀཏཊྛེན།
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kusalā hoti. Sekkhassapi saṅkhārupekkhā kusalā hoti. Vītarāgassa saṅkhārupekkhā abyākatā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti kusalābyākataṭṭhena.
ཀཐཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི? པུཐུཛྫནསྶ སངྑཱརུཔེཀྑཱ ཀིཉྩིཀཱལེ སུཝིདིཏཱ ཧོཏི, ཀིཉྩིཀཱལེ ན སུཝིདིཏཱ ཧོཏི། སེཀྑསྶཔི སངྑཱརུཔེཀྑཱ ཀིཉྩིཀཱལེ སུཝིདིཏཱ ཧོཏི, ཀིཉྩིཀཱལེ ན སུཝིདིཏཱ ཧོཏི། ཝཱིཏརཱགསྶ སངྑཱརུཔེཀྑཱ ཨཙྩནྟཾ སུཝིདིཏཱ ཧོཏི། ཨེཝཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི ཝིདིཏཊྛེན ཙ ཨཝིདིཏཊྛེན ཙ།
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjanassa saṅkhārupekkhā kiñcikāle suviditā hoti, kiñcikāle na suviditā hoti. Sekkhassapi saṅkhārupekkhā kiñcikāle suviditā hoti, kiñcikāle na suviditā hoti. Vītarāgassa saṅkhārupekkhā accantaṃ suviditā hoti. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti viditaṭṭhena ca aviditaṭṭhena ca.
ཀཐཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི? པུཐུཛྫནོ སངྑཱརུཔེཀྑཾ ཨཏིཏྟཏྟཱ ཝིཔསྶཏི། སེཀྑོཔི སངྑཱརུཔེཀྑཾ ཨཏིཏྟཏྟཱ ཝིཔསྶཏི། ཝཱིཏརཱགོ སངྑཱརུཔེཀྑཾ ཏིཏྟཏྟཱ ཝིཔསྶཏི། ཨེཝཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི ཏིཏྟཊྛེན ཙ ཨཏིཏྟཊྛེན ཙ།
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ atittattā vipassati. Sekkhopi saṅkhārupekkhaṃ atittattā vipassati. Vītarāgo saṅkhārupekkhaṃ tittattā vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti tittaṭṭhena ca atittaṭṭhena ca.
ཀཐཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི? པུཐུཛྫནོ སངྑཱརུཔེཀྑཾ ཏིཎྞཾ སཾཡོཛནཱནཾ པཧཱནཱཡ སོཏཱཔཏྟིམགྒཾ པཊིལཱབྷཏྠཱཡ ཝིཔསྶཏི། སེཀྑོ སངྑཱརུཔེཀྑཾ ཏིཎྞཾ སཉྙོཛནཱནཾ པཧཱིནཏྟཱ ཨུཏྟརིཔཊིལཱབྷཏྠཱཡ ཝིཔསྶཏི། ཝཱིཏརཱགོ སངྑཱརུཔེཀྑཾ སབྦཀིལེསཱནཾ པཧཱིནཏྟཱ དིཊྛདྷམྨསུཁཝིཧཱརཏྠཱཡ ཝིཔསྶཏི། ཨེཝཾ པུཐུཛྫནསྶ ཙ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི པཧཱིནཊྛེན ཙ ཨཔྤཧཱིནཊྛེན ཙ།
Kathaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Puthujjano saṅkhārupekkhaṃ tiṇṇaṃ saṃyojanānaṃ pahānāya sotāpattimaggaṃ paṭilābhatthāya vipassati. Sekkho saṅkhārupekkhaṃ tiṇṇaṃ saññojanānaṃ pahīnattā uttaripaṭilābhatthāya vipassati. Vītarāgo saṅkhārupekkhaṃ sabbakilesānaṃ pahīnattā diṭṭhadhammasukhavihāratthāya vipassati. Evaṃ puthujjanassa ca sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti pahīnaṭṭhena ca appahīnaṭṭhena ca.
ཀཐཾ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི? སེཀྑོ སངྑཱརུཔེཀྑཾ ཨབྷིནནྡཏི ཝཱ ཝིཔསྶཏི ཝཱ པཊིསངྑཱཡ ཝཱ ཕལསམཱཔཏྟིཾ སམཱཔཛྫཏི། ཝཱིཏརཱགོ སངྑཱརུཔེཀྑཾ ཝིཔསྶཏི ཝཱ པཊིསངྑཱཡ ཝཱ ཕལསམཱཔཏྟིཾ སམཱཔཛྫཏི, ཏདཛ྄ཛྷུཔེཀྑིཏྭཱ སུཉྙཏཝིཧཱརེན ཝཱ ཨནིམིཏྟཝིཧཱརེན ཝཱ ཨཔྤཎིཧིཏཝིཧཱརེན ཝཱ ཝིཧརཏི། ཨེཝཾ སེཀྑསྶ ཙ ཝཱིཏརཱགསྶ ཙ སངྑཱརུཔེཀྑཱཡ ཙིཏྟསྶ ཨབྷིནཱིཧཱརོ ནཱནཏྟཾ ཧོཏི ཝིཧཱརསམཱཔཏྟཊྛེན།
Kathaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti? Sekkho saṅkhārupekkhaṃ abhinandati vā vipassati vā paṭisaṅkhāya vā phalasamāpattiṃ samāpajjati. Vītarāgo saṅkhārupekkhaṃ vipassati vā paṭisaṅkhāya vā phalasamāpattiṃ samāpajjati, tadajjhupekkhitvā suññatavihārena vā animittavihārena vā appaṇihitavihārena vā viharati. Evaṃ sekkhassa ca vītarāgassa ca saṅkhārupekkhāya cittassa abhinīhāro nānattaṃ hoti vihārasamāpattaṭṭhena.
༥༧. ཀཏི སངྑཱརུཔེཀྑཱ སམཐཝསེན ཨུཔྤཛྫནྟི? ཀཏི སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི? ཨཊྛ སངྑཱརུཔེཀྑཱ སམཐཝསེན ཨུཔྤཛྫནྟི། དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི།
57. Kati saṅkhārupekkhā samathavasena uppajjanti? Kati saṅkhārupekkhā vipassanāvasena uppajjanti? Aṭṭha saṅkhārupekkhā samathavasena uppajjanti. Dasa saṅkhārupekkhā vipassanāvasena uppajjanti.
ཀཏམཱ ཨཊྛ སངྑཱརུཔེཀྑཱ སམཐཝསེན ཨུཔྤཛྫནྟི? པཋམཾ ཛྷཱནཾ པཊིལཱབྷཏྠཱཡ ནཱིཝརཎེ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། དུཏིཡཾ ཛྷཱནཾ པཊིལཱབྷཏྠཱཡ ཝིཏཀྐཝིཙཱརེ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཏཏིཡཾ ཛྷཱནཾ པཊིལཱབྷཏྠཱཡ པཱིཏིཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ ། ཙཏུཏྠཾ ཛྷཱནཾ པཊིལཱབྷཏྠཱཡ སུཁདུཀྑེ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཨཱཀཱསཱནཉྩཱཡཏནསམཱཔཏྟིཾ པཊིལཱབྷཏྠཱཡ རཱུཔསཉྙཾ པཊིགྷསཉྙཾ ནཱནཏྟསཉྙཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཝིཉྙཱཎཉྩཱཡཏནསམཱཔཏྟིཾ པཊིལཱབྷཏྠཱཡ ཨཱཀཱསཱནཉྩཱཡཏནསཉྙཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཨཱཀིཉྩཉྙཱཡཏནསམཱཔཏྟིཾ པཊིལཱབྷཏྠཱཡ ཝིཉྙཱཎཉྩཱཡཏནསཉྙཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ནེཝསཉྙཱནཱསཉྙཱཡཏནསམཱཔཏྟིཾ པཊིལཱབྷཏྠཱཡ ཨཱཀིཉྩཉྙཱཡཏནསཉྙཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཨིམཱ ཨཊྛ སངྑཱརུཔེཀྑཱ སམཐཝསེན ཨུཔྤཛྫནྟི།
Katamā aṭṭha saṅkhārupekkhā samathavasena uppajjanti? Paṭhamaṃ jhānaṃ paṭilābhatthāya nīvaraṇe paṭisaṅkhāsantiṭṭhanā paññā saṅkhārupekkhāsu ñāṇaṃ. Dutiyaṃ jhānaṃ paṭilābhatthāya vitakkavicāre paṭisaṅkhāsantiṭṭhanā paññā saṅkhārupekkhāsu ñāṇaṃ. Tatiyaṃ jhānaṃ paṭilābhatthāya pītiṃ paṭisaṅkhāsantiṭṭhanā paññā saṅkhārupekkhāsu ñāṇaṃ . Catutthaṃ jhānaṃ paṭilābhatthāya sukhadukkhe paṭisaṅkhāsantiṭṭhanā paññā saṅkhārupekkhāsu ñāṇaṃ. Ākāsānañcāyatanasamāpattiṃ paṭilābhatthāya rūpasaññaṃ paṭighasaññaṃ nānattasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Viññāṇañcāyatanasamāpattiṃ paṭilābhatthāya ākāsānañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Ākiñcaññāyatanasamāpattiṃ paṭilābhatthāya viññāṇañcāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Nevasaññānāsaññāyatanasamāpattiṃ paṭilābhatthāya ākiñcaññāyatanasaññaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Imā aṭṭha saṅkhārupekkhā samathavasena uppajjanti.
ཀཏམཱ དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི? སོཏཱཔཏྟིམགྒཾ པཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། སོཏཱཔཏྟིཕལསམཱཔཏྟཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ…པེ॰… པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། སཀདཱགཱམིམགྒཾ པཊིལཱབྷཏྠཱཡ…པེ॰… སཀདཱགཱམིཕལསམཱཔཏྟཏྠཱཡ…པེ॰… ཨནཱགཱམིམགྒཾ པཊིལཱབྷཏྠཱཡ…པེ॰… ཨནཱགཱམིཕལསམཱཔཏྟཏྠཱཡ …པེ॰… ཨརཧཏྟམགྒཾ པཊིལཱབྷཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ གཏིཾ ནིབྦཏྟིཾ ཨུཔཔཏྟིཾ ཛཱཏིཾ ཛརཾ བྱཱདྷིཾ མརཎཾ སོཀཾ པརིདེཝཾ ཨུཔཱཡཱསཾ པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཨརཧཏྟཕལསམཱཔཏྟཏྠཱཡ…པེ॰… སུཉྙཏཝིཧཱརསམཱཔཏྟཏྠཱཡ…པེ॰… ཨནིམིཏྟཝིཧཱརསམཱཔཏྟཏྠཱཡ ཨུཔྤཱདཾ པཝཏྟཾ ནིམིཏྟཾ ཨཱཡཱུཧནཾ པཊིསནྡྷིཾ…པེ॰… པཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ། ཨིམཱ དས སངྑཱརུཔེཀྑཱ ཝིཔསྶནཱཝསེན ཨུཔྤཛྫནྟི།
Katamā dasa saṅkhārupekkhā vipassanāvasena uppajjanti? Sotāpattimaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Sotāpattiphalasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Sakadāgāmimaggaṃ paṭilābhatthāya…pe… sakadāgāmiphalasamāpattatthāya…pe… anāgāmimaggaṃ paṭilābhatthāya…pe… anāgāmiphalasamāpattatthāya …pe… arahattamaggaṃ paṭilābhatthāya uppādaṃ pavattaṃ nimittaṃ āyūhanaṃ paṭisandhiṃ gatiṃ nibbattiṃ upapattiṃ jātiṃ jaraṃ byādhiṃ maraṇaṃ sokaṃ paridevaṃ upāyāsaṃ paṭisaṅkhāsantiṭṭhanā paññā saṅkhārupekkhāsu ñāṇaṃ. Arahattaphalasamāpattatthāya…pe… suññatavihārasamāpattatthāya…pe… animittavihārasamāpattatthāya uppādaṃ pavattaṃ nimittaṃ āyūhanaṃ paṭisandhiṃ…pe… paṭisaṅkhāsantiṭṭhanā paññā saṅkhārupekkhāsu ñāṇaṃ. Imā dasa saṅkhārupekkhā vipassanāvasena uppajjanti.
༥༨. ཀཏི སངྑཱརུཔེཀྑཱ ཀུསལཱ, ཀཏི ཨཀུསལཱ, ཀཏི ཨབྱཱཀཏཱ? པནྣརས སངྑཱརུཔེཀྑཱ ཀུསལཱ, ཏིསྶོ སངྑཱརུཔེཀྑཱ ཨབྱཱཀཏཱ། ནཏྠི སངྑཱརུཔེཀྑཱ ཨཀུསལཱ།
58. Kati saṅkhārupekkhā kusalā, kati akusalā, kati abyākatā? Pannarasa saṅkhārupekkhā kusalā, tisso saṅkhārupekkhā abyākatā. Natthi saṅkhārupekkhā akusalā.
པཊིསངྑཱསནྟིཊྛནཱ པཉྙཱ, ཨཊྛ ཙིཏྟསྶ གོཙརཱ།
Paṭisaṅkhāsantiṭṭhanā paññā, aṭṭha cittassa gocarā;
པུཐུཛྫནསྶ དྭེ ཧོནྟི, ཏཡོ སེཀྑསྶ གོཙརཱ།
Puthujjanassa dve honti, tayo sekkhassa gocarā;
ཏཡོ ཙ ཝཱིཏརཱགསྶ, ཡེཧི ཙིཏྟཾ ཝིཝཊྚཏི༎
Tayo ca vītarāgassa, yehi cittaṃ vivaṭṭati.
ཨཊྛ སམཱདྷིསྶ པཙྩཡཱ, དས ཉཱཎསྶ གོཙརཱ།
Aṭṭha samādhissa paccayā, dasa ñāṇassa gocarā;
ཨཊྛཱརས སངྑཱརུཔེཀྑཱ, ཏིཎྞཾ ཝིམོཀྑཱན པཙྩཡཱ༎
Aṭṭhārasa saṅkhārupekkhā, tiṇṇaṃ vimokkhāna paccayā.
ཨིམེ ཨཊྛཱརསཱཀཱརཱ, པཉྙཱ ཡསྶ པརིཙྩིཏཱ།
Ime aṭṭhārasākārā, paññā yassa pariccitā;
ཀུསལོ སངྑཱརུཔེཀྑཱསུ, ནཱནཱདིཊྛཱིསུ ན ཀམྤཏཱིཏི༎
Kusalo saṅkhārupekkhāsu, nānādiṭṭhīsu na kampatīti.
ཏཾ ཉཱཏཊྛེན ཉཱཎཾ, པཛཱནནཊྛེན པཉྙཱ། ཏེན ཝུཙྩཏི – ‘‘མུཉྩིཏུཀམྱཏཱཔཊིསངྑཱསནྟིཊྛནཱ པཉྙཱ སངྑཱརུཔེཀྑཱསུ ཉཱཎཾ’’།
Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṃ’’.
སངྑཱརུཔེཀྑཱཉཱཎནིདྡེསོ ནཝམོ།
Saṅkhārupekkhāñāṇaniddeso navamo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༩. སངྑཱརུཔེཀྑཱཉཱཎནིདྡེསཝཎྞནཱ • 9. Saṅkhārupekkhāñāṇaniddesavaṇṇanā
