| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. ஸங்க²தலக்க²ணஸுத்தவண்ணனா
7. Saṅkhatalakkhaṇasuttavaṇṇanā
47. ஸத்தமே ஸமேச்ச ஸம்பூ⁴ய பச்சயேஹி கதங் ஸங்க²தங். நிமித்தானீதி ஸஞ்ஜானநஸ்ஸ நிமித்தானி. ஹேதுபச்சயஸமவாயே உப்பஜ்ஜனங் உப்பாதோ³, அத்தலாபோ⁴. வயோதி ப⁴ங்கோ³. டி²தஸ்ஸாதி உப்பாத³க்க²ணதோ உத்³த⁴ங் டி²திக்க²ணபத்தஸ்ஸ. ஸா பனஸ்ஸ அவத்தா² உப்பாதா³வத்தா²ய பி⁴ன்னாதி கத்வா அஞ்ஞத²த்தங் ஜராதி ச வுத்தா. யஸ்மா த⁴ம்மோ உப்பஜ்ஜமானோ ஏவ பி⁴ஜ்ஜதி, ததா² ஸதி உப்பாத³ப⁴ங்கா³ ஸமானக்க²ணா ஸியுங், ந ச தங் யுஜ்ஜதி, தஸ்மா உப்பாதா³வத்தா²ய பி⁴ன்னா ப⁴ங்கா³பி⁴முகா²வத்தா² ஜராதி வேதி³தப்³பா³. யே பன ‘‘ஸங்கா²ரானங் டி²தி நத்தீ²’’தி வத³ந்தி, தேஸங் தங் மிச்சா². யதா² ஹி தஸ்ஸேவ த⁴ம்மஸ்ஸ உப்பாதா³வத்தா²ய பி⁴ன்னா ப⁴ங்கா³வத்தா² இச்சி²தா, அஞ்ஞதா² ‘‘அஞ்ஞங் உப்பஜ்ஜதி, அஞ்ஞங் நிருஜ்ஜ²தீ’’தி ஆபஜ்ஜதி, ஏவங் உப்பஜ்ஜமானஸ்ஸ ப⁴ங்கா³பி⁴முகா² த⁴ம்மா இச்சி²தப்³பா³. ஸா ச டி²திக்க²ணோ. ந ஹி உப்பஜ்ஜமானோ பி⁴ஜ்ஜதீதி ஸக்கா விஞ்ஞாதுந்தி.
47. Sattame samecca sambhūya paccayehi kataṃ saṅkhataṃ. Nimittānīti sañjānanassa nimittāni. Hetupaccayasamavāye uppajjanaṃ uppādo, attalābho. Vayoti bhaṅgo. Ṭhitassāti uppādakkhaṇato uddhaṃ ṭhitikkhaṇapattassa. Sā panassa avatthā uppādāvatthāya bhinnāti katvā aññathattaṃ jarāti ca vuttā. Yasmā dhammo uppajjamāno eva bhijjati, tathā sati uppādabhaṅgā samānakkhaṇā siyuṃ, na ca taṃ yujjati, tasmā uppādāvatthāya bhinnā bhaṅgābhimukhāvatthā jarāti veditabbā. Ye pana ‘‘saṅkhārānaṃ ṭhiti natthī’’ti vadanti, tesaṃ taṃ micchā. Yathā hi tasseva dhammassa uppādāvatthāya bhinnā bhaṅgāvatthā icchitā, aññathā ‘‘aññaṃ uppajjati, aññaṃ nirujjhatī’’ti āpajjati, evaṃ uppajjamānassa bhaṅgābhimukhā dhammā icchitabbā. Sā ca ṭhitikkhaṇo. Na hi uppajjamāno bhijjatīti sakkā viññātunti.
ஸங்க²தந்தி தேபூ⁴மகா த⁴ம்மா பச்சயஸமுப்பன்னத்தா. யதி³ ஏவங் மக்³க³ப²லத⁴ம்மா கத²ந்தி ஆஹ ‘‘மக்³க³ப²லானி பனா’’திஆதி³. லக்க²ணகதா² ஹி யாவதே³வ ஸம்மஸனத்தா². உப்பாத³க்க²ணே உப்பாதோ³, ந டா²னப⁴ங்க³க்க²ணேஸு. கஸ்மா? உப்பாத³உப்பாத³க்க²ணானங் அஞ்ஞமஞ்ஞங் பரிச்சி²ன்னத்தா. யதா² ஹி உப்பாத³ஸங்கா²தேன விகாரேன உப்பாத³க்க²ணோ பரிச்சி²ன்னோ, ஏவங் உப்பாத³க்க²ணேனபி உப்பாதோ³ பரிச்சி²ன்னோ. ஸேஸத்³வயேபி ஏஸேவ நயோ. த⁴ம்மப்பவத்திமத்ததாயபி காலஸ்ஸ லோகஸமஞ்ஞாவஸேனேவ வுத்தங். லக்க²ணங் ந ஸங்க²தங், ஸங்க²தங் ந லக்க²ணந்தி நேஸங் பே⁴த³த³ஸ்ஸனங். அவத்தா²வதோ ஹி அவத்தா² பி⁴ன்னாவாதி . பரிச்சி²ன்னந்தி எத்த² உப்பாத³வயேஹி தாவ ஸங்க²தங் பரிச்சி²ன்னங் ஹோது, ஜராய பன தங் கத²ங் பரிச்சி²ன்னந்தி வுச்சதி? ந வுச்சதி பரிச்சே²தோ³ புப்³ப³ந்தாபரந்தமத்தேன, அத² கோ² ஸபா⁴வபே⁴தே³னாதி நாயங் தோ³ஸோ. ஸங்க²தங் த⁴ம்மஜாதங் பரிச்சி²ன்னங் தப்³ப³ந்தங் த⁴ம்மஜாதங் ஸங்க²தந்தி பஞ்ஞாயதி ஏவங் தேஸங் அபா⁴வேன நிப்³பா³னமேதந்தி லக்கி²தப்³ப³தோ ஸஞ்ஜானிதப்³ப³தோ. இதா³னி ‘‘யதா² ஹீ’’திஆதி³னா யதா²வுத்தமத்தங் உபமாஹி விபா⁴வேதி.
Saṅkhatanti tebhūmakā dhammā paccayasamuppannattā. Yadi evaṃ maggaphaladhammā kathanti āha ‘‘maggaphalāni panā’’tiādi. Lakkhaṇakathā hi yāvadeva sammasanatthā. Uppādakkhaṇe uppādo, na ṭhānabhaṅgakkhaṇesu. Kasmā? Uppādauppādakkhaṇānaṃ aññamaññaṃ paricchinnattā. Yathā hi uppādasaṅkhātena vikārena uppādakkhaṇo paricchinno, evaṃ uppādakkhaṇenapi uppādo paricchinno. Sesadvayepi eseva nayo. Dhammappavattimattatāyapi kālassa lokasamaññāvaseneva vuttaṃ. Lakkhaṇaṃ na saṅkhataṃ, saṅkhataṃ na lakkhaṇanti nesaṃ bhedadassanaṃ. Avatthāvato hi avatthā bhinnāvāti . Paricchinnanti ettha uppādavayehi tāva saṅkhataṃ paricchinnaṃ hotu, jarāya pana taṃ kathaṃ paricchinnanti vuccati? Na vuccati paricchedo pubbantāparantamattena, atha kho sabhāvabhedenāti nāyaṃ doso. Saṅkhataṃ dhammajātaṃ paricchinnaṃ tabbantaṃ dhammajātaṃ saṅkhatanti paññāyati evaṃ tesaṃ abhāvena nibbānametanti lakkhitabbato sañjānitabbato. Idāni ‘‘yathā hī’’tiādinā yathāvuttamattaṃ upamāhi vibhāveti.
ஸங்க²தலக்க²ணஸுத்தவண்ணனா நிட்டி²தா.
Saṅkhatalakkhaṇasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ஸங்க²தலக்க²ணஸுத்தங் • 7. Saṅkhatalakkhaṇasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ஸங்க²தலக்க²ணஸுத்தவண்ணனா • 7. Saṅkhatalakkhaṇasuttavaṇṇanā
