| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၇. သင္ခတလက္ခဏသုတ္တဝဏ္ဏနာ
7. Saṅkhatalakkhaṇasuttavaṇṇanā
၄၇. သတ္တမေ သင္ခတသ္သာတိ ပစ္စယေဟိ သမာဂန္တ္ဝာ ကတသ္သ။ သင္ခတလက္ခဏာနီတိ သင္ခတံ ဧတန္တိ သဉ္ဇာနနကာရဏာနိ နိမိတ္တာနိ။ ဥပ္ပာဒောတိ ဇာတိ။ ဝယောတိ ဘေဒော။ ဌိတသ္သ အညထတ္တံ နာမ ဇရာ။ တတ္ထ သင္ခတန္တိ တေဘူမကာ ဓမ္မာ။ မဂ္ဂဖလာနိ ပန အသမ္မသနူပဂတ္တာ ဣဓ န ကထီယန္တိ။ ဥပ္ပာဒာဒယော သင္ခတလက္ခဏာ နာမ။ တေသု ဥပ္ပာဒက္ခဏေ ဥပ္ပာဒော, ဌာနက္ခဏေ ဇရာ, ဘေဒက္ခဏေ ဝယော။ လက္ခဏံ န သင္ခတံ, သင္ခတံ န လက္ခဏံ , လက္ခဏေန ပန သင္ခတံ ပရိစ္ဆိန္နံ။ ယထာ ဟတ္ထိအသ္သဂောမဟိံသာဒီနံ သတ္တိသူလာဒီနိ သဉ္ဇာနနလက္ခဏာနိ န ဟတ္ထိအာဒယော, နပိ ဟတ္ထိအာဒယော လက္ခဏာနေဝ, လက္ခဏေဟိ ပန တေ ‘‘အသုကသ္သ ဟတ္ထီ, အသုကသ္သ အသ္သော, အသုကဟတ္ထီ, အသုကအသ္သော’’တိ ဝာ ပညာယန္တိ, ဧဝံသမ္ပဒမိဒံ ဝေဒိတဗ္ဗံ။
47. Sattame saṅkhatassāti paccayehi samāgantvā katassa. Saṅkhatalakkhaṇānīti saṅkhataṃ etanti sañjānanakāraṇāni nimittāni. Uppādoti jāti. Vayoti bhedo. Ṭhitassa aññathattaṃ nāma jarā. Tattha saṅkhatanti tebhūmakā dhammā. Maggaphalāni pana asammasanūpagattā idha na kathīyanti. Uppādādayo saṅkhatalakkhaṇā nāma. Tesu uppādakkhaṇe uppādo, ṭhānakkhaṇe jarā, bhedakkhaṇe vayo. Lakkhaṇaṃ na saṅkhataṃ, saṅkhataṃ na lakkhaṇaṃ , lakkhaṇena pana saṅkhataṃ paricchinnaṃ. Yathā hatthiassagomahiṃsādīnaṃ sattisūlādīni sañjānanalakkhaṇāni na hatthiādayo, napi hatthiādayo lakkhaṇāneva, lakkhaṇehi pana te ‘‘asukassa hatthī, asukassa asso, asukahatthī, asukaasso’’ti vā paññāyanti, evaṃsampadamidaṃ veditabbaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. သင္ခတလက္ခဏသုတ္တံ • 7. Saṅkhatalakkhaṇasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇. သင္ခတလက္ခဏသုတ္တဝဏ္ဏနာ • 7. Saṅkhatalakkhaṇasuttavaṇṇanā
