| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৫-২২. সঙ্কিলিট্ঠত্তিকাদিৰণ্ণনা
5-22. Saṅkiliṭṭhattikādivaṇṇanā
সঙ্কিলিট্ঠসঙ্কিলেসিকত্তিকে সব্বং কুসলত্তিকে ৰুত্তনযানুসারেনেৰ ৰেদিতব্বং।
Saṅkiliṭṭhasaṅkilesikattike sabbaṃ kusalattike vuttanayānusāreneva veditabbaṃ.
৭৯. ৰিতক্কত্তিকে যথাকম্মূপগঞাণস্স পরিকম্মন্তি দিব্বচক্খুপরিকম্মমেৰ তস্স উপ্পাদনত্থায পরিকম্মং। উপ্পন্নস্স পন ৰল়ঞ্জনকালে পরিকম্মং সন্ধাযেতং ৰুত্তং। সেসমেত্থ যথাপাল়িমেৰ নিয্যাতি।
79. Vitakkattike yathākammūpagañāṇassa parikammanti dibbacakkhuparikammameva tassa uppādanatthāya parikammaṃ. Uppannassa pana vaḷañjanakāle parikammaṃ sandhāyetaṃ vuttaṃ. Sesamettha yathāpāḷimeva niyyāti.
৮২. তি তদারম্মণভৰঙ্গমূলভৰঙ্গানং ৰসেন ৰুত্তং। সেসমেত্থ সব্বং পাল়িৰসেনেৰ ৰেদিতব্বং।
82. Ti tadārammaṇabhavaṅgamūlabhavaṅgānaṃ vasena vuttaṃ. Sesamettha sabbaṃ pāḷivaseneva veditabbaṃ.
দস্সনত্তিকে দস্সনেন পহাতব্বো রাগো উপ্পজ্জতীতিআদীসু দস্সনেন পহাতব্বো পুথুজ্জনস্স উপ্পজ্জতি। ভাৰনায পহাতব্বো সোতাপন্নস্সাপীতি এৰং উপরিমস্স উপরিমস্স হেট্ঠিমা হেট্ঠিমা নুপ্পজ্জন্তীতি ৰেদিতব্বা। দস্সনেন পহাতব্বো ধম্মো ভাৰনায পহাতব্বস্স ধম্মস্স একেনপি পচ্চযেন পচ্চযো ন হোতি। সেসমেত্থ পাল়িং অনুগন্ত্ৰা কুসলত্তিকে ৰুত্তলক্খণৰসেনেৰ ৰেদিতব্বং।
Dassanattike dassanena pahātabbo rāgo uppajjatītiādīsu dassanena pahātabbo puthujjanassa uppajjati. Bhāvanāya pahātabbo sotāpannassāpīti evaṃ uparimassa uparimassa heṭṭhimā heṭṭhimā nuppajjantīti veditabbā. Dassanena pahātabbo dhammo bhāvanāya pahātabbassa dhammassa ekenapi paccayena paccayo na hoti. Sesamettha pāḷiṃ anugantvā kusalattike vuttalakkhaṇavaseneva veditabbaṃ.
দস্সনেনপহাতব্বহেতুকত্তিকে দস্সনেনপহাতব্বহেতুকাদীনং ৰিভাগো অট্ঠকথাকণ্ডে ৰুত্তনযেনেৰ ৰেদিতব্বো। ৰিচিকিচ্ছুদ্ধচ্চসহগতো মোহো অহেতুকত্তা ততিযপদে পৰিট্ঠো। এৰমেত্থ যেসং দস্সনভাৰনাহি পহাতব্বো হেতু অত্থি, তে পহাতব্বহেতুকা। যেসং সো নত্থি তে নেৰদস্সনেন নভাৰনাযপহাতব্বহেতুকাতি ইমং পহাতব্বহেতুকৰিভাগং ঞত্ৰা সেসং দস্সনেনপহাতব্বত্তিকে চেৰ কুসলত্তিকে চ দস্সিতলক্খণানুসারেনেৰ ৰেদিতব্বং।
Dassanenapahātabbahetukattike dassanenapahātabbahetukādīnaṃ vibhāgo aṭṭhakathākaṇḍe vuttanayeneva veditabbo. Vicikicchuddhaccasahagato moho ahetukattā tatiyapade paviṭṭho. Evamettha yesaṃ dassanabhāvanāhi pahātabbo hetu atthi, te pahātabbahetukā. Yesaṃ so natthi te nevadassanena nabhāvanāyapahātabbahetukāti imaṃ pahātabbahetukavibhāgaṃ ñatvā sesaṃ dassanenapahātabbattike ceva kusalattike ca dassitalakkhaṇānusāreneva veditabbaṃ.
আচযগামিত্তিকে চ পটিচ্চৰারসংসট্ঠৰারেসু অনুলোমং কুসলত্তিকসদিসমেৰ। সেসং ৰিস্সজ্জনতো গণনতো চ যথাপাল়িমেৰ নিয্যাতি।
Ācayagāmittike ca paṭiccavārasaṃsaṭṭhavāresu anulomaṃ kusalattikasadisameva. Sesaṃ vissajjanato gaṇanato ca yathāpāḷimeva niyyāti.
সেক্খত্তিকে অসেক্খো ধম্মো সেক্খস্স ধম্মস্স ন কেনচি পচ্চযেন পচ্চযো। সেক্খো অসেক্খস্স অনন্তরপকতূপনিস্সযো পন হোতি। সেসমেত্থ যথাপাল়িমেৰ নিয্যাতি, তথা পরিত্তত্তিকে।
Sekkhattike asekkho dhammo sekkhassa dhammassa na kenaci paccayena paccayo. Sekkho asekkhassa anantarapakatūpanissayo pana hoti. Sesamettha yathāpāḷimeva niyyāti, tathā parittattike.
পরিত্তারম্মণত্তিকে অপ্পমাণারম্মণাচেতনাতি সেক্খানং গোত্রভুচেতনা, পচ্চৰেক্খণচেতনাতিপি ৰত্তুং ৰট্টতি। ৰিপাকানং পরিত্তারম্মণানন্তি পটিসন্ধিযং কম্মং আরম্মণং কত্ৰা, পৰত্তে চক্খুৰিঞ্ঞাণাদিৰসেনরূপাদিআরম্মণং, তদারম্মণৰসেন জৰনেন গহিতপরিত্তারম্মণঞ্চ আরম্মণং কত্ৰা উপ্পন্নানং। যে পন ‘‘গোত্রভুচিত্তেন নত্থি পটিসন্ধী’’তি ৰদন্তি, তে ইমিনা সুত্তেন পটিসেধেতব্বা। সেসমেত্থ পাল়িনযেনেৰ ৰেদিতব্বং। হীনত্তিকো সঙ্কিলিট্ঠত্তিকসদিসো।
Parittārammaṇattike appamāṇārammaṇācetanāti sekkhānaṃ gotrabhucetanā, paccavekkhaṇacetanātipi vattuṃ vaṭṭati. Vipākānaṃ parittārammaṇānanti paṭisandhiyaṃ kammaṃ ārammaṇaṃ katvā, pavatte cakkhuviññāṇādivasenarūpādiārammaṇaṃ, tadārammaṇavasena javanena gahitaparittārammaṇañca ārammaṇaṃ katvā uppannānaṃ. Ye pana ‘‘gotrabhucittena natthi paṭisandhī’’ti vadanti, te iminā suttena paṭisedhetabbā. Sesamettha pāḷinayeneva veditabbaṃ. Hīnattiko saṅkiliṭṭhattikasadiso.
মিচ্ছত্তত্তিকে মিচ্ছত্তনিযতো সম্মত্তনিযতস্স, সম্মত্তনিযতো ৰা মিচ্ছত্তনিযতস্স কেনচি পচ্চযেন পচ্চযো ন হোতি। মিচ্ছত্তনিযতো ৰা সম্মত্তনিযতো ৰা সহজাতাধিপতিরহিতো নাম নত্থি। সম্মত্তনিযতে একন্ততো আরম্মণপুরেজাতং নত্থি, মিচ্ছত্তনিযতে সিযা আরম্মণপুরেজাতং। অনিযতং চিত্তং আরব্ভ নিযতা মিচ্ছাদিট্ঠি উপ্পজ্জেয্য। সেসা নিযতং আরব্ভ নিযতং নুপ্পজ্জতি, মিচ্ছত্তনিযতং গরুং কত্ৰা ন কোচি ধম্মো উপ্পজ্জতি। কুসলো মিচ্ছত্তস্স উপনিস্সযপচ্চযো ন হোতি। সেসমেত্থ পাল়িযং ৰুত্তনযেনেৰ ৰেদিতব্বং।
Micchattattike micchattaniyato sammattaniyatassa, sammattaniyato vā micchattaniyatassa kenaci paccayena paccayo na hoti. Micchattaniyato vā sammattaniyato vā sahajātādhipatirahito nāma natthi. Sammattaniyate ekantato ārammaṇapurejātaṃ natthi, micchattaniyate siyā ārammaṇapurejātaṃ. Aniyataṃ cittaṃ ārabbha niyatā micchādiṭṭhi uppajjeyya. Sesā niyataṃ ārabbha niyataṃ nuppajjati, micchattaniyataṃ garuṃ katvā na koci dhammo uppajjati. Kusalo micchattassa upanissayapaccayo na hoti. Sesamettha pāḷiyaṃ vuttanayeneva veditabbaṃ.
মগ্গারম্মণত্তিকে পটিচ্চৰারস্স অনুলোমে ৰিপাকপচ্চযো নত্থি। কম্মপচ্চযেপি ইমস্মিং তিকে নানাক্খণিকং ন লব্ভতি, তথা উপ্পন্নত্তিকঅতীতত্তিকেসু। পচ্চনীযে অহেতুকং মগ্গারম্মণন্তি অহেতুকং মগ্গারম্মণং, আৰজ্জনং সন্ধাযেতং ৰুত্তং। সেসমেত্থ পাল়িঅনুসারেনেৰ ৰেদিতব্বং।
Maggārammaṇattike paṭiccavārassa anulome vipākapaccayo natthi. Kammapaccayepi imasmiṃ tike nānākkhaṇikaṃ na labbhati, tathā uppannattikaatītattikesu. Paccanīye ahetukaṃ maggārammaṇanti ahetukaṃ maggārammaṇaṃ, āvajjanaṃ sandhāyetaṃ vuttaṃ. Sesamettha pāḷianusāreneva veditabbaṃ.
উপ্পন্নত্তিকে চ অতীতত্তিকে চ পটিচ্চৰারাদযো নত্থি, পঞ্হাৰারমত্তমেৰ লব্ভতি। কস্মা? পটিচ্চৰারাদযো হি সহজাতপুরেজাতানঞ্ঞেৰ হোন্তি। ইমে চ তিকা অতীতানাগতমিস্সকা। উপ্পন্নত্তিকে চেত্থ অনন্তরভাগিযাপি পচ্চযা ন লব্ভন্তি। কস্মা? উপ্পন্নত্তিকে অতীতস্স অভাৰতো। উপ্পন্নো চ অনুপ্পন্নো চাতি ইমে চেত্থ দ্ৰে ধম্মা উপ্পন্নস্স চ অনুপ্পন্নস্স চাতি ইমেসং দ্ৰিন্নং ন কেনচি পচ্চযেন পচ্চযো। অনুপ্পন্নো চ উপ্পাদী চাতি ইমে পন দ্ৰে উপ্পন্নস্স আরম্মণূপনিস্সযৰসেন দ্ৰীহি পচ্চযেহি পচ্চযো। সেসমেত্থ পাল়িযং আগতনযেনেৰ ৰেদিতব্বং।
Uppannattike ca atītattike ca paṭiccavārādayo natthi, pañhāvāramattameva labbhati. Kasmā? Paṭiccavārādayo hi sahajātapurejātānaññeva honti. Ime ca tikā atītānāgatamissakā. Uppannattike cettha anantarabhāgiyāpi paccayā na labbhanti. Kasmā? Uppannattike atītassa abhāvato. Uppanno ca anuppanno cāti ime cettha dve dhammā uppannassa ca anuppannassa cāti imesaṃ dvinnaṃ na kenaci paccayena paccayo. Anuppanno ca uppādī cāti ime pana dve uppannassa ārammaṇūpanissayavasena dvīhi paccayehi paccayo. Sesamettha pāḷiyaṃ āgatanayeneva veditabbaṃ.
অতীতত্তিকে পচ্চুপ্পন্নং অতীতানাগতস্স, অতীতানাগতঞ্চ অতীতানাগতস্স ন কেনচি পচ্চযেন পচ্চযো। নিব্বানং পন দ্ৰীসুপি ইমেসু তিকেসু নেৰ পচ্চযতো ন পচ্চযুপ্পন্নতো লব্ভতি। সেসমিধাপি পাল়িযং আগতনযেনেৰ ৰেদিতব্বং।
Atītattike paccuppannaṃ atītānāgatassa, atītānāgatañca atītānāgatassa na kenaci paccayena paccayo. Nibbānaṃ pana dvīsupi imesu tikesu neva paccayato na paccayuppannato labbhati. Sesamidhāpi pāḷiyaṃ āgatanayeneva veditabbaṃ.
অজ্ঝত্তত্তিকে অজ্ঝত্তবহিদ্ধাপদং ন গহিতং। অজ্ঝত্তবহিদ্ধাসঙ্খাতা হি উভো রাসযো নেৰ একতো পচ্চযা হোন্তি, ন পচ্চযুপ্পন্না; তস্মা হত্থতলে ঠপিতস্স সাসপস্স ৰণ্ণোপি হত্থতলৰণ্ণেন সদ্ধিং একতো আরম্মণং ন হোতীতি ৰেদিতব্বো। যথা চ অজ্ঝত্তবহিদ্ধাপদং, এৰমেত্থ অজ্ঝত্তারম্মণত্তিকেপি অজ্ঝত্তবহিদ্ধারম্মণপদং ন লব্ভতি। সেসং যথাপাল়িমেৰ নিয্যাতি।
Ajjhattattike ajjhattabahiddhāpadaṃ na gahitaṃ. Ajjhattabahiddhāsaṅkhātā hi ubho rāsayo neva ekato paccayā honti, na paccayuppannā; tasmā hatthatale ṭhapitassa sāsapassa vaṇṇopi hatthatalavaṇṇena saddhiṃ ekato ārammaṇaṃ na hotīti veditabbo. Yathā ca ajjhattabahiddhāpadaṃ, evamettha ajjhattārammaṇattikepi ajjhattabahiddhārammaṇapadaṃ na labbhati. Sesaṃ yathāpāḷimeva niyyāti.
সনিদস্সনত্তিকেপি পাল়িৰসেনেৰ অত্থো গহেতব্বো। গণনাপেত্থ পাল়িযং আগতৰারে সঙ্খিপিত্ৰা হেট্ঠা ৰুত্তনযেনেৰ সংসন্দনেসু সংসন্দিত্ৰা ৰেদিতব্বাতি।
Sanidassanattikepi pāḷivaseneva attho gahetabbo. Gaṇanāpettha pāḷiyaṃ āgatavāre saṅkhipitvā heṭṭhā vuttanayeneva saṃsandanesu saṃsanditvā veditabbāti.
ধম্মানুলোমে তিকপট্ঠানৰণ্ণনা।
Dhammānulome tikapaṭṭhānavaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / পট্ঠানপাল়ি • Paṭṭhānapāḷi
৫. সংকিলিট্ঠত্তিকং • 5. Saṃkiliṭṭhattikaṃ
৬. ৰিতক্কত্তিকং • 6. Vitakkattikaṃ
৭. পীতিত্তিকং • 7. Pītittikaṃ
৮. দস্সনেনপহাতব্বত্তিকং • 8. Dassanenapahātabbattikaṃ
৯. দস্সনেনপহাতব্বহেতুকত্তিকং • 9. Dassanenapahātabbahetukattikaṃ
১০. আচযগামিত্তিকং • 10. Ācayagāmittikaṃ
১১. সেক্খত্তিকং • 11. Sekkhattikaṃ
১২. পরিত্তত্তিকং • 12. Parittattikaṃ
১৩. পরিত্তারম্মণত্তিকং • 13. Parittārammaṇattikaṃ
১৪. হীনত্তিকং • 14. Hīnattikaṃ
১৫. মিচ্ছত্তনিযতত্তিকং • 15. Micchattaniyatattikaṃ
১৬. মগ্গারম্মণত্তিকং • 16. Maggārammaṇattikaṃ
১৭. উপ্পন্নত্তিকং • 17. Uppannattikaṃ
১৮. অতীতত্তিকং • 18. Atītattikaṃ
১৯. অতীতারম্মণত্তিকং • 19. Atītārammaṇattikaṃ
২০. অজ্ঝত্তত্তিকং • 20. Ajjhattattikaṃ
২১. অজ্ঝত্তারম্মণত্তিকং • 21. Ajjhattārammaṇattikaṃ
২২. সনিদস্সনসপ্পটিঘত্তিকং • 22. Sanidassanasappaṭighattikaṃ
