| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೫-೨೨. ಸಙ್ಕಿಲಿಟ್ಠತ್ತಿಕಾದಿವಣ್ಣನಾ
5-22. Saṅkiliṭṭhattikādivaṇṇanā
ಸಙ್ಕಿಲಿಟ್ಠಸಙ್ಕಿಲೇಸಿಕತ್ತಿಕೇ ಸಬ್ಬಂ ಕುಸಲತ್ತಿಕೇ ವುತ್ತನಯಾನುಸಾರೇನೇವ ವೇದಿತಬ್ಬಂ।
Saṅkiliṭṭhasaṅkilesikattike sabbaṃ kusalattike vuttanayānusāreneva veditabbaṃ.
೭೯. ವಿತಕ್ಕತ್ತಿಕೇ ಯಥಾಕಮ್ಮೂಪಗಞಾಣಸ್ಸ ಪರಿಕಮ್ಮನ್ತಿ ದಿಬ್ಬಚಕ್ಖುಪರಿಕಮ್ಮಮೇವ ತಸ್ಸ ಉಪ್ಪಾದನತ್ಥಾಯ ಪರಿಕಮ್ಮಂ। ಉಪ್ಪನ್ನಸ್ಸ ಪನ ವಳಞ್ಜನಕಾಲೇ ಪರಿಕಮ್ಮಂ ಸನ್ಧಾಯೇತಂ ವುತ್ತಂ। ಸೇಸಮೇತ್ಥ ಯಥಾಪಾಳಿಮೇವ ನಿಯ್ಯಾತಿ।
79. Vitakkattike yathākammūpagañāṇassa parikammanti dibbacakkhuparikammameva tassa uppādanatthāya parikammaṃ. Uppannassa pana vaḷañjanakāle parikammaṃ sandhāyetaṃ vuttaṃ. Sesamettha yathāpāḷimeva niyyāti.
೮೨. ತಿ ತದಾರಮ್ಮಣಭವಙ್ಗಮೂಲಭವಙ್ಗಾನಂ ವಸೇನ ವುತ್ತಂ। ಸೇಸಮೇತ್ಥ ಸಬ್ಬಂ ಪಾಳಿವಸೇನೇವ ವೇದಿತಬ್ಬಂ।
82. Ti tadārammaṇabhavaṅgamūlabhavaṅgānaṃ vasena vuttaṃ. Sesamettha sabbaṃ pāḷivaseneva veditabbaṃ.
ದಸ್ಸನತ್ತಿಕೇ ದಸ್ಸನೇನ ಪಹಾತಬ್ಬೋ ರಾಗೋ ಉಪ್ಪಜ್ಜತೀತಿಆದೀಸು ದಸ್ಸನೇನ ಪಹಾತಬ್ಬೋ ಪುಥುಜ್ಜನಸ್ಸ ಉಪ್ಪಜ್ಜತಿ। ಭಾವನಾಯ ಪಹಾತಬ್ಬೋ ಸೋತಾಪನ್ನಸ್ಸಾಪೀತಿ ಏವಂ ಉಪರಿಮಸ್ಸ ಉಪರಿಮಸ್ಸ ಹೇಟ್ಠಿಮಾ ಹೇಟ್ಠಿಮಾ ನುಪ್ಪಜ್ಜನ್ತೀತಿ ವೇದಿತಬ್ಬಾ। ದಸ್ಸನೇನ ಪಹಾತಬ್ಬೋ ಧಮ್ಮೋ ಭಾವನಾಯ ಪಹಾತಬ್ಬಸ್ಸ ಧಮ್ಮಸ್ಸ ಏಕೇನಪಿ ಪಚ್ಚಯೇನ ಪಚ್ಚಯೋ ನ ಹೋತಿ। ಸೇಸಮೇತ್ಥ ಪಾಳಿಂ ಅನುಗನ್ತ್ವಾ ಕುಸಲತ್ತಿಕೇ ವುತ್ತಲಕ್ಖಣವಸೇನೇವ ವೇದಿತಬ್ಬಂ।
Dassanattike dassanena pahātabbo rāgo uppajjatītiādīsu dassanena pahātabbo puthujjanassa uppajjati. Bhāvanāya pahātabbo sotāpannassāpīti evaṃ uparimassa uparimassa heṭṭhimā heṭṭhimā nuppajjantīti veditabbā. Dassanena pahātabbo dhammo bhāvanāya pahātabbassa dhammassa ekenapi paccayena paccayo na hoti. Sesamettha pāḷiṃ anugantvā kusalattike vuttalakkhaṇavaseneva veditabbaṃ.
ದಸ್ಸನೇನಪಹಾತಬ್ಬಹೇತುಕತ್ತಿಕೇ ದಸ್ಸನೇನಪಹಾತಬ್ಬಹೇತುಕಾದೀನಂ ವಿಭಾಗೋ ಅಟ್ಠಕಥಾಕಣ್ಡೇ ವುತ್ತನಯೇನೇವ ವೇದಿತಬ್ಬೋ। ವಿಚಿಕಿಚ್ಛುದ್ಧಚ್ಚಸಹಗತೋ ಮೋಹೋ ಅಹೇತುಕತ್ತಾ ತತಿಯಪದೇ ಪವಿಟ್ಠೋ। ಏವಮೇತ್ಥ ಯೇಸಂ ದಸ್ಸನಭಾವನಾಹಿ ಪಹಾತಬ್ಬೋ ಹೇತು ಅತ್ಥಿ, ತೇ ಪಹಾತಬ್ಬಹೇತುಕಾ। ಯೇಸಂ ಸೋ ನತ್ಥಿ ತೇ ನೇವದಸ್ಸನೇನ ನಭಾವನಾಯಪಹಾತಬ್ಬಹೇತುಕಾತಿ ಇಮಂ ಪಹಾತಬ್ಬಹೇತುಕವಿಭಾಗಂ ಞತ್ವಾ ಸೇಸಂ ದಸ್ಸನೇನಪಹಾತಬ್ಬತ್ತಿಕೇ ಚೇವ ಕುಸಲತ್ತಿಕೇ ಚ ದಸ್ಸಿತಲಕ್ಖಣಾನುಸಾರೇನೇವ ವೇದಿತಬ್ಬಂ।
Dassanenapahātabbahetukattike dassanenapahātabbahetukādīnaṃ vibhāgo aṭṭhakathākaṇḍe vuttanayeneva veditabbo. Vicikicchuddhaccasahagato moho ahetukattā tatiyapade paviṭṭho. Evamettha yesaṃ dassanabhāvanāhi pahātabbo hetu atthi, te pahātabbahetukā. Yesaṃ so natthi te nevadassanena nabhāvanāyapahātabbahetukāti imaṃ pahātabbahetukavibhāgaṃ ñatvā sesaṃ dassanenapahātabbattike ceva kusalattike ca dassitalakkhaṇānusāreneva veditabbaṃ.
ಆಚಯಗಾಮಿತ್ತಿಕೇ ಚ ಪಟಿಚ್ಚವಾರಸಂಸಟ್ಠವಾರೇಸು ಅನುಲೋಮಂ ಕುಸಲತ್ತಿಕಸದಿಸಮೇವ। ಸೇಸಂ ವಿಸ್ಸಜ್ಜನತೋ ಗಣನತೋ ಚ ಯಥಾಪಾಳಿಮೇವ ನಿಯ್ಯಾತಿ।
Ācayagāmittike ca paṭiccavārasaṃsaṭṭhavāresu anulomaṃ kusalattikasadisameva. Sesaṃ vissajjanato gaṇanato ca yathāpāḷimeva niyyāti.
ಸೇಕ್ಖತ್ತಿಕೇ ಅಸೇಕ್ಖೋ ಧಮ್ಮೋ ಸೇಕ್ಖಸ್ಸ ಧಮ್ಮಸ್ಸ ನ ಕೇನಚಿ ಪಚ್ಚಯೇನ ಪಚ್ಚಯೋ। ಸೇಕ್ಖೋ ಅಸೇಕ್ಖಸ್ಸ ಅನನ್ತರಪಕತೂಪನಿಸ್ಸಯೋ ಪನ ಹೋತಿ। ಸೇಸಮೇತ್ಥ ಯಥಾಪಾಳಿಮೇವ ನಿಯ್ಯಾತಿ, ತಥಾ ಪರಿತ್ತತ್ತಿಕೇ।
Sekkhattike asekkho dhammo sekkhassa dhammassa na kenaci paccayena paccayo. Sekkho asekkhassa anantarapakatūpanissayo pana hoti. Sesamettha yathāpāḷimeva niyyāti, tathā parittattike.
ಪರಿತ್ತಾರಮ್ಮಣತ್ತಿಕೇ ಅಪ್ಪಮಾಣಾರಮ್ಮಣಾಚೇತನಾತಿ ಸೇಕ್ಖಾನಂ ಗೋತ್ರಭುಚೇತನಾ, ಪಚ್ಚವೇಕ್ಖಣಚೇತನಾತಿಪಿ ವತ್ತುಂ ವಟ್ಟತಿ। ವಿಪಾಕಾನಂ ಪರಿತ್ತಾರಮ್ಮಣಾನನ್ತಿ ಪಟಿಸನ್ಧಿಯಂ ಕಮ್ಮಂ ಆರಮ್ಮಣಂ ಕತ್ವಾ, ಪವತ್ತೇ ಚಕ್ಖುವಿಞ್ಞಾಣಾದಿವಸೇನರೂಪಾದಿಆರಮ್ಮಣಂ, ತದಾರಮ್ಮಣವಸೇನ ಜವನೇನ ಗಹಿತಪರಿತ್ತಾರಮ್ಮಣಞ್ಚ ಆರಮ್ಮಣಂ ಕತ್ವಾ ಉಪ್ಪನ್ನಾನಂ। ಯೇ ಪನ ‘‘ಗೋತ್ರಭುಚಿತ್ತೇನ ನತ್ಥಿ ಪಟಿಸನ್ಧೀ’’ತಿ ವದನ್ತಿ, ತೇ ಇಮಿನಾ ಸುತ್ತೇನ ಪಟಿಸೇಧೇತಬ್ಬಾ। ಸೇಸಮೇತ್ಥ ಪಾಳಿನಯೇನೇವ ವೇದಿತಬ್ಬಂ। ಹೀನತ್ತಿಕೋ ಸಙ್ಕಿಲಿಟ್ಠತ್ತಿಕಸದಿಸೋ।
Parittārammaṇattike appamāṇārammaṇācetanāti sekkhānaṃ gotrabhucetanā, paccavekkhaṇacetanātipi vattuṃ vaṭṭati. Vipākānaṃ parittārammaṇānanti paṭisandhiyaṃ kammaṃ ārammaṇaṃ katvā, pavatte cakkhuviññāṇādivasenarūpādiārammaṇaṃ, tadārammaṇavasena javanena gahitaparittārammaṇañca ārammaṇaṃ katvā uppannānaṃ. Ye pana ‘‘gotrabhucittena natthi paṭisandhī’’ti vadanti, te iminā suttena paṭisedhetabbā. Sesamettha pāḷinayeneva veditabbaṃ. Hīnattiko saṅkiliṭṭhattikasadiso.
ಮಿಚ್ಛತ್ತತ್ತಿಕೇ ಮಿಚ್ಛತ್ತನಿಯತೋ ಸಮ್ಮತ್ತನಿಯತಸ್ಸ, ಸಮ್ಮತ್ತನಿಯತೋ ವಾ ಮಿಚ್ಛತ್ತನಿಯತಸ್ಸ ಕೇನಚಿ ಪಚ್ಚಯೇನ ಪಚ್ಚಯೋ ನ ಹೋತಿ। ಮಿಚ್ಛತ್ತನಿಯತೋ ವಾ ಸಮ್ಮತ್ತನಿಯತೋ ವಾ ಸಹಜಾತಾಧಿಪತಿರಹಿತೋ ನಾಮ ನತ್ಥಿ। ಸಮ್ಮತ್ತನಿಯತೇ ಏಕನ್ತತೋ ಆರಮ್ಮಣಪುರೇಜಾತಂ ನತ್ಥಿ, ಮಿಚ್ಛತ್ತನಿಯತೇ ಸಿಯಾ ಆರಮ್ಮಣಪುರೇಜಾತಂ। ಅನಿಯತಂ ಚಿತ್ತಂ ಆರಬ್ಭ ನಿಯತಾ ಮಿಚ್ಛಾದಿಟ್ಠಿ ಉಪ್ಪಜ್ಜೇಯ್ಯ। ಸೇಸಾ ನಿಯತಂ ಆರಬ್ಭ ನಿಯತಂ ನುಪ್ಪಜ್ಜತಿ, ಮಿಚ್ಛತ್ತನಿಯತಂ ಗರುಂ ಕತ್ವಾ ನ ಕೋಚಿ ಧಮ್ಮೋ ಉಪ್ಪಜ್ಜತಿ। ಕುಸಲೋ ಮಿಚ್ಛತ್ತಸ್ಸ ಉಪನಿಸ್ಸಯಪಚ್ಚಯೋ ನ ಹೋತಿ। ಸೇಸಮೇತ್ಥ ಪಾಳಿಯಂ ವುತ್ತನಯೇನೇವ ವೇದಿತಬ್ಬಂ।
Micchattattike micchattaniyato sammattaniyatassa, sammattaniyato vā micchattaniyatassa kenaci paccayena paccayo na hoti. Micchattaniyato vā sammattaniyato vā sahajātādhipatirahito nāma natthi. Sammattaniyate ekantato ārammaṇapurejātaṃ natthi, micchattaniyate siyā ārammaṇapurejātaṃ. Aniyataṃ cittaṃ ārabbha niyatā micchādiṭṭhi uppajjeyya. Sesā niyataṃ ārabbha niyataṃ nuppajjati, micchattaniyataṃ garuṃ katvā na koci dhammo uppajjati. Kusalo micchattassa upanissayapaccayo na hoti. Sesamettha pāḷiyaṃ vuttanayeneva veditabbaṃ.
ಮಗ್ಗಾರಮ್ಮಣತ್ತಿಕೇ ಪಟಿಚ್ಚವಾರಸ್ಸ ಅನುಲೋಮೇ ವಿಪಾಕಪಚ್ಚಯೋ ನತ್ಥಿ। ಕಮ್ಮಪಚ್ಚಯೇಪಿ ಇಮಸ್ಮಿಂ ತಿಕೇ ನಾನಾಕ್ಖಣಿಕಂ ನ ಲಬ್ಭತಿ, ತಥಾ ಉಪ್ಪನ್ನತ್ತಿಕಅತೀತತ್ತಿಕೇಸು। ಪಚ್ಚನೀಯೇ ಅಹೇತುಕಂ ಮಗ್ಗಾರಮ್ಮಣನ್ತಿ ಅಹೇತುಕಂ ಮಗ್ಗಾರಮ್ಮಣಂ, ಆವಜ್ಜನಂ ಸನ್ಧಾಯೇತಂ ವುತ್ತಂ। ಸೇಸಮೇತ್ಥ ಪಾಳಿಅನುಸಾರೇನೇವ ವೇದಿತಬ್ಬಂ।
Maggārammaṇattike paṭiccavārassa anulome vipākapaccayo natthi. Kammapaccayepi imasmiṃ tike nānākkhaṇikaṃ na labbhati, tathā uppannattikaatītattikesu. Paccanīye ahetukaṃ maggārammaṇanti ahetukaṃ maggārammaṇaṃ, āvajjanaṃ sandhāyetaṃ vuttaṃ. Sesamettha pāḷianusāreneva veditabbaṃ.
ಉಪ್ಪನ್ನತ್ತಿಕೇ ಚ ಅತೀತತ್ತಿಕೇ ಚ ಪಟಿಚ್ಚವಾರಾದಯೋ ನತ್ಥಿ, ಪಞ್ಹಾವಾರಮತ್ತಮೇವ ಲಬ್ಭತಿ। ಕಸ್ಮಾ? ಪಟಿಚ್ಚವಾರಾದಯೋ ಹಿ ಸಹಜಾತಪುರೇಜಾತಾನಞ್ಞೇವ ಹೋನ್ತಿ। ಇಮೇ ಚ ತಿಕಾ ಅತೀತಾನಾಗತಮಿಸ್ಸಕಾ। ಉಪ್ಪನ್ನತ್ತಿಕೇ ಚೇತ್ಥ ಅನನ್ತರಭಾಗಿಯಾಪಿ ಪಚ್ಚಯಾ ನ ಲಬ್ಭನ್ತಿ। ಕಸ್ಮಾ? ಉಪ್ಪನ್ನತ್ತಿಕೇ ಅತೀತಸ್ಸ ಅಭಾವತೋ। ಉಪ್ಪನ್ನೋ ಚ ಅನುಪ್ಪನ್ನೋ ಚಾತಿ ಇಮೇ ಚೇತ್ಥ ದ್ವೇ ಧಮ್ಮಾ ಉಪ್ಪನ್ನಸ್ಸ ಚ ಅನುಪ್ಪನ್ನಸ್ಸ ಚಾತಿ ಇಮೇಸಂ ದ್ವಿನ್ನಂ ನ ಕೇನಚಿ ಪಚ್ಚಯೇನ ಪಚ್ಚಯೋ। ಅನುಪ್ಪನ್ನೋ ಚ ಉಪ್ಪಾದೀ ಚಾತಿ ಇಮೇ ಪನ ದ್ವೇ ಉಪ್ಪನ್ನಸ್ಸ ಆರಮ್ಮಣೂಪನಿಸ್ಸಯವಸೇನ ದ್ವೀಹಿ ಪಚ್ಚಯೇಹಿ ಪಚ್ಚಯೋ। ಸೇಸಮೇತ್ಥ ಪಾಳಿಯಂ ಆಗತನಯೇನೇವ ವೇದಿತಬ್ಬಂ।
Uppannattike ca atītattike ca paṭiccavārādayo natthi, pañhāvāramattameva labbhati. Kasmā? Paṭiccavārādayo hi sahajātapurejātānaññeva honti. Ime ca tikā atītānāgatamissakā. Uppannattike cettha anantarabhāgiyāpi paccayā na labbhanti. Kasmā? Uppannattike atītassa abhāvato. Uppanno ca anuppanno cāti ime cettha dve dhammā uppannassa ca anuppannassa cāti imesaṃ dvinnaṃ na kenaci paccayena paccayo. Anuppanno ca uppādī cāti ime pana dve uppannassa ārammaṇūpanissayavasena dvīhi paccayehi paccayo. Sesamettha pāḷiyaṃ āgatanayeneva veditabbaṃ.
ಅತೀತತ್ತಿಕೇ ಪಚ್ಚುಪ್ಪನ್ನಂ ಅತೀತಾನಾಗತಸ್ಸ, ಅತೀತಾನಾಗತಞ್ಚ ಅತೀತಾನಾಗತಸ್ಸ ನ ಕೇನಚಿ ಪಚ್ಚಯೇನ ಪಚ್ಚಯೋ। ನಿಬ್ಬಾನಂ ಪನ ದ್ವೀಸುಪಿ ಇಮೇಸು ತಿಕೇಸು ನೇವ ಪಚ್ಚಯತೋ ನ ಪಚ್ಚಯುಪ್ಪನ್ನತೋ ಲಬ್ಭತಿ। ಸೇಸಮಿಧಾಪಿ ಪಾಳಿಯಂ ಆಗತನಯೇನೇವ ವೇದಿತಬ್ಬಂ।
Atītattike paccuppannaṃ atītānāgatassa, atītānāgatañca atītānāgatassa na kenaci paccayena paccayo. Nibbānaṃ pana dvīsupi imesu tikesu neva paccayato na paccayuppannato labbhati. Sesamidhāpi pāḷiyaṃ āgatanayeneva veditabbaṃ.
ಅಜ್ಝತ್ತತ್ತಿಕೇ ಅಜ್ಝತ್ತಬಹಿದ್ಧಾಪದಂ ನ ಗಹಿತಂ। ಅಜ್ಝತ್ತಬಹಿದ್ಧಾಸಙ್ಖಾತಾ ಹಿ ಉಭೋ ರಾಸಯೋ ನೇವ ಏಕತೋ ಪಚ್ಚಯಾ ಹೋನ್ತಿ, ನ ಪಚ್ಚಯುಪ್ಪನ್ನಾ; ತಸ್ಮಾ ಹತ್ಥತಲೇ ಠಪಿತಸ್ಸ ಸಾಸಪಸ್ಸ ವಣ್ಣೋಪಿ ಹತ್ಥತಲವಣ್ಣೇನ ಸದ್ಧಿಂ ಏಕತೋ ಆರಮ್ಮಣಂ ನ ಹೋತೀತಿ ವೇದಿತಬ್ಬೋ। ಯಥಾ ಚ ಅಜ್ಝತ್ತಬಹಿದ್ಧಾಪದಂ, ಏವಮೇತ್ಥ ಅಜ್ಝತ್ತಾರಮ್ಮಣತ್ತಿಕೇಪಿ ಅಜ್ಝತ್ತಬಹಿದ್ಧಾರಮ್ಮಣಪದಂ ನ ಲಬ್ಭತಿ। ಸೇಸಂ ಯಥಾಪಾಳಿಮೇವ ನಿಯ್ಯಾತಿ।
Ajjhattattike ajjhattabahiddhāpadaṃ na gahitaṃ. Ajjhattabahiddhāsaṅkhātā hi ubho rāsayo neva ekato paccayā honti, na paccayuppannā; tasmā hatthatale ṭhapitassa sāsapassa vaṇṇopi hatthatalavaṇṇena saddhiṃ ekato ārammaṇaṃ na hotīti veditabbo. Yathā ca ajjhattabahiddhāpadaṃ, evamettha ajjhattārammaṇattikepi ajjhattabahiddhārammaṇapadaṃ na labbhati. Sesaṃ yathāpāḷimeva niyyāti.
ಸನಿದಸ್ಸನತ್ತಿಕೇಪಿ ಪಾಳಿವಸೇನೇವ ಅತ್ಥೋ ಗಹೇತಬ್ಬೋ। ಗಣನಾಪೇತ್ಥ ಪಾಳಿಯಂ ಆಗತವಾರೇ ಸಙ್ಖಿಪಿತ್ವಾ ಹೇಟ್ಠಾ ವುತ್ತನಯೇನೇವ ಸಂಸನ್ದನೇಸು ಸಂಸನ್ದಿತ್ವಾ ವೇದಿತಬ್ಬಾತಿ।
Sanidassanattikepi pāḷivaseneva attho gahetabbo. Gaṇanāpettha pāḷiyaṃ āgatavāre saṅkhipitvā heṭṭhā vuttanayeneva saṃsandanesu saṃsanditvā veditabbāti.
ಧಮ್ಮಾನುಲೋಮೇ ತಿಕಪಟ್ಠಾನವಣ್ಣನಾ।
Dhammānulome tikapaṭṭhānavaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಪಟ್ಠಾನಪಾಳಿ • Paṭṭhānapāḷi
೫. ಸಂಕಿಲಿಟ್ಠತ್ತಿಕಂ • 5. Saṃkiliṭṭhattikaṃ
೬. ವಿತಕ್ಕತ್ತಿಕಂ • 6. Vitakkattikaṃ
೭. ಪೀತಿತ್ತಿಕಂ • 7. Pītittikaṃ
೮. ದಸ್ಸನೇನಪಹಾತಬ್ಬತ್ತಿಕಂ • 8. Dassanenapahātabbattikaṃ
೯. ದಸ್ಸನೇನಪಹಾತಬ್ಬಹೇತುಕತ್ತಿಕಂ • 9. Dassanenapahātabbahetukattikaṃ
೧೦. ಆಚಯಗಾಮಿತ್ತಿಕಂ • 10. Ācayagāmittikaṃ
೧೧. ಸೇಕ್ಖತ್ತಿಕಂ • 11. Sekkhattikaṃ
೧೨. ಪರಿತ್ತತ್ತಿಕಂ • 12. Parittattikaṃ
೧೩. ಪರಿತ್ತಾರಮ್ಮಣತ್ತಿಕಂ • 13. Parittārammaṇattikaṃ
೧೪. ಹೀನತ್ತಿಕಂ • 14. Hīnattikaṃ
೧೫. ಮಿಚ್ಛತ್ತನಿಯತತ್ತಿಕಂ • 15. Micchattaniyatattikaṃ
೧೬. ಮಗ್ಗಾರಮ್ಮಣತ್ತಿಕಂ • 16. Maggārammaṇattikaṃ
೧೭. ಉಪ್ಪನ್ನತ್ತಿಕಂ • 17. Uppannattikaṃ
೧೮. ಅತೀತತ್ತಿಕಂ • 18. Atītattikaṃ
೧೯. ಅತೀತಾರಮ್ಮಣತ್ತಿಕಂ • 19. Atītārammaṇattikaṃ
೨೦. ಅಜ್ಝತ್ತತ್ತಿಕಂ • 20. Ajjhattattikaṃ
೨೧. ಅಜ್ಝತ್ತಾರಮ್ಮಣತ್ತಿಕಂ • 21. Ajjhattārammaṇattikaṃ
೨೨. ಸನಿದಸ್ಸನಸಪ್ಪಟಿಘತ್ತಿಕಂ • 22. Sanidassanasappaṭighattikaṃ
