| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
१०. सञ्ञालक्खणपञ्हो
10. Saññālakkhaṇapañho
१०. ‘‘भन्ते नागसेन, किंलक्खणा सञ्ञा’’ति? ‘‘सञ्जाननलक्खणा, महाराज, सञ्ञा। किं सञ्जानाति? नीलम्पि सञ्जानाति, पीतम्पि सञ्जानाति, लोहितम्पि सञ्जानाति, ओदातम्पि सञ्जानाति, मञ्जिट्ठम्पि 1 सञ्जानाति। एवं खो, महाराज, सञ्जाननलक्खणा सञ्ञा’’ति।
10. ‘‘Bhante nāgasena, kiṃlakkhaṇā saññā’’ti? ‘‘Sañjānanalakkhaṇā, mahārāja, saññā. Kiṃ sañjānāti? Nīlampi sañjānāti, pītampi sañjānāti, lohitampi sañjānāti, odātampi sañjānāti, mañjiṭṭhampi 2 sañjānāti. Evaṃ kho, mahārāja, sañjānanalakkhaṇā saññā’’ti.
‘‘ओपम्मं करोही’’ति। ‘‘यथा, महाराज, रञ्ञो भण्डागारिको भण्डागारं पविसित्वा नीलपीतलोहितोदातमञ्जिट्ठानि 3 राजभोगानि रूपानि पस्सित्वा सञ्जानाति। एवं खो, महाराज, सञ्जाननलक्खणा सञ्ञा’’ति।
‘‘Opammaṃ karohī’’ti. ‘‘Yathā, mahārāja, rañño bhaṇḍāgāriko bhaṇḍāgāraṃ pavisitvā nīlapītalohitodātamañjiṭṭhāni 4 rājabhogāni rūpāni passitvā sañjānāti. Evaṃ kho, mahārāja, sañjānanalakkhaṇā saññā’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
सञ्ञालक्खणपञ्हो दसमो।
Saññālakkhaṇapañho dasamo.
Footnotes:
