| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༧. སཉྙཱནཱནཏྟསུཏྟཾ
7. Saññānānattasuttaṃ
༩༡. སཱཝཏྠིཡཾ ཝིཧརཏི…པེ॰… ‘‘བྷདནྟེ’’ཏི ཏེ བྷིཀྑཱུ བྷགཝཏོ པཙྩསྶོསུཾ། བྷགཝཱ ཨེཏདཝོཙ – ‘‘དྷཱཏུནཱནཏྟཾ, བྷིཀྑཝེ, པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟཾ, སངྐཔྤནཱནཏྟཾ པཊིཙྩ ཨུཔྤཛྫཏི ཚནྡནཱནཏྟཾ, ཚནྡནཱནཏྟཾ པཊིཙྩ ཨུཔྤཛྫཏི པརིལཱ༹ཧནཱནཏྟཾ, པརིལཱ༹ཧནཱནཏྟཾ པཊིཙྩ ཨུཔྤཛྫཏི པརིཡེསནཱནཱནཏྟཾ། ཀཏམཉྩ, བྷིཀྑཝེ, དྷཱཏུནཱནཏྟཾ? རཱུཔདྷཱཏུ…པེ॰… དྷམྨདྷཱཏུ – ཨིདཾ ཝུཙྩཏི, བྷིཀྑཝེ, དྷཱཏུནཱནཏྟཾ’’།
91. Sāvatthiyaṃ viharati…pe… ‘‘bhadante’’ti te bhikkhū bhagavato paccassosuṃ. Bhagavā etadavoca – ‘‘dhātunānattaṃ, bhikkhave, paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ. Katamañca, bhikkhave, dhātunānattaṃ? Rūpadhātu…pe… dhammadhātu – idaṃ vuccati, bhikkhave, dhātunānattaṃ’’.
‘‘ཀཐཉྩ , བྷིཀྑཝེ, དྷཱཏུནཱནཏྟཾ པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟཾ, སངྐཔྤནཱནཏྟཾ པཊིཙྩ ཨུཔྤཛྫཏི ཚནྡནཱནཏྟཾ, ཚནྡནཱནཏྟཾ པཊིཙྩ ཨུཔྤཛྫཏི པརིལཱ༹ཧནཱནཏྟཾ, པརིལཱ༹ཧནཱནཏྟཾ པཊིཙྩ ཨུཔྤཛྫཏི པརིཡེསནཱནཱནཏྟཾ?
‘‘Kathañca , bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ?
‘‘རཱུཔདྷཱཏུཾ, བྷིཀྑཝེ, པཊིཙྩ ཨུཔྤཛྫཏི རཱུཔསཉྙཱ , རཱུཔསཉྙཾ པཊིཙྩ ཨུཔྤཛྫཏི རཱུཔསངྐཔྤོ, རཱུཔསངྐཔྤཾ པཊིཙྩ ཨུཔྤཛྫཏི རཱུཔཙྪནྡོ, རཱུཔཙྪནྡཾ པཊིཙྩ ཨུཔྤཛྫཏི རཱུཔཔརིལཱ༹ཧོ, རཱུཔཔརིལཱ༹ཧཾ པཊིཙྩ ཨུཔྤཛྫཏི རཱུཔཔརིཡེསནཱ…པེ॰… དྷམྨདྷཱཏུཾ པཊིཙྩ ཨུཔྤཛྫཏི དྷམྨསཉྙཱ, དྷམྨསཉྙཾ པཊིཙྩ ཨུཔྤཛྫཏི དྷམྨསངྐཔྤོ, དྷམྨསངྐཔྤཾ པཊིཙྩ ཨུཔྤཛྫཏི དྷམྨཙྪནྡོ, དྷམྨཙྪནྡཾ པཊིཙྩ ཨུཔྤཛྫཏི དྷམྨཔརིལཱ༹ཧོ, དྷམྨཔརིལཱ༹ཧཾ པཊིཙྩ ཨུཔྤཛྫཏི དྷམྨཔརིཡེསནཱ།
‘‘Rūpadhātuṃ, bhikkhave, paṭicca uppajjati rūpasaññā , rūpasaññaṃ paṭicca uppajjati rūpasaṅkappo, rūpasaṅkappaṃ paṭicca uppajjati rūpacchando, rūpacchandaṃ paṭicca uppajjati rūpapariḷāho, rūpapariḷāhaṃ paṭicca uppajjati rūpapariyesanā…pe… dhammadhātuṃ paṭicca uppajjati dhammasaññā, dhammasaññaṃ paṭicca uppajjati dhammasaṅkappo, dhammasaṅkappaṃ paṭicca uppajjati dhammacchando, dhammacchandaṃ paṭicca uppajjati dhammapariḷāho, dhammapariḷāhaṃ paṭicca uppajjati dhammapariyesanā.
‘‘ཨེཝཾ, ཁོ, བྷིཀྑཝེ, དྷཱཏུནཱནཏྟཾ པཊིཙྩ ཨུཔྤཛྫཏི སཉྙཱནཱནཏྟཾ, སཉྙཱནཱནཏྟཾ པཊིཙྩ ཨུཔྤཛྫཏི སངྐཔྤནཱནཏྟཾ, སངྐཔྤནཱནཏྟཾ པཊིཙྩ ཨུཔྤཛྫཏི ཚནྡནཱནཏྟཾ, ཚནྡནཱནཏྟཾ པཊིཙྩ ཨུཔྤཛྫཏི པརིལཱ༹ཧནཱནཏྟཾ, པརིལཱ༹ཧནཱནཏྟཾ པཊིཙྩ ཨུཔྤཛྫཏི པརིཡེསནཱནཱནཏྟ’’ནྟི། སཏྟམཾ།
‘‘Evaṃ, kho, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānatta’’nti. Sattamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. སཉྙཱནཱནཏྟསུཏྟཝཎྞནཱ • 7. Saññānānattasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. སཉྙཱནཱནཏྟསུཏྟཝཎྞནཱ • 7. Saññānānattasuttavaṇṇanā
