| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
8. ஸன்னிதி⁴காரகஸிக்கா²பத³ங்
8. Sannidhikārakasikkhāpadaṃ
252. அட்ட²மே அப்³ப⁴ந்தரே ஜாதோ அப்³ப⁴ந்தரோ. மஹாதே²ரோதி மஹந்தேஹி தி²ரகு³ணேஹி யுத்தோ. இமினா ‘‘பே³லட்டோ²’’தி ஸஞ்ஞானாமஸ்ஸ ஸஞ்ஞினாமிங் த³ஸ்ஸேதி. பதா⁴னக⁴ரேதி ஸமத²விபஸ்ஸனானங் பத³ஹனட்டா²னக⁴ரஸங்கா²தே ஏகஸ்மிங் ஆவாஸே. ஸுக்க²குரந்தி எத்த² ஸோஸனகுரத்தா ந ஸுக்க²குரங் ஹோதி, கேவலங் பன அஸூபப்³யஞ்ஜனத்தாதி ஆஹ ‘‘அஸூபப்³யஞ்ஜனங் ஓத³ன’’ந்தி. ஸோஸனகுரம்பி யுத்தமேவ. வக்க²தி ஹி ‘‘தங் பிண்ட³பாதங் உத³கேன தேமெத்வா’’தி. ‘‘ஓத³ன’’ந்திஇமினா குரஸத்³த³ஸ்ஸ ஓத³னபரியாயதங் த³ஸ்ஸேதி. ஓத³னஞ்ஹி கரோதி ஆயுவண்ணாத³யோதி ‘‘குர’’ந்தி வுச்சதி. ஸோதி பே³லட்ட²ஸீஸோ. தஞ்ச கோ²தி தஞ்ச ஸுக்க²குரங் ஆஹரதீதி ஸம்ப³ந்தோ⁴. பச்சயகி³த்³த⁴தாயாதி பிண்ட³பாதபச்சயே லுத்³த⁴தாய. தே²ரோ பு⁴ஞ்ஜதீதி ஸம்ப³ந்தோ⁴. மனுஸ்ஸானங் ஏகாஹாரஸ்ஸ ஸத்தாஹமத்தட்டி²தத்தா ‘‘ஸத்தாஹ’’ந்தி வுத்தங். ததோதி பு⁴ஞ்ஜனதோ பரந்தி ஸம்ப³ந்தோ⁴. சத்தாரிபீதி எத்த² பிஸத்³தே³ன அதி⁴கானிபி ஸத்தாஹானி க³ஹேதப்³பா³னி.
252. Aṭṭhame abbhantare jāto abbhantaro. Mahātheroti mahantehi thiraguṇehi yutto. Iminā ‘‘belaṭṭho’’ti saññānāmassa saññināmiṃ dasseti. Padhānaghareti samathavipassanānaṃ padahanaṭṭhānagharasaṅkhāte ekasmiṃ āvāse. Sukkhakuranti ettha sosanakurattā na sukkhakuraṃ hoti, kevalaṃ pana asūpabyañjanattāti āha ‘‘asūpabyañjanaṃ odana’’nti. Sosanakurampi yuttameva. Vakkhati hi ‘‘taṃ piṇḍapātaṃ udakena temetvā’’ti. ‘‘Odana’’ntiiminā kurasaddassa odanapariyāyataṃ dasseti. Odanañhi karoti āyuvaṇṇādayoti ‘‘kura’’nti vuccati. Soti belaṭṭhasīso. Tañca khoti tañca sukkhakuraṃ āharatīti sambandho. Paccayagiddhatāyāti piṇḍapātapaccaye luddhatāya. Thero bhuñjatīti sambandho. Manussānaṃ ekāhārassa sattāhamattaṭṭhitattā ‘‘sattāha’’nti vuttaṃ. Tatoti bhuñjanato paranti sambandho. Cattāripīti ettha pisaddena adhikānipi sattāhāni gahetabbāni.
253. இதீதி இத³ங் தயங். ‘‘ஸன்னிதி⁴ காரோ அஸ்ஸா’’தி ஸமாஸோ விஸேஸனபரனிபாதவஸேன க³ஹேதப்³போ³. ‘‘ஸன்னிதி⁴கிரியந்தி அத்தோ²’’தி இமினா கரீயதீதி காரோதி கம்மத்த²ங் த³ஸ்ஸேதி. ஏகரத்தந்தி அந்திமபரிச்சே²த³வஸேன வுத்தங் தத³தி⁴கானம்பி அதி⁴ப்பேதத்தா. அஸ்ஸாதி ‘‘ஸன்னிதி⁴காரக’’ந்தி பத³ஸ்ஸ.
253.Itīti idaṃ tayaṃ. ‘‘Sannidhi kāro assā’’ti samāso visesanaparanipātavasena gahetabbo. ‘‘Sannidhikiriyanti attho’’ti iminā karīyatīti kāroti kammatthaṃ dasseti. Ekarattanti antimaparicchedavasena vuttaṃ tadadhikānampi adhippetattā. Assāti ‘‘sannidhikāraka’’nti padassa.
ஸன்னிதி⁴காரகஸ்ஸ ஸத்தாஹகாலிகஸ்ஸ நிஸ்ஸக்³கி³யபாசித்தியாபத்தியா பச்சயத்தா ஸன்னிதி⁴காரகங் யாமகாலிகங் கா²த³னீயபோ⁴ஜனீயங் அஸமானம்பி ஸுத்³த⁴பாசித்தியாபத்தியா பச்சயோ ஹோதீதி ஆஹ ‘‘யாமகாலிகங் வா’’தி. படிக்³க³ஹணேதி படிக்³க³ஹணே ச க³ஹணே ச. அஜ்ஜோ²ஹரிதுகாமதாய ஹி படிக்³க³ஹணே ச படிக்³க³ஹெத்வா க³ஹணே சாதி வுத்தங் ஹோதி. யங் பத்தங் அங்கு³லியா க⁴ங்ஸந்தஸ்ஸ லேகா² பஞ்ஞாயதி, ஸோ பத்தோ து³த்³தோ⁴தோ ஹோதி ஸசேதி யோஜனா உத்தரவாக்யே யங்ஸத்³த³ங் தி³ஸ்வா புப்³ப³வாக்யே தங்ஸத்³த³ஸ்ஸ க³மனீயத்தா. க³ண்டி²கபத்தஸ்ஸாதி ப³ந்த⁴னபத்தஸ்ஸ. ஸோதி ஸ்னேஹோ. பக்³க⁴ரதி ஸந்தி³ஸ்ஸதீதி ஸம்ப³ந்தோ⁴. தாதி³ஸேதி து³த்³தோ⁴தே, க³ண்டி²கே வா. தத்தா²தி தோ⁴விதபத்தே ஆஸிஞ்சித்வாதி ஸம்ப³ந்தோ⁴. ஹீதி ஸச்சங். அப்³போ³ஹாரிகாதி ந வோஹரிதப்³பா³, வோஹரிதுங் ந யுத்தாதி அத்தோ². யந்தி கா²த³னீயபோ⁴ஜனீயங் பரிச்சஜந்தீதி ஸம்ப³ந்தோ⁴. ஹீதி ஸச்சங், யஸ்மா வா. ததோதி அபரிச்சத்தகா²த³னீயபோ⁴ஜனீயதோ நீஹரித்வாதி ஸம்ப³ந்தோ⁴.
Sannidhikārakassa sattāhakālikassa nissaggiyapācittiyāpattiyā paccayattā sannidhikārakaṃ yāmakālikaṃ khādanīyabhojanīyaṃ asamānampi suddhapācittiyāpattiyā paccayo hotīti āha ‘‘yāmakālikaṃ vā’’ti. Paṭiggahaṇeti paṭiggahaṇe ca gahaṇe ca. Ajjhoharitukāmatāya hi paṭiggahaṇe ca paṭiggahetvā gahaṇe cāti vuttaṃ hoti. Yaṃ pattaṃ aṅguliyā ghaṃsantassa lekhā paññāyati, so patto duddhoto hoti saceti yojanā uttaravākye yaṃsaddaṃ disvā pubbavākye taṃsaddassa gamanīyattā. Gaṇṭhikapattassāti bandhanapattassa. Soti sneho. Paggharati sandissatīti sambandho. Tādiseti duddhote, gaṇṭhike vā. Tatthāti dhovitapatte āsiñcitvāti sambandho. Hīti saccaṃ. Abbohārikāti na voharitabbā, voharituṃ na yuttāti attho. Yanti khādanīyabhojanīyaṃ pariccajantīti sambandho. Hīti saccaṃ, yasmā vā. Tatoti apariccattakhādanīyabhojanīyato nīharitvāti sambandho.
அகப்பியமங்ஸேஸூதி நித்³தா⁴ரணஸமுதா³யோ. ஸதி பச்சயேதி பிபாஸஸங்கா²தே பச்சயே ஸதி. அனதிரித்தகதந்தி அதிரித்தேன அகதங் ஸன்னிதி⁴காரகங் கா²த³னீயபோ⁴ஜனீயந்தி யோஜனா. ஏகமேவ பாசித்தியந்தி ஸம்ப³ந்தோ⁴. விகப்பத்³வயேதி ஸாமிஸனிராமிஸஸங்கா²தே விகப்பத்³வயே. ஸப்³ப³விகப்பேஸூதி விகாலஸன்னிதி⁴அகப்பியமங்ஸயாமகாலிகபச்சயஸங்கா²தேஸு ஸப்³பே³ஸு விகப்பேஸு.
Akappiyamaṃsesūti niddhāraṇasamudāyo. Sati paccayeti pipāsasaṅkhāte paccaye sati. Anatirittakatanti atirittena akataṃ sannidhikārakaṃ khādanīyabhojanīyanti yojanā. Ekameva pācittiyanti sambandho. Vikappadvayeti sāmisanirāmisasaṅkhāte vikappadvaye. Sabbavikappesūti vikālasannidhiakappiyamaṃsayāmakālikapaccayasaṅkhātesu sabbesu vikappesu.
255. ஆமிஸஸங்ஸட்ட²ந்தி ஆமிஸேன ஸங்ஸட்ட²ங் ஸத்தாஹகாலிகங் யாவஜீவிகங்.
255.Āmisasaṃsaṭṭhanti āmisena saṃsaṭṭhaṃ sattāhakālikaṃ yāvajīvikaṃ.
256. சதுப்³பி³த⁴காலிகஸ்ஸ ஸரூபஞ்ச வசனத்த²ஞ்ச த³ஸ்ஸெந்தோ ஆஹ ‘‘விகாலபோ⁴ஜனஸிக்கா²பதே³’’திஆதி³. தத்த² நித்³தி³ட்ட²ங் கா²த³னீயபோ⁴ஜனீய’’ந்திஇமினா யாவகாலிகஸ்ஸ ஸரூபங் த³ஸ்ஸேதி. ‘‘யாவ…பே॰… காலிக’’ந்திஇமினா வசனத்த²ங் த³ஸ்ஸேதி. ‘‘ஸத்³தி⁴ங்…பே॰… பான’’ந்திஇமினா யாமகாலிகஸ்ஸ ஸரூபங் த³ஸ்ஸேதி. ‘‘யாவ…பே॰… காலிக’’ந்திஇமினா வசனத்த²ங் த³ஸ்ஸேதி. ‘‘ஸப்³பி³ஆதி³ பஞ்சவித⁴ங் பே⁴ஸஜ்ஜ’’ந்திஇமினா ஸத்தாஹகாலிகஸ்ஸ ஸரூபங் த³ஸ்ஸேதி. ‘‘ஸத்தாஹங்…பே॰… காலிக’’ந்திஇமினா வசனத்த²ங் த³ஸ்ஸேதி. ‘‘ட²பெத்வா…பே॰… ஸப்³ப³ம்பீ’’திஇமினா யாவஜீவிகஸ்ஸ ஸரூபங் த³ஸ்ஸேதி. ‘‘யாவ…பே॰… ஜீவிக’’ந்திஇமினா வசனத்த²ங் த³ஸ்ஸேதி. ஸப்³ப³வசனத்தோ² லஹுகமத்தமேவ, க³ருகோ பனேவங் வேதி³தப்³போ³ – யாவ யத்தகோ மஜ்ஜ²ன்ஹிகோ காலோ யாவகாலோ, ஸோ அஸ்ஸத்தீ², தங் வா காலங் பு⁴ஞ்ஜிதப்³ப³ந்தி யாவகாலிகங். யாமோ காலோ யாமகாலோ, ஸோ அஸ்ஸத்தி², தங் வா காலங் பரிபு⁴ஞ்ஜீதப்³ப³ந்தி யாமகாலிகங். ஸத்தாஹோ காலோ ஸத்தாஹகாலோ, ஸோ அஸ்ஸத்தி², தங் வா காலங் நித³ஹித்வா பரிபு⁴ஞ்ஜிதப்³ப³ந்தி ஸத்தாஹகாலிகங். யாவ யத்தகோ ஜீவோ யாவஜீவோ, ஸோ அஸ்ஸத்தி², யாவஜீவங் வா பரிஹரித்வா பரிபு⁴ஞ்ஜிதப்³ப³ந்தி யாவஜீவிகந்தி.
256. Catubbidhakālikassa sarūpañca vacanatthañca dassento āha ‘‘vikālabhojanasikkhāpade’’tiādi. Tattha niddiṭṭhaṃ khādanīyabhojanīya’’ntiiminā yāvakālikassa sarūpaṃ dasseti. ‘‘Yāva…pe… kālika’’ntiiminā vacanatthaṃ dasseti. ‘‘Saddhiṃ…pe… pāna’’ntiiminā yāmakālikassa sarūpaṃ dasseti. ‘‘Yāva…pe… kālika’’ntiiminā vacanatthaṃ dasseti. ‘‘Sabbiādi pañcavidhaṃ bhesajja’’ntiiminā sattāhakālikassa sarūpaṃ dasseti. ‘‘Sattāhaṃ…pe… kālika’’ntiiminā vacanatthaṃ dasseti. ‘‘Ṭhapetvā…pe… sabbampī’’tiiminā yāvajīvikassa sarūpaṃ dasseti. ‘‘Yāva…pe… jīvika’’ntiiminā vacanatthaṃ dasseti. Sabbavacanattho lahukamattameva, garuko panevaṃ veditabbo – yāva yattako majjhanhiko kālo yāvakālo, so assatthī, taṃ vā kālaṃ bhuñjitabbanti yāvakālikaṃ. Yāmo kālo yāmakālo, so assatthi, taṃ vā kālaṃ paribhuñjītabbanti yāmakālikaṃ. Sattāho kālo sattāhakālo, so assatthi, taṃ vā kālaṃ nidahitvā paribhuñjitabbanti sattāhakālikaṃ. Yāva yattako jīvo yāvajīvo, so assatthi, yāvajīvaṃ vā pariharitvā paribhuñjitabbanti yāvajīvikanti.
தத்தா²தி சதுப்³பி³தே⁴ஸு காலிகேஸு. ஸதக்க²த்துந்தி அனேகவாரங். யாவ காலோ நாதிக்கமதி, தாவ பு⁴ஞ்ஜந்தஸ்ஸாதி யோஜனா. அஹோரத்தங் பு⁴ஞ்ஜந்தஸ்ஸாதி ஸம்ப³ந்தோ⁴தி. அட்ட²மங்.
Tatthāti catubbidhesu kālikesu. Satakkhattunti anekavāraṃ. Yāva kālo nātikkamati, tāva bhuñjantassāti yojanā. Ahorattaṃ bhuñjantassāti sambandhoti. Aṭṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
