| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
8. ஸன்னிதி⁴காரகஸிக்கா²பத³வண்ணனா
8. Sannidhikārakasikkhāpadavaṇṇanā
253. அபரஜ்ஜு ஸன்னிதி⁴ நாம ஹோதீதி அத்தோ². அஜ்ஜ படிக்³க³ஹிதந்தி ந கேவலங் படிக்³க³ஹிதமேவ, அத² கோ² உக்³க³ஹிதகம்பி, தேனேவ அட்ட²கதா²யங் ‘‘படிக்³க³ண்ஹாதி, ஆபத்தி து³க்கடஸ்ஸாதி ஏவங் ஸன்னிதி⁴கதங் யங் கிஞ்சி யாவகாலிகங் வா யாமகாலிகங் வா அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே தாவ ஆபத்தி து³க்கடஸ்ஸா’’தி வுத்தங். யதி³ தங் பட²மமேவ படிக்³க³ஹிதங், ‘‘படிக்³க³ஹணே தாவா’’தி ந வத்தப்³ப³ங், தஸ்மா வேதி³தப்³ப³மேதங் ‘‘அத்தனோ காலே க³ஹிதங் அஜ்ஜ படிக்³க³ஹித’ந்தி வுத்த’’ந்தி.
253. Aparajju sannidhi nāma hotīti attho. Ajja paṭiggahitanti na kevalaṃ paṭiggahitameva, atha kho uggahitakampi, teneva aṭṭhakathāyaṃ ‘‘paṭiggaṇhāti, āpatti dukkaṭassāti evaṃ sannidhikataṃ yaṃ kiñci yāvakālikaṃ vā yāmakālikaṃ vā ajjhoharitukāmatāya gaṇhantassa paṭiggahaṇe tāva āpatti dukkaṭassā’’ti vuttaṃ. Yadi taṃ paṭhamameva paṭiggahitaṃ, ‘‘paṭiggahaṇe tāvā’’ti na vattabbaṃ, tasmā veditabbametaṃ ‘‘attano kāle gahitaṃ ajja paṭiggahita’nti vutta’’nti.
எத்தா²ஹ – யதா² பஞ்ச பே⁴ஸஜ்ஜானி உக்³க³ஹிதகானி அனதி⁴ப்பேதானி. ஸத்தாஹாதிக்கமே அனாபத்தி அனஜ்ஜோ²ஹரணீயத்தா, ததா² இதா⁴பி உக்³க³ஹிதகங் நாதி⁴ப்பேதந்தி? எத்த² வுச்சதி – பே⁴ஸஜ்ஜஸிக்கா²பதே³ (பாரா॰ 618 ஆத³யோ) உக்³க³ஹிதகங் நாதி⁴ப்பேதந்தி யுத்தங் அத்தனோ காலாதிக்கமனமத்தேன தத்த² ஆபத்திப்பஸங்க³தோ. எத்த² ந யுத்தங் அத்தனோ காலாதிக்கமனமத்தேன ஆபத்திப்பஸங்கா³பா⁴வதோ. அஜ்ஜோ²ஹரணேனேவ ஹி எத்த² ஆபத்தீதி அதி⁴ப்பாயோ, தஸ்மா அனுக³ண்டி²பத³மதேன அஜ்ஜ உக்³க³ஹெத்வா புனதி³வஸே பு⁴ஞ்ஜந்தோ த்³வே ஆபத்தியோ ஆபஜ்ஜதி.
Etthāha – yathā pañca bhesajjāni uggahitakāni anadhippetāni. Sattāhātikkame anāpatti anajjhoharaṇīyattā, tathā idhāpi uggahitakaṃ nādhippetanti? Ettha vuccati – bhesajjasikkhāpade (pārā. 618 ādayo) uggahitakaṃ nādhippetanti yuttaṃ attano kālātikkamanamattena tattha āpattippasaṅgato. Ettha na yuttaṃ attano kālātikkamanamattena āpattippasaṅgābhāvato. Ajjhoharaṇeneva hi ettha āpattīti adhippāyo, tasmā anugaṇṭhipadamatena ajja uggahetvā punadivase bhuñjanto dve āpattiyo āpajjati.
தத்ராயங் விசாரணா – அத்தனா பு⁴ஞ்ஜிதுகாமோ அஜ்ஜ உக்³க³ஹெத்வா புனதி³வஸே பு⁴ஞ்ஜதி, த்³வே ஆபத்தியோ ஆபஜ்ஜதி. ஸாமணேராதீ³னங்யேவ அத்தா²ய உக்³க³ஹெத்வா க³ஹிதங் புனதி³வஸே படிக்³க³ஹெத்வா பு⁴ஞ்ஜந்தோ ஆபத்தியா ந காரேதப்³போ³தி. படிக்³க³ண்ஹாதி, ஆபத்தி து³க்கடஸ்ஸாதி எத்தா²யமதி⁴ப்பாயோ – ஸசே பே³லட்ட²ஸீஸோ விய து³தியததியாதி³தி³வஸத்தா²ய அஜ்ஜ படிக்³க³ஹெத்வா ஸாமணேராதீ³னங் கோ³பனத்தா²ய தே³தி, தஸ்ஸ புனதி³வஸே அஜ்ஜோ²ஹரணத்த²ங் படிக்³க³ஹணே ஆபத்தி து³க்கடஸ்ஸாதி ஸம்ப⁴வதி. ஸயமேவ ஸசே தங் கோ³பெத்வா ட²பேதி, புனதி³வஸே பதிதங் கசவரங் தி³ஸ்வா விமதிவஸேன வா படிக்³க³ண்ஹதோ படிக்³க³ஹணதோவ ஆபத்தி து³க்கடஸ்ஸாதி ஸம்ப⁴வதி. நோ சே படிக்³க³ண்ஹாதி, தங் து³க்கடங் நத்தி². ‘‘இத³ஞ்ஹி ‘ஏகங் பாத³ங் அதிக்காமேதி, ஆபத்தி து²ல்லச்சயஸ்ஸா’திஆதி³ வியா’’தி வுத்தங். யோ பன ஏகப்பஹாரேனேவ த்³வேபி பாதே³ அதிக்காமேதி, தஸ்ஸ தங் து²ல்லச்சயங் நத்தி², ஏவங்ஸம்பத³மித³ந்தி வேதி³தப்³ப³ங். எத்த² படிக்³க³ஹிதபா⁴வங் அவிஜஹந்தமேவ ஸன்னிதி⁴ங் ஜனேதீதி த⁴ம்மஸிரித்தே²ரோ, தங் ‘‘படிக்³க³ண்ஹாதி, ஆபத்தி து³க்கடஸ்ஸா’’தி பாளியா விருஜ்ஜ²தி. கபாலேன பீதோ பன ஸ்னேஹோ அப்³போ³ஹாரிகோ. கிஞ்சாபி உண்ஹே ஓதாபெந்தஸ்ஸ பக்³க⁴ரதி, ததா²பி ‘‘பே⁴ஸஜ்ஜஸிக்கா²பதே³ வியா’’தி வுத்தங். இதரதா² கபாலேன பீதா ஸப்பிஆத³யோபி ஸத்தாஹாதிக்கமே ஆபத்திங் ஜனெய்யுந்தி. ஸயங் படிக்³க³ஹெத்வாதி இதா⁴பி புப்³பே³ வுத்தவிதி⁴யேவ. து³த்³தோ⁴தபத்தகதா²பி ஏதேன ஸமேதி விய . ஆஹாரத்தா²யாதி காலேபி லப்³ப⁴தி. பகதிஆமிஸேதி கப்பியாமிஸே. ஸாமிஸேன முகே²ன அஜ்ஜோ²ஹரதோ த்³வேதி ‘‘ஹிய்யோ படிக்³க³ஹிதயாமகாலிகங் அஜ்ஜ புரேப⁴த்தங் ஸாமிஸேன முகே²ன அஜ்ஜோ²ஹரதோ த்³வே பாசித்தியானீ’’தி லிகி²தங். அஜ்ஜ படிக்³க³ஹிதங் யாவகாலிகம்பி ஹி யாமாதிக்கந்தபானகேன ஸங்ஸட்ட²ங் ஸன்னிதி⁴ங் கரோதி. அகப்பியமங்ஸேஸு மனுஸ்ஸமங்ஸே து²ல்லச்சயங், ஸேஸமங்ஸே து³க்கடஞ்ச வட்³ட⁴தி.
Tatrāyaṃ vicāraṇā – attanā bhuñjitukāmo ajja uggahetvā punadivase bhuñjati, dve āpattiyo āpajjati. Sāmaṇerādīnaṃyeva atthāya uggahetvā gahitaṃ punadivase paṭiggahetvā bhuñjanto āpattiyā na kāretabboti. Paṭiggaṇhāti, āpatti dukkaṭassāti etthāyamadhippāyo – sace belaṭṭhasīso viya dutiyatatiyādidivasatthāya ajja paṭiggahetvā sāmaṇerādīnaṃ gopanatthāya deti, tassa punadivase ajjhoharaṇatthaṃ paṭiggahaṇe āpatti dukkaṭassāti sambhavati. Sayameva sace taṃ gopetvā ṭhapeti, punadivase patitaṃ kacavaraṃ disvā vimativasena vā paṭiggaṇhato paṭiggahaṇatova āpatti dukkaṭassāti sambhavati. No ce paṭiggaṇhāti, taṃ dukkaṭaṃ natthi. ‘‘Idañhi ‘ekaṃ pādaṃ atikkāmeti, āpatti thullaccayassā’tiādi viyā’’ti vuttaṃ. Yo pana ekappahāreneva dvepi pāde atikkāmeti, tassa taṃ thullaccayaṃ natthi, evaṃsampadamidanti veditabbaṃ. Ettha paṭiggahitabhāvaṃ avijahantameva sannidhiṃ janetīti dhammasiritthero, taṃ ‘‘paṭiggaṇhāti, āpatti dukkaṭassā’’ti pāḷiyā virujjhati. Kapālena pīto pana sneho abbohāriko. Kiñcāpi uṇhe otāpentassa paggharati, tathāpi ‘‘bhesajjasikkhāpade viyā’’ti vuttaṃ. Itarathā kapālena pītā sappiādayopi sattāhātikkame āpattiṃ janeyyunti. Sayaṃ paṭiggahetvāti idhāpi pubbe vuttavidhiyeva. Duddhotapattakathāpi etena sameti viya . Āhāratthāyāti kālepi labbhati. Pakatiāmiseti kappiyāmise. Sāmisena mukhena ajjhoharato dveti ‘‘hiyyo paṭiggahitayāmakālikaṃ ajja purebhattaṃ sāmisena mukhena ajjhoharato dve pācittiyānī’’ti likhitaṃ. Ajja paṭiggahitaṃ yāvakālikampi hi yāmātikkantapānakena saṃsaṭṭhaṃ sannidhiṃ karoti. Akappiyamaṃsesu manussamaṃse thullaccayaṃ, sesamaṃse dukkaṭañca vaḍḍhati.
255. ஸத்தாஹகாலிகங் யாவஜீவிகங் ஆஹாரத்தா²யாதி காலேபி து³க்கடமேவ ஸன்னிதி⁴ங் அனாபஜ்ஜனதோதி கேசி. தத³ஹு படிக்³க³ஹிதங் தத³ஹு புரேப⁴த்தங் வட்டதீதி சே? ந, பாளியம்பி அட்ட²கதா²யம்பி விஸேஸஸ்ஸ நத்தி²தாய. பே⁴ஸஜ்ஜஸிக்கா²பதே³ புரேப⁴த்தங் யதா²ஸுக²ங் பரிபு⁴ஞ்ஜனங் வுத்தந்தி சே? ஆஹாரே ஸப்பிஆதி³ ஸங்க³ஹங் யாதி, தேன தக்³க³திகவஸேன வுத்தங், ந பே⁴ஸஜ்ஜவஸேன வுத்தந்தி உபதிஸ்ஸோ.
255.Sattāhakālikaṃ yāvajīvikaṃ āhāratthāyāti kālepi dukkaṭameva sannidhiṃ anāpajjanatoti keci. Tadahu paṭiggahitaṃ tadahu purebhattaṃ vaṭṭatīti ce? Na, pāḷiyampi aṭṭhakathāyampi visesassa natthitāya. Bhesajjasikkhāpade purebhattaṃ yathāsukhaṃ paribhuñjanaṃ vuttanti ce? Āhāre sappiādi saṅgahaṃ yāti, tena taggatikavasena vuttaṃ, na bhesajjavasena vuttanti upatisso.
ஸன்னிதி⁴காரகஸிக்கா²பத³வண்ணனா நிட்டி²தா.
Sannidhikārakasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 4. போ⁴ஜனவக்³கோ³ • 4. Bhojanavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. ஸன்னிதி⁴காரகஸிக்கா²பத³வண்ணனா • 8. Sannidhikārakasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. ஸன்னிதி⁴காரகஸிக்கா²பத³ங் • 8. Sannidhikārakasikkhāpadaṃ
