| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
8. саннид̇хигаарагасигкаабад̣̇аван̣н̣анаа
8. Sannidhikārakasikkhāpadavaṇṇanā
‘‘гааро гаран̣ам̣ гирияаад̇и ад̇т̇ад̇о зга’’нд̇и зд̇зна гаарасад̣̇д̣̇асса бхаавад̇т̇ад̇ам̣ д̣̇ассзд̇и. саммаа нид̇хаанам̣ табанам̣ саннид̇хи. ‘‘бадиг̇г̇ахзд̇ваа згарад̇д̇ам̣ вийд̇инаамид̇ассзд̇ам̣ наама’’нд̇и иминаа бадиг̇г̇ахзд̇ваа згарад̇д̇ам̣ вийд̇инаамид̇з имасса д̣̇уд̣̇д̇ход̇абхаавам̣ д̣̇ассзд̇и. гин̃жааби яаамагаалигам̣ каад̣̇анийяам̣, бхож̇анийяам̣ ваа на ход̇и, ‘‘анаабад̇д̇и яаамагаалигам̣ яаамз нид̣̇ахид̇ваа бхун̃ж̇ад̇ий’’д̇иаад̣̇и важанад̇о бана д̇ад̇т̇ааби яаамаад̇иггамз саннид̇хибажжаяаа баажид̇д̇иязна бхавид̇аб̣б̣анд̇и ‘‘яам̣ гин̃жи яаавагаалигам̣ ваа яаамагаалигам̣ ваа’’д̇и вуд̇д̇ам̣. ид̣̇аани д̣̇уд̣̇д̇ход̇абхаавамзва вибхаавзд̇ум̣ ‘‘яам̣ ан̇г̇улияаа’’д̇иаад̣̇и вуд̇д̇ам̣. д̇ад̇т̇а яам̣ ан̇г̇улияаа гхам̣санд̇асса лзкаа бан̃н̃ааяад̇ийд̇и яам̣ бад̇д̇ам̣ д̇ход̇ам̣ ан̇г̇улияаа гхам̣санд̇асса бад̇д̇з ан̇г̇улилзкаа бан̃н̃ааяад̇и, со бад̇д̇о д̣̇уд̣̇д̇ход̇о ход̇ийд̇и ад̇т̇о. д̇злаван̣н̣абад̇д̇з бана ан̇г̇улилзкаа бан̃н̃ааяад̇и, саа аб̣б̣охааригаа. снзход̇и д̇злам̣. санд̣̇иссад̇ийд̇и яааг̇уяаа убари санд̣̇иссад̇и. д̇аад̣̇исз бад̇д̇збийд̇и бадиг̇г̇ахан̣ам̣ ависсаж̇ж̇ид̇ваа саяам̣ ваа ан̃н̃зна ваа бхож̇анам̣ нийхарид̇ваа на саммаа д̇ход̇з бад̇д̇зби. бунад̣̇ивасз бхун̃ж̇анд̇асса баажид̇д̇ияанд̇и бад̇д̇з лаг̇г̇ам̣ авиж̇ахид̇аббадиг̇г̇ахан̣ам̣ ход̇ийд̇и д̣̇уд̇ияад̣̇ивасз бхун̃ж̇анд̇асса баажид̇д̇ияам̣. барижжад̇д̇з бана бад̇д̇з бунад̣̇ивасз бхун̃ж̇анд̇асса анаабад̇д̇и.
‘‘Kāro karaṇaṃ kiriyāti atthato eka’’nti etena kārasaddassa bhāvatthataṃ dasseti. Sammā nidhānaṃ ṭhapanaṃ sannidhi. ‘‘Paṭiggahetvā ekarattaṃ vītināmitassetaṃnāma’’nti iminā paṭiggahetvā ekarattaṃ vītināmite imassa duddhotabhāvaṃ dasseti. Kiñcāpi yāmakālikaṃ khādanīyaṃ, bhojanīyaṃ vā na hoti, ‘‘anāpatti yāmakālikaṃ yāme nidahitvā bhuñjatī’’tiādi vacanato pana tatthāpi yāmātikkame sannidhipaccayā pācittiyena bhavitabbanti ‘‘yaṃ kiñci yāvakālikaṃ vā yāmakālikaṃ vā’’ti vuttaṃ. Idāni duddhotabhāvameva vibhāvetuṃ ‘‘yaṃ aṅguliyā’’tiādi vuttaṃ. Tattha yaṃ aṅguliyā ghaṃsantassa lekhā paññāyatīti yaṃ pattaṃ dhotaṃ aṅguliyā ghaṃsantassa patte aṅgulilekhā paññāyati, so patto duddhoto hotīti attho. Telavaṇṇapatte pana aṅgulilekhā paññāyati, sā abbohārikā. Snehoti telaṃ. Sandissatīti yāguyā upari sandissati. Tādise pattepīti paṭiggahaṇaṃ avissajjitvā sayaṃ vā aññena vā bhojanaṃ nīharitvā na sammā dhote pattepi. Punadivase bhuñjantassa pācittiyanti patte laggaṃ avijahitappaṭiggahaṇaṃ hotīti dutiyadivase bhuñjantassa pācittiyaṃ. Pariccatte pana patte punadivase bhuñjantassa anāpatti.
яам̣ банаад̇и яам̣ бхож̇анам̣ бана. абарижжад̇д̇амзва хийд̇и анабзгкависсаж̇ж̇анзна ваа анубасамбаннасса нирабзгкад̣̇аанзна ваа абарижжад̇д̇амзва. габбияа бхож̇ананд̇и анд̇амасо згасид̇т̇амад̇д̇амби габбияабхож̇анам̣. агаббиязсууд̇и агаббияамам̣сзсу. сзсзсууд̇и мануссамам̣сад̇о авасзсзсу хад̇т̇иассасунакаахисийхаб̣яаг̇гхад̣̇ийбиажчад̇аражчамам̣сзсу жзва аббадивзгкид̇з уд̣̇д̣̇иссагад̇амам̣сз жа. баал̣ияам̣ ‘‘сад̇д̇аахагаалигам̣ яааваж̇ийвигам̣ аахаарад̇т̇ааяа бадиг̇г̇ан̣хаад̇и, аабад̇д̇и д̣̇уггадассаа’’д̇иаад̣̇инаа (баажи. 255) саннихид̇зсу сад̇д̇аахагаалигаяааваж̇ийвигзсу бурзбхад̇д̇амби аахаарад̇т̇ааяа аж̇жхохаран̣зби д̣̇уггадасса вуд̇д̇ад̇д̇аа яаамагаалигзби аахаарад̇т̇ааяа аж̇жхохаран̣зби висум̣ д̣̇уггадзнааби бхавид̇аб̣б̣анд̇и ааха ‘‘аахаарад̇т̇ааяа аж̇жхохарад̇о д̣̇уггадзна сад̣̇д̇хим̣ баажид̇д̇ияа’’нд̇и. саб̣б̣авигаббзсууд̇и ‘‘габбияабхож̇анам̣ бхун̃ж̇анд̇ассаа’’д̇иаад̣̇инаа вуд̇д̇зсу саб̣б̣зсу вигаббзсу абарамби баажид̇д̇ияам̣ вад̣дхад̇и. ид̣̇ам̣ вуд̇д̇ам̣ ход̇и (баажи. адта. 253) – габбияабхож̇анз д̣̇вз баажид̇д̇ияаани, мануссамам̣сз т̇уллажжаязна сад̣̇д̇хим̣ д̣̇вз баажид̇д̇ияаани, авасзсзсу бана агаббияамам̣сзсу д̣̇уггадзна сад̣̇д̇хим̣ д̣̇вз баажид̇д̇ияаани. яаамагаалигам̣ сад̇и бажжаяз саамисзна мукзна аж̇жхохарад̇о д̣̇вз баажид̇д̇ияаани, нираамисзна згамзва. аахаарад̇т̇ааяа аж̇жхохарад̇о вигаббад̣̇ваязби д̣̇уггадзна сад̣̇д̇хинд̇и.
Yaṃ panāti yaṃ bhojanaṃ pana. Apariccattameva hīti anapekkhavissajjanena vā anupasampannassa nirapekkhadānena vā apariccattameva. Kappiya bhojananti antamaso ekasitthamattampi kappiyabhojanaṃ. Akappiyesūti akappiyamaṃsesu. Sesesūti manussamaṃsato avasesesu hatthiassasunakhaahisīhabyagghadīpiacchataracchamaṃsesu ceva appaṭivekkhite uddissakatamaṃse ca. Pāḷiyaṃ ‘‘sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassā’’tiādinā (pāci. 255) sannihitesu sattāhakālikayāvajīvikesu purebhattampi āhāratthāya ajjhoharaṇepi dukkaṭassa vuttattā yāmakālikepi āhāratthāya ajjhoharaṇepi visuṃ dukkaṭenāpi bhavitabbanti āha ‘‘āhāratthāya ajjhoharato dukkaṭena saddhiṃ pācittiya’’nti. Sabbavikappesūti ‘‘kappiyabhojanaṃ bhuñjantassā’’tiādinā vuttesu sabbesu vikappesu aparampi pācittiyaṃ vaḍḍhati. Idaṃ vuttaṃ hoti (pāci. aṭṭha. 253) – kappiyabhojane dve pācittiyāni, manussamaṃse thullaccayena saddhiṃ dve pācittiyāni, avasesesu pana akappiyamaṃsesu dukkaṭena saddhiṃ dve pācittiyāni. Yāmakālikaṃ sati paccaye sāmisena mukhena ajjhoharato dve pācittiyāni, nirāmisena ekameva. Āhāratthāya ajjhoharato vikappadvayepi dukkaṭena saddhinti.
авасзсзсууд̇и яаамагаалигаад̣̇ид̇о авасзсзсу. баажид̇д̇ияам̣ вад̣дхад̇иязваад̇и абарамби баажид̇д̇ияам̣ вад̣дхад̇иязва. ид̣̇ам̣ вуд̇д̇ам̣ ход̇и – сажз вигаалз аж̇жхохарад̇и, багад̇ибхож̇анз саннид̇хибажжаяаа жа вигаалабхож̇анабажжаяаа жа д̣̇вз баажид̇д̇ияаани, агаббияамам̣сзсу мануссамам̣сз т̇уллажжаязна сад̣̇д̇хим̣ д̣̇вз баажид̇д̇ияаани, авасзсзсу д̣̇уггадзна сад̣̇д̇хим̣ д̣̇взд̇и.
Avasesesūti yāmakālikādito avasesesu. Pācittiyaṃ vaḍḍhatiyevāti aparampi pācittiyaṃ vaḍḍhatiyeva. Idaṃ vuttaṃ hoti – sace vikāle ajjhoharati, pakatibhojane sannidhipaccayā ca vikālabhojanapaccayā ca dve pācittiyāni, akappiyamaṃsesu manussamaṃse thullaccayena saddhiṃ dve pācittiyāni, avasesesu dukkaṭena saddhiṃ dveti.
б̣зладтасийсо наама ж̇адиласахассасса аб̣бханд̇арз зго махаат̇зро. д̇игабаажид̇д̇ияанд̇и саннид̇хигаарагз саннид̇хигаарагасан̃н̃ивзмад̇игаасаннид̇хигаарагасан̃н̃ийнам̣ васзна д̇ийн̣и баажид̇д̇ияаани. сам̣садтаанийд̇и сам̣садтарасаани. самбхиннарасам̣ санд̇хааязва хи ‘‘д̇ад̣̇ахубадиг̇г̇ахид̇ам̣ гаалз габбад̇ий’’д̇иаад̣̇и вуд̇д̇ам̣. д̇знааха ‘‘д̇асмаа’’д̇иаад̣̇и. зд̇т̇а жа асамбхиннарасанд̇и амиссид̇арасам̣. ид̣̇ан̃жа сийд̇алабааяаасаад̣̇инаа саха лад̣̇д̇хам̣ саббибин̣д̣аад̣̇игам̣ санд̇хааяа вуд̇д̇ам̣. ‘‘суд̇ход̇ам̣ ваа’’д̇и ид̣̇ам̣ бана бин̣д̣абаад̇зна сад̣̇д̇хим̣ лад̣̇д̇хам̣ д̇агголаж̇аад̇ипалаад̣̇им̣, яааг̇уаад̣̇ийсу багкибид̇ваа д̣̇иннасин̇г̇ийвзраад̣̇иган̃жа санд̇хааяа вуд̇д̇ам̣.
Belaṭṭhasīso nāma jaṭilasahassassa abbhantare eko mahāthero. Tikapācittiyanti sannidhikārake sannidhikārakasaññivematikaasannidhikārakasaññīnaṃ vasena tīṇi pācittiyāni. Saṃsaṭṭhānīti saṃsaṭṭharasāni. Sambhinnarasaṃ sandhāyeva hi ‘‘tadahupaṭiggahitaṃ kāle kappatī’’tiādi vuttaṃ. Tenāha ‘‘tasmā’’tiādi. Ettha ca asambhinnarasanti amissitarasaṃ. Idañca sītalapāyāsādinā saha laddhaṃ sappipiṇḍādikaṃ sandhāya vuttaṃ. ‘‘Sudhotaṃ vā’’ti idaṃ pana piṇḍapātena saddhiṃ laddhaṃ takkolajātiphalādiṃ, yāguādīsu pakkhipitvā dinnasiṅgīverādikañca sandhāya vuttaṃ.
д̇знаад̇и сад̇д̇аахагаалигзна. д̇ад̣̇аху бадиг̇г̇ахид̇ам̣ ассаад̇и д̇ад̣̇ахубадиг̇г̇ахид̇ам̣, д̇зна д̇ад̣̇ахубадиг̇г̇ахид̇зна. зса наяо ‘‘д̣̇вийхабадиг̇г̇ахид̇знаа’’д̇иаад̣̇ийсуби. д̇асмаад̇и яасмаа бурзбхад̇д̇ам̣ бадиг̇г̇ахид̇амби ваддад̇и, д̇асмаа. бадиг̇г̇ахид̇ам̣ сад̇д̇аахам̣ габбад̇ийд̇и вуд̇д̇анд̇и ‘‘сад̇д̇аахагаалигзна, бхигкавз, яааваж̇ийвигам̣ бадиг̇г̇ахид̇ам̣ сад̇д̇аахам̣ габбад̇и, сад̇д̇аахаад̇игганд̇з на габбад̇ий’’д̇и (махаава. 305) бхзсаж̇ж̇агканд̇хагз вуд̇д̇ам̣. гин̃жааби мукз згарад̇д̇ам̣ на вуд̇д̇ам̣, д̇ат̇ааби мукз багкид̇д̇амзва яасмаа саннид̇хи наама ход̇и, д̇асмаа ‘‘мукасаннид̇хий’’д̇и вуд̇д̇ам̣.
Tenāti sattāhakālikena. Tadahu paṭiggahitaṃ assāti tadahupaṭiggahitaṃ, tena tadahupaṭiggahitena. Esa nayo ‘‘dvīhapaṭiggahitenā’’tiādīsupi. Tasmāti yasmā purebhattaṃ paṭiggahitampi vaṭṭati, tasmā. Paṭiggahitaṃ sattāhaṃ kappatīti vuttanti ‘‘sattāhakālikena, bhikkhave, yāvajīvikaṃ paṭiggahitaṃ sattāhaṃ kappati, sattāhātikkante na kappatī’’ti (mahāva. 305) bhesajjakkhandhake vuttaṃ. Kiñcāpi mukhe ekarattaṃ na vuttaṃ, tathāpi mukhe pakkhittameva yasmā sannidhi nāma hoti, tasmā ‘‘mukhasannidhī’’ti vuttaṃ.
жад̇ассо габбияабхуумияод̇и уссаавананд̇игаа, г̇онисаад̣̇игаа, г̇ахабад̇и, саммуд̇ийд̇и жад̇ассо габбияагудияо. д̇ад̇т̇а уссаавананд̇игаа (махаава. адта. 295) наама г̇зхз гарияамаанз самбариваарзд̇ваа тид̇зхи ‘‘габбияагудим̣ гарома, габбияагудим̣ гаромаа’’д̇и ваа ‘‘габбияагуди габбияагудий’’д̇и ваа вад̣̇анд̇зхи табид̇абатамидтагат̇амбхаад̣̇игаа сан̇гхасса ваа згасса бхигкуно ваа гуди. яо бана аараамо язбхуяязна ваа абаригкид̇д̇о ход̇и, сагалоби ваа , со ‘‘г̇онисаад̣̇ий’’д̇и вужжад̇и. г̇ахабад̇ийд̇и яаа табзд̇ваа бхигкум̣ сзсзхи ‘‘габбияагудим̣ д̣̇змаа’’д̇и д̣̇иннаа, д̇зсам̣ ваа санд̇агаа. саммуд̇и наама гаммаваажааяа саавзд̇ваа гад̇аа. гат̇ам̣ банзд̇аасам̣ винижчаяо ж̇аанид̇аб̣б̣од̇и ааха ‘‘д̇аасам̣ винижчаяо саманд̇абаасаад̣̇игааяам̣ вуд̇д̇о’’д̇и.
Catasso kappiyabhūmiyoti ussāvanantikā, gonisādikā, gahapati, sammutīti catasso kappiyakuṭiyo. Tattha ussāvanantikā (mahāva. aṭṭha. 295) nāma gehe kariyamāne samparivāretvā ṭhitehi ‘‘kappiyakuṭiṃ karoma, kappiyakuṭiṃ karomā’’ti vā ‘‘kappiyakuṭi kappiyakuṭī’’ti vā vadantehi ṭhapitapaṭhamiṭṭhakathambhādikā saṅghassa vā ekassa bhikkhuno vā kuṭi. Yo pana ārāmo yebhuyyena vā aparikkhitto hoti, sakalopi vā , so ‘‘gonisādī’’ti vuccati. Gahapatīti yā ṭhapetvā bhikkhuṃ sesehi ‘‘kappiyakuṭiṃ demā’’ti dinnā, tesaṃ vā santakā. Sammuti nāma kammavācāya sāvetvā katā. Kathaṃ panetāsaṃ vinicchayo jānitabboti āha ‘‘tāsaṃ vinicchayo samantapāsādikāyaṃ vutto’’ti.
саннид̇хигаарагасигкаабад̣̇аван̣н̣анаа нидтид̇аа.
Sannidhikārakasikkhāpadavaṇṇanā niṭṭhitā.
