| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
8. саннид̇хигаарагасигкаабад̣̇аван̣н̣анаа
8. Sannidhikārakasikkhāpadavaṇṇanā
252-3. адтамз д̇аад̣̇исанд̇и асуубаб̣яан̃ж̇анам̣. яаавагаалигам̣ ваа яаамагаалигам̣ ваа…бз… баажид̇д̇ияанд̇и зд̇т̇а гин̃жааби баал̣ияам̣ каад̣̇анийяабхож̇анийяабад̣̇зхи яаавагаалигамзва сан̇г̇ахид̇ам̣, на яаамагаалигам̣. д̇ат̇ааби ‘‘анаабад̇д̇и яаамагаалигам̣ яаамз нид̣̇ахид̇ваа бхун̃ж̇ад̇ий’’д̇и ид̇ха жзва –
252-3. Aṭṭhame tādisanti asūpabyañjanaṃ. Yāvakālikaṃ vā yāmakālikaṃ vā…pe… pācittiyanti ettha kiñcāpi pāḷiyaṃ khādanīyabhojanīyapadehi yāvakālikameva saṅgahitaṃ, na yāmakālikaṃ. Tathāpi ‘‘anāpatti yāmakālikaṃ yāme nidahitvā bhuñjatī’’ti idha ceva –
‘‘яаамагаалигзна , бхигкавз, сад̇д̇аахагаалигам̣…бз… яааваж̇ийвигам̣ д̇ад̣̇ахубадиг̇г̇ахид̇ам̣ яаамз габбад̇и, яаамаад̇игганд̇з на габбад̇ий’’д̇и (махаава. 305) –
‘‘Yāmakālikena , bhikkhave, sattāhakālikaṃ…pe… yāvajīvikaṃ tadahupaṭiggahitaṃ yāme kappati, yāmātikkante na kappatī’’ti (mahāva. 305) –
ан̃н̃ад̇т̇а жа вуд̇д̇ад̇д̇аа, ‘‘яаамагаалига’’нд̇и важанасаамад̇т̇ияад̇о жа бхаг̇авад̇о ад̇хиббааяан̃н̃уухи адтагат̇аажариязхи яаамагаалигам̣ саннид̇хигаарагагад̇ам̣ баажид̇д̇ияавад̇т̇умзва вуд̇д̇анд̇и д̣̇адтаб̣б̣ам̣. яанд̇и бад̇д̇ам̣, гхам̣санагирияаабзгкааяа жзд̇ам̣ убаяог̇аважанам̣. ан̇г̇улилзкаа бан̃н̃ааяад̇ийд̇и синзхаабхаавзби бад̇д̇асса сужчавид̇ааяа бан̃н̃ааяад̇и. яанд̇и яаавагаалигам̣, яаамагаалиган̃жа. абарижжад̇д̇амзваад̇и нирабзгкад̇ааяа анубасамбаннасса ад̣̇иннам̣, абарижжад̇д̇ан̃жа яаавагаалигаад̣̇ивад̇т̇умзва санд̇хааяа вад̣̇ад̇и, на бана д̇аг̇г̇ад̇абадиг̇г̇ахан̣ам̣. на хи вад̇т̇ум̣ абарижжаж̇ид̇ваа д̇ад̇т̇аг̇ад̇абадиг̇г̇ахан̣ам̣ барижжаж̇ид̇ум̣ саггаа, на жа д̇аад̣̇исам̣ важанамад̇т̇и. яад̣̇и бхавзяяа, ‘‘сажз бад̇д̇о д̣̇уд̣̇д̇ход̇о ход̇и…бз… бхун̃ж̇анд̇асса баажид̇д̇ияа’’нд̇и важанам̣ вируж̇жхзяяа. на хи д̇хованзна аамисам̣ абанзд̇ум̣ вааяаманд̇асса бадиг̇г̇ахан̣з абзгкаа вад̇д̇ад̇и. язна бунад̣̇ивасз бхун̃ж̇ад̇о баажид̇д̇ияам̣ ж̇анзяяа, бад̇д̇з бана вад̇д̇амаанаа абзгкаа д̇аг̇г̇ад̇игз аамисзби вад̇д̇ад̇и званаамаад̇и аамисз анабзгкад̇аа зд̇т̇а на лаб̣бхад̇и, д̇ад̇о аамисз авиж̇ахид̇абадиг̇г̇ахан̣ам̣ бунад̣̇ивасз баажид̇д̇ияам̣ ж̇анзд̇ийд̇и ид̣̇ам̣ вуд̇д̇ам̣. ат̇а мад̇ам̣ ‘‘яад̣̇аг̇г̇знзд̇т̇а аамисаанабзгкад̇аа на лаб̣бхад̇и. д̇ад̣̇аг̇г̇зна бадиг̇г̇ахан̣аанабзгкааби на лаб̣бхад̇ий’’д̇и. д̇ат̇аа сад̇и яад̇т̇а аамисаабзгкаа ад̇т̇и, д̇ад̇т̇а бадиг̇г̇ахан̣аабзгкааби на виг̇ажчад̇ийд̇и аабаннам̣, зван̃жа бадиг̇г̇ахан̣з анабзгкависсаж̇ж̇анам̣ висум̣ на вад̇д̇аб̣б̣ам̣ сияаа. адтагат̇ааяан̃жзд̇амби бадиг̇г̇ахан̣авиж̇аханагааран̣ад̇д̇зна абхимад̇ам̣ сияаа, ид̣̇ам̣ судтуд̇арам̣ гад̇ваа висум̣ вад̇д̇аб̣б̣ам̣ жийвараабзгкааяа вад̇д̇амаанааяаби бажжуд̣̇д̇хаарзна ад̇хидтаанавиж̇аханам̣ вияа. зд̇асмин̃жа убааяз сад̇и г̇ан̣тигаахад̇абад̇д̇зсу авадданад̇аа наама на сияаад̇и вуд̇д̇овааяамад̇т̇о. д̇асмаа яам̣ вуд̇д̇ам̣ саарад̇т̇ад̣̇ийбанияам̣ ‘‘яам̣ барасса барижжаж̇ид̇ваа ад̣̇иннамби сажз бадиг̇г̇ахан̣з нирабзгканиссаж̇ж̇анзна виж̇ахид̇абадиг̇г̇ахан̣ам̣ ход̇и, д̇амби д̣̇уд̇ияад̣̇ивасз ваддад̇ий’’д̇иаад̣̇и (саарад̇т̇а. дий. баажид̇д̇ияаган̣д̣а 3.252-253), д̇ам̣ на саарад̇о бажжзд̇аб̣б̣ам̣.
Aññattha ca vuttattā, ‘‘yāmakālika’’nti vacanasāmatthiyato ca bhagavato adhippāyaññūhi aṭṭhakathācariyehi yāmakālikaṃ sannidhikārakakataṃ pācittiyavatthumeva vuttanti daṭṭhabbaṃ. Yanti pattaṃ, ghaṃsanakiriyāpekkhāya cetaṃ upayogavacanaṃ. Aṅgulilekhā paññāyatīti sinehābhāvepi pattassa succhavitāya paññāyati. Yanti yāvakālikaṃ, yāmakālikañca. Apariccattamevāti nirapekkhatāya anupasampannassa adinnaṃ, apariccattañca yāvakālikādivatthumeva sandhāya vadati, na pana taggatapaṭiggahaṇaṃ. Na hi vatthuṃ apariccajitvā tatthagatapaṭiggahaṇaṃ pariccajituṃ sakkā, na ca tādisaṃ vacanamatthi. Yadi bhaveyya, ‘‘sace patto duddhoto hoti…pe… bhuñjantassa pācittiya’’nti vacanaṃ virujjheyya. Na hi dhovanena āmisaṃ apanetuṃ vāyamantassa paṭiggahaṇe apekkhā vattati. Yena punadivase bhuñjato pācittiyaṃ janeyya, patte pana vattamānā apekkhā taggatike āmisepi vattati evanāmāti āmise anapekkhatā ettha na labbhati, tato āmise avijahitapaṭiggahaṇaṃ punadivase pācittiyaṃ janetīti idaṃ vuttaṃ. Atha mataṃ ‘‘yadaggenettha āmisānapekkhatā na labbhati. Tadaggena paṭiggahaṇānapekkhāpi na labbhatī’’ti. Tathā sati yattha āmisāpekkhā atthi, tattha paṭiggahaṇāpekkhāpi na vigacchatīti āpannaṃ, evañca paṭiggahaṇe anapekkhavissajjanaṃ visuṃ na vattabbaṃ siyā. Aṭṭhakathāyañcetampi paṭiggahaṇavijahanakāraṇattena abhimataṃ siyā, idaṃ suṭṭhutaraṃ katvā visuṃ vattabbaṃ cīvarāpekkhāya vattamānāyapi paccuddhārena adhiṭṭhānavijahanaṃ viya. Etasmiñca upāye sati gaṇṭhikāhatapattesu avaṭṭanatā nāma na siyāti vuttovāyamattho. Tasmā yaṃ vuttaṃ sāratthadīpaniyaṃ ‘‘yaṃ parassa pariccajitvā adinnampi sace paṭiggahaṇe nirapekkhanissajjanena vijahitapaṭiggahaṇaṃ hoti, tampi dutiyadivase vaṭṭatī’’tiādi (sārattha. ṭī. pācittiyakaṇḍa 3.252-253), taṃ na sārato paccetabbaṃ.
багад̇иаамисзд̇и од̣̇анаад̣̇игаббияаяаавагаалигз. д̣̇взд̇и бурзбхад̇д̇ам̣ бадиг̇г̇ахид̇ам̣ яаамагаалигам̣ бурзбхад̇д̇ам̣ саамисзна мукзна бхун̃ж̇ад̇о саннид̇хибажжаяаа згам̣, яаамагаалигасам̣садтад̇ааяа яаавагаалигад̇д̇абхаж̇анзна анад̇ирид̇д̇абажжаяаа зганд̇и д̣̇вз баажид̇д̇ияаани. вигаббад̣̇ваязд̇и саамисанираамисабагкад̣̇ваяз. т̇уллажжаяан̃жа д̣̇уггадан̃жаад̇и мануссамам̣сз т̇уллажжаяам̣, сзсзсу д̣̇уггадам̣. яаавагаалигаяаамагаалигад̇аа, саннид̇хибхааво, д̇асса аж̇жхохаран̣анд̇и имаанзд̇т̇а д̇ийн̣и ан̇г̇аани.
Pakatiāmiseti odanādikappiyayāvakālike. Dveti purebhattaṃ paṭiggahitaṃ yāmakālikaṃ purebhattaṃ sāmisena mukhena bhuñjato sannidhipaccayā ekaṃ, yāmakālikasaṃsaṭṭhatāya yāvakālikattabhajanena anatirittapaccayā ekanti dve pācittiyāni. Vikappadvayeti sāmisanirāmisapakkhadvaye. Thullaccayañca dukkaṭañcāti manussamaṃse thullaccayaṃ, sesesu dukkaṭaṃ. Yāvakālikayāmakālikatā, sannidhibhāvo, tassa ajjhoharaṇanti imānettha tīṇi aṅgāni.
саннид̇хигаарагасигкаабад̣̇аван̣н̣анаа нидтид̇аа.
Sannidhikārakasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 4. бхож̇анаваг̇г̇о • 4. Bhojanavaggo
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 8. саннид̇хигаарагасигкаабад̣̇аван̣н̣анаа • 8. Sannidhikārakasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 8. саннид̇хигаарагасигкаабад̣̇аван̣н̣анаа • 8. Sannidhikārakasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 8. саннид̇хигаарагасигкаабад̣̇аван̣н̣анаа • 8. Sannidhikārakasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 8. саннид̇хигаарагасигкаабад̣̇ам̣ • 8. Sannidhikārakasikkhāpadaṃ
