| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
2. உபோஸத²க்க²ந்த⁴கோ
2. Uposathakkhandhako
68. ஸன்னிபாதானுஜானநா
68. Sannipātānujānanā
132. தேன ஸமயேன பு³த்³தோ⁴ ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. தேன கோ² பன ஸமயேன அஞ்ஞதித்தி²யா பரிப்³பா³ஜகா சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா த⁴ம்மங் பா⁴ஸந்தி. தே மனுஸ்ஸா உபஸங்கமந்தி த⁴ம்மஸ்ஸவனாய. தே லப⁴ந்தி அஞ்ஞதித்தி²யேஸு பரிப்³பா³ஜகேஸு பேமங், லப⁴ந்தி பஸாத³ங், லப⁴ந்தி அஞ்ஞதித்தி²யா பரிப்³பா³ஜகா பக்க²ங். அத² கோ² ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘‘ஏதரஹி கோ² அஞ்ஞதித்தி²யா பரிப்³பா³ஜகா சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா த⁴ம்மங் பா⁴ஸந்தி. தே மனுஸ்ஸா உபஸங்கமந்தி த⁴ம்மஸ்ஸவனாய. தே லப⁴ந்தி அஞ்ஞதித்தி²யேஸு பரிப்³பா³ஜகேஸு பேமங், லப⁴ந்தி பஸாத³ங், லப⁴ந்தி அஞ்ஞதித்தி²யா பரிப்³பா³ஜகா பக்க²ங். யங்னூன அய்யாபி சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதெய்யு’’ந்தி. அத² கோ² ராஜா மாக³தோ⁴ ஸேனியோ பி³ம்பி³ஸாரோ யேன ப⁴க³வா தேனுபஸங்கமி, உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வந்தங் ஏதத³வோச – ‘‘இத⁴ மய்ஹங், ப⁴ந்தே, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ ‘ஏதரஹி கோ² அஞ்ஞதித்தி²யா பரிப்³பா³ஜகா சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா த⁴ம்மங் பா⁴ஸந்தி. தே மனுஸ்ஸா உபஸங்கமந்தி த⁴ம்மஸ்ஸவனாய. தே லப⁴ந்தி அஞ்ஞதித்தி²யேஸு பரிப்³பா³ஜகேஸு பேமங், லப⁴ந்தி பஸாத³ங், லப⁴ந்தி அஞ்ஞதித்தி²யா பரிப்³பா³ஜகா பக்க²ங். யங்னூன அய்யாபி சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதெய்யு’ந்தி. ஸாது⁴, ப⁴ந்தே, அய்யாபி சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதெய்யு’’ந்தி. அத² கோ² ப⁴க³வா ராஜானங் மாக³த⁴ங் ஸேனியங் பி³ம்பி³ஸாரங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² ராஜா மாக³தோ⁴ ஸேனியோ பி³ம்பி³ஸாரோ ப⁴க³வதா த⁴ம்மியா கதா²ய ஸந்த³ஸ்ஸிதோ ஸமாத³பிதோ ஸமுத்தேஜிதோ ஸம்பஹங்ஸிதோ உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதிது’’ந்தி.
132. Tena samayena buddho bhagavā rājagahe viharati gijjhakūṭe pabbate. Tena kho pana samayena aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Atha kho rañño māgadhassa seniyassa bimbisārassa rahogatassa paṭisallīnassa evaṃ cetaso parivitakko udapādi – ‘‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho rājā māgadho seniyo bimbisāro yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi ‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’nti. Sādhu, bhante, ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitu’’nti.
தேன கோ² பன ஸமயேன பி⁴க்கூ² – ப⁴க³வதா அனுஞ்ஞாதா சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதிதுந்தி – சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா துண்ஹீ நிஸீத³ந்தி. தே மனுஸ்ஸா உபஸங்கமந்தி த⁴ம்மஸ்ஸவனாய. தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா துண்ஹீ நிஸீதி³ஸ்ஸந்தி, ஸெய்யதா²பி மூக³ஸூகரா. நனு நாம ஸன்னிபதிதேஹி த⁴ம்மோ பா⁴ஸிதப்³போ³’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, சாதுத்³த³ஸே பன்னரஸே அட்ட²மியா ச பக்க²ஸ்ஸ ஸன்னிபதித்வா த⁴ம்மங் பா⁴ஸிது’’ந்தி.
Tena kho pana samayena bhikkhū – bhagavatā anuññātā cātuddase pannarase aṭṭhamiyā ca pakkhassa sannipatitunti – cātuddase pannarase aṭṭhamiyā ca pakkhassa sannipatitvā tuṇhī nisīdanti. Te manussā upasaṅkamanti dhammassavanāya. Te ujjhāyanti khiyyanti vipācenti – ‘‘kathañhi nāma samaṇā sakyaputtiyā cātuddase pannarase aṭṭhamiyā ca pakkhassa sannipatitvā tuṇhī nisīdissanti, seyyathāpi mūgasūkarā. Nanu nāma sannipatitehi dhammo bhāsitabbo’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitvā dhammaṃ bhāsitu’’nti.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸன்னிபாதானுஜானநாதி³கதா² • Sannipātānujānanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 68. ஸன்னிபாதானுஜானநாதி³கதா² • 68. Sannipātānujānanādikathā
