| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
2. убосат̇агканд̇хаго
2. Uposathakkhandhako
68. саннибаад̇аануж̇аананаа
68. Sannipātānujānanā
132. д̇зна самаязна б̣уд̣̇д̇хо бхаг̇аваа рааж̇аг̇ахз вихарад̇и г̇иж̇жхагуудз баб̣б̣ад̇з. д̇зна ко бана самаязна ан̃н̃ад̇ид̇т̇ияаа бариб̣б̣ааж̇агаа жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇хаммам̣ бхаасанд̇и. д̇з мануссаа убасан̇гаманд̇и д̇хаммассаванааяа. д̇з лабханд̇и ан̃н̃ад̇ид̇т̇иязсу бариб̣б̣ааж̇агзсу бзмам̣, лабханд̇и басаад̣̇ам̣, лабханд̇и ан̃н̃ад̇ид̇т̇ияаа бариб̣б̣ааж̇агаа багкам̣. ат̇а ко ран̃н̃о мааг̇ад̇хасса сзнияасса б̣имб̣исаарасса рахог̇ад̇асса бадисаллийнасса звам̣ жзд̇асо баривид̇агго уд̣̇абаад̣̇и – ‘‘зд̇арахи ко ан̃н̃ад̇ид̇т̇ияаа бариб̣б̣ааж̇агаа жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇хаммам̣ бхаасанд̇и. д̇з мануссаа убасан̇гаманд̇и д̇хаммассаванааяа. д̇з лабханд̇и ан̃н̃ад̇ид̇т̇иязсу бариб̣б̣ааж̇агзсу бзмам̣, лабханд̇и басаад̣̇ам̣, лабханд̇и ан̃н̃ад̇ид̇т̇ияаа бариб̣б̣ааж̇агаа багкам̣. яам̣нууна аяяааби жаад̇уд̣̇д̣̇асз баннарасз адтамияаа жа багкасса саннибад̇зяяу’’нд̇и. ат̇а ко рааж̇аа мааг̇ад̇хо сзнияо б̣имб̣исааро язна бхаг̇аваа д̇знубасан̇гами, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко рааж̇аа мааг̇ад̇хо сзнияо б̣имб̣исааро бхаг̇аванд̇ам̣ зд̇ад̣̇авожа – ‘‘ид̇ха маяхам̣, бханд̇з, рахог̇ад̇асса бадисаллийнасса звам̣ жзд̇асо баривид̇агго уд̣̇абаад̣̇и ‘зд̇арахи ко ан̃н̃ад̇ид̇т̇ияаа бариб̣б̣ааж̇агаа жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇хаммам̣ бхаасанд̇и. д̇з мануссаа убасан̇гаманд̇и д̇хаммассаванааяа. д̇з лабханд̇и ан̃н̃ад̇ид̇т̇иязсу бариб̣б̣ааж̇агзсу бзмам̣, лабханд̇и басаад̣̇ам̣, лабханд̇и ан̃н̃ад̇ид̇т̇ияаа бариб̣б̣ааж̇агаа багкам̣. яам̣нууна аяяааби жаад̇уд̣̇д̣̇асз баннарасз адтамияаа жа багкасса саннибад̇зяяу’нд̇и. саад̇ху, бханд̇з, аяяааби жаад̇уд̣̇д̣̇асз баннарасз адтамияаа жа багкасса саннибад̇зяяу’’нд̇и. ат̇а ко бхаг̇аваа рааж̇аанам̣ мааг̇ад̇хам̣ сзнияам̣ б̣имб̣исаарам̣ д̇хаммияаа гат̇ааяа санд̣̇ассзси самаад̣̇абзси самуд̇д̇зж̇зси самбахам̣сзси. ат̇а ко рааж̇аа мааг̇ад̇хо сзнияо б̣имб̣исааро бхаг̇авад̇аа д̇хаммияаа гат̇ааяа санд̣̇ассид̇о самаад̣̇абид̇о самуд̇д̇зж̇ид̇о самбахам̣сид̇о удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаами. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, жаад̇уд̣̇д̣̇асз баннарасз адтамияаа жа багкасса саннибад̇ид̇у’’нд̇и.
132. Tena samayena buddho bhagavā rājagahe viharati gijjhakūṭe pabbate. Tena kho pana samayena aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Atha kho rañño māgadhassa seniyassa bimbisārassa rahogatassa paṭisallīnassa evaṃ cetaso parivitakko udapādi – ‘‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho rājā māgadho seniyo bimbisāro yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi ‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’nti. Sādhu, bhante, ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitu’’nti.
д̇зна ко бана самаязна бхигкуу – бхаг̇авад̇аа анун̃н̃аад̇аа жаад̇уд̣̇д̣̇асз баннарасз адтамияаа жа багкасса саннибад̇ид̇унд̇и – жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇ун̣хий нисийд̣̇анд̇и. д̇з мануссаа убасан̇гаманд̇и д̇хаммассаванааяа. д̇з уж̇жхааяанд̇и кияяанд̇и вибаажзнд̇и – ‘‘гат̇ан̃хи наама саман̣аа сагяабуд̇д̇ияаа жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇ун̣хий нисийд̣̇иссанд̇и, сзяяат̇ааби мууг̇асуугараа. нану наама саннибад̇ид̇зхи д̇хаммо бхаасид̇аб̣б̣о’’д̇и. ассосум̣ ко бхигкуу д̇зсам̣ мануссаанам̣ уж̇жхааяанд̇аанам̣ кияяанд̇аанам̣ вибаажзнд̇аанам̣. ат̇а ко д̇з бхигкуу бхаг̇авад̇о зд̇амад̇т̇ам̣ аарожзсум̣…бз… ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, жаад̇уд̣̇д̣̇асз баннарасз адтамияаа жа багкасса саннибад̇ид̇ваа д̇хаммам̣ бхаасид̇у’’нд̇и.
Tena kho pana samayena bhikkhū – bhagavatā anuññātā cātuddase pannarase aṭṭhamiyā ca pakkhassa sannipatitunti – cātuddase pannarase aṭṭhamiyā ca pakkhassa sannipatitvā tuṇhī nisīdanti. Te manussā upasaṅkamanti dhammassavanāya. Te ujjhāyanti khiyyanti vipācenti – ‘‘kathañhi nāma samaṇā sakyaputtiyā cātuddase pannarase aṭṭhamiyā ca pakkhassa sannipatitvā tuṇhī nisīdissanti, seyyathāpi mūgasūkarā. Nanu nāma sannipatitehi dhammo bhāsitabbo’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitvā dhammaṃ bhāsitu’’nti.
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / саннибаад̇аануж̇аананаад̣̇игат̇аа • Sannipātānujānanādikathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / саннибаад̇аануж̇аананаад̣̇игат̇ааван̣н̣анаа • Sannipātānujānanādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / саннибаад̇аануж̇аананаад̣̇игат̇ааван̣н̣анаа • Sannipātānujānanādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / саннибаад̇аануж̇аананаад̣̇игат̇ааван̣н̣анаа • Sannipātānujānanādikathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 68. саннибаад̇аануж̇аананаад̣̇игат̇аа • 68. Sannipātānujānanādikathā
