| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
2. උපොසථක්‌ඛන්‌ධකො
2. Uposathakkhandhako
68. සන්‌නිපාතානුජානනා
68. Sannipātānujānanā
132. තෙන සමයෙන බුද්‌ධො භගවා රාජගහෙ විහරති ගිජ්‌ඣකූටෙ පබ්‌බතෙ. තෙන ඛො පන සමයෙන අඤ්‌ඤතිත්‌ථියා පරිබ්‌බාජකා චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා ධම්‌මං භාසන්‌ති. තෙ මනුස්‌සා උපසඞ්‌කමන්‌ති ධම්‌මස්‌සවනාය. තෙ ලභන්‌ති අඤ්‌ඤතිත්‌ථියෙසු පරිබ්‌බාජකෙසු පෙමං, ලභන්‌ති පසාදං, ලභන්‌ති අඤ්‌ඤතිත්‌ථියා පරිබ්‌බාජකා පක්‌ඛං. අථ ඛො රඤ්‌ඤො මාගධස්‌ස සෙනියස්‌ස බිම්‌බිසාරස්‌ස රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘‘එතරහි ඛො අඤ්‌ඤතිත්‌ථියා පරිබ්‌බාජකා චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා ධම්‌මං භාසන්‌ති. තෙ මනුස්‌සා උපසඞ්‌කමන්‌ති ධම්‌මස්‌සවනාය. තෙ ලභන්‌ති අඤ්‌ඤතිත්‌ථියෙසු පරිබ්‌බාජකෙසු පෙමං, ලභන්‌ති පසාදං, ලභන්‌ති අඤ්‌ඤතිත්‌ථියා පරිබ්‌බාජකා පක්‌ඛං. යංනූන අය්‍යාපි චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතෙය්‍යු’’න්‌ති. අථ ඛො රාජා මාගධො සෙනියො බිම්‌බිසාරො යෙන භගවා තෙනුපසඞ්‌කමි, උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො රාජා මාගධො සෙනියො බිම්‌බිසාරො භගවන්‌තං එතදවොච – ‘‘ඉධ මය්‌හං, භන්‌තෙ, රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි ‘එතරහි ඛො අඤ්‌ඤතිත්‌ථියා පරිබ්‌බාජකා චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා ධම්‌මං භාසන්‌ති. තෙ මනුස්‌සා උපසඞ්‌කමන්‌ති ධම්‌මස්‌සවනාය. තෙ ලභන්‌ති අඤ්‌ඤතිත්‌ථියෙසු පරිබ්‌බාජකෙසු පෙමං, ලභන්‌ති පසාදං, ලභන්‌ති අඤ්‌ඤතිත්‌ථියා පරිබ්‌බාජකා පක්‌ඛං. යංනූන අය්‍යාපි චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතෙය්‍යු’න්‌ති. සාධු, භන්‌තෙ, අය්‍යාපි චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතෙය්‍යු’’න්‌ති. අථ ඛො භගවා රාජානං මාගධං සෙනියං බිම්‌බිසාරං ධම්‌මියා කථාය සන්‌දස්‌සෙසි සමාදපෙසි සමුත්‌තෙජෙසි සම්‌පහංසෙසි. අථ ඛො රාජා මාගධො සෙනියො බිම්‌බිසාරො භගවතා ධම්‌මියා කථාය සන්‌දස්‌සිතො සමාදපිතො සමුත්‌තෙජිතො සම්‌පහංසිතො උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිතු’’න්‌ති.
132. Tena samayena buddho bhagavā rājagahe viharati gijjhakūṭe pabbate. Tena kho pana samayena aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Atha kho rañño māgadhassa seniyassa bimbisārassa rahogatassa paṭisallīnassa evaṃ cetaso parivitakko udapādi – ‘‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho rājā māgadho seniyo bimbisāro yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi ‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’nti. Sādhu, bhante, ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitu’’nti.
තෙන ඛො පන සමයෙන භික්‌ඛූ – භගවතා අනුඤ්‌ඤාතා චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිතුන්‌ති – චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා තුණ්‌හී නිසීදන්‌ති. තෙ මනුස්‌සා උපසඞ්‌කමන්‌ති ධම්‌මස්‌සවනාය. තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සමණා සක්‍යපුත්‌තියා චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා තුණ්‌හී නිසීදිස්‌සන්‌ති, සෙය්‍යථාපි මූගසූකරා. නනු නාම සන්‌නිපතිතෙහි ධම්‌මො භාසිතබ්‌බො’’ති. අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. අථ ඛො තෙ භික්‌ඛූ භගවතො එතමත්‌ථං ආරොචෙසුං…පෙ.… අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, චාතුද්‌දසෙ පන්‌නරසෙ අට්‌ඨමියා ච පක්‌ඛස්‌ස සන්‌නිපතිත්‌වා ධම්‌මං භාසිතු’’න්‌ති.
Tena kho pana samayena bhikkhū – bhagavatā anuññātā cātuddase pannarase aṭṭhamiyā ca pakkhassa sannipatitunti – cātuddase pannarase aṭṭhamiyā ca pakkhassa sannipatitvā tuṇhī nisīdanti. Te manussā upasaṅkamanti dhammassavanāya. Te ujjhāyanti khiyyanti vipācenti – ‘‘kathañhi nāma samaṇā sakyaputtiyā cātuddase pannarase aṭṭhamiyā ca pakkhassa sannipatitvā tuṇhī nisīdissanti, seyyathāpi mūgasūkarā. Nanu nāma sannipatitehi dhammo bhāsitabbo’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitvā dhammaṃ bhāsitu’’nti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / සන්‌නිපාතානුජානනාදිකථා • Sannipātānujānanādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සන්‌නිපාතානුජානනාදිකථාවණ්‌ණනා • Sannipātānujānanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සන්‌නිපාතානුජානනාදිකථාවණ්‌ණනා • Sannipātānujānanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සන්‌නිපාතානුජානනාදිකථාවණ්‌ණනා • Sannipātānujānanādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 68. සන්‌නිපාතානුජානනාදිකථා • 68. Sannipātānujānanādikathā
