| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢. ཨུཔོསཐཀྑནྡྷཀོ
2. Uposathakkhandhako
༦༨. སནྣིཔཱཏཱནུཛཱནནཱ
68. Sannipātānujānanā
༡༣༢. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི གིཛ྄ཛྷཀཱུཊེ པབྦཏེ། ཏེན ཁོ པན སམཡེན ཨཉྙཏིཏྠིཡཱ པརིབྦཱཛཀཱ ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ དྷམྨཾ བྷཱསནྟི། ཏེ མནུསྶཱ ཨུཔསངྐམནྟི དྷམྨསྶཝནཱཡ། ཏེ ལབྷནྟི ཨཉྙཏིཏྠིཡེསུ པརིབྦཱཛཀེསུ པེམཾ, ལབྷནྟི པསཱདཾ, ལབྷནྟི ཨཉྙཏིཏྠིཡཱ པརིབྦཱཛཀཱ པཀྑཾ། ཨཐ ཁོ རཉྙོ མཱགདྷསྶ སེནིཡསྶ བིམྦིསཱརསྶ རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘‘ཨེཏརཧི ཁོ ཨཉྙཏིཏྠིཡཱ པརིབྦཱཛཀཱ ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ དྷམྨཾ བྷཱསནྟི། ཏེ མནུསྶཱ ཨུཔསངྐམནྟི དྷམྨསྶཝནཱཡ། ཏེ ལབྷནྟི ཨཉྙཏིཏྠིཡེསུ པརིབྦཱཛཀེསུ པེམཾ, ལབྷནྟི པསཱདཾ, ལབྷནྟི ཨཉྙཏིཏྠིཡཱ པརིབྦཱཛཀཱ པཀྑཾ། ཡཾནཱུན ཨཡྻཱཔི ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏེཡྻུ’’ནྟི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཡེན བྷགཝཱ ཏེནུཔསངྐམི, ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ མཱགདྷོ སེནིཡོ བིམྦིསཱརོ བྷགཝནྟཾ ཨེཏདཝོཙ – ‘‘ཨིདྷ མཡ྄ཧཾ, བྷནྟེ, རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི ‘ཨེཏརཧི ཁོ ཨཉྙཏིཏྠིཡཱ པརིབྦཱཛཀཱ ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ དྷམྨཾ བྷཱསནྟི། ཏེ མནུསྶཱ ཨུཔསངྐམནྟི དྷམྨསྶཝནཱཡ། ཏེ ལབྷནྟི ཨཉྙཏིཏྠིཡེསུ པརིབྦཱཛཀེསུ པེམཾ, ལབྷནྟི པསཱདཾ, ལབྷནྟི ཨཉྙཏིཏྠིཡཱ པརིབྦཱཛཀཱ པཀྑཾ། ཡཾནཱུན ཨཡྻཱཔི ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏེཡྻུ’ནྟི། སཱདྷུ, བྷནྟེ, ཨཡྻཱཔི ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏེཡྻུ’’ནྟི། ཨཐ ཁོ བྷགཝཱ རཱཛཱནཾ མཱགདྷཾ སེནིཡཾ བིམྦིསཱརཾ དྷམྨིཡཱ ཀཐཱཡ སནྡསྶེསི སམཱདཔེསི སམུཏྟེཛེསི སམྤཧཾསེསི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ བྷགཝཏཱ དྷམྨིཡཱ ཀཐཱཡ སནྡསྶིཏོ སམཱདཔིཏོ སམུཏྟེཛིཏོ སམྤཧཾསིཏོ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏུ’’ནྟི།
132. Tena samayena buddho bhagavā rājagahe viharati gijjhakūṭe pabbate. Tena kho pana samayena aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Atha kho rañño māgadhassa seniyassa bimbisārassa rahogatassa paṭisallīnassa evaṃ cetaso parivitakko udapādi – ‘‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho rājā māgadho seniyo bimbisāro yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā māgadho seniyo bimbisāro bhagavantaṃ etadavoca – ‘‘idha mayhaṃ, bhante, rahogatassa paṭisallīnassa evaṃ cetaso parivitakko udapādi ‘etarahi kho aññatitthiyā paribbājakā cātuddase pannarase aṭṭhamiyā ca pakkhassa sannipatitvā dhammaṃ bhāsanti. Te manussā upasaṅkamanti dhammassavanāya. Te labhanti aññatitthiyesu paribbājakesu pemaṃ, labhanti pasādaṃ, labhanti aññatitthiyā paribbājakā pakkhaṃ. Yaṃnūna ayyāpi cātuddase pannarase aṭṭhamiyā ca pakkhassa sannipateyyu’nti. Sādhu, bhante, ayyāpi cātuddase pannarase aṭṭhamiyā ca pakkhassa sannipateyyu’’nti. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassesi samādapesi samuttejesi sampahaṃsesi. Atha kho rājā māgadho seniyo bimbisāro bhagavatā dhammiyā kathāya sandassito samādapito samuttejito sampahaṃsito uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitu’’nti.
ཏེན ཁོ པན སམཡེན བྷིཀྑཱུ – བྷགཝཏཱ ཨནུཉྙཱཏཱ ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏུནྟི – ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ ཏུཎྷཱི ནིསཱིདནྟི། ཏེ མནུསྶཱ ཨུཔསངྐམནྟི དྷམྨསྶཝནཱཡ། ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ ཏུཎྷཱི ནིསཱིདིསྶནྟི, སེཡྻཐཱཔི མཱུགསཱུཀརཱ། ནནུ ནཱམ སནྣིཔཏིཏེཧི དྷམྨོ བྷཱསིཏབྦོ’’ཏི། ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཙཱཏུདྡསེ པནྣརསེ ཨཊྛམིཡཱ ཙ པཀྑསྶ སནྣིཔཏིཏྭཱ དྷམྨཾ བྷཱསིཏུ’’ནྟི།
Tena kho pana samayena bhikkhū – bhagavatā anuññātā cātuddase pannarase aṭṭhamiyā ca pakkhassa sannipatitunti – cātuddase pannarase aṭṭhamiyā ca pakkhassa sannipatitvā tuṇhī nisīdanti. Te manussā upasaṅkamanti dhammassavanāya. Te ujjhāyanti khiyyanti vipācenti – ‘‘kathañhi nāma samaṇā sakyaputtiyā cātuddase pannarase aṭṭhamiyā ca pakkhassa sannipatitvā tuṇhī nisīdissanti, seyyathāpi mūgasūkarā. Nanu nāma sannipatitehi dhammo bhāsitabbo’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ…pe… atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, cātuddase pannarase aṭṭhamiyā ca pakkhassa sannipatitvā dhammaṃ bhāsitu’’nti.
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / སནྣིཔཱཏཱནུཛཱནནཱདིཀཐཱ • Sannipātānujānanādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སནྣིཔཱཏཱནུཛཱནནཱདིཀཐཱཝཎྞནཱ • Sannipātānujānanādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སནྣིཔཱཏཱནུཛཱནནཱདིཀཐཱཝཎྞནཱ • Sannipātānujānanādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སནྣིཔཱཏཱནུཛཱནནཱདིཀཐཱཝཎྞནཱ • Sannipātānujānanādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦༨. སནྣིཔཱཏཱནུཛཱནནཱདིཀཐཱ • 68. Sannipātānujānanādikathā
