| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
2. உபோஸத²க்க²ந்த⁴கங்
2. Uposathakkhandhakaṃ
ஸன்னிபாதானுஜானநாதி³கதா²
Sannipātānujānanādikathā
132. உபோஸத²க்க²ந்த⁴கே – அஞ்ஞதித்தி²யாதி எத்த² தித்த²ங் வுச்சதி லத்³தி⁴; அஞ்ஞங் தித்த²ங் அஞ்ஞதித்த²ங்; அஞ்ஞதித்த²ங் ஏதேஸங் அத்தீ²தி அஞ்ஞதித்தி²யா; இதோ அஞ்ஞலத்³தி⁴காதி வுத்தங் ஹோதி. த⁴ம்மங் பா⁴ஸந்தீதி யங் தேஸங் கத்தப்³பா³கத்தப்³ப³ங், தங் கதெ²ந்தி. தே லப⁴ந்தீதி தே மனுஸ்ஸா லப⁴ந்தி. மூக³ஸூகராதி தூ²லஸரீரஸூகரா.
132. Uposathakkhandhake – aññatitthiyāti ettha titthaṃ vuccati laddhi; aññaṃ titthaṃ aññatitthaṃ; aññatitthaṃ etesaṃ atthīti aññatitthiyā; ito aññaladdhikāti vuttaṃ hoti. Dhammaṃ bhāsantīti yaṃ tesaṃ kattabbākattabbaṃ, taṃ kathenti. Te labhantīti te manussā labhanti. Mūgasūkarāti thūlasarīrasūkarā.
135. அனஜ்ஜா²பன்னோ வா ஹோதி ஆபஜ்ஜித்வா வா வுட்டி²தோதி எத்த² யங் ஆபத்திங் பி⁴க்கு² அனஜ்ஜா²பன்னோ வா ஹோதி, ஆபஜ்ஜித்வா வா வுட்டி²தோ, அயங் அஸந்தீ நாம ஆபத்தீதி ஏவமத்தோ² வேதி³தப்³போ³. ஸம்பஜானமுஸாவாதே³ கிங் ஹோதீதி ய்வாயங் ஸம்பஜானமுஸாவாதோ³ அஸ்ஸ ஹோதீதி வுத்தோ, ஸோ ஆபத்திதோ கிங் ஹோதி, கதரா ஆபத்தி ஹோதீதி அத்தோ². து³க்கடங் ஹோதீதி து³க்கடாபத்தி ஹோதி; ஸா ச கோ² ந முஸாவாத³லக்க²ணேன; ப⁴க³வதோ பன வசனேன வசீத்³வாரே அகிரியஸமுட்டா²னா ஆபத்தி ஹோதீதி வேதி³தப்³பா³. வக்க²தி ஹி –
135.Anajjhāpanno vā hoti āpajjitvā vā vuṭṭhitoti ettha yaṃ āpattiṃ bhikkhu anajjhāpanno vā hoti, āpajjitvā vā vuṭṭhito, ayaṃ asantī nāma āpattīti evamattho veditabbo. Sampajānamusāvāde kiṃ hotīti yvāyaṃ sampajānamusāvādo assa hotīti vutto, so āpattito kiṃ hoti, katarā āpatti hotīti attho. Dukkaṭaṃ hotīti dukkaṭāpatti hoti; sā ca kho na musāvādalakkhaṇena; bhagavato pana vacanena vacīdvāre akiriyasamuṭṭhānā āpatti hotīti veditabbā. Vakkhati hi –
‘‘அனாலபந்தோ மனுஜேன கேனசி,
‘‘Anālapanto manujena kenaci,
வாசாகி³ரங் நோ ச பரே ப⁴ணெய்ய;
Vācāgiraṃ no ca pare bhaṇeyya;
ஆபஜ்ஜெய்ய வாசஸிகங் ந காயிகங்,
Āpajjeyya vācasikaṃ na kāyikaṃ,
பஞ்ஹா மேஸா குஸலேஹி சிந்திதா’’தி. (பரி॰ 479);
Pañhā mesā kusalehi cintitā’’ti. (pari. 479);
அந்தராயிகோதி அந்தராயகரோ. கிஸ்ஸ பா²ஸு ஹோதீதி கிமத்தா²ய பா²ஸு ஹோதி. பட²மஸ்ஸ ஜா²னஸ்ஸ அதி⁴க³மாயாதி பட²மஸ்ஸ ஜா²னஸ்ஸ அதி⁴க³மனத்தா²ய தஸ்ஸ பி⁴க்கு²னோ பா²ஸு ஹோதி ஸுக²ங் ஹோதி. ஏஸ நயோ ஸப்³ப³த்த². இதி ப⁴க³வா உத்³தே³ஸதோ ச நித்³தே³ஸதோ ச பட²மங் பாதிமொக்கு²த்³தே³ஸங் த³ஸ்ஸேஸி.
Antarāyikoti antarāyakaro. Kissa phāsu hotīti kimatthāya phāsu hoti. Paṭhamassa jhānassa adhigamāyāti paṭhamassa jhānassa adhigamanatthāya tassa bhikkhuno phāsu hoti sukhaṃ hoti. Esa nayo sabbattha. Iti bhagavā uddesato ca niddesato ca paṭhamaṃ pātimokkhuddesaṃ dassesi.
136. தே³வஸிகந்தி தி³வஸே தி³வஸே. சாதுத்³த³ஸே வா பன்னரஸே வாதி ஏகஸ்ஸ உதுனோ ததியே ச ஸத்தமே ச பக்கே² த்³விக்க²த்துங் சாதுத்³த³ஸே அவஸேஸே ச²க்க²த்துங் பன்னரஸே; அயங் தாவ ஏகோ அத்தோ². அயங் பன பகதிசாரித்தவஸேன வுத்தோ ‘‘ஸகிங் பக்க²ஸ்ஸ சாதுத்³த³ஸே வா பன்னரஸே வா’’தி வசனதோ பன ததா²ரூபே பச்சயே ஸதி யஸ்மிங் தஸ்மிங் சாதுத்³த³ஸே வா பன்னரஸே வா உத்³தி³ஸிதுங் வட்டதி, ஆவாஸிகானங் பி⁴க்கூ²னங் சாதுத்³த³ஸோ ஹோதி, ஆக³ந்துகானங் பன்னரஸோ. ஸசே ஆவாஸிகா ப³ஹுதரா ஹொந்தி, ஆக³ந்துகேஹி ஆவாஸிகானங் அனுவத்திதப்³ப³’’ந்தி வசனதோபி சேதங் வேதி³தப்³ப³ங்.
136.Devasikanti divase divase. Cātuddase vā pannarase vāti ekassa utuno tatiye ca sattame ca pakkhe dvikkhattuṃ cātuddase avasese chakkhattuṃ pannarase; ayaṃ tāva eko attho. Ayaṃ pana pakaticārittavasena vutto ‘‘sakiṃ pakkhassa cātuddase vā pannarase vā’’ti vacanato pana tathārūpe paccaye sati yasmiṃ tasmiṃ cātuddase vā pannarase vā uddisituṃ vaṭṭati, āvāsikānaṃ bhikkhūnaṃ cātuddaso hoti, āgantukānaṃ pannaraso. Sace āvāsikā bahutarā honti, āgantukehi āvāsikānaṃ anuvattitabba’’nti vacanatopi cetaṃ veditabbaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
68. ஸன்னிபாதானுஜானநா • 68. Sannipātānujānanā
69. பாதிமொக்கு²த்³தே³ஸானுஜானநா • 69. Pātimokkhuddesānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 68. ஸன்னிபாதானுஜானநாதி³கதா² • 68. Sannipātānujānanādikathā
