| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. உபோஸத²க்க²ந்த⁴கங்
2. Uposathakkhandhakaṃ
68. ஸன்னிபாதானுஜானநாதி³கதா²
68. Sannipātānujānanādikathā
132. உபோஸத²க்க²ந்த⁴கே தரந்தி ஓதரந்தி எத்தா²தி தித்த²ங், உத³கதித்த²ங், தித்த²ங் வியாதி தித்த²ங், லத்³தீ⁴தி ஆஹ ‘‘தித்த²ங் வுச்சதி லத்³தீ⁴’’தி. லத்³தி⁴ ஹி ப³ஹூனங் லத்³தி⁴கானங் ஓதரணட்டா²னத்தா தித்த²ங் நாம. அஞ்ஞந்தி ஸாஸனிகலத்³தி⁴தோ அஞ்ஞங். ஏதேஸந்தி பரிப்³பா³ஜகானங். இதோதி இமஸ்மா ஸாஸனிகலத்³தி⁴தோ. யந்தி யங் த⁴ம்மஜாதங். தேஸந்தி அஞ்ஞதித்தி²யானங் பரிப்³பா³ஜகானங். தே லப⁴ந்தீதி எத்த² தஸத்³தோ³ மனுஸ்ஸவிஸயோதி ஆஹ ‘‘தே மனுஸ்ஸா’’தி. மூக³ஸூகராதி எத்த² தூ²லஸரீரஸ்ஸ ஸூகரஸ்ஸ ஸத்³த³மத்தஸ்ஸாபி அபா⁴வதோ மூக³ஸூகரோ நாமாதி ஆஹ ‘‘தூ²லஸரீரஸூகரா’’தி.
132. Uposathakkhandhake taranti otaranti etthāti titthaṃ, udakatitthaṃ, titthaṃ viyāti titthaṃ, laddhīti āha ‘‘titthaṃ vuccati laddhī’’ti. Laddhi hi bahūnaṃ laddhikānaṃ otaraṇaṭṭhānattā titthaṃ nāma. Aññanti sāsanikaladdhito aññaṃ. Etesanti paribbājakānaṃ. Itoti imasmā sāsanikaladdhito. Yanti yaṃ dhammajātaṃ. Tesanti aññatitthiyānaṃ paribbājakānaṃ. Te labhantīti ettha tasaddo manussavisayoti āha ‘‘te manussā’’ti. Mūgasūkarāti ettha thūlasarīrassa sūkarassa saddamattassāpi abhāvato mūgasūkaro nāmāti āha ‘‘thūlasarīrasūkarā’’ti.
135. அஸ்ஸாதி பி⁴க்கு²னோ. ஸோதி ஸம்பஜானமுஸாவாதோ³. கிந்தி கிங் ஆபத்தி. து³க்கடந்தி பத³ஸ்ஸ து³க்கடங் கம்மந்தி ஆஸங்கா ப⁴வெய்யாதி ஆஹ ‘‘து³க்கடாபத்தீ’’தி. ஸா ச கோ² து³க்கடாபத்தி முஸாவாத³லக்க²ணேன ந ஹோதீதி யோஜனா. கேன ஹோதீதி ஆஹ ‘‘ப⁴க³வதோ பன வசனேனா’’தி. வசனேனாதி ச ‘‘ஸம்பஜானமுஸாவாதே³ கிங் ஹோதி? து³க்கடங் ஹோதீ’’தி (மஹாவ॰ 135) வசனேன. அகிரியஸமுட்டா²னாதி ஆவி கத்தப்³பா³ய ஆபத்தியா அகரணேன அகிரியஸமுட்டா²னா.
135.Assāti bhikkhuno. Soti sampajānamusāvādo. Kinti kiṃ āpatti. Dukkaṭanti padassa dukkaṭaṃ kammanti āsaṅkā bhaveyyāti āha ‘‘dukkaṭāpattī’’ti. Sā ca kho dukkaṭāpatti musāvādalakkhaṇena na hotīti yojanā. Kena hotīti āha ‘‘bhagavato pana vacanenā’’ti. Vacanenāti ca ‘‘sampajānamusāvāde kiṃ hoti? Dukkaṭaṃ hotī’’ti (mahāva. 135) vacanena. Akiriyasamuṭṭhānāti āvi kattabbāya āpattiyā akaraṇena akiriyasamuṭṭhānā.
மனுஜேனாதி மனுஸ்ஸேன. வாசாதி வாசாய. யகாரஸ்ஸ ஹி லோபோ. கி³ரந்தி ஸத்³த³ங். பரேதி அஞ்ஞே புக்³க³லே. வாசஸிகந்தி வாசாதோ ஸமுட்டி²தங். அயங் பனெத்த² யோஜனா – பி⁴க்கு² கேனசி ஆஸன்னே டி²தேன மனுஜேன வாசாய அனாலபந்தோ ஹோதி, பரே தூ³ரே டி²தே புக்³க³லே ஸந்தா⁴ய கி³ரங் மஹாஸத்³த³ங் நோ ச ப⁴ணெய்ய, ஏவம்பி வாசஸிகமேவ ஆபஜ்ஜெய்யாதி.
Manujenāti manussena. Vācāti vācāya. Yakārassa hi lopo. Giranti saddaṃ. Pareti aññe puggale. Vācasikanti vācāto samuṭṭhitaṃ. Ayaṃ panettha yojanā – bhikkhu kenaci āsanne ṭhitena manujena vācāya anālapanto hoti, pare dūre ṭhite puggale sandhāya giraṃ mahāsaddaṃ no ca bhaṇeyya, evampi vācasikameva āpajjeyyāti.
அந்தராயிகோதி எத்த² கரொத்யத்தே² ணிகபச்சயோதி ஆஹ ‘‘அந்தராயகரோ’’தி. ‘‘கிமத்தா²யா’’தி இமினா கிஸ்ஸாதி எத்த² தத³த்தே² சதுத்தீ²தி த³ஸ்ஸேதி, ஹெத்வத்தோ²பி யுஜ்ஜதேவ. ஸப்³ப³த்தா²தி ஸப்³பே³ஸு ‘‘து³தியஸ்ஸ ஜா²னஸ்ஸ அதி⁴க³மாயா’’திஆதீ³ஸு. இதீதிஆதி³ நிக³மனங். உத்³தே³ஸதோ சாதி ‘‘ஸுணாது மே ப⁴ந்தே ஸங்கோ⁴’’திஆதி³உத்³தே³ஸதோ ச. நித்³தே³ஸதோ சாதி ‘‘பாதிமொக்க²ந்தி ஆதி³மேத’’ந்திஆதி³னித்³தே³ஸதோ ச.
Antarāyikoti ettha karotyatthe ṇikapaccayoti āha ‘‘antarāyakaro’’ti. ‘‘Kimatthāyā’’ti iminā kissāti ettha tadatthe catutthīti dasseti, hetvatthopi yujjateva. Sabbatthāti sabbesu ‘‘dutiyassa jhānassa adhigamāyā’’tiādīsu. Itītiādi nigamanaṃ. Uddesato cāti ‘‘suṇātu me bhante saṅgho’’tiādiuddesato ca. Niddesato cāti ‘‘pātimokkhanti ādimeta’’ntiādiniddesato ca.
136. தே³வஸிகந்தி எத்த² ணிகபச்சயோ விச்ச²த்தே² ஹோதீதி ஆஹ ‘‘தி³வஸே தி³வஸே’’தி. ததியே ச ஸத்தமே ச பக்கே²தி ஏகஸ்ஸ உதுனோ அட்ட²ஸு பக்கே²ஸு ததியே ச ஸத்தமே ச பக்கே². ‘‘வசனதோ’’தி பத³ங் ‘‘வட்டதீ’’தி பதே³ ஞாபகஹேது. ததா²ரூபே பச்சயேதி ததா²ரூபே விகதிசாரித்தஸங்கா²தே பச்சயே. அனுவத்திதப்³ப³ந்தி அனுமதிங் வத்திதப்³ப³ங். வசனதோபீதி பிஸத்³தோ³ புப்³பே³ ஞாபகஹேதுங் ஸம்பிண்டே³தி. ஏதந்தி ‘‘யஸ்மிங் தஸ்மிங் சாதுத்³த³ஸே வா பன்னரஸே வா உத்³தி³ஸிதுங் வட்டதீ’’தி வசனங்.
136.Devasikanti ettha ṇikapaccayo vicchatthe hotīti āha ‘‘divase divase’’ti. Tatiye ca sattame ca pakkheti ekassa utuno aṭṭhasu pakkhesu tatiye ca sattame ca pakkhe. ‘‘Vacanato’’ti padaṃ ‘‘vaṭṭatī’’ti pade ñāpakahetu. Tathārūpe paccayeti tathārūpe vikaticārittasaṅkhāte paccaye. Anuvattitabbanti anumatiṃ vattitabbaṃ. Vacanatopīti pisaddo pubbe ñāpakahetuṃ sampiṇḍeti. Etanti ‘‘yasmiṃ tasmiṃ cātuddase vā pannarase vā uddisituṃ vaṭṭatī’’ti vacanaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
68. ஸன்னிபாதானுஜானநா • 68. Sannipātānujānanā
69. பாதிமொக்கு²த்³தே³ஸானுஜானநா • 69. Pātimokkhuddesānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸன்னிபாதானுஜானநாதி³கதா² • Sannipātānujānanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
