| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. உபோஸத²க்க²ந்த⁴கங்
2. Uposathakkhandhakaṃ
ஸன்னிபாதானுஜானநாதி³கதா²வண்ணனா
Sannipātānujānanādikathāvaṇṇanā
132. உபோஸத²க்க²ந்த⁴கே தரந்தி ப்லவந்தி எத்த² பா³லாதி தித்த²ங். இதோதி இமஸ்மிங் ஸாஸனே லத்³தி⁴தோ. தங் கதெ²ந்தீதி ‘‘இமஸ்மிங் நாம தி³வஸே முஹுத்தே வா இத³ங் கத்தப்³ப³’’ந்திஆதி³னா கதெ²ந்தி.
132. Uposathakkhandhake taranti plavanti ettha bālāti titthaṃ. Itoti imasmiṃ sāsane laddhito. Taṃ kathentīti ‘‘imasmiṃ nāma divase muhutte vā idaṃ kattabba’’ntiādinā kathenti.
134. ‘‘ஸுணாது மே ப⁴ந்தே’’திஆதீ³ஸு யங் வத்தப்³ப³ங், தங் மாதிகாட்ட²கதா²யங் (கங்கா²॰ அட்ட²॰ நிதா³னவண்ணனா) வித்தா²ரதோ ஆக³தமேவாதி ந இத⁴ வித்தா²ரயிஸ்ஸாம, அத்தி²கேஹி பன ததோயேவ க³ஹேதப்³ப³ங்.
134. ‘‘Suṇātu me bhante’’tiādīsu yaṃ vattabbaṃ, taṃ mātikāṭṭhakathāyaṃ (kaṅkhā. aṭṭha. nidānavaṇṇanā) vitthārato āgatamevāti na idha vitthārayissāma, atthikehi pana tatoyeva gahetabbaṃ.
135. ஆபஜ்ஜித்வா வா வுட்டி²தோதி எத்த² ஆரோசிதாபி ஆபத்தி அஸந்தீ நாம ஹோதீதி வேதி³தப்³ப³ங். தேனேவ மாதிகாட்ட²கதா²யங் (கங்கா²॰ அட்ட²॰ நிதா³னவண்ணனா) வுத்தங் ‘‘யஸ்ஸ பன ஏவங் அனாபன்னா வா ஆபத்தி ஆபஜ்ஜித்வா ச பன வுட்டி²தா வா தே³ஸிதா வா ஆரோசிதா வா, தஸ்ஸ ஸா ஆபத்தி அஸந்தீ நாம ஹோதீ’’தி. முஸாவாதோ³ நாம வசீபே⁴த³பச்சயா ஹோதீதி ஆஹ ‘‘ந முஸாவாத³லக்க²ணேனா’’தி. ப⁴க³வதோ பன வசனேனாதி ஸம்பஜானமுஸாவாதே³ கிங் ஹோதி? ‘‘து³க்கடங் ஹோதீ’’தி இமினா வசனேன. வசீத்³வாரே அகிரியஸமுட்டா²னா ஆபத்தி ஹோதீதி யஸ்மா யஸ்ஸ பி⁴க்கு²னோ அத⁴ம்மிகாய படிஞ்ஞாய துண்ஹீபூ⁴தஸ்ஸ நிஸின்னஸ்ஸ மனொத்³வாரே ஆபத்தி நாம நத்தி², யஸ்மா பன ஆவி காதப்³ப³ங் ந ஆவி அகாஸி, தேனஸ்ஸ வசீத்³வாரே அகிரியஸமுட்டா²னா ஆபத்தி ஹோதி.
135.Āpajjitvā vā vuṭṭhitoti ettha ārocitāpi āpatti asantī nāma hotīti veditabbaṃ. Teneva mātikāṭṭhakathāyaṃ (kaṅkhā. aṭṭha. nidānavaṇṇanā) vuttaṃ ‘‘yassa pana evaṃ anāpannā vā āpatti āpajjitvā ca pana vuṭṭhitā vā desitā vā ārocitā vā, tassa sā āpatti asantī nāma hotī’’ti. Musāvādo nāma vacībhedapaccayā hotīti āha ‘‘na musāvādalakkhaṇenā’’ti. Bhagavato pana vacanenāti sampajānamusāvāde kiṃ hoti? ‘‘Dukkaṭaṃ hotī’’ti iminā vacanena. Vacīdvāre akiriyasamuṭṭhānā āpatti hotīti yasmā yassa bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi, yasmā pana āvi kātabbaṃ na āvi akāsi, tenassa vacīdvāre akiriyasamuṭṭhānā āpatti hoti.
வாசாதி வாசாய, ய-காரலோபேனாயங் நித்³தே³ஸோ. கேனசி மனுஜேன வாசாய அனாலபந்தோதி யோஜேதப்³ப³ங். கி³ரங் நோ ச பரே ப⁴ணெய்யாதி ‘‘இமே ஸொஸ்ஸந்தீ’’தி பரபுக்³க³லே ஸந்தா⁴ய ஸத்³த³ம்பி ந நிச்சா²ரெய்ய. ஆபஜ்ஜெய்ய வாசஸிகந்தி வாசதோ ஸமுட்டி²தங் ஆபத்திங் ஆபஜ்ஜெய்ய.
Vācāti vācāya, ya-kāralopenāyaṃ niddeso. Kenaci manujena vācāya anālapantoti yojetabbaṃ. Giraṃ no ca pare bhaṇeyyāti ‘‘ime sossantī’’ti parapuggale sandhāya saddampi na nicchāreyya. Āpajjeyya vācasikanti vācato samuṭṭhitaṃ āpattiṃ āpajjeyya.
அந்தராயகரோதி விப்படிஸாரவத்து²தாய பாமோஜ்ஜாதி³ஸம்ப⁴வங் நிவாரெத்வா பட²மஜ்ஜா²னாதீ³னங் அதி⁴க³மாய அந்தராயகரோ. தஸ்ஸ பி⁴க்கு²னோ பா²ஸு ஹோதீதி அவிப்படிஸாரமூலகானங் பாமோஜ்ஜாதீ³னங் வஸேன தஸ்ஸ பி⁴க்கு²னோ ஸுகா² படிபதா³ ஸம்பஜ்ஜதீதி அத்தோ².
Antarāyakaroti vippaṭisāravatthutāya pāmojjādisambhavaṃ nivāretvā paṭhamajjhānādīnaṃ adhigamāya antarāyakaro. Tassa bhikkhuno phāsu hotīti avippaṭisāramūlakānaṃ pāmojjādīnaṃ vasena tassa bhikkhuno sukhā paṭipadā sampajjatīti attho.
ஸன்னிபாதானுஜானநாதி³கதா²வண்ணனா நிட்டி²தா.
Sannipātānujānanādikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
68. ஸன்னிபாதானுஜானநா • 68. Sannipātānujānanā
69. பாதிமொக்கு²த்³தே³ஸானுஜானநா • 69. Pātimokkhuddesānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸன்னிபாதானுஜானநாதி³கதா² • Sannipātānujānanādikathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸன்னிபாதானுஜானநாதி³கதா²வண்ணனா • Sannipātānujānanādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 68. ஸன்னிபாதானுஜானநாதி³கதா² • 68. Sannipātānujānanādikathā
