| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
২. উপোসথক্খন্ধকং
2. Uposathakkhandhakaṃ
সন্নিপাতানুজাননাদিকথাৰণ্ণনা
Sannipātānujānanādikathāvaṇṇanā
১৩২. উপোসথক্খন্ধকে তরন্তি প্লৰন্তি এত্থ বালাতি তিত্থং। ইতোতি ইমস্মিং সাসনে লদ্ধিতো। তং কথেন্তীতি ‘‘ইমস্মিং নাম দিৰসে মুহুত্তে ৰা ইদং কত্তব্ব’’ন্তিআদিনা কথেন্তি।
132. Uposathakkhandhake taranti plavanti ettha bālāti titthaṃ. Itoti imasmiṃ sāsane laddhito. Taṃ kathentīti ‘‘imasmiṃ nāma divase muhutte vā idaṃ kattabba’’ntiādinā kathenti.
১৩৪. ‘‘সুণাতু মে ভন্তে’’তিআদীসু যং ৰত্তব্বং, তং মাতিকাট্ঠকথাযং (কঙ্খা॰ অট্ঠ॰ নিদানৰণ্ণনা) ৰিত্থারতো আগতমেৰাতি ন ইধ ৰিত্থারযিস্সাম, অত্থিকেহি পন ততোযেৰ গহেতব্বং।
134. ‘‘Suṇātu me bhante’’tiādīsu yaṃ vattabbaṃ, taṃ mātikāṭṭhakathāyaṃ (kaṅkhā. aṭṭha. nidānavaṇṇanā) vitthārato āgatamevāti na idha vitthārayissāma, atthikehi pana tatoyeva gahetabbaṃ.
১৩৫. আপজ্জিত্ৰা ৰা ৰুট্ঠিতোতি এত্থ আরোচিতাপি আপত্তি অসন্তী নাম হোতীতি ৰেদিতব্বং। তেনেৰ মাতিকাট্ঠকথাযং (কঙ্খা॰ অট্ঠ॰ নিদানৰণ্ণনা) ৰুত্তং ‘‘যস্স পন এৰং অনাপন্না ৰা আপত্তি আপজ্জিত্ৰা চ পন ৰুট্ঠিতা ৰা দেসিতা ৰা আরোচিতা ৰা, তস্স সা আপত্তি অসন্তী নাম হোতী’’তি। মুসাৰাদো নাম ৰচীভেদপচ্চযা হোতীতি আহ ‘‘ন মুসাৰাদলক্খণেনা’’তি। ভগৰতো পন ৰচনেনাতি সম্পজানমুসাৰাদে কিং হোতি? ‘‘দুক্কটং হোতী’’তি ইমিনা ৰচনেন। ৰচীদ্ৰারে অকিরিযসমুট্ঠানা আপত্তি হোতীতি যস্মা যস্স ভিক্খুনো অধম্মিকায পটিঞ্ঞায তুণ্হীভূতস্স নিসিন্নস্স মনোদ্ৰারে আপত্তি নাম নত্থি, যস্মা পন আৰি কাতব্বং ন আৰি অকাসি, তেনস্স ৰচীদ্ৰারে অকিরিযসমুট্ঠানা আপত্তি হোতি।
135.Āpajjitvā vā vuṭṭhitoti ettha ārocitāpi āpatti asantī nāma hotīti veditabbaṃ. Teneva mātikāṭṭhakathāyaṃ (kaṅkhā. aṭṭha. nidānavaṇṇanā) vuttaṃ ‘‘yassa pana evaṃ anāpannā vā āpatti āpajjitvā ca pana vuṭṭhitā vā desitā vā ārocitā vā, tassa sā āpatti asantī nāma hotī’’ti. Musāvādo nāma vacībhedapaccayā hotīti āha ‘‘na musāvādalakkhaṇenā’’ti. Bhagavato pana vacanenāti sampajānamusāvāde kiṃ hoti? ‘‘Dukkaṭaṃ hotī’’ti iminā vacanena. Vacīdvāre akiriyasamuṭṭhānā āpatti hotīti yasmā yassa bhikkhuno adhammikāya paṭiññāya tuṇhībhūtassa nisinnassa manodvāre āpatti nāma natthi, yasmā pana āvi kātabbaṃ na āvi akāsi, tenassa vacīdvāre akiriyasamuṭṭhānā āpatti hoti.
ৰাচাতি ৰাচায, য-কারলোপেনাযং নিদ্দেসো। কেনচি মনুজেন ৰাচায অনালপন্তোতি যোজেতব্বং। গিরং নো চ পরে ভণেয্যাতি ‘‘ইমে সোস্সন্তী’’তি পরপুগ্গলে সন্ধায সদ্দম্পি ন নিচ্ছারেয্য। আপজ্জেয্য ৰাচসিকন্তি ৰাচতো সমুট্ঠিতং আপত্তিং আপজ্জেয্য।
Vācāti vācāya, ya-kāralopenāyaṃ niddeso. Kenaci manujena vācāya anālapantoti yojetabbaṃ. Giraṃ no ca pare bhaṇeyyāti ‘‘ime sossantī’’ti parapuggale sandhāya saddampi na nicchāreyya. Āpajjeyya vācasikanti vācato samuṭṭhitaṃ āpattiṃ āpajjeyya.
অন্তরাযকরোতি ৰিপ্পটিসারৰত্থুতায পামোজ্জাদিসম্ভৰং নিৰারেত্ৰা পঠমজ্ঝানাদীনং অধিগমায অন্তরাযকরো। তস্স ভিক্খুনো ফাসু হোতীতি অৰিপ্পটিসারমূলকানং পামোজ্জাদীনং ৰসেন তস্স ভিক্খুনো সুখা পটিপদা সম্পজ্জতীতি অত্থো।
Antarāyakaroti vippaṭisāravatthutāya pāmojjādisambhavaṃ nivāretvā paṭhamajjhānādīnaṃ adhigamāya antarāyakaro. Tassa bhikkhuno phāsu hotīti avippaṭisāramūlakānaṃ pāmojjādīnaṃ vasena tassa bhikkhuno sukhā paṭipadā sampajjatīti attho.
সন্নিপাতানুজাননাদিকথাৰণ্ণনা নিট্ঠিতা।
Sannipātānujānanādikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৬৮. সন্নিপাতানুজাননা • 68. Sannipātānujānanā
৬৯. পাতিমোক্খুদ্দেসানুজাননা • 69. Pātimokkhuddesānujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সন্নিপাতানুজাননাদিকথা • Sannipātānujānanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সন্নিপাতানুজাননাদিকথাৰণ্ণনা • Sannipātānujānanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সন্নিপাতানুজাননাদিকথাৰণ্ণনা • Sannipātānujānanādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬৮. সন্নিপাতানুজাননাদিকথা • 68. Sannipātānujānanādikathā
