| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
4. ஸன்னிட்டா²பகத்தே²ரஅபதா³னவண்ணனா
4. Sanniṭṭhāpakattheraapadānavaṇṇanā
அரஞ்ஞே குடிகங் கத்வாதிஆதி³கங் ஆயஸ்மதோ ஸன்னிட்டா²பகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ க⁴ரப³ந்த⁴னேன ப³த்³தோ⁴ க⁴ராவாஸே ஆதீ³னவங் தி³ஸ்வா வத்து²காமகிலேஸகாமே பஹாய ஹிமவந்தஸ்ஸ அவிதூ³ரே பப்³ப³தந்தரே அரஞ்ஞவாஸங் கப்பேஸி. தஸ்மிங் காலே பது³முத்தரோ ப⁴க³வா விவேககாமதாய தங் டா²னங் பாபுணி. அத² ஸோ தாபஸோ ப⁴க³வந்தங் தி³ஸ்வா பஸன்னமானஸோ வந்தி³த்வா நிஸீத³னத்தா²ய திணஸந்த²ரங் பஞ்ஞாபெத்வா அதா³ஸி. தத்த² நிஸின்னங் ப⁴க³வந்தங் அனேகேஹி மது⁴ரேஹி திண்டு³காதீ³ஹி ப²லாப²லேஹி ஸந்தப்பேஸி. ஸோ தேன புஞ்ஞகம்மேன ததோ சுதோ தே³வேஸு ச மனுஸ்ஸேஸு ச அபராபரங் ஸங்ஸரந்தோ த்³வே ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ ஸத்³தா⁴ஸம்பன்னோ பப்³ப³ஜிதோ விபஸ்ஸனங் வட்³டெ⁴த்வா நசிரஸ்ஸேவ அரஹா அஹோஸி. கு²ரக்³கே³ அரஹத்தப²லப்பத்தியங் விய நிருஸ்ஸாஹேனேவ ஸந்திபத³ஸங்கா²தே நிப்³பா³னே ஸுட்டு² டி²தத்தா ஸன்னிட்டா²பகத்தே²ரோதி பாகடோ.
Araññekuṭikaṃ katvātiādikaṃ āyasmato sanniṭṭhāpakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbatto viññutaṃ patto gharabandhanena baddho gharāvāse ādīnavaṃ disvā vatthukāmakilesakāme pahāya himavantassa avidūre pabbatantare araññavāsaṃ kappesi. Tasmiṃ kāle padumuttaro bhagavā vivekakāmatāya taṃ ṭhānaṃ pāpuṇi. Atha so tāpaso bhagavantaṃ disvā pasannamānaso vanditvā nisīdanatthāya tiṇasantharaṃ paññāpetvā adāsi. Tattha nisinnaṃ bhagavantaṃ anekehi madhurehi tiṇḍukādīhi phalāphalehi santappesi. So tena puññakammena tato cuto devesu ca manussesu ca aparāparaṃ saṃsaranto dve sampattiyo anubhavitvā imasmiṃ buddhuppāde ekasmiṃ kulagehe nibbatto saddhāsampanno pabbajito vipassanaṃ vaḍḍhetvā nacirasseva arahā ahosi. Khuragge arahattaphalappattiyaṃ viya nirussāheneva santipadasaṅkhāte nibbāne suṭṭhu ṭhitattā sanniṭṭhāpakattheroti pākaṭo.
70. அரஹா பன ஹுத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அரஞ்ஞே குடிகங் கத்வாதிஆதி³மாஹ. தத்த² அரஞ்ஞேதி ஸீஹப்³யக்³கா⁴தீ³னங் ப⁴யேன மனுஸ்ஸா எத்த² ந ரஜ்ஜந்தி ந ரமந்தி ந அல்லீயந்தீதி அரஞ்ஞங், தஸ்மிங் அரஞ்ஞே. குடிகந்தி திணச்ச²த³னகுடிகங் கத்வா பப்³ப³தந்தரே வஸாமி வாஸங் கப்பேஸிந்தி அத்தோ². லாபே⁴ன ச அலாபே⁴ன ச யஸேன ச அயஸேன ச ஸந்துட்டோ² விஹாஸிந்தி ஸம்ப³ந்தோ⁴.
70. Arahā pana hutvā attano pubbakammaṃ saritvā somanassajāto pubbacaritāpadānaṃ pakāsento araññe kuṭikaṃ katvātiādimāha. Tattha araññeti sīhabyagghādīnaṃ bhayena manussā ettha na rajjanti na ramanti na allīyantīti araññaṃ, tasmiṃ araññe. Kuṭikanti tiṇacchadanakuṭikaṃ katvā pabbatantare vasāmi vāsaṃ kappesinti attho. Lābhena ca alābhena ca yasena ca ayasena ca santuṭṭho vihāsinti sambandho.
72. ஜலஜுத்தமனாமகந்தி ஜலே ஜாதங் ஜலஜங், பது³மங், ஜலஜங் உத்தமங் ஜலஜுத்தமங், ஜலஜுத்தமேன ஸமானங் நாமங் யஸ்ஸ ஸோ ஜலஜுத்தமனாமகோ, தங் ஜலஜுத்தமனாமகங் பு³த்³த⁴ந்தி அத்தோ². ஸேஸங் பாளினயானுயோகே³ன ஸுவிஞ்ஞெய்யமேவாதி.
72.Jalajuttamanāmakanti jale jātaṃ jalajaṃ, padumaṃ, jalajaṃ uttamaṃ jalajuttamaṃ, jalajuttamena samānaṃ nāmaṃ yassa so jalajuttamanāmako, taṃ jalajuttamanāmakaṃ buddhanti attho. Sesaṃ pāḷinayānuyogena suviññeyyamevāti.
ஸன்னிட்டா²பகத்தே²ரஅபதா³னவண்ணனா ஸமத்தா.
Sanniṭṭhāpakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 4. ஸன்னிட்டா²பகத்தே²ரஅபதா³னங் • 4. Sanniṭṭhāpakattheraapadānaṃ
