| Library / Tipiṭaka / ติปิฎก • Tipiṭaka / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā |
๑๐-๑๒. สโญฺญชนิกาทิทิฎฺฐินิเทฺทสวณฺณนา
10-12. Saññojanikādidiṭṭhiniddesavaṇṇanā
๑๔๓. ยสฺมา สโญฺญชนิกา ทิฎฺฐิ สพฺพทิฎฺฐิสาธารณา, ตสฺมา ตสฺสา สพฺพทิฎฺฐิสโญฺญชนตฺตา สพฺพทิฎฺฐิสาธารโณ อโตฺถ นิทฺทิโฎฺฐฯ โส เหฎฺฐา วุตฺตทิฎฺฐิปริยุฎฺฐานาเนวฯ
143. Yasmā saññojanikā diṭṭhi sabbadiṭṭhisādhāraṇā, tasmā tassā sabbadiṭṭhisaññojanattā sabbadiṭṭhisādhāraṇo attho niddiṭṭho. So heṭṭhā vuttadiṭṭhipariyuṭṭhānāneva.
๑๔๔. มานวินิพนฺธทิฎฺฐีสุ จกฺขุ อหนฺติ อภินิเวสปรามาโสติ มานปุพฺพโก อภินิเวสปรามาโสฯ น หิ ทิฎฺฐิ มานสมฺปยุตฺตา โหติฯ เตเนว จ มานวินิพนฺธาติ วุตฺตํ, มานปฎิพนฺธา มานมูลกาติ อโตฺถฯ
144. Mānavinibandhadiṭṭhīsu cakkhu ahanti abhinivesaparāmāsoti mānapubbako abhinivesaparāmāso. Na hi diṭṭhi mānasampayuttā hoti. Teneva ca mānavinibandhāti vuttaṃ, mānapaṭibandhā mānamūlakāti attho.
๑๔๕. จกฺขุ มมนฺติ อภินิเวสปรามาโสติ เอตฺถาปิ เอเสว นโยฯ เอตฺถ ปน ‘‘มมา’’ติ วตฺตเพฺพ ‘‘มม’’นฺติ อนุนาสิกาคโม เวทิตโพฺพฯ ‘‘อห’’นฺติ มานวินิพนฺธาย รูปาทีนิปิ อชฺฌตฺติกาเนวฯ น หิ กสิณรูปํ วินา พาหิรานิ ‘‘อห’’นฺติ คณฺหาติฯ ‘‘มม’’นฺติ มานวินิพนฺธาย ปน พาหิรานิปิ ลพฺภนฺติฯ พาหิรานิปิ หิ ‘‘มม’’นฺติ คณฺหาติฯ ยสฺมา ปน ทุกฺขา เวทนา อนิฎฺฐตฺตา มานวตฺถุ น โหติ, ตสฺมา ฉ เวทนา ตาสํ มูลปจฺจยา ฉ ผสฺสา จ น คหิตาฯ สญฺญาทโย ปน อิธ ปจฺฉินฺนตฺตา น คหิตาติ เวทิตพฺพาฯ
145.Cakkhu mamanti abhinivesaparāmāsoti etthāpi eseva nayo. Ettha pana ‘‘mamā’’ti vattabbe ‘‘mama’’nti anunāsikāgamo veditabbo. ‘‘Aha’’nti mānavinibandhāya rūpādīnipi ajjhattikāneva. Na hi kasiṇarūpaṃ vinā bāhirāni ‘‘aha’’nti gaṇhāti. ‘‘Mama’’nti mānavinibandhāya pana bāhirānipi labbhanti. Bāhirānipi hi ‘‘mama’’nti gaṇhāti. Yasmā pana dukkhā vedanā aniṭṭhattā mānavatthu na hoti, tasmā cha vedanā tāsaṃ mūlapaccayā cha phassā ca na gahitā. Saññādayo pana idha pacchinnattā na gahitāti veditabbā.
สํโยชนิกาทิทิฎฺฐินิเทฺทสวณฺณนา นิฎฺฐิตาฯ
Saṃyojanikādidiṭṭhiniddesavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / ปฎิสมฺภิทามคฺคปาฬิ • Paṭisambhidāmaggapāḷi / ๑๐-๑๒. สโญฺญชนิกาทิทิฎฺฐินิเทฺทโส • 10-12. Saññojanikādidiṭṭhiniddeso
