| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
(၁၄) ၄. သန္ထာရဝဂ္ဂဝဏ္ဏနာ
(14) 4. Santhāravaggavaṇṇanā
၁၅၂. စတုတ္ထသ္သ ပဌမေ အာမိသသ္သ စ ဓမ္မသ္သ စ အလာဘေန အတ္တနော ပရသ္သ စ အန္တရေ သမ္ဘဝန္တသ္သ ဆိဒ္ဒသ္သ ဝိဝရသ္သ ဘေဒသ္သ သန္ထရဏံ ပိဒဟနံ သင္ဂဏ္ဟနံ သန္ထာရော။ အယဉ္ဟိ လောကသန္နိဝာသော အလဗ္ဘမာနေန အာမိသေန ဓမ္မေန စာတိ ဒ္ဝီဟိ ဆိဒ္ဒော။ တသ္သ တံ ဆိဒ္ဒံ ယထာ န ပညာယတိ , ဧဝံ ပီဌသ္သ ဝိယ ပစ္စတ္ထရဏေန အာမိသေန ဓမ္မေန စ သန္ထရဏံ သင္ဂဏ္ဟနံ သန္ထာရောတိ ဝုစ္စတိ။ ဧတ္ထ စ အာမိသေန သင္ဂဟော အာမိသသန္ထာရော နာမ။ တံ ကရောန္တေန မာတာပိတူနံ ဘိက္ခုဂတိကသ္သ ဝေယ္ယာဝစ္စကရသ္သ ရညော စောရာနဉ္စ အဂ္ဂံ အဂ္ဂဟေတ္ဝာပိ ဒာတုံ ဝဋ္ဋတိ။ အာမသိတ္ဝာ ဒိန္နေဟိ ရာဇာနော စ စောရာ စ အနတ္ထမ္ပိ ကရောန္တိ, ဇီဝိတက္ခယမ္ပိ ပာပေန္တိ။ အနာမသိတ္ဝာ ဒိန္နေန အတ္တမနာ ဟောန္တိ, စောရနာဂဝတ္ထုအာဒီနိ စေတ္ထ ဝတ္ထူနိ ကထေတဗ္ဗာနိ။ တာနိ သမန္တပာသာဒိကာယ ဝိနယဋ္ဌကထာယံ (ပာရာ. ၁၈၅) ဝိတ္ထာရိတာနိ။ သက္ကစ္စံ ဥဒ္ဒေသဒာနံ ပာဠိဝဏ္ဏနာ ဓမ္မကထာကထနန္တိ ဧဝံ ဓမ္မေန သင္ဂဟော ဓမ္မသန္ထာရော နာမ။
152. Catutthassa paṭhame āmisassa ca dhammassa ca alābhena attano parassa ca antare sambhavantassa chiddassa vivarassa bhedassa santharaṇaṃ pidahanaṃ saṅgaṇhanaṃ santhāro. Ayañhi lokasannivāso alabbhamānena āmisena dhammena cāti dvīhi chiddo. Tassa taṃ chiddaṃ yathā na paññāyati , evaṃ pīṭhassa viya paccattharaṇena āmisena dhammena ca santharaṇaṃ saṅgaṇhanaṃ santhāroti vuccati. Ettha ca āmisena saṅgaho āmisasanthāro nāma. Taṃ karontena mātāpitūnaṃ bhikkhugatikassa veyyāvaccakarassa rañño corānañca aggaṃ aggahetvāpi dātuṃ vaṭṭati. Āmasitvā dinnehi rājāno ca corā ca anatthampi karonti, jīvitakkhayampi pāpenti. Anāmasitvā dinnena attamanā honti, coranāgavatthuādīni cettha vatthūni kathetabbāni. Tāni samantapāsādikāya vinayaṭṭhakathāyaṃ (pārā. 185) vitthāritāni. Sakkaccaṃ uddesadānaṃ pāḷivaṇṇanā dhammakathākathananti evaṃ dhammena saṅgaho dhammasanthāro nāma.
၁၅၃-၁၆၃. ဒုတိယာဒီနိ ဥတ္တာနတ္ထာနေဝ။
153-163. Dutiyādīni uttānatthāneva.
သန္ထာရဝဂ္ဂဝဏ္ဏနာ နိဋ္ဌိတာ။
Santhāravaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / (၁၄) ၄. သန္ထာရဝဂ္ဂော • (14) 4. Santhāravaggo
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / (၁၄) ၄. သန္ထာရဝဂ္ဂဝဏ္ဏနာ • (14) 4. Santhāravaggavaṇṇanā
