| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸந்த²தசதுக்கபே⁴த³கதா²வண்ணனா
Santhatacatukkabhedakathāvaṇṇanā
61-2. படிபன்னகஸ்ஸாதி ஆரத்³த⁴விபஸ்ஸகஸ்ஸ. உபாதி³ன்னகந்தி காயிந்த்³ரியங் ஸந்தா⁴ய வுத்தங். உபாதி³ன்னகேன பு²ஸதீதி உபாதி³ன்னகஸரீரேன பு²ஸீயதீதி கம்மஸாத⁴னேன அத்தோ² த³ட்ட²ப்³போ³. அத² வா ஏவங் கரொந்தோ பி⁴க்கு² கிஞ்சி உபாதி³ன்னகங் உபாதி³ன்னகேன ந பு²ஸதீதி அத்தோ². லேஸங் ஒட்³டெ³ஸ்ஸந்தீதி லேஸங் ட²பெஸ்ஸந்தி, பரிகப்பெஸ்ஸந்தீதி அத்தோ². ஸந்த²தாதி³பே⁴தே³ஹி பி⁴ந்தி³த்வாதி ஸந்த²தாதி³விஸேஸனேஹி விஸேஸெத்வா. ஸந்த²தாயாதி ஸமுதா³யே ஏகதே³ஸவோஹாரோ த³ட்³ட⁴ஸ்ஸ படஸ்ஸ சி²த்³த³ந்திஆதீ³ஸு விய. யதா² ஹி படஸ்ஸ ஏகதே³ஸோவ வத்த²தோ த³ட்³டோ⁴தி வுச்சதி, தங் ஏகதே³ஸவோஹாரங் ஸமுதா³யே படே உபசாரதோ ஆரோபெத்வா புன தங் ஸமுதா³யங் த³ட்³ட⁴ப்பதே³ஸஸங்கா²தசி²த்³த³ஸம்ப³ந்தீ⁴பா⁴வேன ‘‘த³ட்³ட⁴ஸ்ஸ படஸ்ஸ சி²த்³த³’’ந்தி வோஹரந்தி, ஏவமிதா⁴பி இத்தி²யா மக்³க³ப்பதே³ஸவோஹாரங் ஸமுதா³யபூ⁴தாய இத்தி²யா ஆரோபெத்வா புன தங் இத்தி²ங் ஸந்த²தமக்³க³ஸம்ப³ந்தி⁴னிங் கத்வா ஸந்த²தாய இத்தி²யா வச்சமக்³கே³னாதிஆதி³ வுத்தங். ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.61-62) பனெத்த² ‘‘ஏகதே³ஸே ஸமுதா³யவோஹாரோ’’தி வுத்தங், தங் ந யுத்தங் அவயவவோஹாரேன ஸமுதா³யஸ்ஸேவ பதீயமானத்தா. இதரதா² ஹி ஸந்த²தாய வச்சமக்³கே³னாதி இத்தி²லிங்க³தா மக்³க³ஸம்ப³ந்தி⁴தா ச ந ஸியா, ஏகதே³ஸே ஸமுதா³யோபசாரஸ்ஸ பன ஏகதே³ஸோவ அத்தோ² ஸாகா²ய சி²ஜ்ஜமானாய ருக்கோ² சி²ஜ்ஜதீதிஆதீ³ஸு விய.
61-2.Paṭipannakassāti āraddhavipassakassa. Upādinnakanti kāyindriyaṃ sandhāya vuttaṃ. Upādinnakena phusatīti upādinnakasarīrena phusīyatīti kammasādhanena attho daṭṭhabbo. Atha vā evaṃ karonto bhikkhu kiñci upādinnakaṃ upādinnakena na phusatīti attho. Lesaṃ oḍḍessantīti lesaṃ ṭhapessanti, parikappessantīti attho. Santhatādibhedehi bhinditvāti santhatādivisesanehi visesetvā. Santhatāyāti samudāye ekadesavohāro daḍḍhassa paṭassa chiddantiādīsu viya. Yathā hi paṭassa ekadesova vatthato daḍḍhoti vuccati, taṃ ekadesavohāraṃ samudāye paṭe upacārato āropetvā puna taṃ samudāyaṃ daḍḍhappadesasaṅkhātachiddasambandhībhāvena ‘‘daḍḍhassa paṭassa chidda’’nti voharanti, evamidhāpi itthiyā maggappadesavohāraṃ samudāyabhūtāya itthiyā āropetvā puna taṃ itthiṃ santhatamaggasambandhiniṃ katvā santhatāya itthiyā vaccamaggenātiādi vuttaṃ. Sāratthadīpaniyaṃ (sārattha. ṭī. pārājikakaṇḍa 2.61-62) panettha ‘‘ekadese samudāyavohāro’’ti vuttaṃ, taṃ na yuttaṃ avayavavohārena samudāyasseva patīyamānattā. Itarathā hi santhatāya vaccamaggenāti itthiliṅgatā maggasambandhitā ca na siyā, ekadese samudāyopacārassa pana ekadesova attho sākhāya chijjamānāya rukkho chijjatītiādīsu viya.
வத்தா²தீ³னி மக்³க³ஸ்ஸ அந்தோ அப்பவேஸெத்வா ப³ஹியேவ வேட²னங் ஸந்தா⁴ய ‘‘பலிவேடெ²த்வா’’தி வுத்தங். ஸமுதா³யே அவயவூபசாரேனேவ பி⁴க்கு²பி ஸந்த²தோ நாமாதிஆதி³ வுத்தங். யத்தகே பவிட்டே²தி திலபீ³ஜமத்தே பவிட்டே². அக்கி²னாஸாதீ³னங் ஸந்த²தத்தேபி யதா²வத்து²கமேவாதி ஆஹ து²ல்லச்சயக்கெ²த்தே து²ல்லச்சயந்திஆதி³. கா²ணுங் க⁴ட்டெந்தஸ்ஸ து³க்கடந்தி இத்தி²னிமித்தஸ்ஸ அந்தோ கா²ணுங் பவேஸெத்வா ஸமதலங், அதிரித்தங் வா டி²தங் கா²ணுங் ஸசே க⁴ட்டேதி, க⁴ட்டெந்தஸ்ஸ து³க்கடங் பவேஸாபா⁴வதோ. ஸசே பன ஈஸகங் அந்தோ அல்லோகாஸே பவேஸெத்வா டி²தங் அனுபாதி³ன்னமேவ கா²ணுஸீஸங் அங்க³ஜாதேன சு²பதி, பாராஜிகமேவ. தஸ்ஸ தலந்தி வேளுனளாதி³கஸ்ஸ அந்தோதலங். ப³ஹித்³தா⁴ கா²ணுகேதி அந்தோ பவேஸிதவேளுபப்³பா³தி³கஸ்ஸ ப³ஹி நிக்க²ந்தஸீஸங் ஸந்தா⁴ய வுத்தங். யதா² ச இத்தி²னிமித்தேதிஆதீ³ஸு யதா² இத்தி²யா பஸ்ஸாவமக்³கே³ கா²ணுங் கத்வா க⁴ட்டனாதி³கங் வுத்தங், ஏவங் ஸப்³ப³த்த² வச்சமக்³கா³தீ³ஸுபி லக்க²ணங் வேதி³தப்³ப³ந்தி அத்தோ².
Vatthādīni maggassa anto appavesetvā bahiyeva veṭhanaṃ sandhāya ‘‘paliveṭhetvā’’ti vuttaṃ. Samudāye avayavūpacāreneva bhikkhupi santhato nāmātiādi vuttaṃ. Yattake paviṭṭheti tilabījamatte paviṭṭhe. Akkhināsādīnaṃ santhatattepi yathāvatthukamevāti āha thullaccayakkhette thullaccayantiādi. Khāṇuṃ ghaṭṭentassa dukkaṭanti itthinimittassa anto khāṇuṃ pavesetvā samatalaṃ, atirittaṃ vā ṭhitaṃ khāṇuṃ sace ghaṭṭeti, ghaṭṭentassa dukkaṭaṃ pavesābhāvato. Sace pana īsakaṃ anto allokāse pavesetvā ṭhitaṃ anupādinnameva khāṇusīsaṃ aṅgajātena chupati, pārājikameva. Tassa talanti veḷunaḷādikassa antotalaṃ. Bahiddhā khāṇuketi anto pavesitaveḷupabbādikassa bahi nikkhantasīsaṃ sandhāya vuttaṃ. Yathā ca itthinimittetiādīsu yathā itthiyā passāvamagge khāṇuṃ katvā ghaṭṭanādikaṃ vuttaṃ, evaṃ sabbattha vaccamaggādīsupi lakkhaṇaṃ veditabbanti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸந்த²தசதுக்கபே⁴த³கதா²வண்ணனா • Santhatacatukkabhedakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸந்த²தசதுக்கபே⁴த³ககதா²வண்ணனா • Santhatacatukkabhedakakathāvaṇṇanā
