| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[162] 2. ஸந்த²வஜாதகவண்ணனா
[162] 2. Santhavajātakavaṇṇanā
ந ஸந்த²வஸ்மா பரமத்தி² பாபியோதி இத³ங் ஸத்தா² ஜேதவனே விஹரந்தோ அக்³கி³ஜுஹனங் ஆரப்³ப⁴ கதே²ஸி. வத்து² ஹெட்டா² நங்கு³ட்ட²ஜாதகே (ஜா॰ 1.1.144 ஆத³யோ) கதி²தஸதி³ஸமேவ. பி⁴க்கூ² தே அக்³கி³ங் ஜுஹந்தே தி³ஸ்வா ‘‘ப⁴ந்தே, ஜடிலா நானப்பகாரங் மிச்சா²தபங் கரொந்தி, அத்தி² நு கோ² எத்த² வுட்³டீ⁴’’தி ப⁴க³வந்தங் புச்சி²ங்ஸு. ‘‘ந, பி⁴க்க²வே, எத்த²காசி வுட்³டி⁴ நாம அத்தி², போராணகபண்டி³தாபி அக்³கி³ஜுஹனே வுட்³டி⁴ அத்தீ²தி ஸஞ்ஞாய சிரங் அக்³கி³ங் ஜுஹித்வா தஸ்மிங் கம்மே அவுட்³டி⁴மேவ தி³ஸ்வா அக்³கி³ங் உத³கேன நிப்³பா³பெத்வா ஸாகா²தீ³ஹி போதெ²த்வா புன நிவத்தித்வாபி ந ஓலோகேஸு’’ந்தி வத்வா அதீதங் ஆஹரி.
Nasanthavasmā paramatthi pāpiyoti idaṃ satthā jetavane viharanto aggijuhanaṃ ārabbha kathesi. Vatthu heṭṭhā naṅguṭṭhajātake (jā. 1.1.144 ādayo) kathitasadisameva. Bhikkhū te aggiṃ juhante disvā ‘‘bhante, jaṭilā nānappakāraṃ micchātapaṃ karonti, atthi nu kho ettha vuḍḍhī’’ti bhagavantaṃ pucchiṃsu. ‘‘Na, bhikkhave, etthakāci vuḍḍhi nāma atthi, porāṇakapaṇḍitāpi aggijuhane vuḍḍhi atthīti saññāya ciraṃ aggiṃ juhitvā tasmiṃ kamme avuḍḍhimeva disvā aggiṃ udakena nibbāpetvā sākhādīhi pothetvā puna nivattitvāpi na olokesu’’nti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ப்³ராஹ்மணகுலே நிப்³ப³த்தி. மாதாபிதரோ தஸ்ஸ ஜாதக்³கி³ங் க³ஹெத்வா தங் ஸோளஸவஸ்ஸுத்³தே³ஸே டி²தங் ஆஹங்ஸு – ‘‘கிங், தாத, ஜாதக்³கி³ங் க³ஹெத்வா அரஞ்ஞே அக்³கி³ங் பரிசரிஸ்ஸஸி, உதா³ஹு தயோ வேதே³ உக்³க³ண்ஹித்வா குடும்ப³ங் ஸண்ட²பெத்வா க⁴ராவாஸங் வஸிஸ்ஸஸீ’’தி. ஸோ ‘‘ந மே க⁴ராவாஸேன அத்தோ², அரஞ்ஞே அக்³கி³ங் பரிசரித்வா ப்³ரஹ்மலோகபராயணோ ப⁴விஸ்ஸாமீ’’தி ஜாதக்³கி³ங் க³ஹெத்வா மாதாபிதரோ வந்தி³த்வா அரஞ்ஞங் பவிஸித்வா பண்ணஸாலாய வாஸங் கப்பெத்வா அக்³கி³ங் பரிசரி. ஸோ ஏகதி³வஸங் நிமந்திதட்டா²னங் க³ந்த்வா ஸப்பினா பாயாஸங் லபி⁴த்வா ‘‘இமங் பாயாஸங் மஹாப்³ரஹ்முனோ யஜிஸ்ஸாமீ’’தி தங் பாயாஸங் ஆஹரித்வா அக்³கி³ங் ஜாலெத்வா ‘‘அக்³கி³ங் தாவ ப⁴வந்தங் ஸப்பியுத்தங் பாயாஸங் பாயேமீ’’தி பாயாஸங் அக்³கி³ம்ஹி பக்கி²பி. ப³ஹுஸினேஹே பாயாஸே அக்³கி³ம்ஹி பக்கி²த்தமத்தேயேவ அக்³கி³ ஜலித்வா பச்சுக்³க³தாஹி அச்சீஹி பண்ணஸாலங் ஜா²பேஸி. ப்³ராஹ்மணோ பீ⁴ததஸிதோ பலாயித்வா ப³ஹி ட²த்வா ‘‘காபுரிஸேஹி நாம ஸந்த²வோ ந காதப்³போ³, இதா³னி மே இமினா அக்³கி³னா கிச்சே²ன கதா பண்ணஸாலா ஜா²பிதா’’தி வத்வா பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto brāhmaṇakule nibbatti. Mātāpitaro tassa jātaggiṃ gahetvā taṃ soḷasavassuddese ṭhitaṃ āhaṃsu – ‘‘kiṃ, tāta, jātaggiṃ gahetvā araññe aggiṃ paricarissasi, udāhu tayo vede uggaṇhitvā kuṭumbaṃ saṇṭhapetvā gharāvāsaṃ vasissasī’’ti. So ‘‘na me gharāvāsena attho, araññe aggiṃ paricaritvā brahmalokaparāyaṇo bhavissāmī’’ti jātaggiṃ gahetvā mātāpitaro vanditvā araññaṃ pavisitvā paṇṇasālāya vāsaṃ kappetvā aggiṃ paricari. So ekadivasaṃ nimantitaṭṭhānaṃ gantvā sappinā pāyāsaṃ labhitvā ‘‘imaṃ pāyāsaṃ mahābrahmuno yajissāmī’’ti taṃ pāyāsaṃ āharitvā aggiṃ jāletvā ‘‘aggiṃ tāva bhavantaṃ sappiyuttaṃ pāyāsaṃ pāyemī’’ti pāyāsaṃ aggimhi pakkhipi. Bahusinehe pāyāse aggimhi pakkhittamatteyeva aggi jalitvā paccuggatāhi accīhi paṇṇasālaṃ jhāpesi. Brāhmaṇo bhītatasito palāyitvā bahi ṭhatvā ‘‘kāpurisehi nāma santhavo na kātabbo, idāni me iminā agginā kicchena katā paṇṇasālā jhāpitā’’ti vatvā paṭhamaṃ gāthamāha –
23.
23.
‘‘ந ஸந்த²வஸ்மா பரமத்தி² பாபியோ, யோ ஸந்த²வோ காபுரிஸேன ஹோதி;
‘‘Na santhavasmā paramatthi pāpiyo, yo santhavo kāpurisena hoti;
ஸந்தப்பிதோ ஸப்பினா பாயஸேன, கிச்சா²கதங் பண்ணகுடிங் அத³ய்ஹீ’’தி.
Santappito sappinā pāyasena, kicchākataṃ paṇṇakuṭiṃ adayhī’’ti.
தத்த² ந ஸந்த²வஸ்மாதி தண்ஹாஸந்த²வாபி ச மித்தஸந்த²வாபி சாதி து³விதா⁴பி ஏதஸ்மா ஸந்த²வா பரங் உத்தரி அஞ்ஞங் பாபதரங் நத்தி², லாமகதரங் நாம நத்தீ²தி அத்தோ². யோ ஸந்த²வோ காபுரிஸேனாதி யோ பாபகேன காபுரிஸேன ஸத்³தி⁴ங் து³விதோ⁴பி ஸந்த²வோ, ததோ பாபதரங் அஞ்ஞங் நத்தி². கஸ்மா? ஸந்தப்பிதோ …பே॰…அத³ய்ஹீதி, யஸ்மா ஸப்பினா ச பாயாஸேன ச ஸந்தப்பிதோபி அயங் அக்³கி³ மயா கிச்சே²ன கதங் பண்ணஸாலங் ஜா²பேஸீதி அத்தோ².
Tattha na santhavasmāti taṇhāsanthavāpi ca mittasanthavāpi cāti duvidhāpi etasmā santhavā paraṃ uttari aññaṃ pāpataraṃ natthi, lāmakataraṃ nāma natthīti attho. Yo santhavo kāpurisenāti yo pāpakena kāpurisena saddhiṃ duvidhopi santhavo, tato pāpataraṃ aññaṃ natthi. Kasmā? Santappito…pe…adayhīti, yasmā sappinā ca pāyāsena ca santappitopi ayaṃ aggi mayā kicchena kataṃ paṇṇasālaṃ jhāpesīti attho.
ஸோ ஏவங் வத்வா ‘‘ந மே தயா மித்தது³ப்³பி⁴னா அத்தோ²’’தி தங் அக்³கி³ங் உத³கேன நிப்³பா³பெத்வா ஸாகா²ஹி போதெ²த்வா அந்தோஹிமவந்தங் பவிஸித்வா ஏகங் ஸாமமிகி³ங் ஸீஹஸ்ஸ ச ப்³யக்³க⁴ஸ்ஸ ச தீ³பினோ ச முக²ங் லேஹந்திங் தி³ஸ்வா ‘‘ஸப்புரிஸேஹி ஸத்³தி⁴ங் ஸந்த²வா பரங் ஸெய்யோ நாம நத்தீ²’’தி சிந்தெத்வா து³தியங் கா³த²மாஹ –
So evaṃ vatvā ‘‘na me tayā mittadubbhinā attho’’ti taṃ aggiṃ udakena nibbāpetvā sākhāhi pothetvā antohimavantaṃ pavisitvā ekaṃ sāmamigiṃ sīhassa ca byagghassa ca dīpino ca mukhaṃ lehantiṃ disvā ‘‘sappurisehi saddhiṃ santhavā paraṃ seyyo nāma natthī’’ti cintetvā dutiyaṃ gāthamāha –
24.
24.
‘‘ந ஸந்த²வஸ்மா பரமத்தி² ஸெய்யோ, யோ ஸந்த²வோ ஸப்புரிஸேன ஹோதி;
‘‘Na santhavasmā paramatthi seyyo, yo santhavo sappurisena hoti;
ஸீஹஸ்ஸ ப்³யக்³க⁴ஸ்ஸ ச தீ³பினோ ச, ஸாமா முக²ங் லேஹதி ஸந்த²வேனா’’தி.
Sīhassa byagghassa ca dīpino ca, sāmā mukhaṃ lehati santhavenā’’ti.
தத்த² ஸாமா முக²ங் லேஹதி ஸந்த²வேனாதி ஸாமா நாம மிகீ³ இமேஸங் திண்ணங் ஜனானங் ஸந்த²வேன ஸினேஹேன முக²ங் லேஹதீதி.
Tattha sāmā mukhaṃ lehati santhavenāti sāmā nāma migī imesaṃ tiṇṇaṃ janānaṃ santhavena sinehena mukhaṃ lehatīti.
ஏவங் வத்வா போ³தி⁴ஸத்தோ அந்தோஹிமவந்தங் பவிஸித்வா இஸிபப்³ப³ஜ்ஜங் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தெத்வா ஜீவிதபரியோஸானே ப்³ரஹ்மலோகூபகோ³ அஹோஸி.
Evaṃ vatvā bodhisatto antohimavantaṃ pavisitvā isipabbajjaṃ pabbajitvā abhiññā ca samāpattiyo ca nibbattetvā jīvitapariyosāne brahmalokūpago ahosi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘தேன ஸமயேன தாபஸோ அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tena samayena tāpaso ahameva ahosi’’nti.
ஸந்த²வஜாதகவண்ணனா து³தியா.
Santhavajātakavaṇṇanā dutiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 162. ஸந்த²வஜாதகங் • 162. Santhavajātakaṃ
