| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. ஸந்த²வவக்³கோ³
5. Santhavavaggo
1. ஸந்த²வபஞ்ஹோ
1. Santhavapañho
1. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா –
1. ‘‘Bhante nāgasena, bhāsitampetaṃ bhagavatā –
‘‘‘ஸந்த²வதோ ப⁴யங் ஜாதங், நிகேதா ஜாயதே ரஜோ;
‘‘‘Santhavato bhayaṃ jātaṃ, niketā jāyate rajo;
அனிகேதமஸந்த²வங், ஏதங் வே முனித³ஸ்ஸன’ந்தி.
Aniketamasanthavaṃ, etaṃ ve munidassana’nti.
‘‘புன ச ப⁴க³வதா ப⁴ணிதங் ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி. யதி³, ப⁴ந்தே நாக³ஸேன, ததா²க³தேன ப⁴ணிதங் ‘ஸந்த²வதோ ப⁴யங் ஜாதங், நிகேதா ஜாயதே ரஜோ. அனிகேதமஸந்த²வங், ஏதங் வே முனித³ஸ்ஸன’ந்தி, தேன ஹி ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி யங் வசனங், தங் மிச்சா². யதி³ ததா²க³தேன ப⁴ணிதங் ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி, தேன ஹி ‘ஸந்த²வதோ ப⁴யங் ஜாதங், நிகேதா ஜாயதே ரஜோ. அனிகேதமஸந்த²வங், ஏதங் வே முனித³ஸ்ஸன’ந்தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
‘‘Puna ca bhagavatā bhaṇitaṃ ‘vihāre kāraye ramme, vāsayettha bahussute’ti. Yadi, bhante nāgasena, tathāgatena bhaṇitaṃ ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti, tena hi ‘vihāre kāraye ramme, vāsayettha bahussute’ti yaṃ vacanaṃ, taṃ micchā. Yadi tathāgatena bhaṇitaṃ ‘vihāre kāraye ramme, vāsayettha bahussute’ti, tena hi ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங் , மஹாராஜ, ப⁴க³வதா ‘ஸந்த²வதோ ப⁴யங் ஜாதங், நிகேதா ஜாயதே ரஜோ. அனிகேதமஸந்த²வங், ஏதங் வே முனித³ஸ்ஸன’ந்தி. ப⁴ணிதஞ்ச ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி. யங், மஹாராஜ, ப⁴க³வதா ப⁴ணிதங் ‘ஸந்த²வதோ ப⁴யங் ஜாதங், நிகேதா ஜாயதே ரஜோ. அனிகேதமஸந்த²வங், ஏதங் வே முனித³ஸ்ஸன’ந்தி, தங் ஸபா⁴வவசனங் அஸேஸவசனங் நிஸ்ஸேஸவசனங் நிப்பரியாயவசனங் ஸமணானுச்ச²வங் ஸமணஸாருப்பங் ஸமணப்பதிரூபங் ஸமணாரஹங் ஸமணகோ³சரங் ஸமணப்படிபதா³ ஸமணப்படிபத்தி. யதா², மஹாராஜ, ஆரஞ்ஞகோ மிகோ³ அரஞ்ஞே பவனே சரமானோ நிராலயோ அனிகேதோ யதி²ச்ச²கங் ஸயதி, ஏவமேவ கோ², மஹாராஜ, பி⁴க்கு²னா ‘ஸந்த²வதோ ப⁴யங் ஜாதங், நிகேதா ஜாயதே ரஜோ. அனிகேதமஸந்த²வங், ஏதங் வே முனித³ஸ்ஸன’ந்தி சிந்தேதப்³ப³ங்.
‘‘Bhāsitampetaṃ , mahārāja, bhagavatā ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti. Bhaṇitañca ‘vihāre kāraye ramme, vāsayettha bahussute’ti. Yaṃ, mahārāja, bhagavatā bhaṇitaṃ ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti, taṃ sabhāvavacanaṃ asesavacanaṃ nissesavacanaṃ nippariyāyavacanaṃ samaṇānucchavaṃ samaṇasāruppaṃ samaṇappatirūpaṃ samaṇārahaṃ samaṇagocaraṃ samaṇappaṭipadā samaṇappaṭipatti. Yathā, mahārāja, āraññako migo araññe pavane caramāno nirālayo aniketo yathicchakaṃ sayati, evameva kho, mahārāja, bhikkhunā ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti cintetabbaṃ.
‘‘யங் பன, மஹாராஜ, ப⁴க³வதா ப⁴ணிதங் ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி, தங் த்³வே அத்த²வஸே ஸம்பஸ்ஸமானேன ப⁴க³வதா ப⁴ணிதங். கதமே த்³வே? விஹாரதா³னங் நாம ஸப்³ப³பு³த்³தே⁴ஹி வண்ணிதங் அனுமதங் தோ²மிதங் பஸத்த²ங், தங் தே விஹாரதா³னங் த³த்வா ஜாதிஜராமரணா பரிமுச்சிஸ்ஸந்தீதி. அயங் தாவ பட²மோ ஆனிஸங்ஸோ விஹாரதா³னே.
‘‘Yaṃ pana, mahārāja, bhagavatā bhaṇitaṃ ‘vihāre kāraye ramme, vāsayettha bahussute’ti, taṃ dve atthavase sampassamānena bhagavatā bhaṇitaṃ. Katame dve? Vihāradānaṃ nāma sabbabuddhehi vaṇṇitaṃ anumataṃ thomitaṃ pasatthaṃ, taṃ te vihāradānaṃ datvā jātijarāmaraṇā parimuccissantīti. Ayaṃ tāva paṭhamo ānisaṃso vihāradāne.
‘‘புன சபரங் விஹாரே விஜ்ஜமானே பி⁴க்கு²னியோ ப்³யத்தஸங்கேதா ப⁴விஸ்ஸந்தி, ஸுலப⁴ங் த³ஸ்ஸனங் த³ஸ்ஸனகாமானங், அனிகேதே து³த்³த³ஸ்ஸனா ப⁴விஸ்ஸந்தீதி. அயங் து³தியோ ஆனிஸங்ஸோ விஹாரதா³னே. இமே த்³வே அத்த²வஸே ஸம்பஸ்ஸமானேன ப⁴க³வதா ப⁴ணிதங் ‘விஹாரே காரயே ரம்மே, வாஸயெத்த² ப³ஹுஸ்ஸுதே’தி, ந தத்த² பு³த்³த⁴புத்தேன ஆலயோ கரணீயோ நிகேதே’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Puna caparaṃ vihāre vijjamāne bhikkhuniyo byattasaṅketā bhavissanti, sulabhaṃ dassanaṃ dassanakāmānaṃ, anikete duddassanā bhavissantīti. Ayaṃ dutiyo ānisaṃso vihāradāne. Ime dve atthavase sampassamānena bhagavatā bhaṇitaṃ ‘vihāre kāraye ramme, vāsayettha bahussute’ti, na tattha buddhaputtena ālayo karaṇīyo nikete’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ஸந்த²வபஞ்ஹோ பட²மோ.
Santhavapañho paṭhamo.
