| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. སནྠཝཝགྒོ
5. Santhavavaggo
༡. སནྠཝཔཉྷོ
1. Santhavapañho
༡. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ –
1. ‘‘Bhante nāgasena, bhāsitampetaṃ bhagavatā –
‘‘‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ།
‘‘‘Santhavato bhayaṃ jātaṃ, niketā jāyate rajo;
ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི༎
Aniketamasanthavaṃ, etaṃ ve munidassana’nti.
‘‘པུན ཙ བྷགཝཏཱ བྷཎིཏཾ ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི། ཡདི, བྷནྟེ ནཱགསེན, ཏཐཱགཏེན བྷཎིཏཾ ‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ། ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི, ཏེན ཧི ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི ཡཾ ཝཙནཾ, ཏཾ མིཙྪཱ། ཡདི ཏཐཱགཏེན བྷཎིཏཾ ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི, ཏེན ཧི ‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ། ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
‘‘Puna ca bhagavatā bhaṇitaṃ ‘vihāre kāraye ramme, vāsayettha bahussute’ti. Yadi, bhante nāgasena, tathāgatena bhaṇitaṃ ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti, tena hi ‘vihāre kāraye ramme, vāsayettha bahussute’ti yaṃ vacanaṃ, taṃ micchā. Yadi tathāgatena bhaṇitaṃ ‘vihāre kāraye ramme, vāsayettha bahussute’ti, tena hi ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ , མཧཱརཱཛ, བྷགཝཏཱ ‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ། ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི། བྷཎིཏཉྩ ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི། ཡཾ, མཧཱརཱཛ, བྷགཝཏཱ བྷཎིཏཾ ‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ། ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི, ཏཾ སབྷཱཝཝཙནཾ ཨསེསཝཙནཾ ནིསྶེསཝཙནཾ ནིཔྤརིཡཱཡཝཙནཾ སམཎཱནུཙྪཝཾ སམཎསཱརུཔྤཾ སམཎཔྤཏིརཱུཔཾ སམཎཱརཧཾ སམཎགོཙརཾ སམཎཔྤཊིཔདཱ སམཎཔྤཊིཔཏྟི། ཡཐཱ, མཧཱརཱཛ, ཨཱརཉྙཀོ མིགོ ཨརཉྙེ པཝནེ ཙརམཱནོ ནིརཱལཡོ ཨནིཀེཏོ ཡཐིཙྪཀཾ སཡཏི, ཨེཝམེཝ ཁོ, མཧཱརཱཛ, བྷིཀྑུནཱ ‘སནྠཝཏོ བྷཡཾ ཛཱཏཾ, ནིཀེཏཱ ཛཱཡཏེ རཛོ། ཨནིཀེཏམསནྠཝཾ, ཨེཏཾ ཝེ མུནིདསྶན’ནྟི ཙིནྟེཏབྦཾ།
‘‘Bhāsitampetaṃ , mahārāja, bhagavatā ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti. Bhaṇitañca ‘vihāre kāraye ramme, vāsayettha bahussute’ti. Yaṃ, mahārāja, bhagavatā bhaṇitaṃ ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti, taṃ sabhāvavacanaṃ asesavacanaṃ nissesavacanaṃ nippariyāyavacanaṃ samaṇānucchavaṃ samaṇasāruppaṃ samaṇappatirūpaṃ samaṇārahaṃ samaṇagocaraṃ samaṇappaṭipadā samaṇappaṭipatti. Yathā, mahārāja, āraññako migo araññe pavane caramāno nirālayo aniketo yathicchakaṃ sayati, evameva kho, mahārāja, bhikkhunā ‘santhavato bhayaṃ jātaṃ, niketā jāyate rajo. Aniketamasanthavaṃ, etaṃ ve munidassana’nti cintetabbaṃ.
‘‘ཡཾ པན, མཧཱརཱཛ, བྷགཝཏཱ བྷཎིཏཾ ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི, ཏཾ དྭེ ཨཏྠཝསེ སམྤསྶམཱནེན བྷགཝཏཱ བྷཎིཏཾ། ཀཏམེ དྭེ? ཝིཧཱརདཱནཾ ནཱམ སབྦབུདྡྷེཧི ཝཎྞིཏཾ ཨནུམཏཾ ཐོམིཏཾ པསཏྠཾ, ཏཾ ཏེ ཝིཧཱརདཱནཾ དཏྭཱ ཛཱཏིཛརཱམརཎཱ པརིམུཙྩིསྶནྟཱིཏི། ཨཡཾ ཏཱཝ པཋམོ ཨཱནིསཾསོ ཝིཧཱརདཱནེ།
‘‘Yaṃ pana, mahārāja, bhagavatā bhaṇitaṃ ‘vihāre kāraye ramme, vāsayettha bahussute’ti, taṃ dve atthavase sampassamānena bhagavatā bhaṇitaṃ. Katame dve? Vihāradānaṃ nāma sabbabuddhehi vaṇṇitaṃ anumataṃ thomitaṃ pasatthaṃ, taṃ te vihāradānaṃ datvā jātijarāmaraṇā parimuccissantīti. Ayaṃ tāva paṭhamo ānisaṃso vihāradāne.
‘‘པུན ཙཔརཾ ཝིཧཱརེ ཝིཛྫམཱནེ བྷིཀྑུནིཡོ བྱཏྟསངྐེཏཱ བྷཝིསྶནྟི, སུལབྷཾ དསྶནཾ དསྶནཀཱམཱནཾ, ཨནིཀེཏེ དུདྡསྶནཱ བྷཝིསྶནྟཱིཏི། ཨཡཾ དུཏིཡོ ཨཱནིསཾསོ ཝིཧཱརདཱནེ། ཨིམེ དྭེ ཨཏྠཝསེ སམྤསྶམཱནེན བྷགཝཏཱ བྷཎིཏཾ ‘ཝིཧཱརེ ཀཱརཡེ རམྨེ, ཝཱསཡེཏྠ བཧུསྶུཏེ’ཏི, ན ཏཏྠ བུདྡྷཔུཏྟེན ཨཱལཡོ ཀརཎཱིཡོ ནིཀེཏེ’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Puna caparaṃ vihāre vijjamāne bhikkhuniyo byattasaṅketā bhavissanti, sulabhaṃ dassanaṃ dassanakāmānaṃ, anikete duddassanā bhavissantīti. Ayaṃ dutiyo ānisaṃso vihāradāne. Ime dve atthavase sampassamānena bhagavatā bhaṇitaṃ ‘vihāre kāraye ramme, vāsayettha bahussute’ti, na tattha buddhaputtena ālayo karaṇīyo nikete’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
སནྠཝཔཉྷོ པཋམོ།
Santhavapañho paṭhamo.
