| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
48. ஸந்தோஸனித்³தே³ஸவண்ணனா
48. Santosaniddesavaṇṇanā
459. ‘‘சத்தாரிமானி , பி⁴க்க²வே, அப்பானி சேவ ஸுலபா⁴னி ச, தானி ச அனவஜ்ஜானி. கதமானி சத்தாரி? பங்ஸுகூலங், பி⁴க்க²வே, சீவரானங் அப்பஞ்ச ஸுலப⁴ஞ்ச, தஞ்ச அனவஜ்ஜங். பிண்டி³யாலோபோ, பி⁴க்க²வே, போ⁴ஜனானங் அப்பஞ்ச ஸுலப⁴ஞ்ச, தஞ்ச அனவஜ்ஜங். ருக்க²மூலங் , பி⁴க்க²வே, ஸேனாஸனானங் அப்பஞ்ச ஸுலப⁴ஞ்ச, தஞ்ச அனவஜ்ஜங். பூதிமுத்தபே⁴ஸஜ்ஜங், பி⁴க்க²வே, பே⁴ஸஜ்ஜானங் அப்பஞ்ச ஸுலப⁴ஞ்ச, தஞ்ச அனவஜ்ஜங். இமானி கோ², பி⁴க்க²வே, சத்தாரி அப்பானி சேவ ஸுலபா⁴னி ச, தானி ச அனவஜ்ஜானீ’’தி (அ॰ நி॰ 4.27; இதிவு॰ 101) வசனதோ ‘‘அப்பேனா’’திஆதி³ வுத்தங்.
459. ‘‘Cattārimāni , bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ , bhikkhave, senāsanānaṃ appañca sulabhañca, tañca anavajjaṃ. Pūtimuttabhesajjaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjānī’’ti (a. ni. 4.27; itivu. 101) vacanato ‘‘appenā’’tiādi vuttaṃ.
ஸந்துட்டோ²தி எத்த² யதா²லாப⁴யதா²ப³லயதா²ஸாருப்பஸந்தோஸானங் வஸேன ஏகேகஸ்மிங் பச்சயே தயோ தயோ கத்வா சதூஸு பச்சயேஸு த்³வாத³ஸ ஸந்தோஸா ஹொந்தி. மத்தஞ்ஞூதி எத்த² (ம॰ நி॰ அட்ட²॰ 1.422; ஸங்॰ நி॰ அட்ட²॰ 3.4.239; அ॰ நி॰ அட்ட²॰ 2.3.16; இதிவு॰ அட்ட²॰ 28; த⁴॰ ஸ॰ அட்ட²॰ 124-134) சத்தாரோ மத்தா பரியேஸனமத்தா படிக்³க³ஹணமத்தா பரிபோ⁴க³மத்தா விஸ்ஸஜ்ஜனமத்தாதி. இதரீதரேன யாபெந்தோ ஸுப⁴ரோ நாம. ஸந்தோஸவினிச்ச²யோ.
Santuṭṭhoti ettha yathālābhayathābalayathāsāruppasantosānaṃ vasena ekekasmiṃ paccaye tayo tayo katvā catūsu paccayesu dvādasa santosā honti. Mattaññūti ettha (ma. ni. aṭṭha. 1.422; saṃ. ni. aṭṭha. 3.4.239; a. ni. aṭṭha. 2.3.16; itivu. aṭṭha. 28; dha. sa. aṭṭha. 124-134) cattāro mattā pariyesanamattā paṭiggahaṇamattā paribhogamattā vissajjanamattāti. Itarītarena yāpento subharo nāma. Santosavinicchayo.
ஸந்தோஸனித்³தே³ஸவண்ணனா நிட்டி²தா.
Santosaniddesavaṇṇanā niṭṭhitā.
