| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೪೮. ಸನ್ತೋಸನಿದ್ದೇಸವಣ್ಣನಾ
48. Santosaniddesavaṇṇanā
೪೫೯. ‘‘ಚತ್ತಾರಿಮಾನಿ , ಭಿಕ್ಖವೇ, ಅಪ್ಪಾನಿ ಚೇವ ಸುಲಭಾನಿ ಚ, ತಾನಿ ಚ ಅನವಜ್ಜಾನಿ। ಕತಮಾನಿ ಚತ್ತಾರಿ? ಪಂಸುಕೂಲಂ, ಭಿಕ್ಖವೇ, ಚೀವರಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ। ಪಿಣ್ಡಿಯಾಲೋಪೋ, ಭಿಕ್ಖವೇ, ಭೋಜನಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ। ರುಕ್ಖಮೂಲಂ , ಭಿಕ್ಖವೇ, ಸೇನಾಸನಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ। ಪೂತಿಮುತ್ತಭೇಸಜ್ಜಂ, ಭಿಕ್ಖವೇ, ಭೇಸಜ್ಜಾನಂ ಅಪ್ಪಞ್ಚ ಸುಲಭಞ್ಚ, ತಞ್ಚ ಅನವಜ್ಜಂ। ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಅಪ್ಪಾನಿ ಚೇವ ಸುಲಭಾನಿ ಚ, ತಾನಿ ಚ ಅನವಜ್ಜಾನೀ’’ತಿ (ಅ॰ ನಿ॰ ೪.೨೭; ಇತಿವು॰ ೧೦೧) ವಚನತೋ ‘‘ಅಪ್ಪೇನಾ’’ತಿಆದಿ ವುತ್ತಂ।
459. ‘‘Cattārimāni , bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ , bhikkhave, senāsanānaṃ appañca sulabhañca, tañca anavajjaṃ. Pūtimuttabhesajjaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjānī’’ti (a. ni. 4.27; itivu. 101) vacanato ‘‘appenā’’tiādi vuttaṃ.
ಸನ್ತುಟ್ಠೋತಿ ಏತ್ಥ ಯಥಾಲಾಭಯಥಾಬಲಯಥಾಸಾರುಪ್ಪಸನ್ತೋಸಾನಂ ವಸೇನ ಏಕೇಕಸ್ಮಿಂ ಪಚ್ಚಯೇ ತಯೋ ತಯೋ ಕತ್ವಾ ಚತೂಸು ಪಚ್ಚಯೇಸು ದ್ವಾದಸ ಸನ್ತೋಸಾ ಹೋನ್ತಿ। ಮತ್ತಞ್ಞೂತಿ ಏತ್ಥ (ಮ॰ ನಿ॰ ಅಟ್ಠ॰ ೧.೪೨೨; ಸಂ॰ ನಿ॰ ಅಟ್ಠ॰ ೩.೪.೨೩೯; ಅ॰ ನಿ॰ ಅಟ್ಠ॰ ೨.೩.೧೬; ಇತಿವು॰ ಅಟ್ಠ॰ ೨೮; ಧ॰ ಸ॰ ಅಟ್ಠ॰ ೧೨೪-೧೩೪) ಚತ್ತಾರೋ ಮತ್ತಾ ಪರಿಯೇಸನಮತ್ತಾ ಪಟಿಗ್ಗಹಣಮತ್ತಾ ಪರಿಭೋಗಮತ್ತಾ ವಿಸ್ಸಜ್ಜನಮತ್ತಾತಿ। ಇತರೀತರೇನ ಯಾಪೇನ್ತೋ ಸುಭರೋ ನಾಮ। ಸನ್ತೋಸವಿನಿಚ್ಛಯೋ।
Santuṭṭhoti ettha yathālābhayathābalayathāsāruppasantosānaṃ vasena ekekasmiṃ paccaye tayo tayo katvā catūsu paccayesu dvādasa santosā honti. Mattaññūti ettha (ma. ni. aṭṭha. 1.422; saṃ. ni. aṭṭha. 3.4.239; a. ni. aṭṭha. 2.3.16; itivu. aṭṭha. 28; dha. sa. aṭṭha. 124-134) cattāro mattā pariyesanamattā paṭiggahaṇamattā paribhogamattā vissajjanamattāti. Itarītarena yāpento subharo nāma. Santosavinicchayo.
ಸನ್ತೋಸನಿದ್ದೇಸವಣ್ಣನಾ ನಿಟ್ಠಿತಾ।
Santosaniddesavaṇṇanā niṭṭhitā.
