༡. སནྟུཊྛསུཏྟཾ

1. Santuṭṭhasuttaṃ

༡༤༤. སཱཝཏྠིཡཾ ཝིཧརཏི…པེ॰… ‘‘སནྟུཊྛཱཡཾ ¹, བྷིཀྑཝེ, ཀསྶཔོ ཨིཏརཱིཏརེན ཙཱིཝརེན, ཨིཏརཱིཏརཙཱིཝརསནྟུཊྛིཡཱ ཙ ཝཎྞཝཱདཱི; ན ཙ ཙཱིཝརཧེཏུ ཨནེསནཾ ཨཔྤཏིརཱུཔཾ ཨཱཔཛྫཏི; ཨལདྡྷཱ ཙ ཙཱིཝརཾ ན པརིཏསྶཏི; ལདྡྷཱ ཙ ཙཱིཝརཾ ཨགདྷིཏོ ² ཨམུཙྪིཏོ ཨནཛ྄ཛྷཱཔནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི’’།

144. Sāvatthiyaṃ viharati…pe… ‘‘santuṭṭhāyaṃ ³, bhikkhave, kassapo itarītarena cīvarena, itarītaracīvarasantuṭṭhiyā ca vaṇṇavādī; na ca cīvarahetu anesanaṃ appatirūpaṃ āpajjati; aladdhā ca cīvaraṃ na paritassati; laddhā ca cīvaraṃ agadhito ⁴ amucchito anajjhāpanno ādīnavadassāvī nissaraṇapañño paribhuñjati’’.

‘‘སནྟུཊྛཱཡཾ, བྷིཀྑཝེ, ཀསྶཔོ ཨིཏརཱིཏརེན པིཎྜཔཱཏེན, ཨིཏརཱིཏརཔིཎྜཔཱཏསནྟུཊྛིཡཱ ཙ ཝཎྞཝཱདཱི; ན ཙ པིཎྜཔཱཏཧེཏུ ཨནེསནཾ ཨཔྤཏིརཱུཔཾ ཨཱཔཛྫཏི; ཨལདྡྷཱ ཙ པིཎྜཔཱཏཾ ན པརིཏསྶཏི; ལདྡྷཱ ཙ པིཎྜཔཱཏཾ ཨགདྷིཏོ ཨམུཙྪིཏོ ཨནཛ྄ཛྷཱཔནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི།

‘‘Santuṭṭhāyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī; na ca piṇḍapātahetu anesanaṃ appatirūpaṃ āpajjati; aladdhā ca piṇḍapātaṃ na paritassati; laddhā ca piṇḍapātaṃ agadhito amucchito anajjhāpanno ādīnavadassāvī nissaraṇapañño paribhuñjati.

‘‘སནྟུཊྛཱཡཾ, བྷིཀྑཝེ, ཀསྶཔོ ཨིཏརཱིཏརེན སེནཱསནེན, ཨིཏརཱིཏརསེནཱསནསནྟུཊྛིཡཱ ཙ ཝཎྞཝཱདཱི; ན ཙ སེནཱསནཧེཏུ ཨནེསནཾ ཨཔྤཏིརཱུཔཾ ཨཱཔཛྫཏི; ཨལདྡྷཱ ཙ སེནཱསནཾ ན པརིཏསྶཏི; ལདྡྷཱ ཙ སེནཱསནཾ ཨགདྷིཏོ ཨམུཙྪིཏོ ཨནཛ྄ཛྷཱཔནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི།

‘‘Santuṭṭhāyaṃ, bhikkhave, kassapo itarītarena senāsanena, itarītarasenāsanasantuṭṭhiyā ca vaṇṇavādī; na ca senāsanahetu anesanaṃ appatirūpaṃ āpajjati; aladdhā ca senāsanaṃ na paritassati; laddhā ca senāsanaṃ agadhito amucchito anajjhāpanno ādīnavadassāvī nissaraṇapañño paribhuñjati.

‘‘སནྟུཊྛཱཡཾ, བྷིཀྑཝེ, ཀསྶཔོ ཨིཏརཱིཏརེན གིལཱནཔྤཙྩཡབྷེསཛྫཔརིཀྑཱརེན, ཨིཏརཱིཏརགིལཱནཔྤཙྩཡབྷེསཛྫཔརིཀྑཱརསནྟུཊྛིཡཱ ཙ ཝཎྞཝཱདཱི; ན ཙ གིལཱནཔྤཙྩཡབྷེསཛྫཔརིཀྑཱརཧེཏུ ཨནེསནཾ ཨཔྤཏིརཱུཔཾ ཨཱཔཛྫཏི; ཨལདྡྷཱ ཙ གིལཱནཔྤཙྩཡབྷེསཛྫཔརིཀྑཱརཾ ན པརིཏསྶཏི; ལདྡྷཱ ཙ གིལཱནཔྤཙྩཡབྷེསཛྫཔརིཀྑཱརཾ ཨགདྷིཏོ ཨམུཙྪིཏོ ཨནཛ྄ཛྷཱཔནྣོ ཨཱདཱིནཝདསྶཱཝཱི ནིསྶརཎཔཉྙོ པརིབྷུཉྫཏི།

‘‘Santuṭṭhāyaṃ, bhikkhave, kassapo itarītarena gilānappaccayabhesajjaparikkhārena, itarītaragilānappaccayabhesajjaparikkhārasantuṭṭhiyā ca vaṇṇavādī; na ca gilānappaccayabhesajjaparikkhārahetu anesanaṃ appatirūpaṃ āpajjati; aladdhā ca gilānappaccayabhesajjaparikkhāraṃ na paritassati; laddhā ca gilānappaccayabhesajjaparikkhāraṃ agadhito amucchito anajjhāpanno ādīnavadassāvī nissaraṇapañño paribhuñjati.

‘‘ཏསྨཱཏིཧ , བྷིཀྑཝེ, ཨེཝཾ སིཀྑིཏབྦཾ – ‘སནྟུཊྛཱ བྷཝིསྶཱམ ཨིཏརཱིཏརེན ཙཱིཝརེན, ཨིཏརཱིཏརཙཱིཝརསནྟུཊྛིཡཱ ཙ ཝཎྞཝཱདིནོ; ན ཙ ཙཱིཝརཧེཏུ ཨནེསནཾ ཨཔྤཏིརཱུཔཾ ཨཱཔཛྫིསྶཱམ; ཨལདྡྷཱ ཙ ཙཱིཝརཾ ན ཙ པརིཏསྶིསྶཱམ; ལདྡྷཱ ཙ ཙཱིཝརཾ ཨགདྷིཏཱ ཨམུཙྪིཏཱ ཨནཛ྄ཛྷཱཔནྣཱ ཨཱདཱིནཝདསྶཱཝིནོ ནིསྶརཎཔཉྙཱ པརིབྷུཉྫིསྶཱམ’’’། (ཨེཝཾ སབྦཾ ཀཱཏབྦཾ)།

‘‘Tasmātiha , bhikkhave, evaṃ sikkhitabbaṃ – ‘santuṭṭhā bhavissāma itarītarena cīvarena, itarītaracīvarasantuṭṭhiyā ca vaṇṇavādino; na ca cīvarahetu anesanaṃ appatirūpaṃ āpajjissāma; aladdhā ca cīvaraṃ na ca paritassissāma; laddhā ca cīvaraṃ agadhitā amucchitā anajjhāpannā ādīnavadassāvino nissaraṇapaññā paribhuñjissāma’’’. (Evaṃ sabbaṃ kātabbaṃ).

‘‘‘སནྟུཊྛཱ བྷཝིསྶཱམ ཨིཏརཱིཏརེན པིཎྜཔཱཏེན…པེ॰… སནྟུཊྛཱ བྷཝིསྶཱམ ཨིཏརཱིཏརེན སེནཱསནེན…པེ॰… སནྟུཊྛཱ བྷཝིསྶཱམ ཨིཏརཱིཏརེན གིལཱནཔྤཙྩཡབྷེསཛྫཔརིཀྑཱརེན, ཨིཏརཱིཏརགིལཱནཔྤཙྩཡབྷེསཛྫཔརིཀྑཱརསནྟུཊྛིཡཱ ཙ ཝཎྞཝཱདིནོ; ན ཙ གིལཱནཔྤཙྩཡབྷེསཛྫཔརིཀྑཱརཧེཏུ ཨནེསནཾ ཨཔྤཏིརཱུཔཾ ཨཱཔཛྫིསྶཱམ ཨལདྡྷཱ ཙ གིལཱནཔྤཙྩཡབྷེསཛྫཔརིཀྑཱརཾ ན པརིཏསྶིསྶཱམ; ལདྡྷཱ ཙ གིལཱནཔྤཙྩཡབྷེསཛྫཔརིཀྑཱརཾ ཨགདྷིཏཱ ཨམུཙྪིཏཱ ཨནཛ྄ཛྷཱཔནྣཱ ཨཱདཱིནཝདསྶཱཝིནོ ནིསྶརཎཔཉྙཱ པརིབྷུཉྫིསྶཱམཱ’ཏི། ཨེཝཉྷི ཝོ, བྷིཀྑཝེ, སིཀྑིཏབྦཾ། ཀསྶཔེན ཝཱ ཧི ཝོ, བྷིཀྑཝེ, ཨོཝདིསྶཱམི ཡོ ཝཱ པནསྶ ⁵ ཀསྶཔསདིསོ, ཨོཝདིཏེཧི ཙ པན ཝོ ཏཐཏྟཱཡ པཊིཔཛྫིཏབྦ’’ནྟི། པཋམཾ།

‘‘‘Santuṭṭhā bhavissāma itarītarena piṇḍapātena…pe… santuṭṭhā bhavissāma itarītarena senāsanena…pe… santuṭṭhā bhavissāma itarītarena gilānappaccayabhesajjaparikkhārena, itarītaragilānappaccayabhesajjaparikkhārasantuṭṭhiyā ca vaṇṇavādino; na ca gilānappaccayabhesajjaparikkhārahetu anesanaṃ appatirūpaṃ āpajjissāma aladdhā ca gilānappaccayabhesajjaparikkhāraṃ na paritassissāma; laddhā ca gilānappaccayabhesajjaparikkhāraṃ agadhitā amucchitā anajjhāpannā ādīnavadassāvino nissaraṇapaññā paribhuñjissāmā’ti. Evañhi vo, bhikkhave, sikkhitabbaṃ. Kassapena vā hi vo, bhikkhave, ovadissāmi yo vā panassa ⁶ kassapasadiso, ovaditehi ca pana vo tathattāya paṭipajjitabba’’nti. Paṭhamaṃ.

Next: ༢. ཨནོཏྟཔྤཱིསུཏྟཾ • 2. Anottappīsuttaṃ

Footnotes:

1. སནྟུཊྛོཡཾ (སཱི॰)

2. ཨགཐིཏོ (སཱི॰)

3. santuṭṭhoyaṃ (sī.)

4. agathito (sī.)

5. ཡོ ཝཱ པན (སཱི॰), ཡོ ཝཱ (པཱི॰)

6. yo vā pana (sī.), yo vā (pī.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. སནྟུཊྛསུཏྟཝཎྞནཱ • 1. Santuṭṭhasuttavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. སནྟུཊྛསུཏྟཝཎྞནཱ • 1. Santuṭṭhasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact