| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. கஸ்ஸபஸங்யுத்தங்
5. Kassapasaṃyuttaṃ
1. ஸந்துட்ட²ஸுத்தவண்ணனா
1. Santuṭṭhasuttavaṇṇanā
144. கஸ்ஸபஸங்யுத்தஸ்ஸ பட²மே ஸந்துட்டா²யந்தி ஸந்துட்டோ² அயங். இதரீதரேனாதி ந தூ²லஸுகு²மலூக²பணீததி²ரஜிண்ணானங் யேன கேனசி, அத² கோ² யதா²லத்³தா⁴தீ³னங் இதரீதரேன யேன கேனசி ஸந்துட்டோ²தி அத்தோ². சீவரஸ்மிஞ்ஹி தயோ ஸந்தோஸா யதா²லாப⁴ஸந்தோஸோ யதா²ப³லஸந்தோஸோ யதா²ஸாருப்பஸந்தோஸோதி. பிண்ட³பாதாதீ³ஸுபி ஏஸேவ நயோ.
144. Kassapasaṃyuttassa paṭhame santuṭṭhāyanti santuṭṭho ayaṃ. Itarītarenāti na thūlasukhumalūkhapaṇītathirajiṇṇānaṃ yena kenaci, atha kho yathāladdhādīnaṃ itarītarena yena kenaci santuṭṭhoti attho. Cīvarasmiñhi tayo santosā yathālābhasantoso yathābalasantoso yathāsāruppasantosoti. Piṇḍapātādīsupi eseva nayo.
தேஸங் அயங் பபே⁴த³ஸங்வண்ணனா – இத⁴ பி⁴க்கு² சீவரங் லப⁴தி ஸுந்த³ரங் வா அஸுந்த³ரங் வா, ஸோ தேனேவ யாபேதி, அஞ்ஞங் ந பத்தே²தி, லப⁴ந்தோபி ந க³ண்ஹாதி. அயமஸ்ஸ சீவரே யதா²லாப⁴ஸந்தோஸோ. அத² பன பகதிது³ப்³ப³லோ வா ஹோதி ஆபா³த⁴ஜராபி⁴பூ⁴தோ வா, க³ருசீவரங் பாருபந்தோ கிலமதி, ஸோ ஸபா⁴கே³ன பி⁴க்கு²னா ஸத்³தி⁴ங் தங் பரிவத்தெத்வா லஹுகேன யாபெந்தோபி ஸந்துட்டோ²வ ஹோதி. அயமஸ்ஸ சீவரே யதா²ப³லஸந்தோஸோ. அபரோ பணீதபச்சயலாபீ⁴ ஹோதி, ஸோ பட்டசீவராதீ³னங் அஞ்ஞதரங் மஹக்³க⁴சீவரங் ப³ஹூனி வா சீவரானி லபி⁴த்வா – ‘‘இத³ங் தே²ரானங் சிரபப்³ப³ஜிதானங், இத³ங் ப³ஹுஸ்ஸுதானங் அனுரூபங், இத³ங் கி³லானானங், இத³ங் அப்பலாபீ⁴னங் ஹோதூ’’தி த³த்வா தேஸங் புராணசீவரங் வா ஸங்காரகூடாதி³தோ வா பன நந்தகானி உச்சினித்வா தேஹி ஸங்கா⁴டிங் கத்வா தா⁴ரெந்தோபி ஸந்துட்டோ²வ ஹோதி. அயமஸ்ஸ சீவரே யதா²ஸாருப்பஸந்தோஸோ.
Tesaṃ ayaṃ pabhedasaṃvaṇṇanā – idha bhikkhu cīvaraṃ labhati sundaraṃ vā asundaraṃ vā, so teneva yāpeti, aññaṃ na pattheti, labhantopi na gaṇhāti. Ayamassa cīvare yathālābhasantoso. Atha pana pakatidubbalo vā hoti ābādhajarābhibhūto vā, garucīvaraṃ pārupanto kilamati, so sabhāgena bhikkhunā saddhiṃ taṃ parivattetvā lahukena yāpentopi santuṭṭhova hoti. Ayamassa cīvare yathābalasantoso. Aparo paṇītapaccayalābhī hoti, so paṭṭacīvarādīnaṃ aññataraṃ mahagghacīvaraṃ bahūni vā cīvarāni labhitvā – ‘‘idaṃ therānaṃ cirapabbajitānaṃ, idaṃ bahussutānaṃ anurūpaṃ, idaṃ gilānānaṃ, idaṃ appalābhīnaṃ hotū’’ti datvā tesaṃ purāṇacīvaraṃ vā saṅkārakūṭādito vā pana nantakāni uccinitvā tehi saṅghāṭiṃ katvā dhārentopi santuṭṭhova hoti. Ayamassa cīvare yathāsāruppasantoso.
இத⁴ பன பி⁴க்கு² பிண்ட³பாதங் லப⁴தி லூக²ங் வா பணீதங் வா, ஸோ தேனேவ யாபேதி, அஞ்ஞங் ந பத்தே²தி, லப⁴ந்தோபி ந க³ண்ஹாதி. அயமஸ்ஸ பிண்ட³பாதே யதா²லாப⁴ ஸந்தோஸோ. யோ பன அத்தனோ பகதிவிருத்³த⁴ங் வா ப்³யாதி⁴விருத்³த⁴ங் வா பிண்ட³பாதங் லப⁴தி, யேனஸ்ஸ பரிபு⁴த்தேன அபா²ஸு ஹோதி, ஸோ ஸபா⁴க³ஸ்ஸ பி⁴க்கு²னோ தங் த³த்வா தஸ்ஸ ஹத்த²தோ ஸப்பாயபோ⁴ஜனங் பு⁴த்வா ஸமணத⁴ம்மங் கரொந்தோபி ஸந்துட்டோ²வ ஹோதி. அயமஸ்ஸ பிண்ட³பாதே யதா²ப³லஸந்தோஸோ. அபரோ ப³ஹுங் பணீதங் பிண்ட³பாதங் லப⁴தி, ஸோ தங் சீவரங் விய சிரபப்³ப³ஜித-ப³ஹுஸ்ஸுத-அப்பலாப⁴கி³லானானங் த³த்வா , தேஸங் வா ஸேஸகங் பிண்டா³ய வா சரித்வா மிஸ்ஸகாஹாரங் பு⁴ஞ்ஜந்தோபி ஸந்துட்டோ²வ ஹோதி. அயமஸ்ஸ பிண்ட³பாதே யதா²ஸாருப்பஸந்தோஸோ.
Idha pana bhikkhu piṇḍapātaṃ labhati lūkhaṃ vā paṇītaṃ vā, so teneva yāpeti, aññaṃ na pattheti, labhantopi na gaṇhāti. Ayamassa piṇḍapāte yathālābha santoso. Yo pana attano pakativiruddhaṃ vā byādhiviruddhaṃ vā piṇḍapātaṃ labhati, yenassa paribhuttena aphāsu hoti, so sabhāgassa bhikkhuno taṃ datvā tassa hatthato sappāyabhojanaṃ bhutvā samaṇadhammaṃ karontopi santuṭṭhova hoti. Ayamassa piṇḍapāte yathābalasantoso. Aparo bahuṃ paṇītaṃ piṇḍapātaṃ labhati, so taṃ cīvaraṃ viya cirapabbajita-bahussuta-appalābhagilānānaṃ datvā , tesaṃ vā sesakaṃ piṇḍāya vā caritvā missakāhāraṃ bhuñjantopi santuṭṭhova hoti. Ayamassa piṇḍapāte yathāsāruppasantoso.
இத⁴ பன பி⁴க்கு² ஸேனாஸனங் லப⁴தி மனாபங் வா அமனாபங் வா, ஸோ தேன நேவ ஸோமனஸ்ஸங் ந படிக⁴ங் உப்பாதே³தி, அந்தமஸோ திணஸந்தா²ரகேனாபி யதா²லத்³தே⁴னேவ துஸ்ஸதி. அயமஸ்ஸ ஸேனாஸனே யதா²லாப⁴ஸந்தோஸோ. யோ பன அத்தனோ பகதிவிருத்³த⁴ங் வா ப்³யாதி⁴விருத்³த⁴ங் வா ஸேனாஸனங் லப⁴தி, யத்த²ஸ்ஸ வஸதோ அபா²ஸு ஹோதி, ஸோ தங் ஸபா⁴க³ஸ்ஸ பி⁴க்கு²னோ த³த்வா தஸ்ஸ ஸந்தகே ஸப்பாயஸேனாஸனே வஸந்தோபி ஸந்துட்டோ²வ ஹோதி. அயமஸ்ஸ ஸேனாஸனே யதா²ப³லஸந்தோஸோ. அபரோ மஹாபுஞ்ஞோ லேணமண்ட³பகூடாகா³ராதீ³னி ப³ஹூனி பணீதஸேனாஸனானி லப⁴தி, ஸோ தானி சீவராதீ³னி விய சிரபப்³ப³ஜிதப³ஹுஸ்ஸுதஅப்பலாப⁴கி³லானானங் த³த்வா யத்த² கத்த²சி வஸந்தோபி ஸந்துட்டோ²வ ஹோதி. அயமஸ்ஸ ஸேனாஸனே யதா²ஸாருப்பஸந்தோஸோ. யோபி ‘‘உத்தமஸேனாஸனங் நாம பமாத³ட்டா²னங், தத்த² நிஸின்னஸ்ஸ தி²னமித்³த⁴ங் ஓக்கமதி, நித்³தா³பி⁴பூ⁴தஸ்ஸ படிபு³ஜ்ஜ²தோ பாபவிதக்கா பாதுப⁴வந்தீ’’தி படிஸஞ்சிக்கி²த்வா தாதி³ஸங் ஸேனாஸனங் பத்தம்பி ந ஸம்படிச்ச²தி, ஸோ தங் படிக்கி²பித்வா அப்³போ⁴காஸருக்க²மூலாதீ³ஸு வஸந்தோ ஸந்துட்டோ²வ ஹோதி. அயம்பி ஸேனாஸனே யதா²ஸாருப்பஸந்தோஸோ.
Idha pana bhikkhu senāsanaṃ labhati manāpaṃ vā amanāpaṃ vā, so tena neva somanassaṃ na paṭighaṃ uppādeti, antamaso tiṇasanthārakenāpi yathāladdheneva tussati. Ayamassa senāsane yathālābhasantoso. Yo pana attano pakativiruddhaṃ vā byādhiviruddhaṃ vā senāsanaṃ labhati, yatthassa vasato aphāsu hoti, so taṃ sabhāgassa bhikkhuno datvā tassa santake sappāyasenāsane vasantopi santuṭṭhova hoti. Ayamassa senāsane yathābalasantoso. Aparo mahāpuñño leṇamaṇḍapakūṭāgārādīni bahūni paṇītasenāsanāni labhati, so tāni cīvarādīni viya cirapabbajitabahussutaappalābhagilānānaṃ datvā yattha katthaci vasantopi santuṭṭhova hoti. Ayamassa senāsane yathāsāruppasantoso. Yopi ‘‘uttamasenāsanaṃ nāma pamādaṭṭhānaṃ, tattha nisinnassa thinamiddhaṃ okkamati, niddābhibhūtassa paṭibujjhato pāpavitakkā pātubhavantī’’ti paṭisañcikkhitvā tādisaṃ senāsanaṃ pattampi na sampaṭicchati, so taṃ paṭikkhipitvā abbhokāsarukkhamūlādīsu vasanto santuṭṭhova hoti. Ayampi senāsane yathāsāruppasantoso.
இத⁴ பன பி⁴க்கு² பே⁴ஸஜ்ஜங் லப⁴தி லூக²ங் வா பணீதங் வா, ஸோ யங் லப⁴தி தேனேவ துஸ்ஸதி, அஞ்ஞங் ந பத்தே²தி, லப⁴ந்தோபி ந க³ண்ஹாதி. அயமஸ்ஸ கி³லானபச்சயே யதா²லாப⁴ஸந்தோஸோ. யோ பன தேலேனத்தி²கோ பா²ணிதங் லப⁴தி, ஸோ தங் ஸபா⁴க³ஸ்ஸ பி⁴க்கு²னோ த³த்வா தஸ்ஸ ஹத்த²தோ தேலங் க³ஹெத்வா வா அஞ்ஞதே³வ வா பரியேஸித்வா பே⁴ஸஜ்ஜங் கரொந்தோபி ஸந்துட்டோ²வ ஹோதி. அயமஸ்ஸ கி³லானபச்சயே யதா²ப³லஸந்தோஸோ. அபரோ மஹாபுஞ்ஞோ ப³ஹுங் தேலமது⁴பா²ணிதாதி³பணீதபே⁴ஸஜ்ஜங் லப⁴தி, ஸோ தங் சீவரங் விய சிரபப்³ப³ஜித-ப³ஹுஸ்ஸுத-அப்பலாப⁴கி³லானானங் த³த்வா தேஸங் ஆப⁴தேன யேன கேனசி யாபெந்தோபி ஸந்துட்டோ²வ ஹோதி. யோ பன ஏகஸ்மிங் பா⁴ஜனே முத்தஹரீதகங் ட²பெத்வா ஏகஸ்மிங் சதுமது⁴ரங் ‘‘க³ண்ஹ, ப⁴ந்தே, யதி³ச்ச²ஸீ’’தி வுச்சமானோ ஸசஸ்ஸ தேஸு அஞ்ஞதரேனபி ரோகோ³ வூபஸம்மதி, அத² ‘‘முத்தஹரீதகங் நாம பு³த்³தா⁴தீ³ஹி வண்ணித’’ந்தி சதுமது⁴ரங் படிக்கி²பித்வா முத்தஹரீதகேன பே⁴ஸஜ்ஜங் கரொந்தோ பரமஸந்துட்டோ²வ ஹோதி. அயமஸ்ஸ கி³லானபச்சயே யதா²ஸாருப்பஸந்தோஸோ. இதி இமே தயோ ஸந்தோஸே ஸந்தா⁴ய ‘‘ஸந்துட்டா²யங், பி⁴க்க²வே, கஸ்ஸபோ இதரீதரேன சீவரேனா’’தி வுத்தங்.
Idha pana bhikkhu bhesajjaṃ labhati lūkhaṃ vā paṇītaṃ vā, so yaṃ labhati teneva tussati, aññaṃ na pattheti, labhantopi na gaṇhāti. Ayamassa gilānapaccaye yathālābhasantoso. Yo pana telenatthiko phāṇitaṃ labhati, so taṃ sabhāgassa bhikkhuno datvā tassa hatthato telaṃ gahetvā vā aññadeva vā pariyesitvā bhesajjaṃ karontopi santuṭṭhova hoti. Ayamassa gilānapaccaye yathābalasantoso. Aparo mahāpuñño bahuṃ telamadhuphāṇitādipaṇītabhesajjaṃ labhati, so taṃ cīvaraṃ viya cirapabbajita-bahussuta-appalābhagilānānaṃ datvā tesaṃ ābhatena yena kenaci yāpentopi santuṭṭhova hoti. Yo pana ekasmiṃ bhājane muttaharītakaṃ ṭhapetvā ekasmiṃ catumadhuraṃ ‘‘gaṇha, bhante, yadicchasī’’ti vuccamāno sacassa tesu aññatarenapi rogo vūpasammati, atha ‘‘muttaharītakaṃ nāma buddhādīhi vaṇṇita’’nti catumadhuraṃ paṭikkhipitvā muttaharītakena bhesajjaṃ karonto paramasantuṭṭhova hoti. Ayamassa gilānapaccaye yathāsāruppasantoso. Iti ime tayo santose sandhāya ‘‘santuṭṭhāyaṃ, bhikkhave, kassapo itarītarena cīvarenā’’ti vuttaṃ.
வண்ணவாதீ³தி ஏகோ ஸந்துட்டோ² ஹோதி, ஸந்தோஸஸ்ஸ வண்ணங் ந கதே²தி. ஏகோ ந ஸந்துட்டோ² ஹோதி, ஸந்தோஸஸ்ஸ வண்ணங் கதே²தி. ஏகோ நேவ ஸந்துட்டோ² ஹோதி, ந ஸந்தோஸஸ்ஸ வண்ணங் கதே²தி. ஏகோ ஸந்துட்டோ² ச ஹோதி, ஸந்தோஸஸ்ஸ ச வண்ணங் கதே²தி. அயங் தாதி³ஸோதி த³ஸ்ஸேதுங் இதரீதரசீவரஸந்துட்டி²யா ச வண்ணவாதீ³தி வுத்தங். அனேஸனந்தி தூ³தெய்யபஹிணக³மனானுயோக³ப்பபே⁴த³ங் நானப்பகாரங் அனேஸனங். அலத்³தா⁴தி அலபி⁴த்வா. யதா² ச ஏகச்சோ ‘‘கத²ங் நு கோ² சீவரங் லபி⁴ஸ்ஸாமீ’’தி புஞ்ஞவந்தேஹி பி⁴க்கூ²ஹி ஸத்³தி⁴ங் ஏகதோ ஹுத்வா கோஹஞ்ஞங் கரொந்தோ உத்தஸதி பரிதஸ்ஸதி, அயங் ஏவங் அலத்³தா⁴ ச சீவரங் ந பரிதஸ்ஸதி. லத்³தா⁴ சாதி த⁴ம்மேன ஸமேன லபி⁴த்வா. அக³தி⁴தோதி விக³தலோப⁴கே³தோ⁴. அமுச்சி²தோதி அதி⁴மத்ததண்ஹாய முச்ச²ங் அனாபன்னோ. அனஜ்ஜா²பன்னோதி தண்ஹாய அனொத்த²டோ அபரியோனத்³தோ⁴. ஆதீ³னவத³ஸ்ஸாவீதி அனேஸனாபத்தியஞ்ச க³தி⁴தபரிபோ⁴கே³ ச ஆதீ³னவங் பஸ்ஸமானோ. நிஸ்ஸரணபஞ்ஞோதி, ‘‘யாவதே³வ ஸீதஸ்ஸ படிகா⁴தாயா’’தி வுத்தனிஸ்ஸரணமேவ ஜானந்தோ பரிபு⁴ஞ்ஜதீதி அத்தோ². இதரீதரேன பிண்ட³பாதேனாதிஆதீ³ஸுபி யதா²லத்³தா⁴தீ³னங் யேன கேனசி பிண்ட³பாதேன, யேன கேனசி ஸேனாஸனேன, யேன கேனசி கி³லானபச்சயபே⁴ஸஜ்ஜபரிக்கா²ரேனாதி ஏவமத்தோ² த³ட்ட²ப்³போ³.
Vaṇṇavādīti eko santuṭṭho hoti, santosassa vaṇṇaṃ na katheti. Eko na santuṭṭho hoti, santosassa vaṇṇaṃ katheti. Eko neva santuṭṭho hoti, na santosassa vaṇṇaṃ katheti. Eko santuṭṭho ca hoti, santosassa ca vaṇṇaṃ katheti. Ayaṃ tādisoti dassetuṃ itarītaracīvarasantuṭṭhiyā ca vaṇṇavādīti vuttaṃ. Anesananti dūteyyapahiṇagamanānuyogappabhedaṃ nānappakāraṃ anesanaṃ. Aladdhāti alabhitvā. Yathā ca ekacco ‘‘kathaṃ nu kho cīvaraṃ labhissāmī’’ti puññavantehi bhikkhūhi saddhiṃ ekato hutvā kohaññaṃ karonto uttasati paritassati, ayaṃ evaṃ aladdhā ca cīvaraṃ na paritassati. Laddhā cāti dhammena samena labhitvā. Agadhitoti vigatalobhagedho. Amucchitoti adhimattataṇhāya mucchaṃ anāpanno. Anajjhāpannoti taṇhāya anotthaṭo apariyonaddho. Ādīnavadassāvīti anesanāpattiyañca gadhitaparibhoge ca ādīnavaṃ passamāno. Nissaraṇapaññoti, ‘‘yāvadeva sītassa paṭighātāyā’’ti vuttanissaraṇameva jānanto paribhuñjatīti attho. Itarītarena piṇḍapātenātiādīsupi yathāladdhādīnaṃ yena kenaci piṇḍapātena, yena kenaci senāsanena, yena kenaci gilānapaccayabhesajjaparikkhārenāti evamattho daṭṭhabbo.
கஸ்ஸபேன வா ஹி வோ, பி⁴க்க²வே, ஓவதி³ஸ்ஸாமீதி எத்த² யதா² மஹாகஸ்ஸபத்தே²ரோ சதூஸு பச்சயேஸு தீஹி ஸந்தோஸேஹி ஸந்துட்டோ², தும்ஹேபி ததா²ரூபா ப⁴வதா²தி ஓவத³ந்தோ கஸ்ஸபேன ஓவத³தி நாம. யோ வா பனஸ்ஸ கஸ்ஸபஸதி³ஸோதி எத்தா²பி யோ வா பனஞ்ஞோபி கஸ்ஸபஸதி³ஸோ மஹாகஸ்ஸபத்தே²ரோ விய சதூஸு பச்சயேஸு தீஹி ஸந்தோஸேஹி ஸந்துட்டோ² ப⁴வெய்ய, தும்ஹேபி ததா²ரூபா ப⁴வதா²தி ஓவத³ந்தோ கஸ்ஸபஸதி³ஸேன ஓவத³தி நாம. தத²த்தாய படிபஜ்ஜிதப்³ப³ந்தி ‘‘ஸம்மாஸம்பு³த்³த⁴ஸ்ஸ இமாய இமஸ்மிங் ஸந்துட்டி²ஸுத்தே வுத்தஸல்லேகா²சாரபடிபத்தியா கத²னங் நாம பா⁴ரோ, அம்ஹாகம்பி இமங் படிபத்திங் பரிபூரங் கத்வா பூரணங் பா⁴ரோயேவ, ஆக³தோ கோ² பன பா⁴ரோ க³ஹேதப்³போ³’’தி சிந்தெத்வா யதா² மயா கதி²தங், தத²த்தாய ததா²பா⁴வாய தும்ஹேஹிபி படிபஜ்ஜிதப்³ப³ந்தி. பட²மங்.
Kassapena vā hi vo, bhikkhave, ovadissāmīti ettha yathā mahākassapatthero catūsu paccayesu tīhi santosehi santuṭṭho, tumhepi tathārūpā bhavathāti ovadanto kassapena ovadati nāma. Yo vā panassa kassapasadisoti etthāpi yo vā panaññopi kassapasadiso mahākassapatthero viya catūsu paccayesu tīhi santosehi santuṭṭho bhaveyya, tumhepi tathārūpā bhavathāti ovadanto kassapasadisena ovadati nāma. Tathattāya paṭipajjitabbanti ‘‘sammāsambuddhassa imāya imasmiṃ santuṭṭhisutte vuttasallekhācārapaṭipattiyā kathanaṃ nāma bhāro, amhākampi imaṃ paṭipattiṃ paripūraṃ katvā pūraṇaṃ bhāroyeva, āgato kho pana bhāro gahetabbo’’ti cintetvā yathā mayā kathitaṃ, tathattāya tathābhāvāya tumhehipi paṭipajjitabbanti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸந்துட்ட²ஸுத்தங் • 1. Santuṭṭhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸந்துட்ட²ஸுத்தவண்ணனா • 1. Santuṭṭhasuttavaṇṇanā
