| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
७. सन्तुट्ठिसुत्तं
7. Santuṭṭhisuttaṃ
२७. ‘‘चत्तारिमानि , भिक्खवे, अप्पानि च 1 सुलभानि च, तानि च अनवज्जानि। कतमानि चत्तारि? पंसुकूलं, भिक्खवे, चीवरानं अप्पञ्च सुलभञ्च , तञ्च अनवज्जं। पिण्डियालोपो, भिक्खवे, भोजनानं अप्पञ्च सुलभञ्च, तञ्च अनवज्जं। रुक्खमूलं, भिक्खवे, सेनासनानं अप्पञ्च सुलभञ्च, तञ्च अनवज्जं। पूतिमुत्तं, भिक्खवे, भेसज्जानं अप्पञ्च सुलभञ्च, तञ्च अनवज्जं। इमानि खो, भिक्खवे, चत्तारि अप्पानि च सुलभानि च, तानि च अनवज्जानि। यतो खो, भिक्खवे, भिक्खु अप्पेन च तुट्ठो होति सुलभेन च, इदमस्साहं अञ्ञतरं सामञ्ञङ्गन्ति 2 वदामी’’ति।
27. ‘‘Cattārimāni , bhikkhave, appāni ca 3 sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca , tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave, senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ca sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca, idamassāhaṃ aññataraṃ sāmaññaṅganti 4 vadāmī’’ti.
‘‘अनवज्जेन तुट्ठस्स, अप्पेन सुलभेन च।
‘‘Anavajjena tuṭṭhassa, appena sulabhena ca;
न सेनासनमारब्भ, चीवरं पानभोजनं।
Na senāsanamārabbha, cīvaraṃ pānabhojanaṃ;
विघातो होति चित्तस्स, दिसा नप्पटिहञ्ञति॥
Vighāto hoti cittassa, disā nappaṭihaññati.
‘‘ये चस्स धम्मा अक्खाता, सामञ्ञस्सानुलोमिका।
‘‘Ye cassa dhammā akkhātā, sāmaññassānulomikā;
अधिग्गहिता तुट्ठस्स, अप्पमत्तस्स सिक्खतो’’ति॥ सत्तमं।
Adhiggahitā tuṭṭhassa, appamattassa sikkhato’’ti. sattamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ७. सन्तुट्ठिसुत्तवण्णना • 7. Santuṭṭhisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७. सन्तुट्ठिसुत्तवण्णना • 7. Santuṭṭhisuttavaṇṇanā
