| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
៧. សន្តុដ្ឋិសុត្តំ
7. Santuṭṭhisuttaṃ
២៧. ‘‘ចត្តារិមានិ , ភិក្ខវេ, អប្បានិ ច 1 សុលភានិ ច, តានិ ច អនវជ្ជានិ។ កតមានិ ចត្តារិ? បំសុកូលំ, ភិក្ខវេ, ចីវរានំ អប្បញ្ច សុលភញ្ច , តញ្ច អនវជ្ជំ។ បិណ្ឌិយាលោបោ, ភិក្ខវេ, ភោជនានំ អប្បញ្ច សុលភញ្ច, តញ្ច អនវជ្ជំ។ រុក្ខមូលំ, ភិក្ខវេ, សេនាសនានំ អប្បញ្ច សុលភញ្ច, តញ្ច អនវជ្ជំ។ បូតិមុត្តំ, ភិក្ខវេ, ភេសជ្ជានំ អប្បញ្ច សុលភញ្ច, តញ្ច អនវជ្ជំ។ ឥមានិ ខោ, ភិក្ខវេ, ចត្តារិ អប្បានិ ច សុលភានិ ច, តានិ ច អនវជ្ជានិ។ យតោ ខោ, ភិក្ខវេ, ភិក្ខុ អប្បេន ច តុដ្ឋោ ហោតិ សុលភេន ច, ឥទមស្សាហំ អញ្ញតរំ សាមញ្ញង្គន្តិ 2 វទាមី’’តិ។
27. ‘‘Cattārimāni , bhikkhave, appāni ca 3 sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca , tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave, senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ca sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca, idamassāhaṃ aññataraṃ sāmaññaṅganti 4 vadāmī’’ti.
‘‘អនវជ្ជេន តុដ្ឋស្ស, អប្បេន សុលភេន ច;
‘‘Anavajjena tuṭṭhassa, appena sulabhena ca;
ន សេនាសនមារព្ភ, ចីវរំ បានភោជនំ;
Na senāsanamārabbha, cīvaraṃ pānabhojanaṃ;
វិឃាតោ ហោតិ ចិត្តស្ស, ទិសា នប្បដិហញ្ញតិ។
Vighāto hoti cittassa, disā nappaṭihaññati.
‘‘យេ ចស្ស ធម្មា អក្ខាតា, សាមញ្ញស្សានុលោមិកា;
‘‘Ye cassa dhammā akkhātā, sāmaññassānulomikā;
អធិគ្គហិតា តុដ្ឋស្ស, អប្បមត្តស្ស សិក្ខតោ’’តិ។ សត្តមំ;
Adhiggahitā tuṭṭhassa, appamattassa sikkhato’’ti. sattamaṃ;
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ៧. សន្តុដ្ឋិសុត្តវណ្ណនា • 7. Santuṭṭhisuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៧. សន្តុដ្ឋិសុត្តវណ្ណនា • 7. Santuṭṭhisuttavaṇṇanā
