| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. ஸந்துட்டி²ஸுத்தவண்ணனா
7. Santuṭṭhisuttavaṇṇanā
27. ஸத்தமே நித்³தோ³ஸானீதி அவஜ்ஜரஹிதானி ஆக³மனஸுத்³தி⁴தோ காயமண்ட³னாதி³கிலேஸவத்து²பா⁴வாபா⁴வதோ ச. தத்த² ஸுலப⁴தாய பரியேஸனது³க்க²ஸ்ஸ அபா⁴வோ த³ஸ்ஸிதோ, அப்பதாய பரிஹரணது³க்க²ஸ்ஸபி அபா⁴வோ த³ஸ்ஸிதோ, அனவஜ்ஜதாய அக³ரஹிதப்³ப³தாய பி⁴க்கு²ஸாருப்பபா⁴வோ த³ஸ்ஸிதோ ஹோதி. அப்பதாய வா பரித்தாஸஸ்ஸ அவத்து²தா, ஸுலப⁴தாய கே³தா⁴தீ³னங் அவத்து²தா, அனவஜ்ஜதாய ஆதீ³னவத³ஸ்ஸனநிஸ்ஸரணபஞ்ஞானங் அத்தி²தா த³ஸ்ஸிதா ஹோதி. அப்பதாய வா லாபே⁴ன ந ஸோமனஸ்ஸங் ஜனயந்தி, அலாபே⁴ன ந தோ³மனஸ்ஸங் ஜனயந்தி, அனவஜ்ஜதாய விப்படிஸாரனிமித்தங் அஞ்ஞாணுபெக்க²ங் ந ஜனயந்தி அவிப்படிஸாரவத்து²பா⁴வதோ.
27. Sattame niddosānīti avajjarahitāni āgamanasuddhito kāyamaṇḍanādikilesavatthubhāvābhāvato ca. Tattha sulabhatāya pariyesanadukkhassa abhāvo dassito, appatāya pariharaṇadukkhassapi abhāvo dassito, anavajjatāya agarahitabbatāya bhikkhusāruppabhāvo dassito hoti. Appatāya vā parittāsassa avatthutā, sulabhatāya gedhādīnaṃ avatthutā, anavajjatāya ādīnavadassananissaraṇapaññānaṃ atthitā dassitā hoti. Appatāya vā lābhena na somanassaṃ janayanti, alābhena na domanassaṃ janayanti, anavajjatāya vippaṭisāranimittaṃ aññāṇupekkhaṃ na janayanti avippaṭisāravatthubhāvato.
பங்ஸுகூலந்தி ஸங்காரகூடாதீ³ஸு யத்த² கத்த²சி பங்ஸூனங் உபரி டி²தத்தா அப்³பு⁴க்³க³தட்டே²ன பங்ஸுகூலங் வியாதி பங்ஸுகூலங், பங்ஸு விய குச்சி²தபா⁴வங் உலதி க³ச்ச²தீதி பங்ஸுகூலந்தி ஏவங் லத்³த⁴னாமங் ரதி²காதீ³ஸு பதிதனந்தகானி உச்சினித்வா கதசீவரங். ருக்க²மூலந்தி விவேகானுரூபங் யங் கிஞ்சி ருக்க²ஸமீபங். யங் கிஞ்சி முத்தந்தி யங் கிஞ்சி கோ³முத்தங். கேசி பனெத்த² ‘‘கோ³முத்தபரிபா⁴விதஹரீதகக²ண்ட³ங் பூதிமுத்த’’ந்தி வத³ந்தி. ‘‘பூதிபா⁴வேன ஆபணாதி³தோ விஸ்ஸட்ட²ங் ச²ட்³டி³தங் அபரிக்³க³ஹிதங் யங் கிஞ்சி பே⁴ஸஜ்ஜங் பூதிமுத்தந்தி அதி⁴ப்பேத’’ந்தி அபரே.
Paṃsukūlanti saṅkārakūṭādīsu yattha katthaci paṃsūnaṃ upari ṭhitattā abbhuggataṭṭhena paṃsukūlaṃ viyāti paṃsukūlaṃ, paṃsu viya kucchitabhāvaṃ ulati gacchatīti paṃsukūlanti evaṃ laddhanāmaṃ rathikādīsu patitanantakāni uccinitvā katacīvaraṃ. Rukkhamūlanti vivekānurūpaṃ yaṃ kiñci rukkhasamīpaṃ. Yaṃ kiñci muttanti yaṃ kiñci gomuttaṃ. Keci panettha ‘‘gomuttaparibhāvitaharītakakhaṇḍaṃ pūtimutta’’nti vadanti. ‘‘Pūtibhāvena āpaṇādito vissaṭṭhaṃ chaḍḍitaṃ apariggahitaṃ yaṃ kiñci bhesajjaṃ pūtimuttanti adhippeta’’nti apare.
யதோ கோ²தி பச்சத்தே நிஸ்ஸக்கவசனங், யங் கோ²தி வுத்தங் ஹோதி. தேன துட்டோ² ஹோதீதி வுத்தகிரியங் பராமஸதி. துட்டோ²தி ஸந்துட்டோ². இத³மஸ்ஸாஹந்தி ய்வாயங் சதுப்³பி³தே⁴ன யதா²வுத்தேன பச்சயேன அப்பேன ஸுலபே⁴ன ஸந்தோஸோ, இத³ங் இமஸ்ஸ பி⁴க்கு²னோ ஸீலஸங்வராதீ³ஸு அஞ்ஞதரங் ஏகங் ஸாமஞ்ஞங்க³ங் ஸமணபா⁴வகாரணந்தி அஹங் வதா³மி. ஸந்துட்ட²ஸ்ஸ ஹி சதுபாரிஸுத்³தி⁴ஸீலங் பரிபுண்ணங் ஹோதி, ஸமத²விபஸ்ஸனா ச பா⁴வனாபாரிபூரிங் க³ச்ச²ந்தி. அத² வா ஸாமஞ்ஞங் நாம அரியமக்³கோ³, தஸ்ஸ ஸங்கே²பதோ த்³வே அங்கா³ பா³ஹிரங் அஜ்ஜ²த்திகந்தி. தத்த² பா³ஹிரங் ஸப்புரிஸூபனிஸ்ஸயோ ஸத்³த⁴ம்மஸ்ஸவனஞ்ச. அஜ்ஜ²த்திகங் பன யோனிஸோமனஸிகாரோ த⁴ம்மானுத⁴ம்மப்படிபத்தி ச. தேஸு யஸ்மா யதா²ரஹங் த⁴ம்மானுத⁴ம்மப்படிபத்திபூ⁴தா தஸ்ஸ மூலபூ⁴தா சேதே த⁴ம்மா, யதி³த³ங் அப்பிச்ச²தா ஸந்துட்டி²தா பவிவித்ததா அஸங்ஸட்ட²தா ஆரத்³த⁴வீரியதாதி ஏவமாத³யோ, தஸ்மா வுத்தங் ‘‘இத³மஸ்ஸாஹங் அஞ்ஞதரங் ஸாமஞ்ஞங்க³ந்தி வதா³மீ’’தி.
Yato khoti paccatte nissakkavacanaṃ, yaṃ khoti vuttaṃ hoti. Tena tuṭṭho hotīti vuttakiriyaṃ parāmasati. Tuṭṭhoti santuṭṭho. Idamassāhanti yvāyaṃ catubbidhena yathāvuttena paccayena appena sulabhena santoso, idaṃ imassa bhikkhuno sīlasaṃvarādīsu aññataraṃ ekaṃ sāmaññaṅgaṃ samaṇabhāvakāraṇanti ahaṃ vadāmi. Santuṭṭhassa hi catupārisuddhisīlaṃ paripuṇṇaṃ hoti, samathavipassanā ca bhāvanāpāripūriṃ gacchanti. Atha vā sāmaññaṃ nāma ariyamaggo, tassa saṅkhepato dve aṅgā bāhiraṃ ajjhattikanti. Tattha bāhiraṃ sappurisūpanissayo saddhammassavanañca. Ajjhattikaṃ pana yonisomanasikāro dhammānudhammappaṭipatti ca. Tesu yasmā yathārahaṃ dhammānudhammappaṭipattibhūtā tassa mūlabhūtā cete dhammā, yadidaṃ appicchatā santuṭṭhitā pavivittatā asaṃsaṭṭhatā āraddhavīriyatāti evamādayo, tasmā vuttaṃ ‘‘idamassāhaṃ aññataraṃ sāmaññaṅganti vadāmī’’ti.
ஸேனாஸனமாரப்³பா⁴தி விஹாராதி³ங் மஞ்சபீடா²தி³ஞ்ச ஸேனாஸனங் நிஸ்ஸாய. சீவரங் பானபோ⁴ஜனந்தி நிவாஸனாதி³சீவரங் அம்ப³பானகாதி³பானங் கா²த³னீயபோ⁴ஜனீயாதி³பு⁴ஞ்ஜிதப்³ப³வத்து²ஞ்ச ஆரப்³பா⁴தி ஸம்ப³ந்தோ⁴. விகா⁴தோதி விகா⁴தபா⁴வோ, சித்தஸ்ஸ து³க்க²ங் ந ஹோதீதி யோஜனா. அயஞ்ஹெத்த² ஸங்கே²பத்தோ² – ‘‘அமுகஸ்மிங் நாம ஆவாஸே பச்சயா ஸுலபா⁴’’தி லபி⁴தப்³ப³ட்டா²னக³மனேன வா ‘‘மய்ஹங் பாபுணாதி, ந துய்ஹ’’ந்தி விவாதா³பஜ்ஜனேன வா நவகம்மகரணாதி³வஸேன வா ஸேனாஸனாதீ³னி பரியேஸந்தானங் அஸந்துட்டா²னங் இச்சி²தாலாபா⁴தி³னா யோ விகா⁴தோ சித்தஸ்ஸ ஹோதி, ஸோ தத்த² ஸந்துட்ட²ஸ்ஸ ந ஹோதி. தி³ஸா நப்படிஹஞ்ஞதீதி ஸந்துட்டி²யா சாதுத்³தி³ஸபா⁴வேன தி³ஸா ந படிஹனதி. வுத்தஞ்ஹேதங் ‘‘சாதுத்³தி³ஸோ அப்படிகோ⁴ ச ஹோதி, ஸந்துஸ்ஸமானோ இதரீதரேனா’’தி (ஸு॰ நி॰ 42).
Senāsanamārabbhāti vihārādiṃ mañcapīṭhādiñca senāsanaṃ nissāya. Cīvaraṃ pānabhojananti nivāsanādicīvaraṃ ambapānakādipānaṃ khādanīyabhojanīyādibhuñjitabbavatthuñca ārabbhāti sambandho. Vighātoti vighātabhāvo, cittassa dukkhaṃ na hotīti yojanā. Ayañhettha saṅkhepattho – ‘‘amukasmiṃ nāma āvāse paccayā sulabhā’’ti labhitabbaṭṭhānagamanena vā ‘‘mayhaṃ pāpuṇāti, na tuyha’’nti vivādāpajjanena vā navakammakaraṇādivasena vā senāsanādīni pariyesantānaṃ asantuṭṭhānaṃ icchitālābhādinā yo vighāto cittassa hoti, so tattha santuṭṭhassa na hoti. Disā nappaṭihaññatīti santuṭṭhiyā cātuddisabhāvena disā na paṭihanati. Vuttañhetaṃ ‘‘cātuddiso appaṭigho ca hoti, santussamāno itarītarenā’’ti (su. ni. 42).
ஸமணத⁴ம்மஸ்ஸ அனுலோமாதி ஸமணத⁴ம்மஸ்ஸ ஸமத²விபஸ்ஸனாபா⁴வனாய, அரியமக்³க³ஸ்ஸேவ வா அனுச்ச²விகா அப்பிச்ச²தாத³யோ. துட்ட²சித்தஸ்ஸ பி⁴க்கு²னோதி துட்ட²சித்தேன பி⁴க்கு²னா. அதி⁴க்³க³ஹிதா ஹொந்தீதி படிபக்க²த⁴ம்மே அபி⁴ப⁴வித்வா க³ஹிதா ஹொந்தி. அந்தோக³தாதி அப்³ப⁴ந்தரக³தா. ந பரிபா³ஹிராதி ந பா³ஹிரா கதா.
Samaṇadhammassaanulomāti samaṇadhammassa samathavipassanābhāvanāya, ariyamaggasseva vā anucchavikā appicchatādayo. Tuṭṭhacittassa bhikkhunoti tuṭṭhacittena bhikkhunā. Adhiggahitā hontīti paṭipakkhadhamme abhibhavitvā gahitā honti. Antogatāti abbhantaragatā. Na paribāhirāti na bāhirā katā.
ஸந்துட்டி²ஸுத்தவண்ணனா நிட்டி²தா.
Santuṭṭhisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. ஸந்துட்டி²ஸுத்தங் • 7. Santuṭṭhisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. ஸந்துட்டி²ஸுத்தவண்ணனா • 7. Santuṭṭhisuttavaṇṇanā
