| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৭. সন্তুট্ঠিসুত্তৰণ্ণনা
7. Santuṭṭhisuttavaṇṇanā
২৭. সত্তমে অপ্পানীতি পরিত্তানি। সুলভানীতি সুখেন লদ্ধব্বানি, যত্থ কত্থচি সক্কা হোন্তি লভিতুং। অনৰজ্জানীতি নিদ্দোসানি। পিণ্ডিযালোপভোজনন্তি জঙ্ঘাপিণ্ডিযবলেন চরিত্ৰা আলোপমত্তং লদ্ধং ভোজনং। পূতিমুত্তন্তি যংকিঞ্চি মুত্তং। যথা হি সুৰণ্ণৰণ্ণোপি কাযো পূতিকাযোতি ৰুচ্চতি, এৰং অভিনৰম্পি মুত্তং পূতিমুত্তমেৰ।
27. Sattame appānīti parittāni. Sulabhānīti sukhena laddhabbāni, yattha katthaci sakkā honti labhituṃ. Anavajjānīti niddosāni. Piṇḍiyālopabhojananti jaṅghāpiṇḍiyabalena caritvā ālopamattaṃ laddhaṃ bhojanaṃ. Pūtimuttanti yaṃkiñci muttaṃ. Yathā hi suvaṇṇavaṇṇopi kāyo pūtikāyoti vuccati, evaṃ abhinavampi muttaṃ pūtimuttameva.
ৰিঘাতোতি ৰিগতঘাতো, চিত্তস্স দুক্খং ন হোতীতি অত্থো। দিসা নপ্পটিহঞ্ঞতীতি যস্স হি ‘‘অসুকট্ঠানং নাম গতো চীৰরাদীনি লভিস্সামী’’তি চিত্তং উপ্পজ্জতি, তস্স দিসা পটিহঞ্ঞতি নাম। যস্স এৰং ন উপ্পজ্জতি, তস্স নপ্পটিহঞ্ঞতি নাম। ধম্মাতি পটিপত্তিধম্মা। সামঞ্ঞস্সানুলোমিকাতি সমণধম্মস্স অনুলোমা। অধিগ্গহিতাতি সব্বেতে তুট্ঠচিত্তস্স ভিক্খুনো অধিগ্গহিতা হোন্তি অন্তোগতা ন পরিবাহিরাতি।
Vighātoti vigataghāto, cittassa dukkhaṃ na hotīti attho. Disānappaṭihaññatīti yassa hi ‘‘asukaṭṭhānaṃ nāma gato cīvarādīni labhissāmī’’ti cittaṃ uppajjati, tassa disā paṭihaññati nāma. Yassa evaṃ na uppajjati, tassa nappaṭihaññati nāma. Dhammāti paṭipattidhammā. Sāmaññassānulomikāti samaṇadhammassa anulomā. Adhiggahitāti sabbete tuṭṭhacittassa bhikkhuno adhiggahitā honti antogatā na paribāhirāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৭. সন্তুট্ঠিসুত্তং • 7. Santuṭṭhisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৭. সন্তুট্ঠিসুত্তৰণ্ণনা • 7. Santuṭṭhisuttavaṇṇanā
