| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৫. সানুসুত্তৰণ্ণনা
5. Sānusuttavaṇṇanā
২৩৯. যক্খেন গহিতো হোতীতি যক্খেন অনুপৰিট্ঠো হোতি। তস্স যক্খগহণস্স কারণং মূলতো পভুতি ৰিত্থারতো দস্সেতুং ‘‘সো’’তিআদিমাহ। তস্স অন্তিমভৰিকত্তা আদিতো পট্ঠায অধিসীলসিক্খায সক্কচ্চং পূরণন্তি দস্সেতি ‘‘সো পব্বজিতকালতো’’তিআদিনা। পচ্চাহারন্তি পটিক্খেপং। ইমস্মিং সরভঞ্ঞেতি ইমস্মিং মম ধম্মভণনে। পত্তিন্তি পত্তিদানং। পিযা হোন্তি, তেনাহ ভগৰা ‘‘আকঙ্খেয্য চে, ভিক্খৰে, ভিক্খু ‘সব্রহ্মচারীনং পিযো চ অস্সং মনাপো চ গরু চ ভাৰনীযো চা’তি, সীলেস্ৰেৰস্স পরিপূরকারী’’তি (ম॰ নি॰ ১.৬৫)। তথা চাহ ‘‘তস্মিং সামণেরে’’তিআদি।
239.Yakkhenagahito hotīti yakkhena anupaviṭṭho hoti. Tassa yakkhagahaṇassa kāraṇaṃ mūlato pabhuti vitthārato dassetuṃ ‘‘so’’tiādimāha. Tassa antimabhavikattā ādito paṭṭhāya adhisīlasikkhāya sakkaccaṃ pūraṇanti dasseti ‘‘so pabbajitakālato’’tiādinā. Paccāhāranti paṭikkhepaṃ. Imasmiṃ sarabhaññeti imasmiṃ mama dhammabhaṇane. Pattinti pattidānaṃ. Piyā honti, tenāha bhagavā ‘‘ākaṅkheyya ce, bhikkhave, bhikkhu ‘sabrahmacārīnaṃ piyo ca assaṃ manāpo ca garu ca bhāvanīyo cā’ti, sīlesvevassa paripūrakārī’’ti (ma. ni. 1.65). Tathā cāha ‘‘tasmiṃ sāmaṇere’’tiādi.
ৰুড্ঢিমন্ৰাযাতি যোব্বনপ্পত্তিযা অঙ্গপচ্চঙ্গানং পরিৰুড্ঢিমাগম্ম। কামসম্ভোগসমত্থতাৰসেন পরিপক্কিন্দ্রিযো। অনুযোজেত্ৰাৰাতি ৰিস্সজ্জেত্ৰাৰ, গিহিভাৰে ৰা অনুযোজেত্ৰাৰ। ‘‘পুব্বে তুয্হং পুত্তো সীলৰা কল্যাণধম্মো লজ্জী কুক্কুচ্চকো সিক্খাকামোতি সম্ভাৰিতো, ইদানি ততো অঞ্ঞথা জাতো’’তি ঘোসনাৰসেন দেৰতানং অন্তরে মাহেৰ মে লজ্জং উপ্পাদেয্য।
Vuḍḍhimanvāyāti yobbanappattiyā aṅgapaccaṅgānaṃ parivuḍḍhimāgamma. Kāmasambhogasamatthatāvasena paripakkindriyo. Anuyojetvāvāti vissajjetvāva, gihibhāve vā anuyojetvāva. ‘‘Pubbe tuyhaṃ putto sīlavā kalyāṇadhammo lajjī kukkuccako sikkhākāmoti sambhāvito, idāni tato aññathā jāto’’ti ghosanāvasena devatānaṃ antare māheva me lajjaṃ uppādeyya.
পাটিহারিযপক্খঞ্চাতি চাতুদ্দসীপঞ্চদসীঅট্ঠমীনং যথাক্কমং আদিতো অন্ততো আদিঅন্ততো চ পৰেসননিক্খমনৰসেন উপোসথসীলস্স পটি পটি অভিমুখং পচ্চাৰহিতব্বপক্খঞ্চ। তেরসিযাপীতি পরং সত্তমীনৰমীসুপীতি অত্থো। পৰেসভূতঞ্হি উপোসথসীলস্স সত্তমীসু সমাদিন্নং সীলং পটিপদং, নৰমীসু নিক্খমভূতন্তি আচরিযা। পোরাণট্ঠকথাযং পন পচ্চুগ্গমনানুগমনপরিযাযেন ৰুত্তন্তি আহ ‘‘মনুস্সা’’তিআদি। অড্ঢমাসন্তি সকলকালপক্খং । এৰঞ্হি ৰস্সৰাসস্স অনুগমনং গতং হোতি। সুট্ঠু সমাগতন্তি সুপরিসুদ্ধং সম্পন্নং কত্ৰা অত্তনো সন্তানং আগতং। তং পন অত্তনো চিত্তেন সমং পকারেহি যুত্তং হোতীতি আহ ‘‘সম্পযুত্ত’’ন্তি। অরহন্তানং অনুকরণেন সেট্ঠচরিযং। ‘‘ন তে হি যক্খা কীল়ন্তী’’তি অত্তনো পুত্তস্স কাযে অধিমুচ্চনং অত্তনো কীল়নং ৰিয হোতীতি কত্ৰা আহ।
Pāṭihāriyapakkhañcāti cātuddasīpañcadasīaṭṭhamīnaṃ yathākkamaṃ ādito antato ādiantato ca pavesananikkhamanavasena uposathasīlassa paṭi paṭi abhimukhaṃ paccāvahitabbapakkhañca. Terasiyāpīti paraṃ sattamīnavamīsupīti attho. Pavesabhūtañhi uposathasīlassa sattamīsu samādinnaṃ sīlaṃ paṭipadaṃ, navamīsu nikkhamabhūtanti ācariyā. Porāṇaṭṭhakathāyaṃ pana paccuggamanānugamanapariyāyena vuttanti āha ‘‘manussā’’tiādi. Aḍḍhamāsanti sakalakālapakkhaṃ . Evañhi vassavāsassa anugamanaṃ gataṃ hoti. Suṭṭhu samāgatanti suparisuddhaṃ sampannaṃ katvā attano santānaṃ āgataṃ. Taṃ pana attano cittena samaṃ pakārehi yuttaṃ hotīti āha ‘‘sampayutta’’nti. Arahantānaṃ anukaraṇena seṭṭhacariyaṃ. ‘‘Na te hi yakkhā kīḷantī’’ti attano puttassa kāye adhimuccanaṃ attano kīḷanaṃ viya hotīti katvā āha.
উপাসিকা যথাৰুত্তউপোসথসীলেন সীলৰতী, সামণেরো পন অত্তনো সামণেরসীলেন সীলৰা। উপ্পতিত্ৰাতি আকাসে উপ্পতিত্ৰা। মোক্খো নত্থি দুক্খাৰহস্স কম্মস্স কতূপচিতত্তা।
Upāsikā yathāvuttauposathasīlena sīlavatī, sāmaṇero pana attano sāmaṇerasīlena sīlavā. Uppatitvāti ākāse uppatitvā. Mokkho natthi dukkhāvahassa kammassa katūpacitattā.
দুৰিধেপি কামেতি ৰত্থুকামকিলেসকামে। কিলেসকামং পরিচ্চজন্তো এৰ হি ৰত্থুকামে পরিচ্চজতি নাম। ৰিব্ভমনৰসেন আগচ্ছতি ভিক্খায আহিণ্ডনাদিপব্বজিতকিচ্চতো। উপ্পব্বজিত্ৰা ৰিগতসীলস্স জীৰতো আনাপানমত্তেন জীৰন্তোপি সো মতকোৰ। ৰুত্তঞ্হেতং ‘‘মরণঞ্হেতং, সুনক্খত্ত, অরিযস্স ৰিনযে, যো সিক্খং পচ্চক্খায হীনাযাৰত্ততী’’তি (ম॰ নি॰ ৩.৪৫)।
Duvidhepi kāmeti vatthukāmakilesakāme. Kilesakāmaṃ pariccajanto eva hi vatthukāme pariccajati nāma. Vibbhamanavasena āgacchati bhikkhāya āhiṇḍanādipabbajitakiccato. Uppabbajitvā vigatasīlassa jīvato ānāpānamattena jīvantopi so matakova. Vuttañhetaṃ ‘‘maraṇañhetaṃ, sunakkhatta, ariyassa vinaye, yo sikkhaṃ paccakkhāya hīnāyāvattatī’’ti (ma. ni. 3.45).
উণ্হট্ঠেনাতি সপরিল়াহট্ঠেন। অভিধাৰথাতি অভিধাৰতীতি ইমস্মিং অভিধাৰনকিচ্চে ভদ্দং তে হোতূতি ৰত্ৰা গিহিভাৰায অভিধাৰথ। নীহরিত্ৰাতি নিক্খামেত্ৰা। একাদসহি অগ্গীহি আদিত্তত্তা মহাডাহসদিসে। সল্লক্খেত্ৰাতি গিহিভাৰে আদীনৰং, পব্বজ্জায আনিসংসঞ্চ সল্লক্খেত্ৰা। হিরোত্তপ্পং পটিলভিত্ৰা ‘‘মম উপ্পব্বজিতুকামতং সব্রহ্মচারিনো জানিস্সন্তী’’তি। চতুন্নং পরিসানং চিত্তসঙ্খোভৰসেন সকলজম্বুদীপং খোভেত্ৰা।
Uṇhaṭṭhenāti sapariḷāhaṭṭhena. Abhidhāvathāti abhidhāvatīti imasmiṃ abhidhāvanakicce bhaddaṃ te hotūti vatvā gihibhāvāya abhidhāvatha. Nīharitvāti nikkhāmetvā. Ekādasahi aggīhi ādittattā mahāḍāhasadise. Sallakkhetvāti gihibhāve ādīnavaṃ, pabbajjāya ānisaṃsañca sallakkhetvā. Hirottappaṃ paṭilabhitvā ‘‘mama uppabbajitukāmataṃ sabrahmacārino jānissantī’’ti. Catunnaṃ parisānaṃ cittasaṅkhobhavasena sakalajambudīpaṃ khobhetvā.
সানুসুত্তৰণ্ণনা নিট্ঠিতা।
Sānusuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৫. সানুসুত্তং • 5. Sānusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. সানুসুত্তৰণ্ণনা • 5. Sānusuttavaṇṇanā
