| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๐. สปริวารฉตฺตทายกเตฺถรอปทานํ
10. Saparivārachattadāyakattheraapadānaṃ
๘๒.
82.
‘‘ปทุมุตฺตโร โลกวิทู, อาหุตีนํ ปฎิคฺคโห;
‘‘Padumuttaro lokavidū, āhutīnaṃ paṭiggaho;
๘๓.
83.
‘‘ตมทฺทสาสิํ สมฺพุทฺธํ, เทเสนฺตํ อมตํ ปทํ;
‘‘Tamaddasāsiṃ sambuddhaṃ, desentaṃ amataṃ padaṃ;
สกํ จิตฺตํ ปสาเทตฺวา, อคมาสิํ สกํ ฆรํฯ
Sakaṃ cittaṃ pasādetvā, agamāsiṃ sakaṃ gharaṃ.
๘๔.
84.
‘‘ฉตฺตํ อลงฺกตํ คยฺห, อุปคจฺฉิํ นรุตฺตมํ;
‘‘Chattaṃ alaṅkataṃ gayha, upagacchiṃ naruttamaṃ;
หโฎฺฐ หเฎฺฐน จิเตฺตน, อากาเส อุกฺขิปิํ อหํฯ
Haṭṭho haṭṭhena cittena, ākāse ukkhipiṃ ahaṃ.
๘๕.
85.
‘‘สุสงฺคหิตยานํว , ทโนฺตว สาวกุตฺตโม;
‘‘Susaṅgahitayānaṃva , dantova sāvakuttamo;
อุปคนฺตฺวาน สมฺพุทฺธํ, มตฺถเก สมฺปติฎฺฐหิฯ
Upagantvāna sambuddhaṃ, matthake sampatiṭṭhahi.
๘๖.
86.
‘‘อนุกมฺปโก การุณิโก, พุโทฺธ โลกคฺคนายโก;
‘‘Anukampako kāruṇiko, buddho lokagganāyako;
ภิกฺขุสเงฺฆ นิสีทิตฺวา, อิมา คาถา อภาสถฯ
Bhikkhusaṅghe nisīditvā, imā gāthā abhāsatha.
๘๗.
87.
‘‘‘เยน ฉตฺตมิทํ ทินฺนํ, อลงฺกตํ มโนรมํ;
‘‘‘Yena chattamidaṃ dinnaṃ, alaṅkataṃ manoramaṃ;
เตน จิตฺตปฺปสาเทน, ทุคฺคติํ โส น คจฺฉติฯ
Tena cittappasādena, duggatiṃ so na gacchati.
๘๘.
88.
‘‘‘สตฺตกฺขตฺตุญฺจ เทเวสุ, เทวรชฺชํ กริสฺสติ;
‘‘‘Sattakkhattuñca devesu, devarajjaṃ karissati;
พาตฺติํสกฺขตฺตุญฺจ ราชา, จกฺกวตฺตี ภวิสฺสติฯ
Bāttiṃsakkhattuñca rājā, cakkavattī bhavissati.
๘๙.
89.
‘‘‘กปฺปสตสหสฺสมฺหิ, โอกฺกากกุลสมฺภโว;
‘‘‘Kappasatasahassamhi, okkākakulasambhavo;
โคตโม นาม โคเตฺตน, สตฺถา โลเก ภวิสฺสติฯ
Gotamo nāma gottena, satthā loke bhavissati.
๙๐.
90.
‘‘‘ตสฺส ธเมฺมสุ ทายาโท, โอรโส ธมฺมนิมฺมิโต;
‘‘‘Tassa dhammesu dāyādo, oraso dhammanimmito;
สพฺพาสเว ปริญฺญาย, นิพฺพายิสฺสตินาสโว’ฯ
Sabbāsave pariññāya, nibbāyissatināsavo’.
๙๑.
91.
‘‘พุทฺธสฺส คิรมญฺญาย, วาจาสภิมุทีริตํ;
‘‘Buddhassa giramaññāya, vācāsabhimudīritaṃ;
ปสนฺนจิโตฺต สุมโน, ภิโยฺย หาสํ ชเนสหํฯ
Pasannacitto sumano, bhiyyo hāsaṃ janesahaṃ.
๙๒.
92.
วิมานมุตฺตมํ มยฺหํ, อพฺภุคฺคตํ มโนรมํฯ
Vimānamuttamaṃ mayhaṃ, abbhuggataṃ manoramaṃ.
๙๓.
93.
‘‘วิมานา นิกฺขมนฺตสฺส, เสตจฺฉตฺตํ ธรียติ;
‘‘Vimānā nikkhamantassa, setacchattaṃ dharīyati;
ตทา สญฺญํ ปฎิลภิํ, ปุพฺพกมฺมสฺสิทํ ผลํฯ
Tadā saññaṃ paṭilabhiṃ, pubbakammassidaṃ phalaṃ.
๙๔.
94.
‘‘เทวโลกา จวิตฺวาน, มนุสฺสตฺตญฺจ อาคมิํ;
‘‘Devalokā cavitvāna, manussattañca āgamiṃ;
ฉตฺติํสกฺขตฺตุํ จกฺกวตฺตี, สตฺตกปฺปสตมฺหิโตฯ
Chattiṃsakkhattuṃ cakkavattī, sattakappasatamhito.
๙๕.
95.
สํสริตฺวานุปุเพฺพน, มานุสํ ปุนราคมิํฯ
Saṃsaritvānupubbena, mānusaṃ punarāgamiṃ.
๙๖.
96.
‘‘โอกฺกนฺตํ มาตุกุจฺฉิํ มํ, เสตฺตจฺฉตฺตํ อธารยุํ;
‘‘Okkantaṃ mātukucchiṃ maṃ, settacchattaṃ adhārayuṃ;
ชาติยา สตฺตวโสฺสหํ, ปพฺพชิํ อนคาริยํฯ
Jātiyā sattavassohaṃ, pabbajiṃ anagāriyaṃ.
๙๗.
97.
‘‘สุนโนฺท นาม นาเมน, พฺราหฺมโณ มนฺตปารคู;
‘‘Sunando nāma nāmena, brāhmaṇo mantapāragū;
ผลิกํ ฉตฺตมาทาย, สาวกคฺคสฺส โส ตทาฯ
Phalikaṃ chattamādāya, sāvakaggassa so tadā.
๙๘.
98.
‘‘อนุโมทิ มหาวีโร, สาริปุโตฺต มหากถี;
‘‘Anumodi mahāvīro, sāriputto mahākathī;
สุตฺวานุโมทนํ ตสฺส, ปุพฺพกมฺมมนุสฺสริํฯ
Sutvānumodanaṃ tassa, pubbakammamanussariṃ.
๙๙.
99.
‘‘อญฺชลิํ ปคฺคเหตฺวาน, สกํ จิตฺตํ ปสาทยิํ;
‘‘Añjaliṃ paggahetvāna, sakaṃ cittaṃ pasādayiṃ;
สริตฺวา ปุริมํ กมฺมํ, อรหตฺตมปาปุณิํฯ
Saritvā purimaṃ kammaṃ, arahattamapāpuṇiṃ.
๑๐๐.
100.
‘‘อุฎฺฐาย อาสนา ตมฺหา, สิเร กตฺวาน อญฺชลิํ;
‘‘Uṭṭhāya āsanā tamhā, sire katvāna añjaliṃ;
สมฺพุทฺธํ อภิวาเทตฺวา, อิมํ วาจํ อุทีริยิํฯ
Sambuddhaṃ abhivādetvā, imaṃ vācaṃ udīriyiṃ.
๑๐๑.
101.
‘‘สตสหสฺสิโต กเปฺป, พุโทฺธ โลเก อนุตฺตโร;
‘‘Satasahassito kappe, buddho loke anuttaro;
ปทุมุตฺตโร โลกวิทู, อาหุตีนํ ปฎิคฺคโหฯ
Padumuttaro lokavidū, āhutīnaṃ paṭiggaho.
๑๐๒.
102.
‘‘ตสฺส ฉตฺตํ มยา ทินฺนํ, วิจิตฺตํ สมลงฺกตํ;
‘‘Tassa chattaṃ mayā dinnaṃ, vicittaṃ samalaṅkataṃ;
อุโภ หเตฺถหิ ปคฺคณฺหิ, สยมฺภู อคฺคปุคฺคโลฯ
Ubho hatthehi paggaṇhi, sayambhū aggapuggalo.
๑๐๓.
103.
‘‘อโห พุโทฺธ อโห ธโมฺม, อโห โน สตฺถุสมฺปทา;
‘‘Aho buddho aho dhammo, aho no satthusampadā;
เอกจฺฉตฺตสฺส ทาเนน, ทุคฺคติํ นุปปชฺชหํฯ
Ekacchattassa dānena, duggatiṃ nupapajjahaṃ.
๑๐๔.
104.
‘‘กิเลสา ฌาปิตา มยฺหํ, ภวา สเพฺพ สมูหตา;
‘‘Kilesā jhāpitā mayhaṃ, bhavā sabbe samūhatā;
สพฺพาสเว ปริญฺญาย, วิหรามิ อนาสโวฯ
Sabbāsave pariññāya, viharāmi anāsavo.
๑๐๕.
105.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา สปริวารฉตฺตทายโก เถโร อิมา คาถาโย อภาสิตฺถาติฯ
Itthaṃ sudaṃ āyasmā saparivārachattadāyako thero imā gāthāyo abhāsitthāti.
สปริวารฉตฺตทายกเตฺถรสฺสาปทานํ ทสมํฯ
Saparivārachattadāyakattherassāpadānaṃ dasamaṃ.
อุมาปุปฺผิยวโคฺค เตตฺติํสติโมฯ
Umāpupphiyavaggo tettiṃsatimo.
ตสฺสุทฺทานํ –
Tassuddānaṃ –
อุมาปุปฺผญฺจ ปุลินํ, หาโส ยโญฺญ นิมิตฺตโก;
Umāpupphañca pulinaṃ, hāso yañño nimittako;
สํสาวโก นิคฺคุณฺฑี จ, สุมนํ ปุปฺผฉตฺตโก;
Saṃsāvako nigguṇḍī ca, sumanaṃ pupphachattako;
สปริวารฉโตฺต จ, คาถา สตฺตสตุตฺตราติฯ
Saparivārachatto ca, gāthā sattasatuttarāti.
Footnotes:
