| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. ஸபரிவாராஸனத்தே²ரஅபதா³னவண்ணனா
6. Saparivārāsanattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ ஸபரிவாராஸனத்தே²ரஸ்ஸ அபதா³னங். ஸோபி புரிமபு³த்³தே⁴ஸு கதாதி⁴காரோ தத்த² தத்த² ப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே விப⁴வஸம்பன்னே குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஜாதோ ஸாஸனே பஸன்னோ தா³னப²லங் ஸத்³த³ஹந்தோ நானக்³க³ரஸபோ⁴ஜனேன ப⁴க³வதோ பிண்ட³பாதங் அதா³ஸி, த³த்வா ச பன போ⁴ஜனஸாலாயங் போ⁴ஜனத்தா²ய நிஸின்னாஸனங் ஜாதிஸுமனமல்லிகாதீ³ஹி அலங்கரி. ப⁴க³வா ச ப⁴த்தானுமோத³னமகாஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ அனேகவித⁴ங் ஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே குலகே³ஹே நிப்³ப³த்தோ வுத்³தி⁴மன்வாய ஸத்³தோ⁴ பஸன்னோ பப்³ப³ஜித்வா ந சிரஸ்ஸேவ அரஹா அஹோஸி.
Padumuttarabuddhassātiādikaṃ āyasmato saparivārāsanattherassa apadānaṃ. Sopi purimabuddhesu katādhikāro tattha tattha bhavesu vivaṭṭūpanissayāni puññāni upacinanto padumuttarassa bhagavato kāle vibhavasampanne kulagehe nibbatto vuddhippatto saddhājāto sāsane pasanno dānaphalaṃ saddahanto nānaggarasabhojanena bhagavato piṇḍapātaṃ adāsi, datvā ca pana bhojanasālāyaṃ bhojanatthāya nisinnāsanaṃ jātisumanamallikādīhi alaṅkari. Bhagavā ca bhattānumodanamakāsi. So tena puññakammena devamanussesu saṃsaranto anekavidhaṃ sampattiṃ anubhavitvā imasmiṃ buddhuppāde vibhavasampanne kulagehe nibbatto vuddhimanvāya saddho pasanno pabbajitvā na cirasseva arahā ahosi.
43. ஸோ ஏவங் பத்தஸந்திபதோ³ ‘‘கேன நு கோ² புஞ்ஞேன இத³ங் ஸந்திபத³ங் அனுப்பத்த’’ந்தி ஞாணேன உபதா⁴ரெந்தோ புப்³ப³கம்மங் தி³ஸ்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. தங் வுத்தத்த²மேவ. பிண்ட³பாதங் அதா³ஸஹந்தி தத்த² தத்த² லத்³தா⁴னங் பிண்டா³னங் கப³ளங் கப³ளங் கத்வா பாதப்³ப³தோ கா²தி³தப்³ப³தோ ஆஹாரோ பிண்ட³பாதோ, தங் பிண்ட³பாதங் ப⁴க³வதோ அதா³ஸிங், ப⁴க³வந்தங் போ⁴ஜேஸிந்தி அத்தோ².
43. So evaṃ pattasantipado ‘‘kena nu kho puññena idaṃ santipadaṃ anuppatta’’nti ñāṇena upadhārento pubbakammaṃ disvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Piṇḍapātaṃ adāsahanti tattha tattha laddhānaṃ piṇḍānaṃ kabaḷaṃ kabaḷaṃ katvā pātabbato khāditabbato āhāro piṇḍapāto, taṃ piṇḍapātaṃ bhagavato adāsiṃ, bhagavantaṃ bhojesinti attho.
44. அகித்தயி பிண்ட³பாதந்தி மயா தி³ன்னபிண்ட³பாதஸ்ஸ கு³ணங் ஆனிஸங்ஸங் பகாஸேஸீதி அத்தோ².
44.Akittayipiṇḍapātanti mayā dinnapiṇḍapātassa guṇaṃ ānisaṃsaṃ pakāsesīti attho.
48. ஸங்வுதோ பாதிமொக்க²ஸ்மிந்தி பாதிமொக்க²ஸங்வரஸீலேன ஸங்வுதோ பிஹிதோ படிச்ச²ன்னோதி அத்தோ². இந்த்³ரியேஸு ச பஞ்சஸூதி சக்கு²ந்த்³ரியாதீ³ஸு பஞ்சஸு இந்த்³ரியேஸு ரூபாதீ³ஹி கோ³பிதோ இந்த்³ரியஸங்வரஸீலஞ்ச கோ³பிதோதி அத்தோ². ஸேஸங் ஸுவிஞ்ஞெய்யமேவாதி.
48.Saṃvuto pātimokkhasminti pātimokkhasaṃvarasīlena saṃvuto pihito paṭicchannoti attho. Indriyesu ca pañcasūti cakkhundriyādīsu pañcasu indriyesu rūpādīhi gopito indriyasaṃvarasīlañca gopitoti attho. Sesaṃ suviññeyyamevāti.
ஸபரிவாராஸனத்தே²ரஅபதா³னவண்ணனா ஸமத்தா.
Saparivārāsanattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. ஸபரிவாராஸனத்தே²ரஅபதா³னங் • 6. Saparivārāsanattheraapadānaṃ
